1 Dungga ninyo, O mga elder sang akon simbahan, kag magpamati sa akon mga pulong, kag hibaloa sa akon kon ano ang akon pagbuot parte sa inyo, kag amo man parte sining duta nga sa diin ginpadala ko kamo.

2 Kay sa pagkamatuod ginasiling ko sa inyo, bulahan sia nga nagatuman sang akon mga kasugoan, sa kabuhi man ukon sa kamatayon; kag sia nga tampad sa pihak sang mga pag-antos, ang iya padya mas dako sa ginharian sang langit.

3 Sa sini nga tion, indi ninyo makita sa inyo tawhanon nga mga mata ang plano sang inyo Dios parte sining mga magaabot sa palaabuton, kag ang himaya nga magasunod pagkatapos sing madamo nga pag-antos.

4 Kay pagkatapos sing madamo nga pag-antos magaabot ang mga bugay. Gani, magaabot ang adlaw nga pagakoronahan kamo sing dako nga himaya; ang oras wala pa, apang malapit na.

5 Dumduma ining ginhambal ko sa inyo sadto agud nga mahuptan ninyo ini sa inyo tagipusuon kag mabaton inang magasunod.

6 Tan-awa, sa pagkamatuod ginasiling ko sa inyo, ginpadala ko kamo sa sini nga rason—agud nga mangin matinumanon kamo, kag agud mangin handa ang inyo mga tagipusuon sa pagpamatuod sang mga butang nga magaabot;

7 Kag amo man agud nga mapasidunggan kamo sa pag-organisar sang Sion, kag sa pagpamatuod parte sa duta sa diin magatindog ang Sion sang Dios;

8 Kag amo man agud mahimo nga ihanda ang isa ka piyesta sang manamit nga pagkaon para sa mga imol; huo, isa ka piyesta sang manamit nga pagkaon kag sang maayo nga alak agud nga makahibalo ang kalibutan nga indi mapaslawan ang mga baba sang mga propeta;

9 Huo, isa ka panihapon sa balay sang Ginuo nga ginhanda sing maayo sa diin pagaagdahon ang tanan nga nasyon.

10 Una, ang mga manggaranon kag mga may tinun-an, ang mga maalam kag ang mga dungganon;

11 Kag pagkatapos sina magaabot ang adlaw sang akon gahum; dayon magatambong ang mga imol, mga piang, kag mga bungol sa kasal sang Kordero, kag magaambit sang panihapon sang Ginuo nga ginhanda para sa dako nga adlaw nga magaabot.

12 Tan-awa, ako, nga Ginuo, naghambal sini.

13 Kag agud nga magasulong ang testimonya halin sa Sion, huo, halin sa baba sang siyudad nga panublion sa Dios—

14 Huo, kay sa sini nga rason ginpadala ko kamo diri, kag ginpili ang akon alagad nga si Edward Partridge, kag ginhatag sa iya ang iya buluhaton sa sini nga duta.

15 Apang kon indi sia maghinulsol sang iya mga sala nga amo ang pagkawala’y pagtuo kag kabulag sang tagipusuon, paandaman sia agud indi sia makasala.

16 Tan-awa, ginhatag ang iya buluhaton sa iya, kag indi na ini pag-ihatag pa liwat.

17 Kag kon sin-o man ang ginhatagan sining buluhaton ginpili nga mangin isa ka hukom sa Israel, pareho sadto sang una nga panahon, sa pagpartida sang mga duta nga panublion halin sa Dios para sa iya mga anak;

18 Kag sa paghukom sang iya katawhan paagi sa testimonya sang mga matarong, kag paagi sa bulig sang iya mga manuglaygay suno sa mga layi sang ginharian nga ginhatag sang mga propeta sang Dios.

19 Kay sa pagkamatuod ginasiling ko sa inyo, dapat tumanon ang akon layi sa sining duta.

20 Indi dapat maghunahuna ang bisan sin-o nga isa sia ka tagdumala; apang padumalaha ang Dios sa iya nga nagahukom suno sa laygay sang iya kaugalingon nga pagbuot, ukon sa iban nga pulong, sia nga nagalaygay ukon nagapungko sa hukmanan.

21 Indi dapat maglapas ang bisan sin-o sang mga layi sang duta kay sia nga nagatuman sang mga layi sang Dios wala sang rason nga maglapas sang mga layi sang duta.

22 Gani, magpaidalom sa mga awtoridad nga nagadumala tubtob nga magahari sia nga iya kinamatarong ang maghari, kag magatasak sang tanan nga kaaway sa idalom sang iya mga tiil.

23 Tan-awa, ang nabaton ninyo nga mga layi halin sa akon kamot mga layi sang simbahan, kag suno sa sini dapat huptan ninyo ang mga ini. Tan-awa, yari ang kaalam.

24 Kag karon, suno sang ginhambal ko parte sa akon alagad nga si Edward Partridge, ining duta amo ang pagapuy-an niya nga duta, kag sang ginpili niya nga iya mga manuglaygay; kag amo man ang pagapuy-an nga duta sang akon ginpili nga magdumala sang akon balay-talagoan;

25 Gani, padal-a sila sang ila mga panimalay sa sini nga duta suno sa ila paghinambalanay sa ila mga kaugalingon kag sa akon.

26 Kay tan-awa, indi nagakabagay nga magsugo ako sa tanan nga butang; kay sia nga ginapilit sa tanan nga butang isa ka matamad kag indi maalam nga alagad; gani, wala sia sing may mabaton nga padya.

27 Sa pagkamatuod ginasiling ko, dapat mangin mapisan ang mga tawo sa pagpakigbahin sa maayo nga kawsa, kag maghimo sing madamo nga butang paagi sa ila kaugalingon nga pagbuot, kag magpahanabo sing madamo nga pagkamatarong;

28 Kay ang gahum yara sa ila sa diin may ikasarang sila nga mangin hilway sa pagpili. Kag kon nagahimo ang mga tawo sang maayo, indi nila madula ang ila padya.

29 Apang sia nga wala sing may ginahimo kon indi sia pagsuguon, kag nagabaton sang kasugoan nga may pagpangduhaduha sa tagipusuon, kag nagatuman sini nga may katamad, ang amo man pagasilotan.

30 Sin-o bala ako nga naghimo sang tawo, siling sang Ginuo, nga magakabig sa iya nga wala’y sala kon wala sia nagatuman sang akon mga kasugoan?

31 Sin-o bala ako, siling sang Ginuo, nga nagpromisa kag wala nagtuman?

32 Nagasugo ako kag wala nagatuman ang mga tawo; ginabawi ko ang kasugoan kag indi sila makabaton sang pagpakamaayo.

33 Dayon nagasiling sila sa ila mga tagipusuon: Indi ini buluhaton sang Ginuo kay wala natuman ang iya mga promisa. Apang kalisud sa mga ini kay nagahulat ang ila padya halin sa idalom kag indi halin sa ibabaw.

34 Kag karon ginahatag ko sa inyo ang dugang nga mga direksyon parte sining duta.

35 Kinaalam para sa akon nga ang akon alagad nga si Martin Harris mangin ehemplo sa simbahan sa paghatag sang iya kwarta sa obispo sang simbahan.

36 Kag amo man, layi ini sa tagsa ka tawo nga nagakari sa sining duta agud magbaton sang panublion; kag himuon niya sa iya kwarta ang suno sa ginasugo sang layi.

37 Kag kaalam man nga dapat magbakal sang mga duta sa Independence para sa lugar sang balay-talagoan, kag amo man para sa balay-pang-imprinta.

38 Kag iban pa gid nga mga direksyon parte sa akon alagad nga si Martin Harris ang ihatag sa iya sang Espiritu agud nga mabaton niya ang iya panublion suno sa nagakaigo para sa iya;

39 Kag pahinulsola sia sang iya mga sala kay ginahandum niya ang pagdayaw sang kalibutan.

40 Kag ipatuman man sa akon alagad nga si William W. Phelps ang iya palangakoan sa diin ginpili ko sia, kag ipabaton sa iya ang iya panublion sa duta;

41 Kag kinahanglan man niya maghinulsol kay ako, nga Ginuo, wala nahamuot sa iya kay nagatinguha sia nga mangin labaw sa iban nga tawo, kag indi sia tuman nga malulo sa akon atubang.

42 Tan-awa, sia nga naghinulsol sang iya mga sala, ang amo man ginapatawad, kag ako, nga Ginuo, wala na nagadumdum sang ila mga sala.

43 Paagi sini mahibaloan ninyo kon nagahinulsol ang tawo sang iya mga sala—tan-awa, ikumpisar niya ang mga ini kag talikdan ang mga ini.

44 Kag karon, sa pagkamatuod, ginasiling ko parte sa nabilin nga mga elder sang akon simbahan, wala pa nag-abot ang tion kag ini sa madamo pa nga mga tinuig agud nga ila mabaton ang ila panublion sa sini nga duta luwas kon pangayuon nila ini paagi sa pangamuyo sang pagtuo, kag lamang kon ihatag ini sa ila sang Ginuo.

45 Kay tan-awa, tiponon nila ang katawhan halin sa mga punta sang kalibutan.

46 Karon, tipona ang inyo mga kaugalingon; kag sila nga wala ginpili nga magpabilin sa sini nga duta, ipawali sa ila ang ebanghelyo sa mga rehiyon sa palibot; kag pagkatapos pabalika sila sa ila mga puluy-an.

47 Pawaliha sila sa dalanon, kag pasaksiha sang kamatuoran sa tanan nga lugar, kag patawga sa mga manggaranon, sa mga dungganon kag kubos, kag sa mga imol nga maghinulsol.

48 Kag dapat pauswagon nila ang mga simbahan kon maghinulsol ang mga pumuluyo sang duta.

49 Kag dapat may pilion nga representante suno sa tingug sang mga miyembro, sa simbahan sa Ohio, nga magbaton sang kwarta nga ibakal sang mga duta sa Sion.

50 Kag ginahatag ko sa akon alagad nga si Sidney Rigdon ang kasugoan nga magsulat sia sang paglaragway sang duta sang Sion, kag pahayag sang pagbuot sang Dios suno sa pagpahibalo sini sang Espiritu sa iya;

51 Kag isa ka sulat nga may upod nga suskripsyon sang tug-an nga amot sang mga miyembro ang ipadala sa tanan nga simbahan sa pagtipon sang kwarta nga ibutang sang obispo sa iya mismo kamot ukon sa kamot sang iya representante, suno sa nagakaigo para sa iya ukon suno sa iya imando, agud ibakal sang mga duta para sa panublion sang mga anak sang Dios.

52 Kay, tan-awa, ginasiling ko sa inyo, pagbuot sang Ginuo nga dapat buksan sang mga disipulo kag sang mga anak sang katawhan ang ila mga tagipusuon sa pagbakal sining bilog nga rehiyon sang pungsod sa labing madali nga itugot sang panahon.

53 Tan-awa, yari ang kaalam. Ipahimo ini sa ila kay indi gani wala sila sing may mabaton nga panublion luwas kon ini paagi sa pagpaagay sang dugo.

54 Kag sa liwat, kon may duta nga makuha, ipadala ang mga manug-obra sang tanan nga sahi sa sini nga duta agud magpangabudlay para sa mga santos sang Dios.

55 Ipahimo ining tanan nga butang sa husto nga paagi; kag ang mga oportunidad sang mga duta dapat ipahibalo sang obispo ukon sang representante sang simbahan sa tagsa ka tion.

56 Kag ipahanabo ang buluhaton sang pagtipon nga indi dali-dali, ukon nga nagapalagyo; kundi nga himuon ini suno sa laygay sang mga elder sang simbahan sa mga komperensya nga suno sa ihibalo nga ila ginabaton sa tagsa ka tion.

57 Kag ipakonsagrar kag ipadedikar kay Sidney Rigdon nga akon alagad ining duta, kag ang lugar para sa templo, sa Ginuo.

58 Kag ipahanabo ang pagpatawag sang miting sa komperensya; kag pagkatapos sina pabalika ang akon mga alagad nga sanday Sidney Rigdon kag Joseph Smith Jr. upod si Oliver Cowdery agud maghimo sang nabilin pa nga mga buluhaton nga akon ginhatag sa ila sa ila kaugalingon nga duta, kag ang iban pa gid nga mga buluhaton nga imando sang mga komperensya.

59 Kag wala sing bisan sin-o nga tawo nga magbalik halin sini nga duta luwas nga magpamatuod sia sa dalanon sinang iya nahibaloan kag sigurado nga ginapatihan.

60 Bawia kay Ziba Peterson inang ginhatag sa iya; kag papadayona sia bilang miyembro sang simbahan, kag dapat magpangabudlay sia sa iya kaugalingon nga mga kamot upod ang mga kauturan sa simbahan tubtob nga napinahan na sia sing husto para sa iya mga sala; kay wala niya ginakumpisar ang mga ini, kag nagahunahuna sia nga taguon ang mga ini.

61 Pahiwata man ang nabilin nga mga elder sining simbahan nga nagapakadto sa sini nga duta, nga ang pila sa ila nabugayan sing tuman bisan pa nga nagapalanglapaw, sang komperensya sa sini nga lugar.

62 Kag ipadumala sa akon alagad nga si Edward Partridge ang komperensya nga pagahiwaton nila.

63 Kag pabalika man sila nga nagawali sang ebanghelyo sa dalanon, nga nagapamatuod sang mga ginpahayag sa ila.

64 Kay sa pagkamatuod, kinahanglan maghalin ang tunog sang ebanghelyo sa sini nga lugar pakadto sa bilog nga kalibutan, kag sa pinakamalayo nga mga bahin sang kalibutan—kinahanglan iwali ang ebanghelyo sa tagsa ka tawo nga may mga tanda nga nagasunod sa ila nga mga nagapati.

65 Kag tan-awa magakari ang Anak sang Tawo. Amen.