Salig diha sa Ginoo

Kon ang mga higala ug mga minahal moduol kanato nga may kabalaka mahitungod sa ilang tinuohan, ang atong unang reaksiyon mahimong kakulba o gani kalisang. Ang ilang mga kabalaka mahimong mogiya kanimo sa pagpangutana og malisod nga mga pangutana: “Unsay kahulogan niini alang sa akong pamilya?” “May nahimo ba akong sayop?”

Kon usa ka tawo nga suod nganha kanimo mosukna sa ilang mga tinuohan, kini wala mangahulogan nga sila imong napakyas. Ang rason alang sa ilang mga kabalaka tingali makalibog. Kinahanglan kitang mobuhat og unsay atong mahimo nga makatabang kanila, apan kinahanglan usab nga mosalig kita sa Langitnong Amahan ug ni Jesukristo. Nahigugma sila niadtong adunay mga pangutana. Aniay pipila ka mga butang nga ikaw makahimo sa pagpabilin sa kalinaw diha sa imong kasingkasing ug hunahuna samtang ikaw nagsuporta sa uban:

• Salig nga ang Dios nahibalo. Ang Ginoo nagtinguha sa kalamboan ug kalipay sa matag tawo. Siya nag-awhag sa atong sinsero nga mga pangutana. Siya nahibalo sa atong mga panlimbasog ug naghilak tungod sa atong pag-antos. Mopadayon siya sa paglugway og gugma ug sa pagtabang ngadto sa mga tawo kinsa nanlimbasog o mopalayo sa Simbahan.

• Dapita ang Ginoo samtang nagpadayon kini nga proseso. Bisan ang labing maayo nga mga kapanguhaan ug ang labing binantayan nga gihunahuna nga mensahe mahimong dili epektibo kon ang pagpanyempo sa higayon o paagi sa pagsulti sayop. Pag-ampo nga ang Ginoo motabang kanimo sa pagpangalagad. Ang Espiritu makatabang kanimo sa pagsabot sa piho nga panginahanglan sa usa ka tawo ug makahibalo kon kanus-a makig-atubang ug maminaw kaysa mosulti o motudlo. Kini makatabang usab kanimo sa pag-ila kon unsaon ug kanus-a makigbahin sa imong pagpamatuod o sa pagdapit kanila sa paghimo og mga lakang nga mas maduol ngadto sa Dios.

• Pagbaton og pagtan-aw sa umaabot. Ang hugot nga pagtuo ug mga pagbati sa usa ka tawo mahitungod sa Dios kasagaran mausab sa kadugayan. Ug kitang tanan manginahanglan gihapon sa pagkat-on ug pagtubo og dugay human kita mobalhin ngadto sa sunod nga kinabuhi. Ikaw makakaplag og paglaom kon imong tan-awon ang mga panlimbasog sa imong minahal uban niining mas lapad nga panan-aw. Padayon sa mapailubong pagtudlo sa mga pulong sa Dios, nahibalo nga ang tukmang panahon sa pag-ani anaa sa mga kamot sa Dios.

• Pangitaa ang paglaom diha sa imong kahibalo sa kinaiyahan sa Dios. Ang atong panan-aw niini nga kinabuhi limitado. Kita nahibalo nga ang Dios maalamon, mapailubon, ug mahigugmaon. Siya mihatag sa matag usa kanato sa atong kabubut-on. Nahibalo Siya nga tanan kita adunay mga hagit ug mga pagsulay. Ug siya mihatag og Manluluwas kinsa adunay gahom sa pagpaduol kanato balik ngadto Kaniya.

Importanting mga kasulatan: Mga Proverbio 3:5–6; Isaias 55:8–9; 2 Timoteo 1:7–8; Alma 26:11–12