Na soifua Iesu Keriso i se olaga atoatoa e ala i le usiusitai i le finagalo o le Tama Faalelagi i mea uma. Ua molimau mai perofeta o aso nei: “E ui ina leai se agasala, ae na papatisoina o Ia [Iesu Keriso] ina ia faataunuu ai le amiotonu uma” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). E pei o le Faaola, tatou te faataunuuina le amiotonu pe a tatou taliaina sauniga ma feagaiga o le talalelei faavavau. O lenei lesona e sailiili ai pe faapefea ona usiusitai le Faaola i le talalelei faavavau ma pe faapefea ona mafai ona tatou mulimuli i Lana faataitaiga.
Faitauga Faaopoopo
Robert D. Hales, “ O Le Feagaiga o le Papatisoga: O Le I Ai i le Malo ma ni O le Malo” Liahona, Ian. 2001, 6–9.
A o faia se talatalanoaga ma se uo e uiga i mataupu faalelotu, na oo i le mataupu o le papatisoga. A uma ona e faamatala atu pe aisea tatou te papatiso ai, ua fesili atu lau uo, “Ou te malamalama ua papatisoina i tatou ia faamamaina mai agasala. Ae o Iesu sa atoatoa; sa leai Sana agasala. Ae aisea la na papatiso ai o Ia?”
Faataga se taimi mo tamaiti aoga e mafaufau ai i lenei fesili, ona valaaulia lea o i latou e tali mai.
A uma sina talanoaga, valaaulia se tamaitiiti aoga e faitau leotele le Mataio 3:13–17 pe faaali atu le “The Baptism of Jesus” (2:55) mai le The Life of Jesus Christ Bible Videos. (Sii mai ma muai matamata le vitio a o lei amataina le vasega.) Afai e te faaalia le vitio, valaaulia tamaiti aoga e mulimuli i le faitauga i a latou tusitusiga paia.
A uma le vitio, fesili atu:
O le a le mafuaaga na tuuina mai e Iesu mo le papatisoina? (Mafaufau e tusi le aoaoga faavae lenei i le laupapa: Na papatisoina Iesu Keriso e faataunuu ai le amiotonu uma.)
O le a sou manatu i le uiga faapea o Iesu na papatisoina “e faataunuu meatonu uma”? (Mataio 3:15).
Ina ia fesoasoani i tamaiti aoga e taliina lenei fesili, tuu atu ia i latou se taimi e suesue ai a latou tusitusiga paia. Atonu e te manao e fautua atu latou te tusi le 2 Nifae 31:4–9 i autafa o a latou mau i talaane o le Mataio 3:15. Fai i tamaiti aoga e faitau le leoa le 2 Nifae 31:5–6 ma matau le fesili na fai atu e Nifae. A maea se taimi talafeagai, faamatala atu na taliina e Nifae lenei fesili i le 2 Nifae 31:7–9. Valaaulia se tamaitiiti aoga e faitau leotele nei fuaiupu, ma fai i le vasega e mulimuli i le faitauga ma faailoa mai auala na faataunuu ai e le Faaola mea tonu uma i le papatisoina. Atonu e te manao e fautuaina e faailoga mea latou te mauaina. A o faasoa e tamaiti aoga mea na latou iloaina mai, tusi fuaitau nei i le laupapa:
Na Ia faalotomaualaloina o Ia lava i luma o le Tama.
Na Ia molimauina i le Tama o le a Ia usiusitai i Ana poloaiga.
Na Ia faaali atu i fanau a tagata le faitotoa e mafai ai ona latou ulu atu i le malo selesitila.
Na Ia faia se faataitaiga mo i tatou.
Manatua: O lenei gaoioiga o le a faatagaina ai tamaiti aoga e faataitai le tomai tau suesuega o tusitusiga paia o le faia o lisi, i le fesoasoani atu ia i latou e faailoa mai manatu autu na manao le tusitala o le mau e faamamafaina.)
Faamanatu i tamaiti aoga le fesili na fai e Nifae (tagai i le fuaiupu 6). Ona fesili atu lea:
A o mafaufau i aitema i le laupapa, e faapefea e le papatisoga o Iesu Keriso ona saunia se faataitaiga o le uiga o le amiotonu?
A o tali mai tamaiti aoga, ia mautinoa o nei manatu ua faailoaina ma talanoaina (atonu e te manao e suitulaga aitema i le laupapa i fuaitau nei):
O le amiotonu e aofia ai le mulimuli i le finagalo o le Tama.
O le amiotonu e aofia ai le osifeagaiga ma le Tama e usiusitai i Ana poloaiga.
O le amiotonu e aofia ai le mauaina o sauniga o le faaolataga.
O le amiotonu e aofia ai le mulimuli i le faataitaiga na faia e Iesu Keriso.
Fesili i le vasega:
E faapefea ona tatou faaaogaina le faataitaiga a Iesu o le amiotonu i o tatou lava olaga?
Molimau atu i lau vasega e faapea, e pei o i tatou, na aafia Iesu i tuutuuga uma o le fuafuaga a le Tama Faalelagi. O Lona soifuaga atoatoa o se faataitaiga e tatau ona tatou saili e mulimuli i ai.
Valaaulia se tamaitiiti aoga e faitau leotele le 2 Nifae 31:10–12. Fesili i le vasega:
I le fuaiupu 10, o le a le valaaulia na tuuina mai e le Faaola ia i tatou uma lava?
E tusa ai ma nei fuaiupu, o le a le mea na tau mai e Iesu e tatau ona tatou faia e mulimuli ai ia te Ia?
Fai i tamaiti aoga e faitau le leoa le 2 Nifae 31:16–17. Ona fesili atu lea:
O le a se isi mea e mafai ona tatou faia e mulimuli ai i le faataitaiga a le Faaola?
O le a le uiga o le tumau seia oo i le iuga ma ia mulimuli i “le faataitaiga a le Alo o le Atua soifua”? fuaiupu 16. (E mafai ona e faamamafaina le upu faia i le fuaiupu 17. Ia faamamafa atu foi le mataupu faavae lenei: A o tatou mulimuli i le faataitaiga a Iesu Keriso, e mafai ona tatou faataunuu mea tonu uma, e pei ona Ia faia.)
Faamatala i tamaiti aoga o mau na latou faitau i ai i le 2 Nifae 31 o loo i ai le autu o le talalelei faavavau, lea na faatuina e le Tama Faalelagi a o lei foafoaina le lalolagi.
Valaaulia tamaiti aoga e iloilo le Roma 6:3–6 ma vaai mo upu po o fuaitau autu o loo faamautinoa mai ai o le mulimuli i le faataitaiga a Iesu Keriso e manaomia ai le sili atu i le na o le papatisoina. Atonu e te manao e fautuaina tamaiti aoga e faailoga mea ua latou maua.
Tuu i tamaiti aoga se kopi o le saunoaga lenei a Elder Robert D. Hales o le Korama a Aposetolo e Toasefululua, ma fai ia i latou e faitau le leoa. Valaaulia i latou e mafaufau pe na faapefea e o latou lava papatisoga ona aafia ai o latou olaga.
Ata
Elder Robert D. Hales
“Pe a tatou malamalama i a tatou feagaiga o le papatisoga ma le meaalofa o le Agaga Paia, o le a ia suia o tatou olaga ma o le a amatalia ai lo tatou faamaoni i le malo o le Atua. Pe a oo mai faaosoosoga ia i tatou, afai tatou te faalogo, o le a faamanatu mai e le Agaga Paia ia te i tatou ua uma ona tatou folafola atu e manatua lo tatou Faaola ma usiusitai i poloaiga a le Atua. …
“A o tatou mulimuli i le faataitaiga a Iesu, ua faapena foi ona tatou faaali atu o le a tatou salamo ma usiusitai i le tausia o poloaiga a lo tatou Tama Faalelagi. Tatou te faamaualaloina i tatou lava ma se loto momomo ma se agaga salamo a o tatou iloa a tatou agasala ma sailia le faamagaloga i a tatou agasala (tagai i le 3 Ni. 9:20). Tatou te osi feagaiga tatou te ave i o tatou luga le suafa o Iesu Keriso ma manatua pea o Ia. …
“… Ou te tatalo ina ia malamalama i tatou taitoatasi o tagata o Lona malo o lo tatou papatisoga ma le faamauga o le faitotoa lea i Lona malo. Pe a tatou ulu atu i ai, tatou te osi feagaiga ina ia i ai i Lona malo—faavavau!” Robert D. Hales, “ O Le Feagaiga o le Papatisoga: O le i ai i le Malo ma ni o le Malo” Liahona, Ian. 2001, 7–8, 9).
Fai atu i tamaiti aoga fesili nei:
Na faapefea e le papatisoina ona fesoasoani ia te oe e mulimuli i le faataitaiga a Iesu Keriso i le faataunuuina o mea tonu uma?
Tuu atu i tamaiti aoga se taimi e mafaufau ai pe o faapefea ona latou ola i tulaga faatonuina o le amiotonu e pei ona faataitaia e le Faaola i Lona papatisoga. Fai i tamaiti aoga e mafaufau loloto pe o a nisi mea e mafai ona latou faia e faaali ai le usiusitai i le Tama Faalelagi.