Givhan tru long Program blong Ol Pikinini mo Ol Yut

Hat blong program blong Ol Pikinini mo Ol Yut, i lukluk nomo blong traem, evri dei, blong kam moa olsem Sevya, we i bin givhan long wan fasin we i stret evriwan. Plante long olgeta we oli bin tekpat long program ia, oli bin lanem se moa yu progres long ol defren eria blong laef blong yu, moa yu gat tul blong save help o givhan long ol narawan.

Be wetem program blong Ol Pikinini mo Ol Yut, yu no nid blong wet kasem taem yu lanem wan samting blong save blesem ol narawan. Aksen ia blong stap lanem samting, hem i givim finis ol janis blong givhan.

Blong wan yang man we nem blong hem i, Profet, we i stap laef long Gana, blong setemap gol long program blong Ol Pikinini mo Ol Yut blong lan blong plei piano, i bin wan stat nomo. “Hem i gol blong mi tu blong helpem ol nara pipol blong save wanem nao mi mi stap lanem,” Profet i talem.

Iven we hem i no wan tija yet, gol blong hem i gro i kam wan bigfala samting we hem i neva tingting long hem. I gat samples 50 studen we oli stap tekem piano klas long mitinghaos, wetem Profet. Mo ?huia nao i stap tijim Profet mo olgeta nara 50 studen? Alexander M. Mo Kelvin M., we tufala tugeta i gat 13 yia. Kelvin i talem: “Mifala i wantem soem ol aksen blong stap kaen long ol nara pipol.”

Tri dei long wan wik, tufala yut ia oli tijim ol besik piano lesen, we oli fri, i go long evriwan we oli kam blong lanem piano. I gat wan mo gud samting we i bin kamaot long ol piano lesen ia. Samfala long ol studen ia oli presentem Jos tru long ol lesen blong piano, mo afta ol studen ia oli bin stadi long gospel, mo oli bin disaed blong kasem baptaes.

Taem we yumi stap hadwok blong mekem yumiwan i kam antap, yumi save givhan long ol narawan taem yumi stap invaetem olgeta blong joenem yumi.

Pikja

woman preparing food

Foto i kam long Jonas Rebicki

Olsem wan stek Praemeri Presiden, Sabrina Simões Deus Agusto blong Kuritiba, Brasil, i bin luk olsem ol defren divelopmen eria blong wanwan i blesem ol pikinini mo ol yut insaed long stek blong hem. Be tu, hem i bin luk plante wei blong yusum wanem we hem i bin lanem abaot fasin blong developem hemwan long asaenmen blong hem olsem wan givhan sista.

Sista Agusto i talem: “Taem mi developem wan talen, mi save yusum talen ia blong blesem wan we mi stap givhan long hem.”

Sista Agusto i bin tijim wan long ol sista ia we hem i kasem wok blong givhan long hem, blong olsem wanem blong mekem ol joklet trafol (wan joklet loli). Sista ia, naoia i stap mekem mo salem ol joklet trafol ia blong help blong sapotem mane we i kam insaed long hom. “Sam manis afta, mi kasem blesing taem wan nara sista i bin tijim mi olsem wanem blong mekem hani bred, we bae mi save salem,” Sista Agusto i talem. “Blong stap developem mo serem ol talen blong yumi i save blesem laef blong wanwan long yumi mo i save mekem ol rilesensip blong yumi i kam strong moa olsem ol givhan sista.”