“E tabu rabwatam,” Ibukin Kakorakoraia Kairake: Te Kairi ni Karaoan te Rinerine (2022)
“E tabu rabwatam,” Ibukin Kakorakoraia Kairake
E tabu rabwatam
1 I-Korinto 6:18–20
Rabwatam bon te bwaintangira ae kamiimi mairoun Tamam are i Karawa. E anganiko ni buokiko ni riki n ai Arona. Karekean rabwatam e anganiko rikiraken te mwaaka ni kamwakura inaomatam n rinerine. Ana euangkerio Iesu Kristo ae kaokaki e kona ni buokiko n noora rabwatam man ana taratara te Atua. Ao anne e karika te kaokoro a bubura n am rinerine iaon bwa tera ko na karaoia ma rabwatam ao ko na kanga n tararuaia.
Koaua akea tokina
Rabwatam bon katotongan te Atua—te moani mimitong, karineaki Ngaia i karawa ma aonaaba. Koroboki aika tabu e kabotaua rabwatara nakon te tembora ae tabu, te tabo are e maeka iai te Tamnei. Eng, rabwatam e bon aki kororaoi ngkai. Ma am taneiai are ko karekea n rabwatam e kona ni buokiko ni katauraoi ni butimwaea te kororaoi n teuana te bong, mangautin mimitongin te rabwata.
Tamneim e bon karaoaki man rabwatam ao tamneim. E nanonaki n aei, marurungin te rabwata ao marurungin te tamnei a bon tomaki ni koaua. Te Tia Kamaiu e kaota Tuan te Mauri n reirei te reirei n tabeakin rabwatami—ao ni beritani kakabwaiaakin te rabwata ao tamnei.
Namakin iaon mwakuri n taanga bon te mwakoro ae kakawaki n ana baire te Atua ni karaoa te mare ae kakukurei ao te utu ae akea tokina. Namakin aikai a bon aki bure—a bon tabu. Ibukina namakin iaon mwakuri n taanga a bon tabu ao mwaaka. Te Atua e anganiko Ana tua n tuan te itiaki ni katauroiko ni kabonganai namakin aikai n aron are E kantaningaia. E kamatataaki tuan te itiaki bwa te Atua e kariaia waakin mwakuri n taanga tii imarenan te mwaane ao te aine ake a tia ni mareaki. A mwaiti n aonaaba a mwanuokin ke riki a manrerea ana tua te Atua, ma te Uea e kaoiira bwa ti na riki bwa Ana reirei ao ni maiuakin kainibaire aika rietaata riki nakon te aonaaba.
Kakao
Tararua rabwatam—ao rabwataia tabeman—ma te karinerine. Ngkana ko karaoi babaire iaon am kunikai, karaoan iram, ao aron taraakim, titirakiniko, “I karinea ngkai rabwatau n aron te bwaintangira mairoun te Atua?” Tamara are i Karawa e tangiriira bwa ti na taraira n tatabeman ibukina bwa antai raoi ngaira: tiaki ti rabwata ma Natina aika tangiraki ma tokin kawaira ae mai ieta. Totokoi aekan katei are e anaa taraakim ke katika taraan rabwatam n oneamwiin are antai ngkoe ngkai bon natin te Atua ma am bong aika ana roko ae akea tokina. Anga itiakin naano ao tangiran ana kairi te Atua n ara rinerine. Ukoukora te reirei mairouia ami kaaro.
Karaoi bwaai ake ana kakorakora rabwatam—akea are e na kammarakia ke uruanna. Kakukureiko ma te kakaitau ni mwaitin bwaai aika a tamaroa are te Atua e a tia ni katauraoi. Ma uringnga bwa te arekoro, bakee, kobee, ii, ao tabeua turaki aika kamamate ao bwaai ake a renganaki a bon aki tau ibukin rabwatam ke tamneim. Riki ibuobuoki man bwaai ake a renganaki, n aron turaki ake iai kabwarabwarakia, a kona ni kaikoaki ngkana aki kabonganaaki raoi.
Kawakin mwakuri n taanga ao namakin iaon mwakuri n taanga bwa a tabu. A riai n aki riki bwa atuun karaki n te manikangare ke te kakukurei. Itinanikun te mare imarenan te mwaane ao te aine, e bon bure ringan taabo aika raba, taabo aika a tabuaki ni mwakoron rabwatan temanna e ngae ngkana e raba n te kunikai. N am rinerine iaona bwa tera ko na karaoia, taraakina, warekana, ongora nako iai, iangoa taekana, katanoata, ke tekiti, totokoi bwaai nako are iai nanoia ni kauta te namakin n iango buaka irouia tabeman ke boni ngkoe. Aei are reitaki ma tamnei aika buakaka n aekaia nako. Ngkana ko kunea bwa te aroaro ke waaki ni kakukurei e karekea te kariiri ae korakora, totokoi. Ko ataia bwa tera aekan aroaro ao waaki ni kakukurei akanne. Ao ngkana ko aki koaua raoi, te Tamnei, am karo, ao am taan kairiri a kona ni buokiko n ataia. Kaotia nakon Tamam are i Karawa are ko kawakin boraraoi ao karinea te mwaaka ae tabu ni karaon te maiu.
Berita aika beritanaki
Am karinerine ibukim ao tabeman e na rikirake ngkana ko karinea rabwatam rinanon ongeabam, taraakim, ao kunikaim.
Te Uea e beritani korakoran te kaubwai n te atatai nakoia koraki ake a kawakin Tuan te Mauri. Te rabwata ae marurung, inanaomata man anua aika a kareke, e karikirakea naba am atatai ni karekei kaotioti i bon iroum, iango ae itiaki, ao beku iroun te Uea.
Maiuakinan te itiaki e uota ana kariaia te Atua ao te mwaaka n tamnei i bon iroum. Ngkana ko a tia ni mare, te tua aei e na uota korakoran te tangira, onimaki, ao te katiteuanaaki n am mare. Te ongeaaba n te tua aei e na karaoi angaraoi ibukim n rikirake n akea tokina ao riki n ai aron Tamam are i Karawa. Am kakoaua raoi e na rikirake ngkai ko maiu n ai aron ana reirei Iesu Kristo.
Titiraki ao kaekaaia
Tera ana kainibaire te Uea iaon te kunikai, katamaroam, taitai, ao ewaran kunim? Ana kainibaire te Uea bon ibukim ni karinea tabun rabwatam, e ngae ngkana ko a riki ni kaokoro man te aonaaba. Karika te koaua aei ao te Tamnei n riki bwa am tia kairiko ni karaoi am babaire—riki babaire ake a tia n roota rabwatam. Bwaina te wanawana, ao ukoukora reirei mairouia am karo ao taan kairiiri.
N na kanga n tokanikai n taian kariiri ao katei aika buakaka? Tamara are i Karawa ao Iesu Kristo iai mwaakaia ni buokiko. Kaona maium ma bwaai are e na kaoa te mwaaka anne nakon maium, n aron te tataro, kamatebwaian koroboki aika tabu, ao te mwakuri n ibuobuoki nakoia tabeman. Rairaki nakon Iesu Kristo ao Ana euangkerio ao ko na kunea te mamaara anne ni kakorakoraaki. Ukori ibuobuoki mairouia kaaro, taan kairiiri, ao kauntira aika mwaatai ngkana e kainanoaki. Ibukiia koraki ake a korakai man anua aika a kareke, iai ana buroukuram ni kamarurung te Ekaretia iaon anua aika a kareke. Aikai ana kakabwaia ana Ekaretia te Tia Kamaiu ni buokiko ni karekea tararuan maium. E na anaa te tai, ngaia are taotaona nanom, ao tai bwarannano.
I bon kaitataan nakoia aomata ake bon arou ni mwaine. E kanga kainibaire aikai ni kaineti nakoiu? Namakin ni kaitataan imarenan te mwaane ma mwaane ao te aine ma aine tiaki te bure. Ngkana iai namakin aikai iroum ao ko aki tabe ke ni mwakurii iaoia, ngkoe ko na bon maiuakina ana tua ae tabu Tamara are i Karawa n tuan te itiaki. Bon ngkoe natin te Atua ae tangiraki ao ana reirei Iesu Kristo. Uringnga bwa te Tia Kamaiu e oota ni bwaai ni kabane ake ko rinanona. Rinanon am berita aika tabu n reitakim ma Ngaia, ko na kunea te korakora n ongeaba n ana tua ao ni karekea te kakabwaia are E beritanna. Onimakinna ao Ana euangkerio.
E karaoaki te mwakuri n iowawa n tautau nakoiu, ao I a maama. I a bure ni karaoan te bure? Ngkai e karaoaki mwakuri n iowawa n tautau ke te bwainikirinaki nakoim ko aki bukinaki ni bure iai. Taiaoka tai namakina te bure iai ke te maama. E tangiriko te Tia Kamaiu. E tangiria ni buokiko, kamarurungko, ao n anganiko te rau. Kauntira aika mwaatai, kaain am utu, ao am taan kairiiri a kona naba ni ibuobuoki.
Taraa Karikani Bai 1:27 (ti karikaki ni katotongan te Atua); Ioane 14:18 (te Tia Kamaiu e beritana te kabebete); 1-Biribi 4:7 (te rau are aki kona n ataaki mairoun te Atua); Reirei ao Berita aika Tabu 88:15 (te tamnei ao te rabwata bon te tamnei); 89 (tuan te Mauri); 121:45 (katamaroa am iango ni kakorakora matoan nanom).
Titiraki ibukin beeba ni kariaia nakon te tembora
E a tia te Uea n taekinna bwa bwaai nako ana bane ni “karaoaki n te itiaki” i Matana (Reirei ao Berita aika Tabu 42:41). Ko kekeiaki ibukin ataakin te itiaki n am iango ao n anuam? Ko kawakina tuan te itiaki?
Ko mataata ao n ongotaeka nakon Tuan te Mauri?