“Kōm̧m̧ani kālet ko reim̧we,” N̄an Kōkajoorļo̧k Jodikdik ro: Juon Tōl n̄an Kōm̧m̧ani Kālet ko (2022)
“Kōm̧m̧ani kālet ko reim̧we,” N̄an Kōkajoorļo̧k Jodikdik ro
Kōm̧m̧ani kālet ko reim̧we
Ilo N̄an Kōkajoorļo̧k Jodikdik ro, kwonaaj loe katakin ko an Jisōs Kraist im rikanaan ro An. Ippān m̧ool kein āinwōt am̧ kein tōl, kwomaron̄ kōm̧m̧ani kālet ko reim̧we me renaaj kōjeram̧m̧an kwe kiiō im indeeo.
Jisōs Kraist ej iaļ eo n̄an m̧ōņōņō indeeo. Ilo am̧ kōjerbale anemkwoj eo am̧ n̄an ļoore Jisōs Kraist, kwoj pād ilo iaļ eo ej tōl n̄an m̧ōņōņō indeeo. Kōm̧m̧an bwe Jisōs Kraist en am̧ waanjon̄o̧k, am̧ pedped in dekā eo epen. Kalōk mour eo am̧ ilo katak ko An, im jon̄e kālet ko am̧ kaki. Bujen ko kwoj kōm̧m̧ane ilo iien peptaij, ilo iien kwojkwoj eo, im ilo tampeļ rej dekā in ekkal ko an pedped eo am̧ epen ilo Kraist. Kwonaaj baj wōt jelm̧ae apan̄ ko im kapo ko, ak Jemedwōj Ilan̄ im Rilo̧mo̧o̧r renaaj jipan̄ kwe ilo aolepeer.
Kwoj juon jetōb nejin Anij ejitōnbōro. Karōk in m̧ōņōņō eo An eļap ej kōm̧m̧an maron̄ n̄an kwe n̄an eddōkļo̧k ilo jetōb im kōlapļo̧k un eo am̧ ekwojarjar. En̄in ej unin An kar jilkintok Jisōs Kraist bwe en am̧ Rilo̧mo̧o̧r.
Jem̧ōm ilo Lan̄ ej lōke kwe. Em̧ōj an lewaj n̄an eok eļap kōjeram̧m̧an, ekoba tarlep in gospel eo im kain̄i im bujen ko rekwojarjar eo ej kapen kwe n̄an E im boktok kajoor eo An n̄an mour eo am̧. Kōn kōjeram̧m̧an kani ej koba tok eddo ko. E ejeļā ke kwomaron̄ kōm̧m̧ane juon oktak ilo laļ in, menin aikuj, ilo elōn̄ wāween ko, oktak jān laļ in. Kappukōt tōl eo an Jemedwōj Ilan̄ ilo am̧ kōm̧m̧ani kālet ko. Enaaj kōjeram̧m̧an kwe kōn im̧we kōn Jetōb Kwojarjar.
Un eo an N̄an Kōkajoorļo̧k Jodikdik ro ejjab n̄an lewaj n̄an kwe juon “aaet” ak “jaab” kōn aolep kālet ko kwomaron̄ jelm̧ae. Ijjeļo̧kin, Irooj ej karuwaineneik kwe n̄an mour ilo juon wāween eo euteijļo̧k im ekwojarjar ļo̧k—wāween eo An. Tōl in enaaj jipan̄ kwe kōn wāween eo An. Ej kōmeļeļeik m̧ool ko em̧ōj An kwaļo̧ki. Kōm̧m̧an bwe m̧ool kein ren am̧ unin tōl n̄an kōm̧m̧ani kālet ko—kālet ko reļļap, āinwōt kōm̧m̧ane bujen ko ilo tampeļ im jerbale juon mijen, barāinwōt kālet ko aolep raan, āinwōt wāween kōm̧m̧an n̄an armej im wāween am̧ kōjerbale iien ko am̧.
Ilo an ro jet jipan̄ kwe, eddōkļo̧k eo am̧ ilo jetōb ej am̧ make. Ej kōtaan kwe im Irooj. Ejeļā buruom̧, im E wōt emaron̄ Riekajet eo em̧m̧antata. Kajjeon jon̄an wōt am̧ maron̄ n̄an em̧m̧anļo̧k kajjojo raan, kōjparok kien ko an Anij im kauteij bujen ko am̧, im jipan̄ ro jet epaakeļo̧k Rilo̧mo̧o̧r.
Lale Mosaia 4:29–30 (wāween ko n̄an jero̧wiwi ejeļo̧k bōnbōn i er, jej aikuj lale kōj make); Hilamōn 5:12 (kalōk pedped eo am̧ ilo Kraist); Katak im Bujen 45:57 (bōke Jetōb Kwojarjar bwe en am̧ tōl); 82:15 (kobaik kwe make n̄an Irooj ilo bujen ko).
Elmen an kein tōl in ejaak
Kajjojo unin kōnono ewōr jilu m̧ōttan ko ie:
-
M̧ool ko n̄an indeeo, ak katak ko an jepļaaktok eo an gospel eo an Jisōs Kraist
-
Karuwainene n̄an mour kōn m̧ool ko
-
Kōjeraam̧m̧an ko kar kallim̧ur kaki me Irooj ej leļo̧k n̄an ro rej mour kōn katak ko An.