“Nakonako n otan te Atua,” Ibukin Kakorakoraia Kairake, (2022)
“Nakonako n otan te Atua,” Ibukin Kakorakoraia Kairake
Nakonako n otan te Atua
I-Karatia 5:25
Ko kona n noori raoi bwaai ngkana ko karaoi rinerine aika a tamaroa. Anne bukin kakawakin te ota: te ota e kabebetea nooran te kawai ae eti. Tamara are i Karawa e anga kawaim ni karekea otan karawa—te Tamnei ae Raoiroi—ni buokiko n noora raoi bwa tera ae raoiroi ao buakaka, eti ke bure.
Koaua akea Tokina
Ni karaoan te bwabetito ko rin n te berita ae tabu ae kakukurei n reitaki ma Tamara are i Karawa ao Iesu Kristo. Inanon te tembora, ko na karaoi reitan berita aika tabu are e kona ni kakorakora te reitaki anne. Ni katoa wiiki n tain te toa, ko kabouii am berita. Ko kaota nanom ni kawakin tuua, ao te Uea e kakabwaiako n anganiko te tai ni karekea te Tamnei ae Raoiroi bwa raoraom n taainako. Bon teuana man Ana bwaintangira ae korakora nakoim.
Karaoan rinerine aika tamaroa e na anganiko am atatai n namakina te Tamnei. A mwaiti bwaai aika raraoi ao n tamaroa n te aonaaba. N aron ae rabwatam e rootaki bwa man bwaai ake ko kanna ao nimma, am iango ao tamneim e namakina korakoran rootakim bwa man tera are ko warekia, matakuakinna, ao n ongoraeakinna.
Kakao
Bairea am tai ibukin te Uea ni katoa bong. Reiakina Taekana. Ururingnga n tainako. Tataro nakon Tamam are i Karawa. Kamatebwaii booki aika tabu ao aia taeka burabeti aika a maiu. Ngkanne kataia ni maiuakin bwaai ake ko reiakinii.
Ukoukora are e na uotiko rake, kaungako, ao ni kaoa te Tamnei. N aron karaoan am rinerine bwa tera ae ko na matakuakinna, warekia, ongoraeakinna, ke n iria, iangoia bwa aekara te namakin ae e na anganiko. E kaoa te iango ae tamaroa? Kateiraroa man bwaai ake e kaenaenai bwaai aika tabu ke aki itiaki. Tai iri bwaai ake e kawaeremea am motikitaeka ke kairootakim nakon te Tamnei, n aron te aki rau, te arekooro, ao te turaki aika a kamamate. Karekea te ninikoria n aki kamaiua te witeo ke keeim, otinako man te tamnei ke te taenti, bita am katangitang, ke kitanii bwaai ake e aki boraoi ma te Tamnei.
Kabonganai bwaai ni kareke rongorongo n kaungaiia. Bwaai n reitaki ibukin te botanaomata e kona n riki bwa bwaai n reitaki aika korakora. Ngkana ko kabonganai, kabotoa am taratara, onimaki, ao koaua. Tai kabotaua maium nakon aia taneiai aomata tabeman. Uringnga are taum e roko man natinakim irouia kaaro i karawa, tiaki man bwaai n reitaki ibukin te botanaomata.
Ukora tamaroan taian taneiai ao koaua ao te reitaki ae reitinako. Taratara raoi bwa kamanenaakin bwaai n rabakau aika boou ao bwaai ni kareke rongorongo e na aki oneamwin am tai ae ko na kamanena ma am utu ao raoraom. Bwaai n reitaki ibukin te botanaomata ao tabeua bwaai n rabakau aika boou a kona n anaa am tai ae bati n akean boon manenana. Anaa te motirawa man tamaroan te aonaaba, ao reitaki ma aomata ni koaua n te maiu.
Berita aika beritanaki
Ko kona ni karekea te Tamnei iroum n taainako. Te Tamnei ae Raoiroi e na kaota nakoim kakoauan Tamara are i Karawa ao Iesu Kristo. E na kabebeteko, kairiko, kauringko, ao katabuko. E na buokiko n ataa te koaua ao n noora te tamaroa n te aonaaba.
Titiraki ao kaekaaia
N na kanga n ataia ngkana I a namakina te Tamnei ae Raoiroi? Reiakinan ataakin te Tamnei ae Raoiroi e anaa te tai, kataneiai, ao taotaonakinano. E taetae nakoia aomata aika a kakaokoro ni kawai aika kaokoro. Tai tarariaoi bwaai aika bebete—te namakin ae rau are ko karekea n ongoraean ana koaua temanna ke am namakin are e tuai rauaki imwin karaoan te rinerine ae bure. Ukorii booki aika tabu ibukin reitakin te Tamnei ae Raoiroi ni kawai aika kaokoro, tataroakinna, ao teimatoa n tarai aanga n namakinan te Tamnei.
Tera tamnei aika buakaka? Bukin tera N na totokoia? Tamnei aika buakaka e bon tei ibukin, n taian tamnei ke taian taeka, are e karaoaki nakon kautan te namakin n te tangako. Tamnei aika buakaka a roko n arona ae mwaiti, karinaki n witeo, tamnei, booki, ao katangitang. E kona naba n riki bwa rongorongo ke tamnei ni kanakoaki imarenaia rao. Tamnei aika buakaka e riaon bwaai are a tabu—rabwatara ao namakinan te tangako—ma akean te karinerine. Ko na kona n rinanon tamnei aika buakaka n akean nanom nako iai. Tao ko na rinanon tamnei aika buakaka ni bon oin nanom ke tiaki, waekoa tannako. Ko kona naba n tangiria ni marooro ma te karo ke tabeman ikawai aika onimakinaki. Ni bon oin nanom ni mataku n tamnei aika buakaka bon te bure ao kabuakaka am atatai n namakina te Tamnei. E kamamaraa tauan nanom ao nunora tein arom n taraiko ao tabeman. Iesu Kristo iai mwaakana ni buokiko n totokoi tamanei aika buakaka ao rairannano. Rairaki Nakoina; tannako man te bure. E kona ni buokiko am bitiobi ni karekea te korakora ao kabwarabure rinanon te Tia Kamaiu.
Taraa Amota 5:14 (ukoukora te raoiroi); I-Karatia 5:22–23 (tuaan te Tamnei); Moronaai 7:18–19 (ootan Kristo); Reirei Tua ma Berita aika Tabu 6:23 (te Uea e taekina te rau); 20:77, 79 (tataro n te toa).
Titiraki ibukin beeba ni kariaia nakon te tembora
E a tia te Uea n taekinna bwa bwaai nako ana bane ni “karaoaki n te itiaki” i Matana (Doctrine and Covenants 42:41). Ko kekeiaki ibukin ataakin te itiaki n am iango ao n anuam? Ko kawakina tuan te itiaki?
Ko kekeiaki ni kawakina te bong ae te Tabati n tabuia, ni mweengam ao n te taromauri, ni kaekaei am bootaki, ni katauraoiko nakon ao ni kororaoi n anaa te toa; ao ni maiuakina maium ni kabooraoia ma tuua ao tuan te euangkerio?