Wanem Nao STORI blong KRISMES I Tijim Yumi Abaot WOK blong GIVHAN

Man we i wok long hotel i no bin mekem rum blong Sevya, !be yumi no mas mekem semmak mistek ia! Yumi save mekem rum blong Sevya long ol hat blong yumi taem yumi mekem rum blong ol brata mo sista blong yumi raon long ol tebol blong yumi, insaed long ol hom mo insaed long ol tradisen blong yumi. Plante tradisen blong famli i save kam moa swit mo iven gat plante memori taem yumi invaetem ol nara pipol blong joenem yumi. Daiana mo famli blong hem oli gat wan tradisen blong stap invaetem wan naraman blong kam spendem Krismes wetem olgeta. Evri Disemba bae oli toktokraon mo tokbaot huia blong oli save invaetem.² Ating famli blong yu i save statem wan sem tradisen olsem. Ating wan we yu stap givhan long hem bae i laekem blong joenem famli blong yu blong singsing ol Krismes singsing tugeta. Yu save mekem tu wan ples long taem blong kakae long aftenun blong wan naraman we i nogat wan famli long eria ia.

?Wanem wan moa gud wei blong selebretem Sevya ia bitim we blong folem eksampol blong Hem blong invaetem wan narawan blong joen? Tingbaot se Hem i invaetem “evriwan blong kam long Hem mo tekem pat blong gud fasin blong Hem; mo Hem i no tanem baksaed blong Hem long eniwan we i kam long Hem, blak mo waet, slef mo fri, man mo woman; mo Hem i tingbaot olgeta we oli no gat respek long tru God; mo evriwan i semmak long God, ol Jiu tugeta wetem ol Jentael.” (2 Nifae 26:33). Mekem rum mo invaetem ol narawan blong joen.

I luk gud mo stret se ol man blong lukaot long ol sipsip bae oli save stap olsem ol fas wan blong welkamem Sevya taem Hem i bebi. Ol profet blong bifo oli lukluk long Jisas Kraes olsem “Man blong lukaot sipsip blong Isrel” (Ol Sam 80:1) mo wan “Man blong Lukaot long Sipsip ova long ful wol” (1 Nifae 13:41). Mo Kraes Hemwan i bin talem, “Mi nao, gudfala man ya blong lukaot long sipsip, mo mi save ol sipsip blong mi” (Jon 10:14). Fasin ia blong save gud mo oltaem lukaot long sipsip blong yumi i wan ki pat blong gaedem mo givhan olsem we Sevya i stap mekem.

Wetem ol laet we i saen mo ol dekoresen we i naes mo flas, i gat plante samting blong lukluk long taem blong Krismes. Be maet samting we i naes moa we yumi save faenem long sisen ia i taem we yumi tanem tingting mo lukluk blong yumi i go long olgeta we yumi stap givhan long ol, mo blong stap lukaot gud long ol sipsip blong yumiwan. Fasin blong stap lukaotgud long wan, i we yumi raetem daon ol fevret kakae o askem olgeta abaot ol holidei plan blong olgeta. Yumi stap lukaotgud long wan, taem yumi luksave mo helpem ol narawan wetem ol nid blong olgeta—tugeta hemia we yumi save luksave mo hemia we yumi no luksave.

Taem hasban blong Cheryl, Mick i ded, hem i bin harem nogud bigwan. Fasfala Krismes we hasban blong Cheryl bae i no stap wetem hem i stap kam kolosap, mo filing ia blong stap hemwan i gro bigwan. Tangkyu tumas we givhan sista blong hem, Shauna, i bin stap. Shauna mo hasban blong hem, Jim, tufala i invaetem Cheryl plante taem long ol sot trip blong holidei wetem tufala. Tufala i bin luk kot blong Cheryl we i olfala finis mo tokbaot blong mekem wan samting long hem. Sam dei i pas bifo Krismes, Shauna mo Jim i karem wan Krismes presen blong Cheryl: wan naes mo niufala kot. Oli bin luksave nid blong Cheryl long saed blong bodi blong gat wan kot we i wom, be tu, ol nid blong hem long saed blong filing mo kamfot mo blong gat fren. Tufala i bin tekem step blong rere long ol taem blong nid mo mekem i hapen long evri paoa blong tufala, mo tu, blong soem wan gudfala eksampol long olsem wanem yumi save lukaot long ol sipsip blong yumi.³

“Bambae yumi go naoia” !hem i wan invitesen blong plante glad mo paoa! Ol man blong lukaot long sipsip oli no ting se ol fren blong olgeta bae oli taet tumas blong mekem trip ia. Oli no wokbaot kwaet long rod ia i go long Betlehem olgetawan nomo. Oli tanem olgeta wanwan i go long narawan mo talem se “!Bambae yumi go naoia!”

Taem yumi no save invaetem ol fren blong yumi blong kam luk Sevya olsem wan bebi, be yumi save invaetem olgeta blong filim spirit blong Krismes (o spirit blong Kraes) taem oli stap mekem seves wetem yumi. “Wei blong mekem spirit blong Krismes i kam moa bigwan i blong go aot wetem bigfala fasin blong stap kaen mo givim samting long olgeta raon long yumi mo givimaot long yumiwan,” Bonnie L. Oscarson, foma Yang Woman Jeneral Presiden i bin talem.⁴ Pikjarem long maen blong yu, se yu stap holem wan kandel. Ol narawan bae oli save luk gud mo kasem wan gudfala samting aot long laet blong kandel blong yu, be pikjarem long maen blong yu, wanem wom o gudfala filing bae oli save filim sapos yu yusum kandel blong yu blong laetem kandel blong olgeta mo letem olgeta i holem laet blong olgetawan.

Kraes Hemwan i bin tijim se olgeta we oli biaen long Hem, bambae oli save gat laet blong laef (luk long Jon 8:12). Blong stap givim seves olsem Hem, i wan wei blong folem Hem mo stap hapi long laet blong promes ia. Serem laet ia taem yu stap invaetem ol narawan blong givim seves wetem yu. ?Olsem wanem nao yu mo olgeta we yu stap givhan long olgeta, i givim seves tugeta? Tugeta yu save rere long wan kakae we yu laekem tumas o mekem wan sapraes long wan naraman wetem wan smol presen o wan not we yu raetem. Tugeta yutufala i save filim laet ia we i kam tru long fasin ia blong folem eksampol blong Kraes blong stap givim seves.

I isi blong pikjarem long maen, bigfala glad ia blong ol man blong lukaot long sipsip, taem we oli stap talemaot sapraes nius ia we Kraes i bon long ol fulap man ia we oli bin save mitim. !Ol enjel oli anaonsem we Mesaea we oli bin stap profesae long hem i bin kam! Hem i bin stap ia. I tru, blong stap talemaot gud nius blong Sevya i wan stamba tingting blong storian blong taem ia we Jisas Kraes i bon. Ol enjel oli bin singsing. Sta i bin poenem rod. Mo ol man blong lukaot long sipsip oli talemaot i go long plante ples raon long wol.

Yumi save ademap ol voes blong yumi i go long stori blong Krismes ia tru long fasin blong stap talemaot gud nius ia mo blong stap testifae abaot Sevya. “Taem yu gat spesel janis ia blong ripresentem Sevya long ol wok blong yu blong givhan, askem yuwan, ‘?Olsem wanem mi save serem laet blong gospel wetem man, woman ia o famli ia?’” Sista Jean B. Bingham, Rilif Sosaeti Jeneral Presiden i bin tijim. ?Wanem nao Spirit i talem long mi blong mekem?”⁵

Hemia samfala tingting blong yu save tingting long hem taem yu stap lukaotem blong save olsem wanem yu save serem testemoni blong yu abaot Sevya mo gospel blong Hem:

• Faenem wan skripja we i tajem yu abaot Sevya o filing o tingting blong yu long from wanem yu stap gat fasin blong talem tangkyu long Hem. Serem wetem olgeta we yu givhan long ol.

• Sendem wan teks o wan sosol media mesej wetem wan Krismes vidio. !I gat sam gudgudfala wan long ChurchofJesusChrist.org!

• Talem long wan fren abaot wan spesel memori o kastom we i rimaenem yu long Kraes.

Gat fet se Tabu Spirit bae i talemaot witnes long saed blong trutok blong testemoni blong yu, olsem we Hem i bin talemaot witnes long Simeon mo Anna se bebi Jisas i Sevya (luk long Luk 2:26, 38).

“Blong ona wetem wan tru tingting se [Jisas Kraes] i kam long wol,yumi mas mekem olsem we Hem i bin mekem, mo go aot wetem fasin blong gat sore mo fogiv long ol narawan ,” Elda Dieter F. Uchtdorf blong Kworom blong Olgeta Twelef Aposol i talem. “Hemia bae yumi save mekem evri dei tru toktok mo aksen blong yumi. Bae hemia i kam olsem Krismes kastom blong yumi, nomata ples we yumi stap— blong stap gat smolsmol fasin blong stap kaen, fogiv moa, no jaj tumas, gat fasin blong talem tangkyu moa, mo rere oltaem blong givim samting we yumi gat plante wetem olgeta we oli stap long nid.”⁶