“O [Iesu Keriso] na femaliuai i auala o Palesitina, ma faamalolo i e mamai, faapupula i e tauaso, ma faatutu mai e na oti”(“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). O vavega o se vaega taua o le galuega alofa faaletino a le Faaola, ae na latou faamaonia foi Lona mana ma le pule, ma tuuina atu le talitonuga o Lona valaauga o Ia o le Mesia. E ala i le faatinoina o le faatuatua ia Iesu Keriso, o i tatou foi e mafai ona molimauina pe aafia ai i le alofa o le Faaola, agaalofa, ma le mana i le tulaga o vavega.
Faitauga Faaopoopo
Dallin H. Oaks, “Miracles,” Ensign, June 2001, 6–17.
Sydney S. Reynolds, “O se Atua o Vavega,” Liahona, Iulai 2001, 12–14.
Na faia e le Faaola vavega i le taimi o Lana galuega faaletino
Tusi fuaitau nei i le laupapa: faafilemu le sami, faatuina e na oti, ma tulieseina temoni. Fesili i tamaiti aoga po o fea o nei vavega na faia e le Faaola latou te manatu e sili i [vavega] e tolu. A uma ona tali mai tamaiti aoga, faaopoopo le foafoaina ole lalolagi i le lisi i le laupapa ma fesili atu po o fea e aupito silisili. Toe fai le gaoioiga i le faaliliu o agaga ma le mulimuli, i le puapuagatia ma maliu mo a tatou agasala.
Fai atu i tamaiti aoga pe faapefea ona latou faamatalaina le upu vavega. A uma ona tali mai tamaiti aoga, faaali atu le faamalamalamaga lenei ma valaaulia se tamaitiiti aoga e faitau leotele:
“[O se vavega o] se mea uigaese na tupu e ala i le mana o le Atua. O vavega o se elemene taua lea i le galuega a Iesu Keriso. E aofia ai le faamaloloina o mai, faatuina e na oti i le ola, ma le toetu. O vavega o se vaega o le talalelei a Iesu Keriso. E manaomia le faatuatua ina ia mafai ai ona faaalia mai vavega” (Taiala i Tusitusiga Paia, “Vavega”; scriptures.lds.org).
O a nisi faataitaiga o vavega na faia e Iesu i le taimi o Lana galuega faaletino? (Lisi tali a tamaiti aoga i le laupapa.)
Aisea e taua ai le iloaina po o le a le loloto o le mana o le Faaola?
Lisi mau fesootai nei i le laupapa, ma valaaulia tamaiti aoga e filifili se mau e suesue: Mareko 1:40–42; Mareko 5:1–8, 19; Mareko 8:1–9; Luka 7:11–15; ma le 3 Nifae 17:5–9. Fai atu ia i latou e faailoa mai i le fuaitau na latou faitauina se vavega na faia e le Faaola ma le mea e faailoa mai ai e uiga i Lona mana. A maea le taimi talafeagai, talanoaina fesili nei:
O le a le vavega na e faitau i ai, ma o le a le mea ua faaalia mai ai e uiga i le mana o le Faaola?
E faapefea e le malamalama i le mana o le Faaola e fai ai vavega ona fesoasoani ia te oe e maua ai le faatuatua ia te Ia? (A o tali mai tamaiti aoga, e mafai ona e faasino atu e faapea o seneturi a o lei fanau mai le Faaola, na muai vaai perofeta o le a Ia faia vavega i le taimi o Lana galuega i le lalolagi [tagai i le 1 Nifae11:31; Mosaea 3:5–6]. O lenei malamalama na fesoasoani ia i latou na ola a o lei fanau mai o Ia ina ia maua le faatuatua sili atu ia te Ia.)
Valaaulia tamaiti aoga e toe vaai i le fuaitau na latou suesueina ma faailoa mai le mafuaaga o loo taua mai ai na faia ai e Iesu le vavega. Talanoaina fesili nei:
O le a le mafuaaga o loo taua mai na faia ai e le Faaola vavega na e faitau i ai? (Faataga ni nai tamaiti aoga e tali mai. O le agaalofa o le Faaola o loo taua i faataitaiga taitasi. Tau i tamaiti aoga a o latou aoao e faailoa mai mamanu ma autu e pei o lenei i tusitusiga paia, o le a latou faalolotoina lo latou malamalama i tusitusiga paia.)
O a auala na faaalia ai e nei vavega le agaalofa o le Faaola?
O le a se eseesega e maua i le iloaina o le Faaola e faia i nisi taimi vavega ona o le tele o Lona agaalofa? (A o tali mai tamaiti aoga, faamamafa atu e faapea a o tatou faatinoina le faatuatua ia Iesu Keriso, e mafai ona tatou maua le mana ma lagonaina Lona agaalofa mo i tatou. )
Faaiu lenei vaega o le lesona i le valaaulia o tamaiti aoga e faitau le Galuega 10:38 a o mulimuli le isi vaega o le vasega i le faitauga. Ona fesili atu lea i tamaiti aoga:
O le a le uiga faapea na faamaloloina e Iesu “e ua faatoilaloina uma e le tiapolo”? (O lenei fuaitau atonu e faatatau i vavega a Iesu o le tutuliina i fafo o temoni faapea foi ma le vavega silisili o vavega uma—le faamalologa faaleagaga na aumaia e Iesu i e na mafatia i agasala. Faasino atu faapea e ui lava o le faamalologa faaletino o se vaega taua o le galuega a le Faaola, o ona aafiaga e le tumau. O le faamanuiaga o le faamalologa faaleagaga sa—ma e—faavavau.)
O le faatuatua ia Iesu Keriso e aumaia vavega i o tatou olaga
Tau i tamaiti aoga faapea e ui lava e taua le iloa o Iesu na faia vavega a o “Ia savalia auala o Palesitina” (“O Le Keriso Soifua: O Le Molimau a le Au Aposetolo,” 2), atonu e sili atu le taua o le iloa o loo Ia faaauau pea ona faia vavega i le aso. Fai i tamaiti aoga e faitau le leoa le Eteru 12:12, 18 ona tusi lea i lalo se mataupu faavae ua latou aoao mai nei fuaiupu. Valaaulia ni nai tamaiti aoga e faasoa mai i le vasega mea sa latou tusiaina. (O tali e tatau ona aofia ai le meamoni lenei: A o tatou faatinoina le faatuatua ia Iesu Keriso, e mafai ona tatou molimauina Lona mana faavavega i o tatou olaga.)
Ina ia fesoasoani i tamaiti aoga e sailiili i lenei upumoni, tusi i le laupapa mau fesootai nei: Mareko 2:1–12; Mareko 5:22–24, 35–43; ma le Mareko 5:25–34.Manatua: Atonu e te manao e faasino atu o nei fuaitau e maua ai le isi faataitaiga o se mamanu po o le autu i mau.) Vaevae taitoatolu le vasega. Tofi vaega taitasi e faitau se tasi o fuaitau, ma vaai mo auala na faaalia ai le faatuatua ia Iesu Keriso. A maea se taimi talafeagai, fesili atu:
O a faamaoniga o le faatuatua ia Iesu Keriso na e mauaina?
Saunia se kopi mo tamaiti aoga taitasi e tufa atu “Faamaloloina e Mamai.”
Na aoao mai Elder Dallin H. Oaks o le Korama a Aposetolo e Toasefululua, le taua ona manaomia o le faatuatua mo vavega ina ia tutupu:
Ata
Elder Dallin H. Oaks
“O le faatuatua e alagatatau mo le faamaloloina e ala i mana mai le lagi. O loo aoao mai foi le Tusi a Mamona e faapea ‘afai e leai se faatuatua i le fanauga a tagata, e le mafai e le Atua ona faia se vavega ia te i latou’ (Eteru 12:12) [tagai foi i le 1 Nifae 7:12; MF&F 35:9]. I se saunoaga e uiga i le faamaloloina o mai, na saunoa ai Peresitene Spencer W. Kimball: O le manaomia ona i ai o le faatuatua e tele lava ina manatu faatauvaa i ai. E foliga mai ua masani ona faalagolago le tagata ma’i i le mana o le perisitua ma le mana o le faamalologa lea latou te faamoemoe ia i ai i le usoga e tuuina atu le faauuga ae o le tiutetauave sili atu ua i ai lea i le ua faamanuiaina. … O le itu aupito taua lava o le faatuatua o le tagata pe afai e malamalama ma mafai ona tali atu le tagata lava ia. “Ua e ola i lou faatuatua” [Mataio 9:22]sa fetalai soo ai le Matai ma na toetoe lava a avea o se tali o se pese’ [“President Kimball Speaks Out on Administration to the Sick,” New Era, Oct. 1981, 47]” (“Faamaloloina o e Mamai,” Ensign po o le Liahona, Me 2010, 49).
Na faamanatu mai foi e Elder Dallin H. Oaks ia i tatou o se vaega taua o le mauaina o le faatuatua o le naunautai e talia le finagalo o le Atua:
Ata
Elder Dallin H. Oaks
“A o tatou faaaogaina le mana e le masalomia o le perisitua a le Atua ma a o tatou teufatuina Ana folafolaga o le a faafofoga ma tali mai o Ia i tatalo faatuatua, e ao ina tatou manatua i taimi uma o le faatuatua ma le mana faamalolo o le perisitua e le mafai ona aumaia ai se taunuuga e ese mai le finagalo o Le ana le perisitua. O lenei mataupu faavae o loo aoaoina mai i le faaaliga lea na faatonuina ai toeaina o le Ekalesia e tuu atu o latou lima i luga o e mamai O le folafolaga a le Alii e faapea ‘o le ua faatuatua mai ia te au, ma ua le tofia e oti,o le a faamaloloina’ MF&F 42:48; faaopoopo le faamamafa). E faapena, i se isi faaaliga o ona po nei ua folafola mai le Alii afai ‘e ole atu o ia e tusa ma le finagalo o le Atua … o le a faia e pei ona ole atu o ia’ (MF&F 46:30) [tagai foi i le 1 Ioane 5:14; Helamana 10:5].
“Mai nei mea uma ua tatou iloa ai, e oo lava foi i auauna ale Alii e faaaogaina Lona mana paia i se tulaga ua i ai se faatuatua tele ina ia faamaloloina, e le mafai ona tuuina atu se faamanuiaga faaleperisitua o le a famaloloina ai se tagata, pe afai o lena faamalologa e le o le finagalo o le Alii.
“I le avea ai ma ni fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Na ou lagonaina lena talitonuina i se lauga na tuuina atu e lou tausoga i le falelauasiga o se tamaitai talavou o le na maliu i se gasegase tigaina. Sa ia tautalagia upu nei na muamua ou te’i ai ona faatoa ou malamalalma ai lea:‘Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia faamanuiaga faaleperisitua. Sa tusia lona igoa i lisi o tatalo i le malumalu. O ia o le autu o le faitau selau o talosaga mo le toe faafoisia mai o lona malosi. Ma ou te iloa ua lava ma totoe le faatuatua o lenei aiga e faamaloloina ai o ia, vagana ai o le finagalo o le Alii e foi atu o ia i le taimi nei. Na ou lagonaina foi lena talitonuina i upu a se tama o se isi teineitiiti lelei na maliu ona o le kanesa, i lona talavou. Sa ia tautino: ‘O le faatuatua o lo matou aiga o loo ia Iesu Keriso, ae e le faalagolago i taunuuga.’ E tatagi pea le moni o na aoaoga ia te au. Tatou te faia mea uma tatou te mafaia mo le faamaloloina o se pele, ona tatou faalagolago lea i le Alii mo le taunuuga” (“Faamaloloina o e Mamai,” Ensign po o le Liahona, Me 2010, 50).
Ina ia fesoasoani i tamaiti aoga e malamalama i le manaomia o le faatuatua i le faia o vavega, valaaulia se tamaitiiti e faitau leotele le saunoaga muamua i le pepa na tufa atu a Elder Dallin H. Oaks o le Korama a Aposetolo e Toasefululua. Ona fesili atu lea:
O a meamoni taua na aoao mai e Elder Oaks e uiga i le faatuatua?
Mo nisi manatu mai ia Elder Oaks, mafaufau e faitau pe faasoa atu i au lava upu le saunoaga lona lua i le pepa e tufa atu. E mafai ona e taua faapea na faasino e Elder Oaks nei faamatalaga i e umia le perisitua. Talanoaina fesili nei:
O le a le mea na fai mai ai Elder Oaks e manaomia mai ia i tatou pe a tatou tatalo i le faatuatua mo se vavega ia tupu?
Aisea e taua ai le manatua o le mea tatou te sailia e tatau ona ogatusa ma le finagalo o le Tama Faalelagi?
Molimau atu o vavega o loo tutupu pea i aso nei. Faasoa atu le saunoaga lenei mai ia Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“E tele vavega o loo tutupu i aso uma i le galuega a la tatou Ekalesia ma i olaga o o tatou tagata. O le toatele ua latou molimauina vavega nai lo le tele o le silafia” (“Vavega,” Ensign, June 2001, 6).
Aisea e te manatu ai tatou te le masani ona iloa vavega e tutupu i o tatou olaga? (A o tali mai tamaiti aoga, e mafai ona e faasino atu faapea o nai vavega e aafia ai faaaliga maoae o le mana o le Alii. O le tele o vavega e laiti tele ma e patino lava. [Tagai i le Sydney S. Reynolds, “O se Atua o Vavega,” Liahona, Me 2001, 12–13.])
O a mea ua faaalia mai e nei vavega laiti, ma patino e uiga i le alofa o le Tama Faalelagi ma Iesu keriso ia i tatou?
O a ni faataitaiga o vavega “laiti” po o le “aso uma” e mafai ona e mafaufau i ai? (Afai e leai ni tali, mafaufau e faasoa atu nisi o loo taua e Sister Sydney S. Reynolds o le au peresitene aoao o le Peraimeri i le “O se Atua o Vavega” [Liahona, Me 2001, 12–13].)
Valaaulia ni tamaiti aoga e tali mai i fesili nei:
O a ni mea e mafai ona e faia e iloa gofie atili ai ma maua ai se agaga faafetai sili atu mo vavega a le Alii—laiti ma tetele—i lou olaga?
Uunaia tamaiti aoga e mafaufau ma le agaga tatalo pe faapefea ona latou usiusitai i mea na latou tusia. Faaiu le lesona i le fesili i tamaiti aoga po o ai e manao e faasoa atu a latou molimau i le Faaola ma le alofa ua latou lagona mai ia te Ia ma mo Ia.