Givhan tru long Ol Jos Aktiviti

Winta i stap kam, mo David Dickson i nogat wan aedia blong olsem wanem bae hem i kipim famli blong hem i wom.

David, waef blong hem, mo tufala gel blong hem i jes muv i kam long siti blong Fredonia, Arizona, USA, wan ples we i drae mo i stap antap, we ol bigfala red klif i raonem wetem ol smosmol tri mo ol plant we i grin truaot long ful yia.

Haos we famli Dickson i rentem i stap dipen long wan stov we i yusum faea wud olsem mein ples blong karem hot win long hem. David i lanem kwiktaem se blong stap hipimap ol faea i wan skil we i nid blong gat from ol winta long Fredonia i fulap long sno mo aes.

“Mi no bin gat eni faea wud o wan jenso o !iven gat save ia long olsem wanem blong yusum wan!” David i talem. “Mi no save wanem bae mi mekem.”

Sam long ol wod memba oli bin askem David sapos famli blong hem i gat inaf faea wud blong save go tru long winta. “I no tekem long taem tumas blong oli luksave se mi no gat inaf,” David i talem. “Ol elda blong kworom oli askem blong helpem mi blong hipimap faea wud. Mi bin fulap wetem fasin blong talem tangkyu, mo akseptem help blong olgeta.”

I no long taem, David i faenem aot se trip ia blong hipimap ol faea wud i wan long ol fulap trip aktiviti we wod i planem gud, oganaesem gud, mo kam gud long hem. Wan Satedei moning, David, ol elda blong kworom, mo ol nara wod memba oli go long ol maonten long wan grup blong ol trak mo trela.

“Long wan aftenun nomo, mo tangkyu long ol tul mo save, ol memba blong wod i givim famli wan hip blong faea wud we inaf blong stap tru long tu winta,” David i talem. “Be wanem i moa impoten, i we oli bin tijim mi evri samting mi nidim blong save abaot olsem wanem blong hipimap faea wud miwan. Long taem we bae mi lego Fredonia, mi bin save olsem wanem blong yusum wan jenso, mo mi bin help long fulap nara aktiviti blong hipimap faea wud bitim we mi save kaontem.”

Ol kaen wod aktiviti olsem i no bildim nomo wan gudfala rilesensip nomo long medel blong ol memba blong Jos, be i bildim tu, ol gudfala rilesensip wetem evriwan long komuniti.

“Mi tingbaot wan woman, we i no wan memba blong Jos, we i bin niu long eria ia,” David i talem. “Hem i stap bonem ol timba blong haos nomo blong kipim hom blong hem i wom. Taem mifala i bin lanem abaot situesen blong hem, mifala i mekem sua se hem i bin gat inaf faea wud blong go tru long winta ia. Hem i fulap long bigfala tangkyu mekem se i no save toktok.”

Ol efot blong givhan long Fredonia i mekem sua se evriwan i bin stap sef mo wom truaot long winta.

Taem Meg Yost i stap mekem misinari wok long Romania, oltaem hem mo kompanion blong hem i stap visitim wan famli we i nomo stap kam long jos long taem. “Famli Stanica i wan long ol famli long ol fas memba blong Jos long Romania,” Meg i talem, “mo mifala i lavem olgeta.”

Taem i kam long taem blong plan mo oganaesem wan branj aktiviti, ol lida oli disaed se branj ia bae i wan “Paeonia Naet.” Hemia bae i wan naet blong selebretem ol paeonia we oli bin gat bigfala karej blong krosem Yunaeted Stet blong kasem Sol Lek Vali. Bae hem i wan janis tu, blong givim ona i go long ol paeonia blong Jos long Romania.

“Mifala i ting se bae i wan gud wei blong sam long ol memba blong serem testemoni blong laef blong olgeta we i bin jenis mo olsem wanem oli bin luk Jos i gro long Romania,” Meg i talem. “Kwiktaem mifala i ting se famli Stanica i mas pat long aktiviti ia. Mifala i invaetem olgeta blong tekpat, !mo oli bin glad tumas!”

Long naet blong aktiviti, famli Stanica i no kam yet be i taem blong aktiviti i stat nao.

“Mifala i wari se bae oli no kam,” Meg i tingting bak. “Be long stret taem, oli wokbaot i kam tru long doa. Famli Stanica i serem wan naes testemoni abaot gospel mo Jos. Oli bin storian mo mekem fren tu, wetem ol nara memba we oli nomo luk long taem.”

Ol memba blong branj i openem ol han blong olgeta mo welkamem famli Stanica. Long nekis Sandei, Meg i glad tumas blong luk Sista Stanica long jos.

“Taem mi bin visitim branj sam manis afta, !hem i stap kam yet!” Meg i talem. “Mi ting se janis ia blong serem testemoni blong hem mo fil olsem hem i pat mo se oli nidim hem long branj, i bin helpem hem fulap.”

Pikja

women talking

• Planem ol aktiviti we i folem ol nid: Ol aktiviti oli wan gudfala wei blong ansarem ol defren kaen nid. Oli save planem folem ol stret nid blong wanwan man, woman o grup. Oli mas folem ol nid blong olgeta we oli tekpat, we i sapos oli nid blong save wanwan long olgeta moa, lanem moa abaot gospel, o filim Spirit.

• Invaetem evriwan: Taem yu stap planem ol aktiviti, mekem wan spesel efot blong invaetem olgeta we bae oli kasem wan gudfala samting aot long aktiviti ia sapos oli tekpat. Tingbaot ol niu memba, ol les-aktiv memba, ol yut, ol yang singgel adalt, ol pipol wetem disabiliti, mo ol pipol we oli gat defren bilif. Invaetem olgeta i kam long aktiviti we oli intres long hem, mo talemaot hamas bae yu hapi blong oli kam.

• Leftemap tingting blong tekpat: Olgeta we yu invaetem olgeta bae oli kasem moa aot long ol aktiviti sapos oli gat janis blong tekpat. Wan wei blong leftemap tingting blong oli tekpat i blong gat wanwan man o woman i yusum ol presen, skil o talen blong olgeta long taem blong aktiviti.

• Welkamem evriwan: Sapos ol fren blong yu i kam long aktiviti, mekem evri samting yu save mekem blong mekem olgeta i fil welkam. Mekem semmak, sapos yu luk ol man we yu no save, mekem fren wetem olgeta mo !welkamem olgeta tu!