Zotërimi Doktrinor: Jakob 1:5–6

“Le të Kërkojë nga Perëndia”

Pamja

Profeti Jozef Smith i Riu, në Korijen e Shenjtë (në Mançester, Nju‑Jork) kur mori Vegimin e Parë. Jozefi portretizohet i gjunjëzuar përpara Perëndisë Atit dhe Jezu Krishtit. Të dy, Perëndia Ati dhe Krishti, portretizohen të veshur me rroba të bardha. Ati po ia paraqet Krishtin Jozefit. Ka pemë në sfond. (Joseph Smith – Historia 1:15–20)

Në një mësim të mëparshëm, “Jakob [Bibël] 1”, ti mësove se Perëndia na bekon me urtësi nëse ia kërkojmë Atij me besim. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargjet te Jakob [Bibël] 1:5–6, të shpjegosh doktrinën dhe t’i zbatosh parimet e marrjes së njohurisë shpirtërore në situata nga jeta reale.

Mëso përmendsh dhe shpjego

Përfytyro një shok ose shoqe që po has vështirësi për të marrë një vendim të rëndësishëm në jetën e vet. Ti e di se ky shok ose kjo shoqe nuk është rritur me besimin se ne mund t’i flasim Perëndisë drejtpërdrejt në lutje.

Kujto që në mësimin e mëparshëm ti studiove të vërtetën vijuese nga Jakob [Bibël] 1:5–6: Perëndia do të na bekojë me urtësi nëse ia kërkojmë Atij me besim.

1. Përgjigju për pyetjet vijuese në ditarin tënd të studimit:

Si mund t’i përdorësh vargjet te Jakob [Bibël] 1:5–6 për të shpjeguar marrëdhënien që Ati Qiellor na fton të kemi me Të? (Mund të jetë e dobishme të përfshish shembuj të pyetjeve që dikush mund të bëjë ose të urtësisë që mund të kërkojë nga Perëndia në lutje, si edhe përvoja vetjake apo shembuj nga shkrimet e shenjta.)

Të jesh i aftë për ta gjetur dhe shpjeguar këtë fragment të zotërimit doktrinor mund të të ndihmojë teksa ua shpërndan ungjillin të tjerëve gjatë gjithë jetës sate. Për të të ndihmuar ta mësosh përmendsh këtë fragment, shiko figurën e Vegimit të Parë të Jozef Smithit në fillim të mësimit ndërkohë që përsërit frazën kyç dhe referencën e shkrimit të shenjtë në vijim sa herë të mundesh brenda një minute: “Në qoftë se ndonjërit nga ju i mungon urtia, le të kërkojë nga Perëndia” (Jakob [Bibël] 1:5–6).

Ushtroje vënien në zbatim

Pamja

I riu Jozef Smith i ulur në një karrige duke lexuar Biblën.

Jozef Smithi është një nga shembujt e shumtë në shkrimet e shenjta të njerëzve që janë bekuar nga ndjekja e parimeve të marrjes së njohurisë shpirtërore. Për ushtrimin vijues të vënies në zbatim, ti do të studiosh një shembull të mënyrës se si ai i zbatoi këto parime në jetën e tij. Para se të fillosh, gjej pak kohë për t’i shqyrtuar shkurtimisht këto parime në paragrafët 5–12 të pjesës “Marrja e Njohurisë Shpirtërore” te Dokumenti Bazë i Zotërimit Doktrinor (2022).

Mendo për atë që ti di tashmë për përvojën e Jozef Smithit. Çfarë pyetjesh pati Jozefi? (Shih te Joseph Smith – Historia 1:8–10.)
Përse është e rëndësishme që ne të kërkojmë përgjigje nga Perëndia për pyetjet tona ashtu siç bëri Jozef Smithi?

Mendo për çdo pyetje që ke ose për urtësinë që po kërkon. Teksa e plotëson veprimtarinë vijuese, mendo se si shembulli i Jozefit për zbatimin e parimeve të marrjes së njohurisë shpirtërore mund të të ndihmojë në situata që kërkojnë urtësi nga Perëndia.

Studio vargjet te Joseph Smith – Historia 1:8, 11–17 dhe merre parasysh ta shenjosh çdo frazë që tregon se si Jozefi i ndoqi parimet e marrjes së njohurisë shpirtërore si adoleshent. Ndonëse mund të kesh tashmë njohuri për historinë e tij, kërko në këto vargje hollësi që zbulojnë dëshirat, qëndrimet dhe besimin e Jozefit përtej asaj që mund të kesh vënë re më parë.

Çfarë shembujsh të Jozefit gjete që vepron me besim, duke mbajtur një këndvështrim të përjetshëm dhe duke përdorur burimet e caktuara në mënyrë hyjnore?

2. Përgjigju për të paktën katër prej pyetjeve vijuese në ditarin tënd të studimit:

Kërko kuptueshmëri të mëtejshme nëpërmjet burimeve të caktuara në mënyrë hyjnore

Si mendon, përse ishte e rëndësishme për Jozef Smithin që të kërkonte përgjigje për pyetjet e tij drejtpërdrejt nga Perëndia?
Çfarë besonte Jozefi se do të ndodhte nëse ai nuk do të drejtohej te Perëndia për të gjetur përgjigje? (Shih te Joseph Smith – Historia 1:13.)
Krahas lutjes, në ç’mënyrë tjetër mund të kërkosh përgjigje nga Perëndia?

Shqyrtoji konceptet dhe pyetjet me një këndvështrim të përjetshëm

Çfarë mendon se dinte Jozefi për Perëndinë që i dha atij siguri për t’ia kërkuar përgjigjet Atij drejtpërdrejt?
Kur përgjigjet për pyetjet e tua nuk vijnë shpejt, në ç’mënyrë është e dobishme të kuptosh se si Ati Qiellor ua zbulon të vërtetën fëmijëve të Tij?
Përse do të donte Satani që ta pengonte Jozefin, dhe ty, t’i lutesh Perëndisë për përgjigje?

Vepro me besim

Si e demonstroi Jozef Smithi të “kër[uarit] me besim, pa dyshuar” (Jakob [Bibël] 1:6), edhe kur Satani u përpoq ta pengonte atë të lutej? (Shih te Joseph Smith – Historia 1:15–16.)
Si mund të të ndihmojë shembulli i Jozefit për pyetjet dhe shqetësimet e tua vetjake? Merre parasysh të bësh një plan specifik për mënyrën se si do të veprosh me besim.