“Etetal ilo Meram an Anij,” N̄an Kōkajoorļo̧k Jodikdik ro: Juon Tōl n̄an Kōm̧m̧ani Kālet ko (2022)
“Etetal ilo Meram an Anij,” N̄an Kōkajoorļo̧k Jodikdik ro
Etetal ilo Meram an Anij
Galetia 5:25.
Kwōj kōm̧m̧an kālet ko rem̧m̧anļo̧k eļan̄n̄e alikkar am̧ loe men ko. Unin an aorōk meram: meram ekōm̧m̧an bwe en pidodo n̄an loe iaļ eo ejim̧we. Jemedwōj Ilan̄ ekar lewaj n̄an kwe maron̄ eo n̄an bōk meram jān lan̄—menin letok eo an Jetōb Kwojarjar—n̄an jipan̄ eok alikkar am̧ loe ta eo em̧m̧an im nana, ejim̧we im ebōd.
M̧ool ko indeeo
Ilo iien peptaij kwoj deļo̧n̄e juon jemjerā in bujen elem̧ōņōņō ippān Jemedwōj Ilan̄ im Jisōs Kraist. Ilo tampeļ, kwonaaj kōm̧m̧ane bujen ko jet me emaron̄ kōkajoorļo̧k jemjera eo. Kajjojo wiik ilo iien kwojkwoj eo, kwoj kōkāāl bujen ko am̧. Kwoj kwaļo̧k am̧ kōņaan n̄an kōjparok kien ko, im Irooj ej kōjeraam̧m̧an kwe kōn iien em̧m̧an n̄an bōk Jetōb Kwojarjar āinwōt juon mōttam̧ iien otemjej. Ej juon iaan kōjeraam̧m̧an ko An reļļap n̄an kwe.
Kōm̧m̧ani kālet ko rem̧m̧an ekōm̧m̧an bwe maron̄ eo am̧ n̄an en̄jake Jetōb en em̧m̧anļo̧k. Elōn̄ men ko rem̧m̧an im wōr tokjeer ilo laļ in. Āinwōt an ānbwinūm̧ jelet ta eo kwoj m̧ōn̄ā im daak, kōļmenļo̧kjen eo am̧ im jetōb rej jelet ta eo kwoj riiti, alooje, im ron̄jake.
Kūr ko
Kōm̧m̧an iien n̄an Irooj aolep raan. Katak kōn E. Keememej E iien otemjelok. Jar n̄an Jem̧ōm̧ Ilan̄. Ekkatak jeje ko rekwojarjar im naan ko an rikanaan ro remour. Innām mour kōn ta eo kwoj ekkatak.
Pukōt ta enaaj kōketak, im̧we, im karuwainene Jetōb. Ilo am̧ kōm̧m̧ane kālet ko kōn ta eo kwoj alwoje, riiti, ron̄jake, ak bōk koņaam ilo, ļōmņak kōn ewi wāween am̧ en̄jake. Ej ke karuwaineneik tok ļōmņak ko rem̧m̧an? Pād ettoļo̧k jān jabdewōt men ko rej kōm̧m̧an kōjak kōn men ko rekwojarjar ak ejjab erreo. Jab bōk koņaam ilo men ko kadikļo̧k ekajet eo am̧ ak ejekkar n̄an Jetōb, āinwōt joreen, dren in kadōk, ak uno ko rekajoor rekauwōtata. Kwon peran n̄an kune juon pijaan alwoj ak ikkure, elļo̧k jān juon pijaan alwoj ak tuuj, ukōte al eo am̧, ak kune jabdewōt men ko rej jab juon wōt ippān Jetōb.
Kōjerbale social media n̄an kōketak Social media emaron̄ juon kein jerbal ekajoor n̄an ekōnono. N̄e kwoj kōjerbale, pādpād ioon meram, tōmak, im m̧ool. Jab keid mour eo am̧ n̄an ta ko ro jet rej en̄jake. Keememej bwe tokjem ej itok jān juon ajri eo nejin ro Jinōm̧ im Jem̧ōm̧ Ilan̄, ejjab jān social media.
Pukōt en̄jake ko ewōr tokjeer im jemerā ko rem̧ool im aitok. Kwon kōjparok bwe am̧ kōjerbal iaļan iiaio im media ren jab bōbrae ami joļo̧k iien ko ami ippān baamļe im ro m̧ōttam̧. Social media im iaļan iiaio ko jet emaron̄ bōk eļap iien ko am̧ ilo an jab korool lewaj men ko raorōk reļļap. Kakkije jān laļ eo an online, im iiaio ippān armej ilo m̧oolin.
Kōjeraam̧m̧an ko kar kallim̧ur kaki
Emaron̄ pād Jetōb ippam̧ iien otemjej. Jetōb Kwojarjar enaaj kam̧ool n̄an kwe kōn Jemedwōj Ilan̄ im Jisōs Kraist. Enaaj kaenōm̧m̧an, tōl, kakkōl, im kōjeraam̧m̧an kwe. Enaaj jipan̄ kwe kile m̧ool im loe em̧m̧an eo an laļ in.
Kajjitōk ko im uwaak ko
Elmen aō jeļā n̄e ij en̄jake Jetōb Kwojarjar? Ekkatak n̄an kile Jetōb ebōk iien, kōmālmel, im kijenmej. E ej kōnono n̄an kajjojo armej ilo wāween ko reoktak. Jab pere men ko reļam waan—en̄jake in aeņōm̧m̧an kwoj ron̄ jān naan in kam̧ool eo an juon armej ak en̄jake eo ejjab jim̧we kwoj bōke ālkin am̧ kōm̧m̧an juon kālet ebōd. Kappukōt ilo jeje ko rekwojarjar kōn wāween ko reoktak Jetōb ej kōnono, jar kake, im laleļo̧k iien ko rem̧m̧an n̄an en̄jake Jetōb.
Ta in pija ko renana? Etke ij aikuj bōbrae jene? Pija nana ej bōk jikin, ilo pija ko ak naan ko, eo kar kōm̧m̧ane n̄an karūj en̄jake ko ilo m̧ōm̧ in kanniōk. Pija nana ej itok ilo bujin kain wāween ko, ekoba pijaan alwōj, bok, im kōjan̄jan̄. Emaron̄ barāinwōt ennaan ko im pija ko jilkinļo̧k ikōņaan ro rej m̧ōtta. Pija nana ej kōm̧m̧an bwe men ko rekwojarjar—ānbwinid im en̄jake ko kanniōk—ren jab juon men in kauteij. Kwomaron̄ jidiļo̧k am̧ loe pija ko renana. Men̄e ekar jidiļo̧k am̧ loe pija ko renana ak jaab, kajju etal jāni. Kwomaron̄ barāinwōt kōnono ippān juon m̧am̧a ak baba ak juon ritto kwoj lōke. Alwōj pija nana ilo kar kōņaan ej jerawiwi im ej ko̧kkure maron̄ eo am̧ n̄an en̄jake Jetōb. Ej kam̧ōjņo̧ik maron̄ eo am̧ n̄an kōjebwebweik eok make im kajoreen wāween am̧ loe kwe make im ro jet. Jisōs Kraist ewōr an kajoor n̄an jipan̄ kwe anjo̧ jān pija ko renana im ukweļo̧k. Jitlo̧k n̄an E; eļļok jān marok. Bisop eo am̧ emaron̄ jipan̄ kwe bōk kajoor im jeorļo̧k bōd kōn Rilo̧mo̧o̧r.
Lale Amos 5:14 (kapukōt em̧m̧an); Galetia 5:22–23 (leen ko an Jetōb); Moronai 7:18–19 (meram an Kraist); Katak im Bujen ko 6:23 (Irooj ej kōnono kōn aeņōm̧m̧an); 20:77, 79 (jar in kwojkwoj).
Kajjitōk ko ikkijeen pepa in mālim in deļo̧n̄e tampeļ
Irooj ekar ba bwe men otemjej rej aikuj “kōm̧m̧an ilo erreo” Im̧aan Mejān (Katak im Bujen Ko 42:41). Kwoj kajjieon̄ in erreo ilo m̧wil ilo ļōmņak im m̧antim̧? Kwoj ke pokake kien erreo?
Kwoj ke kajjieon̄ kōjparok ekwojarjar eo an raan in Jabōt, jim̧or ilo m̧weo im ilo m̧ōnjar eo; pād ilo kweilo̧k ko am̧, m̧aanjabpopo n̄an im bōk m̧ōttan kwojkwoj eo ilo erreo; im mour ilo ineem̧m̧an kōn kakien ko im kien ko an gospel eo?