“Ānbwinūm̧ ekwojarjar,” N̄an Kōkajoorļo̧k Jodikdik ro: Juon Tōl n̄an Kōm̧m̧ani Kālet ko (2022)
“Ānbwinūm̧ ekwojarjar,” N̄an Kōkajoorļo̧k Jodikdik ro
Ānbwinūm̧ ekwojarjar
1 Korint 6:18–20
Ānbwinūm̧ ej juon menin letok aiboojoj jān Jemedwōj Ilan̄. E ekar lewaj n̄an kwe n̄an jipan̄ kwe erom̧ āinwōt E. Ānbwinūm̧ ej lewaj n̄an eok juon kajoor eļap n̄an kōjerbal anemkwōj n̄an kālet eo am̧. Jepļaaktok eo an gospel eo an Jisōs Kraist emaron̄ jipan̄ kwe loe ānbwinūm̧ ilo wāween eo Anij ej loe. Im menin ekōm̧m̧an juon oktak eļap ilo kālet ko am̧ kōn ta eo kwoj aikuj kōm̧m̧ane kōn anbwinūm̧ im wāween kōjparoke.
M̧ool ko indeeo
Ānbwinūm̧ ej nememein Anij—aiboojoj tata, Armej eo euteij tata ilo aolepen laļ in. Jeje ko rekwojarjar rej keidi ānbwinid n̄an juon tampeļ ekwojarjar, juon jikin Jetōb emaron̄ jokwe ie. Aaet, ānbwinūm̧ ejjab wāppen kiiō. Ak en̄jake ko kwoj iooni ilo āinbwinum̧ emaron̄ jipan̄ kwe kōppopo n̄an bōke juon raan juon ānbwin ejejjōt, em̧ōj an jerkakpeje, im eaiboojoj.
Am̧ ej kōm̧m̧an jān ānbwinūm̧ im jetōb eo am̧. Kōn un in, ājmour ilo ānbwin im ājmour ilo jetōb rej ekkeijel wōt ippān doon. Rilo̧mo̧o̧r ekar kwaļo̧k Naan in Mālōtlōt n̄an katakin katak ko kōn kea kake anbwinūm̧—im n̄an kallim̧ur kōjeram̧m̧an ko an ānbwin im jetōb.
En̄jake ko an mōm̧ an kanniōk ej m̧ōttan eo aorōk ilo karōk eo an Anij n̄an ejaake m̧are ko relem̧ōņōņō im baam̧le ko n̄an indeeo. En̄jake kein rej jab jerawiwi—rej ekwojarjar. Kōnke en̄jake ko an mōm̧ an kanniōk relukkuun ekwojarjar im lukkuun kajoor, Anij em̧ōj an lewaj n̄an eok kien eo An kōn mour erreo n̄an kōppopo n̄an kōjerbale en̄jake kein ekkar n̄an ta eo E ej karōke. Kien erreo ej ba bwe Anij ej kōmālim m̧akūtkūt ko an kanniōk ikōtaan wōt juon em̧m̧aan im juon kōrā em̧ōj aer m̧are. Elōn̄ ilo la ļin rej kaarmejet ak kōm̧m̧an kōjak kōn kien in an Anij, ak Irooj ej karuwainene kōj n̄an erom̧ rikaļoor ro An im mour kōn m̧wil eo euteijļo̧k jān eo an laļ in.
Kūr ko
Kōm̧man n̄an ānbwinūm̧—im ānbwinin ro jet—ilo kauteij Ilo am̧ kōm̧m̧an kālet ko kōn nuknuk, wāween kōm̧m̧ane bōram, paaktokim, kajjitōk ippam make, “N̄aij ke kauteij ānbwinū āinwōt juon menin letok eo ekwojarjar jān Anij?” Jemedwōj Ilan̄ ekōņaan bwe jān kalimjōk doon kōn lukkuun wōn kōj: ejjab ilo ānbwin wōt ak āinwōt ajri ro Nejin rejitōn bōro kōn juon kōttōpar ekwojarjar. Bōbrae jān style ko rej kwaļo̧k ak kōm̧m̧an ļōmņak ak erreiļo̧k ko rejjab ekkar n̄an ānbwinūm̧ ijeļo̧kin kōn lukkuun wōn kwe āinwōt juon nejin Anij kōn juon ilju im jakļaj eo indeeo. Kōtļo̧k bwe mour erreo im iakwe n̄an Anij ej tōl kālet ko am̧. Kapukōt naan in kapilōk jān mama im baba eo am̧.
Kōm̧m̧ani men ko renaaj kōkajoor anbwinūm̧—ejjab men ko renaaj kōmetak ak ko̧kkure. M̧ōņōņō kōn kam̧oolol kōn elōn̄ men ko rem̧m̧an Anij ekar letok. Ak keememej bwe dren in kadōk, jikka, kōpe, tii, im uno ko jet rekajoor im rej jab ekkar n̄an ānbwinūm̧ ak jetōb eo am̧. Em̧ool barāinwōt uno ko jet n̄an jipan̄, āinwōt uno ko elletok in taktō, emaron̄ ko̧kkure eļan̄n̄e ejjab jerbal ilo jim̧we.
Kōm̧man bwe kiki ippān doon im en̄jake ko an kanniōk ren ekwojarjar. Rejjab aikuj kein kōnono ko n̄an kōm̧m̧an kōjak ak kein kaloojoj. Pād ko itulikin m̧arre ikōtaan juon em̧m̧aan im juon kōrā, ejjab jim̧we n̄an jibwe ijoko rettiņo im ekwojarjar ilo ānbwinin juon armej men̄e ej nuknuk. Ilo kālet eo am̧ kōn ta eo kwōj kōm̧m̧ane, lale, riiti, ron̄jake, ļōmņak kake, likūt ilo mejatoto, ak jeje, bōbare jabdewōt men ko ewōr kōttōpar ie n̄an karūj ļōmņak in ļōn̄ ko ilo jet ak ilo kwe make. Menin ekoba pija nana ko ilo jabdewōt wāween. N̄e kwoj loe bwe wāween eo ak m̧akūtkūt eo ekōm̧m̧an kapo ko rekajoorļo̧k, etal jāni. Kwojeļā ta wāween ko im m̧akūtkūt ko. N̄e kwoj jāb lukkuun jeļā, Jetōb eo, m̧am̧a im baba ro am̧, ritōļ ro am̧ remaron̄ jipan̄ kwe jeļā. Kwaļo̧k n̄an Jemed Ilan̄ ke kwoj kaorōk im kautiej kajoor eo ekwojarjar n̄an ejaak mour.
Kōjeraam̧m̧an ko kar kallim̧ur kaki.
Kautiej n̄an kwe make im ro jet enaaj lapļo̧k ilo am̧ kauteij ānbwinūm̧ ilo m̧wilim, paaktokim, im nuknuk.
Irooj ekar kallim̧ur kōn jeram̧m̧an ko an jeļāļo̧kjen eļap n̄an ro rej kōjparok Naan in Malōtlōt. Juon ānbwin eo ewāmourur, ejeļo̧k anūrlep, ej barāinwōt kōlapļo̧k maron̄ eo am̧ n̄an bōk revelesōn ko am̧ make, lōmņak eo ealikkar, im jerbal n̄an Irooj.
Mour kōn kien erreo ej boktok errā eo an Anij im kajoor in jetōb an make. N̄e em̧ōj am̧ m̧are, kien in enaaj boktok eļapļo̧k iakwe, lōke, im ippān doon ilo m̧are eo am̧. Pokake kien in enaaj kōm̧m̧an bwe kwon wōnm̧aanļo̧k n̄an indeeo im erom̧ āinwōt Jemedwōj Ilan̄. Lōke eo am̧ enaaj eddōkļo̧k ilo am̧ mour āinwōt rikaļoor an Jisōs Kraist.
Kajjitōk ko im uwaak ko
Ta katak eo an Irooj kōn nuknuk, erreo, eo̧ ko, im dede ko? Katak eo an Irooj ej n̄an kwe n̄an kautiej kwojarjar eo n̄an anbwinūm̧, men̄e ej meļeļein bwe kwo oktak jān laļ in. Kōtļo̧k bwe m̧ool in im Jetōb ren am̧ tōl ilo am̧ kōm̧m̧ani kālet ko—eļaptata kālet ko me renaaj jelōt ānbwinūm̧ ilo juon iien aitok kitien. Kwon mālōtlōt im tiljek, kappukōt kapilōk jān m̧am̧a im baba eo am̧ im ritōl ro am̧.
Elmen aō jelm̧ae kapo im imminene ko renana? Jemedwōj Ilan̄ im Jisōs Kraist ewōr aer kajoor n̄an jipan̄ kwe. Kobrak mour eo am̧ kōn men ko rej karuwainene kajoor n̄an mour eo am̧, āinwōt jar, ekkatak jeje ko rekwojarjar, im jerbal n̄an ro jet. Reiļo̧k n̄an Jisōs Kraist im gospel eo An im kwonaaj loe bwe m̧ōjņo̧ ko remaron̄ erom̧ kajoor. Kappukōt jipan̄ jān ro jinōm̧ im jem̧ōm̧, ritōl ro, im ko̧o̧njeļōr ro ritijem̧ļo̧k n̄e emenin aikuji. N̄an ro rej en̄taan kōn an̄ūrlep, Kabun̄ in ej letok būrokuraam̧ ko rej jipan̄ kōn an̄ūrlep ko. Kōjeraam̧m̧an ko kein Kabun̄ eo an Rilo̧mo̧o̧r ej letok n̄an jipan̄ eok bar bōk maron̄ eo n̄an kōjebwebweik mour eo am̧. Enaaj bōk iien, kōn menin kijenmej, im jab ebweer.
Ewōr aō kōņaan ippān bar juon armej āinwōt n̄a (leddik n̄an leddik ak laddik n̄an laddik). Ewi wāween an jon̄o̧k kein iooktok n̄a? En̄jake eo kōn kōņaan leddik n̄an leddik ak ļaddik n̄an ļaddik ejjab jerawiwi. N̄e ewōr am̧ en̄jake kein im kwoj jab kōm̧m̧ani ak mour kaki, kwoj mour kōn kien erreo eo ekwojarjar an Jemedwōj Ilan̄. Kwoj juon nejin Anij ejitōn bōro im juon rikaļoor an Jisōs Kraist. Keememej bwe Rilo̧mo̧o̧r emeļeļe aolep men kwoj en̄jake. Ilo koneekjen in bujen eo am̧ Ippān, kwonaaj kappukōt kajoor n̄an pokake kien ko an Anij im bōk kōjeraam̧m̧an ko E kar kallim̧uri. Lōke E im gospel eo An.
Kar kakkure n̄a, im ijook. Ij ke jerawiwi? Juon eo kar ko̧kkure ak kajoreene kōn m̧ōm̧ ko kanniōk ejjab kōm̧m̧an bwe en lōn̄ ruōm̧ ak kwon jerawiwi. Jouj jab en̄jake ke elōn̄ ruōm ak jook. Rilo̧mo̧o̧r ej iakwe eok. Ekōņaan jipan̄ eok, kōmour eok, im lewaj aenōm̧m̧an. Ko̧o̧njeļōr ro retijem̧ļo̧k, ro uwaan baam̧le eo am̧, im ritōl ro am̧ remaron̄ barāinwōt jipan̄ kwe.
Lale Jenesis 1:27 (jej kōm̧m̧an ilo lememein Anij); Jon 14:18 (Rilo̧mo̧o̧r ej kallimur kōn aeņōm̧m̧an); Pailimon 4:7 (aeņōm̧m̧an ilo Anij ej letok meļeļe); Katak im Bujen ko 88:15 (jetōb im anbwin rej ejaak eo an juon armej); 89 (Naan in mālōtlōt); 121:45 (lōmņak ko rerreo rej tōl n̄an eļapļo̧k lōke).
Kajjitōk ko ikkijeen pepa in mālim in deļo̧n̄e tampeļ
Irooj ekar ba bwe men otemjej rej aikuj “kōm̧m̧an ilo erreo” Im̧aan Mejān (Katak im Bujen Ko 42:41). Kwoj kajjieon̄ in erreo ilo m̧wil in ļōmņak im m̧antim̧? Kwoj ke pokake kien erreo?
Kwoj ke meļeļe im pokake Naan in Mālōtlōt?