Amumaha ang Imong Kaugalingong Hugot nga Pagtuo

Ang pagtabang og alsa sa palas-anon sa uban nagkinahanglan og paninguha ug makahatag kanato og kaayohan sa wala damha nga mga paagi. Siguroha ang paghatag sa imong kaugalingon og espirituhanong pag-amuma ug sa pagpabilin nga lig-on diha sa gipahiuli nga ebanghelyo ni Jesukristo. Sa usa ka emerhensiya, ang mga pasahero sa usa ka eroplano gitudloan sa pagbutang sa ilang kaugalingong mga oxygen mask og una ug dayon sa pagtabang sa uban. Sa samang paagi, makatabang lamang kita sa uban kon kita nag-atiman sa importante nga buhat sa pag-amuma sa atong kaugalingong hugot nga pagtuo ug pagpamatuod.

Ang mosunod nga mga baroganan makatabang kanimo sa paglig-on sa imong hugot nga pagtuo samtang mangalagad ngadto sa uban:

• Hinumdomi unsa ang imong gituohan ug nasinati. Pamalandonga ang mga higayon sa dihang imong gibati ang impluwensiya sa Espiritu Santo. Hinumdomi ang mga panahon nga imong nasinati ang kalinaw, hingpit nga kalipay, gugma, ug katin-aw. Paghunahuna mahitungod sa panahon nga imong gibati ang Dios nga nakigsulti nganha kanimo sa hilom nga mga paagi sa pagpanghimatuod sa imong hugot nga pagtuo. Ang imong nangaging espirituhanong mga kasinatian makaserbisyo isip usa ka tinubdan sa kalig-on ug panalipod gikan sa pagduhaduha ug kahadlok.

• Padayon sa pag-ugmad sa imong pagpamatuod. Importante ang pagpadayon sa pagbuhat sa mga butang nga mitabang kanimo sa pagtukod sa imong pagpamatuod sa ebanghelyo. Mahimong maglakip kini sa pagbasa sa mga kasulatan, pag-ampo, pag-ambit sa sakramento, pagsimba sa templo, ug sa pagserbisyo sa uban. Kining yano nga mga pagbansay makatabang kanimo sa pagbati sa impluwensiya sa Espiritu ug sa pagpabilin nga matinud-anon.

• Tabang ngadto sa uban. Kon ang palas-anon sa pagpangalagad ngadto sa usa ka higala o sakop sa pamilya bation nga bug-at, hinumdomi nga ikaw wala mag-inusara. Ikaw makaduol ngadto sa masaligan nga sakop sa pamilya, mga higala, mga lider sa Simbahan, o mga propesyonal. Ang ilang lawom nga pagsabot, mga pag-ampo, ug kahanas makatabang kanimo sa paghinumdom kon giunsa ikaw paghigugma sa Dios. Sila usab makasuporta kanimo samtang ikaw nagtinguha og mga tubag sa imong kaugalingon nga mga pangutana.

• Pagtakda og maayong mga utlanan. Samtang kita kinahanglan nga maninguha sa pagpaminaw ug sa pagsuporta sa uban diha sa ilang mga pangutana o mga kabalaka, kinahanglan usab kita nga moila sa atong kaugalingong mga panginahanglan ug mga limitasyon. Ang imong mga emosyon ug mga pagbati may kalabotan usab. Mahimong ikaw nagsinati og kahadlok, kapakyasan, ug kasubo atol niini nga proseso. Kon ang usa ka panag-istoryahanay makakapoy na kaayo, ipahayag ang imong mga pagbati ug paghan-ay alang sa laing panahon sa pag-istorya. Ang imong minahal mahimong gusto nga himoon ang ilang mga pangutana nga hilisgotan sa matag panag-istoryahanay o sa pag-istorya mahitungod sa usa ka hilisgotan sa paagi nga magpakaulaw kanimo o sa imong tinuohan. Sama lamang nga ikaw nagkinahanglan sa pagrespeto sa panaw sa uban, sila nagkinahanglan sa pagrespeto sa imo. Ikaw dili kinahanglan nga mobati og gipakaminos o walay utok kon ikaw moabot sa usa ka lahi nga panapos kaysa uban nga tawo.

• Himoa nga mas maayo ka pagkahatag og impormasyon. Ikaw dili kinahanglan nga mahimong usa ka eksperto sa usa ka isyu nga mahimong usa ka maayong tigsuporta. Apan kini makahimo kaayo nga positibo sa pagkat-on mahitungod sa usa ka hilisgotan nga ikaw walay kinatibuk-ang kahulogan niini. Paninguha og usa ka mahunahunaong pagtuon sa doktrina ug kasaysayan sa Simbahan. Himoa nga mas mapamilyar sa sagad nga mga pangutana. Pagkat-on kon unsay nasulti sa mga lider sa Simbahan ug sa matinud-anong mga eksperto kabahin niini nga mga hilisgotan. Niini nga proseso, mahimo kang magkat-on, kalimtan ang nakat-onan, ug sa pagkat-on pag-usab sa daghang mga butang.

• Himoa nga mapamilyar sa mga baroganan alang sa pagpangita sa mga tubag. Pagtuon ug lihoka ang mga baroganan nga gihisgotan diha sa “Pagpangita sa mga Tubag sa Imong mga Pangutana” sa seksiyon niini nga kapanguhaan.

Importante nga mga kasulatan: Lucas 22:31–32; 1 Nephi 15:8–11; Jacob 4:6; Alma 32:41–43; Doktrina ug mga Pakigsaad 6:14