Tabang Kanila sa tibuok Nilang Panaw

Ang ubang mga tawo kinsa nanlimbasog og mga pangutana mahitungod sa ilang tinuohan nagsulbad sa ilang mga kabalaka og dali ug nagpadayon sa unahan. Alang sa daghan, ang panlimbasog mokabat og panahon. Ang imong gugma, pag-awhag, ug kaandam sa pagpanaw nga mag-uban makatabang kanila sa pagkaplag og paglaom.

Padayon sa pagpuyo sa ebanghelyo samtang ikaw nagtabang sa imong higala o minahal sa ilang panaw. Ang inyong managlahi nga dalan mahimong magkabugkos ug magtabang kanimo sa pagpabilin nga konektado kaysa maggiya kanimo palayo. “Ang atong mga panaw sa kinabuhi tinagsa,” gitudlo ni Elder Gerrit W. Gong, “apan kita makaduol pagbalik ngadto sa Dios nga atong Amahan ug sa Iyang Hinigugmang Anak pinaagi sa pagsalig diha sa Dios, sa usag usa, ug sa atong mga kaugalingon.”¹ Aniay pipila ka mga baroganan alang sa pagsuporta ug pag-awhag sa uban:

Himoa nga usa ka nga kasaligan nga tinubdan alang sa panaghisgotan. Kon usa ka higala o sakop sa pamilya nagdala sa ilang mga pangutana nganha kanimo, sila tingali wala mangita og usa ka tawo nga moayo sa problema apan hinoon usa ka minahal kinsa andam sa paglakaw kuyog kanila sa ilang panaw. Pagmabination. Pahibaloa sila nga ikaw mopadayon sa pag-amuma kanila walay pagsapayan sa ilang mga kabalaka ug mga pagpili.
Tabang kanila sa pagpangita sa mga tubag. Usa ka paagi sa pagtabang mahimo pinaagi sa pagpakigbahin sa mga baroganan nga gihisgotan diha sa “Pagpangita sa mga Tubag sa Imong mga Pangutana” seksiyon niini nga kapanguhaan. Tabangi ang imong higala o sakop sa pamilya sa pagpangita og mga materyal nga gimantala sa Simbahan kabahin sa sagad nga mga pangutana, ug pagpakaandam sa pagsulti mahitungod niini nga mga kapanguhaan uban kanila. Awhaga sila sa paghimo og matinud-anong mga panan-aw kabahin sa mahagitong mga pangutana nga usa ka pundasyon nga bahin sa ilang pagtuon. Kon naaghat sa Espiritu, pahinumdomi sila sa makatabang nga mga kasulatan ug awhaga sila sa pagpadayon sa pag-ampo.
Himoa nga Mahimong usa ka Kristohanong panig-ingnan. Usa sa labing maayo nga mga paagi sa pagpakigbahin sa ebanghelyo mao ang pagpakita og Kristohanong gugma ug sa pagpuyo og kinabuhi sa pagkamaayo. Samtang ikaw magpabilin nga matinud-anon ug maghupot sa imong mga pakigsaad, ikaw nagpakita sa hingpit nga kalipay sa pagpuyo sa ebanghelyo ngadto niadtong imong gitabangan. Mahimo silang mopili sa dili pagpaminaw sa imong tambag o sa pagpamatuod, apan sila maimpluwensya sa imong ehemplo sa sinserong gugma ug sa pagkamatinud-anon.
Pagtukod og pagsinabtanay. Ikaw makapadayon sa inyong relasyon nga lig-on pinaagi sa pagtukod og mga pagtuo ug mga interes nga magsinabtanay. Likayi ang ilang mga pangutana nga mahimong tutokan sa tanan nimong mga inter-aksiyon. Tungod lamang kay sila nanlimbasog sa pipila ka butang wala magpasabot nga ilang gisalikway ang tanan. Padayon sa paggahin og panahon uban kanila nga malingaw sa mga kalihokan nga ikaw nakigbahin kaniadto. Sa pagpadayon, mahimong ikaw makadiskobre og bag-ong mga butang nga magkaubang sutaon ug ipakigbahin.
Pangita og mga paagi sa pagbuhat og maayo nga magkauban. Dapita ang imong higala o sakop sa pamilya sa pagkuyog kanimo samtang inyong buhaton ang mga baroganan sa ebanghelyo nga magdala kaninyo og hingpit nga kalipay. Ikaw makahangyo kanila sa pagserbisyo sa uban kauban nimo, pag-apil diha sa makapabayaw nga kalihokan, o sa paglig-on sa inyong komunidad nga magkauban. Kamong duha gusto nga ipalambo ang kalibotan nga naglibot kaninyo, walay pagsapayan sa ilang mga pangutana kabahin sa tinuohan.
Ilha nga kini mahimong mokabat og panahon. Kon usa ka tawo nga atong suod adunay mga kabalaka o mga pangutana mahitungod sa tinuohan, mahimong kita maglaom nga usa ka makakumbinsir nga panghunahuna o kinasingkasing nga pagpamatuod dali nga mosulbar sa mga butang. Hinumdomi nga walay kanunay nga daling solusyon ngadto sa espirituhanong mga kabalaka o mga pangutana. Pangandam sa paghimo og mas taas nga panaw uban kanila. Hatagi sila og panahon ug lugway sa pagtubo. Ilha nga ang paagi sa ilang pagpahayag sa ilang hugot nga pagtuo mahimong tan-awon nga lahi nganha kanimo kaysa kaniadto, ug kana OK.

Importanting mga kasulatan: Isaias 35:3–4; Mga Taga-Galacia 6:2; 1 Pedro 3:15; Mosiah 18:9; Doktrina ug mga Pakigsaad 11:21