“Jebta 4: Kappukot im Pedped ioon Jetōb,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)
“Jebta 4: Kappukot im Pedped ioon Jetōb,” Kwaļo̧k Gospel eo Aō
Pija
Liaona, jān Arnlod Friberg
Jebta 4
Jebta 4: Kappukot im Pedped ioon Jetōb
Ļōmņak kōn Menin
Ta eo imaron̄ kōm̧m̧an n̄an an kajoor eo an Jetōb Kwojarjar pād ilo mour eo aō im jerbal in jipan̄ an mijenede?
Ta jerbal eo an Jetōb Kwojarjar ilo oktak in?
Ekōjkan aō maron̄ jipan̄ armej ro kōmij katakin en̄jake kareel eo an Jetōb Kwojarjar?
Ekōjkan aō maron̄ kōm̧m̧an bwe jar ko aō en ļapļo̧k meļeļeier?
Ekōjkan aō maron̄ ekatak n̄an kile im̧we ko an Jetōb Kwojarjar?
Kappukōt Tōl eo an Jetōb Kwojarjar
Menin ļetok eo an Jetōb Kwojarjar ej juon iaan menin letok ko reļļap tata me Anij ekar leļo̧k n̄an ajri ro Nejin. Ekanooj aorōk ilo jerbal eo am̧ āinwōt juon mijenede. Kwoj aikuji tōl eo, kajoor in revelesōn eo an Jetōb Kwojarjar ilo am̧ jipan̄ armej ro peptaij, kapen, im oktak.
Bōk tōl eo an Jetōb Kwojarjar ilo mour eo am̧ ej aikuji jerbal in jetōb. Jerbal in ekitbuuj emakijkij ilo jar im ekkatak jeje ko rekwojarjar ejjab m̧ūjkōk. Ej barāinwōt koba kōjparok bujen ko im kien ko an Anij (lale Mosaia 18:8–10, 13). Ej koba erreo ilo bōk m̧ōttan kwojkwoj eo kajjojo wiik (lale Katak im Bujen Ko 20:77, 79).
Kwoj jelm̧ae aikuj ko reppen im jekjek ko aolep raan. Im̧we ko jān Jetōb renaaj jipan̄ eok jeļā ta eo n̄an kōm̧m̧ane im ba. Ilo am̧ kappukōt im jerbali im̧we kein, Jetōb Kwojarjar eo enaaj kōļapļo̧k maron̄ ko am̧ im jerbal in jipan̄ eo eļapļo̧k jān ta eo kwomaron̄ kōm̧m̧an kōn kwe make. E enaaj jipan̄ eok ilo aolep jekjek ko an jerbal in jipan̄ an mijenede im mour eo am̧ make. (Lale 2 Nipai 32:2–5; Alma 17:3; Hilamōn 5:17–19; Katak im Bujen Ko 43:15–16; 84:85.)
Pija
Būreejtōn Russell M. Nelson
“Ilo raan ko rej itok, enaaj maron̄ pen jo̧o̧r ilo jetōb ilo an ejjeļo̧k tōl, jineet, kaenōm̧m̧an, im bōk kareel ko jān Jetōb Kwojarjar eo” (Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96).
Pija
Meram, M̧ool, jān Simon Dewey
Meram an Kraist
Meram an Kraist“ em̧ōj leļo̧k e n̄an aolep armej, bwe en maron̄ jeļā em̧m̧an jān nana” (Moronai 7:16; lale eoon 14–19; lale barāinwōt Jon 1:9). Meram an Kraist ej kōmeramļo̧k, jeļā, im kareel me ej itok jān Jisōs Kraist. Kareel in ej bōk eļap tata menin letok eo an Jetōb Kwojarjar. Enaaj tōl ro me rej kōņaan bōk ekkatak im mour kōn gospel eo an Jisōs Kraist kar kōjepļaaktok.
Jetōb Kwojarjar
Armej in Jetōb Kwojarjar
Jetōb Kwojarjar ej membōr eo kein kajilu an Doulul in Anij. E ej juon armej in jetōb im ejjeļo̧k ānbwinin kanniōk im di ko (lale Katak im Bujen Ko 130:22). E ej Rikaenōm̧m̧an eo, eo Rilo̧mo̧o̧r eo ekar kallim̧ur kake enaaj katakin rikaļoor ro An aolep men ko im bōktok n̄an keememej eo aer ta eo Jisōs ekar katakin (lale Jon 14:26).
Kajoor eo an Jetōb Kwojarjar
Kam̧ool eo me ej itok n̄an ro rikappukōt ro rem̧ool an m̧ool eo m̧okta jān an peptaij eo itok kōn kajoor eo an Jetō Kwojarjar. Aolep armej remaron̄ bōk juon naan in kam̧ool kōn Jisōs Kraist im gospel eo An kar kōjepļaaktok kōn kajoor eo an Jetōb Kwojarjar. “Kōn kajoor eo an Jetōb Kwōjarjar [jej] maron̄ jeļā m̧ool eo kōn men ko otemjej” (Moronai 10:5).
Menin Letok eo an Jetōb Kwojarjar
Menin letok eo an Jetōb Kwojarjar ej jim̧we eo n̄an bōk jemjerā eo ejjab bōjrak an Jetōb Kwojarjar ilo ad erreo. Jej bōk menin letok eo an Jetōb Kwojarjar ālkin ad peptaij kōn dān. Ej leļo̧k kōn kain̄i eo an kapene.
Rikanaan Josep Smith ekar ba: “Ewōr juon oktak ikōtaan Jetōb Kwojarjar eo im menin letok eo an Jetōb Kwojarjar. Kornelius ekar bōk Jetōb Kwojarjar eo m̧okta jān an kar peptaij, eo ekar kajoor in kareel eo an Anij n̄an e kōn m̧ool eo an Gospel eo, bōtaab ekar jab maron̄ bōk menin letok eo an Jetōb Kwojarjar m̧ae iien eo ālkin an ka peptaij” (Teachings of Presidents of the Church: Joseph Smith [2007], 97).
Ej kōn menin letok eo im kajoor eo an Jetōb Kwojarjar me jej kōkwojarjar—eļapļo̧k an kwojarjar, lukkuun dipio, āinļo̧k wōt Anij. Ej kōn pinmuur e an Kraist im kajoor in kōkwojarjar eo an Jetōb Kwojarjar eo me jemaron̄ in bar ļotak ilo jetōb ilo ad kōjparok bujen ko jej kōm̧m̧ani ippān Anij (lale Mosaia 27:25–26).
Jetōb Kwojarjar in Kallim̧ur
Jetōb Kwojarjar eo ej barāinwōt kōnono kake āinwōt Jetōb Kwojarjar in Kallim̧ur (lale Katak im Bujen Ko 88:3). Ilo eddo in, Jetōb Kwojarjar eo ej kapen bwe kain̄i ko an priesthood eo jej būki im bujen ko jej kōm̧m̧ani rej em̧m̧an n̄an Anij. Ro me rej liāp kōn Jetōb Kwojarjar in Kallim̧ur eo renaaj bōk aolep men ewōr ippān Jemed (lale Katak im Bujen Ko 76:51–60; Epesōs 1:13–14; Unin Tōl ko n̄an Jeje Ko Rekwōjarjar, “Jetōb Kwōjarjar in Kallim̧ur”).
Aolep kain̄i ko im bujen ko aikuj in liāpi kōn Jetōb Kwojarjar in Kallim̧ur eo n̄an aer em̧m̧an ālkin mour in (lale Katak im Bujen Ko 132:7, 18–19, 26). Liāp jab in ej pedped ioon tiljek eo an ejjab bōjrak.
Menin letok ko an Jetōb
Irooj ej letok n̄an kōj menin letok ko an Jetōb eo n̄an kōjeraam̧m̧an kōj im n̄an kōjerbali n̄an kōjeraam̧m̧an ro jet (lale Katak im Bujen Ko 46:8–9, 26). N̄an waanjon̄ak, mijenede ro me rej ekkatak juon kajin kāāl remaron̄ bōk menin letok eo an lo ko n̄an leļo̧k n̄an er jipan̄ n̄an katakin ro jet ilo kajin eo aer make.
Jejjo iaan menin letok ko an Jetōb rej kōmeļeļeik ilo Moronai 10:8–18, Katak im Bujen Ko 46:11–33, im 1 Korint 12:1–12. Men kein rej jejjo wōt iaan elōn̄ menin letok ko an Jetōb. Irooj emaron̄ kōjeraam̧m̧an kōj kōn menin letok ko jet pedped ioon tiljek eo ad, aikuj ko ad, im aikuj ko an ro jet.
Rilo̧mo̧o̧r eo ej kūr kōj n̄an m̧ool in kappukōt menin letok ko ilo jetōb (lale Katak im Bujen Ko 46:8; 1 Korint 14:1, 2). Menin letok kein rej itok kōn jar, tōmak, im kijejeto—im ekkar n̄an ankilan Anij.
Ekōjkan an Piter im Jon kar kappukōt menin letok ko ilo jetōb?
Ekōjkan an Anij kar uwaake jar ko aer?
Ta eo kwomaron̄ ekkatak jān en̄jake in kōn jerbal eo am̧ make?
Pija
kumi rej jar
Kajoor eo an Jetōb ilo Oktak
Oktak ej waļo̧k kōn kajoor eo an Jetōb Kwojarjar. Jerbal eo am̧ ej n̄an jipan̄ bōktok kajoor eo an Jetōb n̄an mour eo an juon armej. Jet wāween ko kwomaron̄ kōm̧mani rej elmakoti itulaļ:
Kappukōt n̄an bōk Jetōb eo ippām ilo jar, riiti jeje ko rekwojarjar, im kōjparok bujen ko am̧ .
Katakin kōn Jetōb kōn Rilo̧mo̧o̧r im ennaan eo an Jepļaaktok eo. Ļoor tōl eo an Jetōb ilo ukukōt ennaan eo am̧ n̄an kajjojo aikuj ko an armej ro.
Kam̧ool bwe kwojeļā kōn kajoor eo an Jetōb Kwojarjar bwe ta eo kwoj katakin ej m̧ool. Ilo am̧ kam̧ool, Jetōb Kwojarjar eo emaron̄ kwaļo̧k kam̧ool n̄an ro jet.
Kajjitōk ippān armej ro n̄an kōm̧m̧an, im rie er ilo kōjparok kallim̧ur ko aer. Ilo an armej kōjparok kien ko, renaaj en̄jake an ļapļo̧k an kajoor eo an Jetōb Kwojarjar. Lale jebta 11.
Etale kajjitōk ko ippān armej ro kōn en̄jake ko aer ilo aer kar jerbale kūr eo. Tōmak eo aer enaaj eddōkļo̧k ilo aer ukweļo̧k, pokake kien ko, im kōjparok kallim̧ur ko aer. Jipan̄ er kile an Jetōb jerbal ippāer.
Pija
Būreejtōn M. Russell Ballard
Būreejtōn M. Russell Ballard ekar katakin: “Oktak eo em̧ool ej itok kōn kajoor eo an Jetōb. N̄e Jetōb eo ej un̄ur bōro ko bōro ko rej oktak. N̄e kajjojo armej ro … rej en̄jake an Jetōb eo jerbal ippāer, ak n̄e rej lo kein kam̧ool eo kōn iakwe eo an Irooj im menwōd ilo mour ko aer, rej katakin im kōkajoorļo̧k ilo jetōb im tōmak eo aer ilo E ej ļapļo̧k. En̄jake kein kōn Jetōb eo rej make itok n̄e juon armej ej m̧ōņōņō n̄an idajon̄jon̄e naan eo [lale Alma 32:27]. En̄in wāween ad itok n̄an en̄jake an gospel eo m̧ool” (“Now Is the Time,” Ensign, Nov. 2000, 75).
Ekkatak Am̧ Make im Ippān Eo M̧ōttam̧
Katak juon ak elōn̄ļo̧k eoon kein. Ilo am̧ riit, kappukōt n̄an meļeļe ta eo armej eo ej en̄jake ilo jekjek eo an oktak. Ļo̧o̧ke en̄jake ko am̧ ilo jōnōļ in ekkatak eo am̧. Ekōnono kōn kōļmenļo̧kjeņ ko am̧ ippān mijenede ro jet im membōr ro.
Katak juon ak elōn̄ļo̧k eoon kein. Ilo am̧ riit, ļōmņak kōn ekōjkan am̧ kōkōm̧anm̧anļo̧k am̧ katakin kōn kajoor in oktak eo an Jetōb. Ļo̧o̧ke en̄jake ko am̧ im im̧we ko ilo jōnōļ in ekkatak eo am̧. Ekōnono kōn aitia ko am̧ ippān mijenede ro jet im membōr ro.
N̄an jipan̄ ro jet erom oktak, kwoj aikuj katakin kōn kajoor eo an Jetōb (lale Katak im Bujen Ko 50:13–14, 17–22). Irooj ekar ba, “Im Jetōb eo enaaj lewōj n̄an kom̧ jān jar in tōmak; im eļan̄n̄e kom̧ij jab bōk Jetōb eo kom̧ij jamin maron̄ katakin” (Katak im Bujen Ko 42:14).
Ilo am̧ jar kōn jipan̄ ilo katakin eo am̧, kajoor eo an Jetōb Kwojarjar enaaj bōkļo̧k katak ko am̧ “n̄an būruōn ro nejin armej” (2 Nipai 33:1). Ilo am̧ katakin kōn Jetōb im ro jet rej bōk Jetōb eo, kwonaaj “remeļeļe doon” im “ketak im lan̄lōn̄ ippān doon” (Katak im Bujen Ko 50:22).
Ekōjkan Jar
Jisōs ekar katakin kōj ekōjkan jar Matu 6:9–13; 3 Nipai 18:19). Jar ilo m̧ool im kōn kōttōpar em̧ool n̄an jerbali im̧we ko ilo am̧ būki jān Jetōb Kwojarjar. Jar eo ewejepedik ej aikuji kijejeto eo ettā, ej jipan̄ (lale Moronai 10:3–4; Katak im Bujen Ko 8:10).
Kōjebal kajin eo me ej kwaļo̧k iakwe, n̄an kautiej Anij. Ilo kajin In̄lij, kōjerbal kajin jeje ko rekwojarjar ko āinwōt Thee, Thou, Thy, im Thine ijello̧kin ko ekkā kōjerbali you, your, im yours.
Aolep iien kwaļo̧k kam̧m̧oolol. Juon kijejetoeo ekkar n̄an kam̧m̧oolol naaj jipan̄ eok kile ekōjkan an Anij tiriam̧o kake mour eo am̧ Enaaj jipan̄ kōpeļļo̧k būruōm̧ im am̧ ļōmņak n̄an im̧we.
Jar “kōn aolep kajoor in bōro” kōn iakwe em̧ool n̄an likūt ioom̧ (Moronai 7:48). Jar kōn ro jet kōn etaer. Jar kōn ro kwoj katakin er. Kappukōt im̧we kōn ekōjkan am̧ naaj kūr im jipan̄ er itok n̄an Kraist.
Ekkatak Am̧ Make
Ekkatak kōn jar eo an Irooj Matu 6:9–13). Kajjitōk ippam̧ make kajjitōk kein, im ļo̧o̧ke im̧we ko ilo jōnōļ in ekkatak eo am̧.
Ekōjkan an eddo eo am̧ kiiō āinwōt juon mijenede jelet jar ko am̧?
Ilo wāween ta ko jar ko am̧ rej kappukōt n̄an kōjeraam̧m̧an mour ko an ro jet?
Ekōjkan am̧ jar n̄an am̧ maron̄ anjo̧ ioon kapo?
Ekōjan am̧ jar kōj jipan̄ ilo kakūrm̧ool aikuj ko am̧ ilo jetōb im kanniōk?
Ekōjkan am̧ leļo̧k aiboojoj eo n̄an Anij n̄e kwoj jar?
N̄āāt n̄an Jar
N̄āāt eo kwoj aikuj jar? Irooj ekar ba, “Niknik kappukot, jar iien otemjej, im lōke, im aolep men ko naaj jerbal ippān doon n̄an em̧m̧an eo ami” (Katak im Bujen Ko 90:24).
Alma ekar ba, “Pepe ippān Irooj ilo aolep kōm̧m̧an ko am̧, im Enaaj tōl eok n̄an aenōm̧m̧an; aaet, n̄e kwōj babu ilo bon̄ kwōn babu n̄an Irooj, bwe En maron̄ oņaake eok ilo am̧ kiki; im n̄e kwōj jerkak ilo jibbon̄ buruōm̧ en obrak kōn kam̧m̧oolol ko n̄an Anij” (Alma 37:37; lale barainwōt 34:17–27).
Irooj ej kajjitōk ippam̧ n̄an kakoņ iien ko ejjeļo̧k keroro ie, ittiņo n̄an jar: “Deļo̧n̄ļo̧k ilo uukiļo̧k ko ami … jar n̄an Jemām” (3 Nipai 13:6; lale barāinwōt eoon 7–13).
Būreejtōn Gordon B. Hinckley ekar katakin: “Aolep jibbon̄ … , mijenede ro rej aikuj bukwelōlō im kajjitōk ippān Irooj n̄an kōtļo̧k loeer im kōnono kōn er n̄an kōjeraam̧m̧an ro renaaj katakin er. Eļan̄n̄e renaaj kōm̧m̧ane menin, juon meram enaaj itok n̄an mour ko aer. Enaaj wōr juon lo̧udin̄din̄ eļapļo̧k n̄an jerbal eo. Renaaj itok n̄an jeļā bwe ilo juon en̄jake em̧ool, rej ro rikarejeran Irooj kōnono ilo Etan” (“Missionary Service,” First Worldwide Leadership Training Meeting, Jan. 11, 2003, 20).
Lōke Anij N̄e Jej Jar
Wōr tōmak ilo Anij ej meļeļe in lōke E. Menin ekoba lōke Ankilan im iien eo An ilo uwaake jar ko am̧ (lale Aiseia 55:8–9). Būreejtōn Dallin H. Oaks ekar katakin:
“Jekdo̧o̧n ta ewi kajoor in tōmak eo ad, ejjab maron̄ kwaļo̧k juon jemļo̧k eo ej jum̧ae Ankilan eo me ewōr ad tōmak. Keememej bwe n̄e jar ko am̧ rejjab āinwōt uwaak ilo wāween eo ak ilo iien kwoj kōņaan. Kōjerbal tōmak ilo Irooj Jisōs Kraist ilo aolep iien unin kōnono eo ekkar n̄an laajrak an lan̄, n̄an em̧m̧an eo im m̧ōņōņō eo im māletlet eo im iien eo an Irooj. N̄e ewōr ippād kain tōmak in im lōke ilo Irooj, ewōr ippād kōjparok eo em̧ool im ineem̧m̧an eo ilo mour ko ad” (“The Atonement and Faith,” Ensign, Apr. 2010, 30).
Ikkijen jar ko me āinwōt rejjab uwaak, Būreejtōn Russell M. Nelson ekar ba:
“Ijeļā en̄jake jab in! Ijeļā mijak ko im jepeļļo̧k ko an kain iien kein. Bōtaab ibar āinwōt jeļā bwe jar ko ad rejjamin kowaani. Tōmak eo ad ejjamin jab kam̧m̧oolol kake. Ijeļā bwe kōļmenļo̧kjeņ eo an Jemedwōj Ilan̄ eo emāletlet otem māletlet eļap an ļap jān eo ad. Ilo ad jeļā kōn inepata ko ad ilo mour in im metak, E ejeļā kōn eddōkļo̧k eo im kōjatdikdik eo ad ilo mour jab wabanban eo ad. Eļan̄n̄e jej jar n̄an jeļā Ankilan im ajeļo̧k kōj make n̄ane kōn kijenmej im peran, kemour in lan̄ eo emaron̄ bōk jikin ilo wāween eo An make im iien eo” (“Jesus Christ—the Master Healer,” Liahona, Nov. 2005, 86).
Pija
Iaļ eo n̄an Emmaus, jān Greg Olsen
Ekkatak im Kile Im̧we ko an Jetōb
Ej aorōk n̄an eok im armej ro kwoj katakin n̄an ekkatak n̄an kile kōnono ko jān Jetōb. Jetōb ekkā kōnono ilo mera, n̄an en̄jake ko am̧, kōļmenļo̧kjen, im bōro. Rikanaan Elijah ekar lo bwe ainikien Irooj ekar jab pād ilo kōto, m̧akūtkūt in laļ, ak kijeek—bōtaab ekar pād ilo “juon ainikien e dik” (1 Kiin̄ Ro 19:12). Ej “jab juon ainikien jourur,” bōtaab ijello̧k “juon ainikien emera in lur eweeppān, āinwōt n̄e eaar juon unoojdikdik,” im mekarta emaron̄ “kabijļo̧k em̧ool n̄an lukkuun bōro” (Hilamōn 5:30).
Kōnono ko jān Jetōb emaron̄ oktak en̄jaki n̄an armej ro jet. Mekarta ekōjkan an kōnono kein en̄jaki, jeje ko rekwojarjar rej katakin ekōjkan kūle er. N̄an waanjon̄ak, Jetōb enaaj katakin eok im tōl eok n̄an kōm̧m̧an em̧m̧an. E enaaj kōmeramļo̧k ļōmņak eo am̧. E enaaj tōl eok n̄an etetal ettā im ekajet ilo jim̧we. (Lale Katak im Bujen Ko 11:12–14 im “Ekkatak Am̧ Make” bo̧o̧k eo tokālik ilo jekjōn in).
Ilo uwaake kajjitōk eo “Ekōjkan ad kile im̧we ko an Jetōb?” Būreejtōn Gordon B. Hinckley ekar riiti Moronai 7:13, 16–17. Innām ekar ba:
“En̄in ej juon teej, n̄e men eo de eo kar ba im kōm̧m̧ane. Ej ke kareel juon armej n̄an kōm̧m̧an em̧man, n̄an jutak, n̄an jutak wōt, n̄an kōm̧mane men eo ejim̧we, n̄an jouj, n̄an jouj? Innām ej jān Jetōb eo an Anij. …
“… Eļan̄n̄e ej kūr n̄an kōm̧m̧an em̧m̧an, ej jān Anij. Eļan̄n̄e ej kajjitōk n̄an kōm̧m̧an nana, ej jān devil eo. … Im eļan̄n̄e kwoj kōm̧m̧ane men eo ejim̧we im eļan̄n̄e kwoj mour ilo iaļ eo ejim̧we, kwonaaj jeļā ilo būruōm̧ ta eo Jetōb eo ej ba n̄an kwe.
“Kwoj kile im̧we ko an Jetōb kōn leen ko an Jetōb—eo me ej kōmeramļo̧k, eo me ej kalōk, eo me ej em̧m̧an im jipan̄ im ļōn̄aj im ej tōl kōj n̄an ļōmņak ko rem̧m̧anļo̧k im naan ko rem̧m̧anļo̧k im jerbal ko rem̧m̧anļo̧k an Jetōb eo an Anij” (Teachings of Gordon B. Hinckley [1997], 260–61).
Ilo am̧ kappukōt im ļoor tōl eo an Jetōb Kwojarjar, maron̄ eo am̧ n̄an kile im meļeļe im̧we ko An naaj eddōkļo̧k ilo iien ko (lale 2 Nipai 28:30). Ilo jet wāween ko, ļapļo̧k am̧ iminene n̄an kajin eo an Jetōb eo ej āinwōt ekkatak bar juon kajin. Ej juon jekjek jidik kōn jidik me ej aikuj niknik, kijejeto ilo kijenmej.
Kappukōt tōl eo an Jetōb Kwojarjar kōn dipio in kōttōpar an bōro. Eļan̄n̄e kwoj obrak kōn bar jet men ko, kwomaron̄ jab en̄jake unoojdikdik eo emera an Jetōb. Ak E emaron̄ kōttar n̄an kōnono m̧ae iien kwoj kappukōt kareel eo An kōn juon kōņaan ettā n̄an jerbal ilo im̧we ko An.
Ainikien ko ilo laļ in rej jiāe kōn ajeļo̧k eo ad. Emaron̄ pidodo aer kadiwōj im̧we ko ilo jetōb ijello̧kin kwoj leļo̧k ijo am̧ n̄an Jetōb eo ilo būruōm̧. Keememej kapilōk in jān Irooj: “Ikōn̄ wōt im jeļā ke N̄a Anij” (Sam Ko 46:10; lale barāinwōt Katak im Bujen Ko 101:16).
Pija
Elder David A. Bednar
“Anij ej kōjerbal elōn̄ jon̄ak ko n̄an kwaļo̧k revelesōn ko an n̄an ļaddik ro im leddik ro Nejin, ko āinwōt ļōmņak ko n̄an ļōmņak im en̄jake ko n̄an bōro, ettōn̄ak, … im im̧we. Jet revelesōn rej būki ilo iien eo em̧ōkaj tata im kajoor; jet rej kūli jidik kōn jidik im wujlepļo̧k. Bōk, kile, im uwaake revelesōn ko jān Anij rej menin letok ko ilo jetōb me jej aolep aikuj būki im kappukōt ilo jetjet” (David A. Bednar, “The Spirit of Revelation in the Work,” 2018 mission leadership seminar).
Ekkatak Am̧ Make
Ekkatak jeje ko rekwojarjar ilo tebōļ in. Ļōmņak kōn iien ko kwar en̄jake jabdewōt en̄jake ko, ļōmņak ko , ak im̧we ko kar kōmeļeļeik ilo eoon kein. Ilo am̧ ekkatak im bōk en̄jake eo, kobaik eoon ko jet n̄an laajrak in. Ļōmņak kōn ekōjkan am̧ maron̄ kōjerbal pedped in katak ko n̄an jipan̄ ro jet en̄jake im kile Jetōb eo.
Āinwōt rikarejeran Irooj, kwoj kōm̧m̧ane jerbal eo an Irooj ilo wāween eo An im kōn kajoor eo An. Rikanaan Josep Smith ekar katkain bwe “ejjeļo̧k armej emaron̄ kwaļo̧k gospel eo ilo an jako Jetōb Kwojarjar eo” (Teachings: Joseph Smith, 332).
Lōke Jetōb eo n̄an tōl eok ilo aolep jekjek an jerbal eo am̧. E enaaj kōmeramļo̧k im im̧we eok. E enaaj jipan̄ eok lo armej ro n̄an katakin im naaj bōktok kajoor n̄an katak eo am̧. E enaaj jipan̄ ilo am̧ jipan̄ membōr ro, membōr ro rej bar ro̧o̧ltok, im rioktak ro rekāāl kōkajoorļo̧k tōmak eo aer.
Jet mijenede ro rej en̄jake lōke ilo er make. Ro jet ejjeļo̧k kain lōke rōt in. Ettā ilo am̧ likūt lōke eo am̧ im tōmak eo ilo Jisōs Kraist, ejjab ilo kwe make. Pedped ioon Jetōb eo ijello̧kin tōļan ko im maron̄ ko am̧ make. Jetōb Kwojarjar eo enaaj kōļapļo̧k kijejeto ko am̧ eļap jān maron̄ ta eo kwomaron̄ kōm̧m̧ane kōn kwe make.
Ekkatak Jeje ko Rekwojarjar
Ekkatak kōn eoon kein im ļōmņak kōn ekōjkan aer uwaake kajjitōk ko raorōk me kwoj aikuj kajjitōk kajjojo raan. Ekōjkan am̧ maron̄ kōjerbal katak ko ilo eoon kein n̄an lo kijejeto ko am̧, m̧wen̄an in karōk ko, im ekkatak am̧ make im ippān eo m̧ōttam̧? Ekōjkan am̧ maron̄ kōjerbal eoon kein n̄an kijejeto ko am̧ n̄an katakin, kūr armej ro n̄an kōm̧m̧ani kallim̧ur ko, im etale kallim̧ur ko?
Ilo am̧ jar kōn im̧we, keidi im̧we ko am̧ ilo jetōb ippān jeje ko rekwojarjar im katak ko an rikanaan ro remour. Im̧we ko jān Jetōb renaaj jokkun wōt juon ippān kein jipan̄ kein.
Kappukōt Revelesōn ilowaan Ijjitōn̄ eo Am̧
Kwon lōke bwe en̄jake ko kwoj būki rej juon wōt ippān ijjitōn̄ eo am̧. Ijello̧kin kwar kūr kōn mālim eo ejetjet, im̧we ko jān Jetōb eo kar jab liwaj n̄an eok n̄an kapilōk ak kajim̧we eo jet. N̄an waanjon̄ak, kwojjamin naaj bōk revelesōn n̄an jiron̄ juon bisop ta eo ej aikuj kōm̧m̧ane ilo kūr eo an.
Pija
Juon Menin Letok an Meram
Kile Kareel eo Em̧ool an Jetōb
Būreejtōn Howard W. Hunter ekar kapilōk: “In lewaj juon naan in kakkōl. … Ij ļōmņak eļan̄n̄e jejjab mejmej karuo … , jemaron̄ jino kajjieon̄ riabe kareel eo em̧ool an Jetōb eo an Irooj kōn jekjek ko rejjab erreo im iņoņooj. Ij n̄ūrbōktak n̄e ej waļo̧k bwe en̄jake eo ekajoor ak kōmejaaļaļ ko rej keidi ippān an Jetōb eo pād. Em̧ool Jetōb eo an Irooj emaron̄ bōktok en̄jake ko rekajoor, ekoba kōmejaaļaļ ko, bōtaab n̄an kwaļo̧k ejjab n̄an pok ippān pād eo an Jetōb eo make” (The Teachings of Howard W. Hunter [1997], 184).
Jab Kajjieon̄ n̄an Kipel Men ko an Jetōb
Men ko an jetōb rejjab maron̄ kipeli. Kwomaron̄ kōpooj juon m̧wil am juon mejatoto me ej karauwaineneitok Jetōb eo, im kwomaron̄ kōpooj eok make, bōtaab kwojjab maron̄ kōmlet ekōjkan ak n̄āāt im̧we ej itok. Kwon kijenmej im lōke bwe kwonaaj bōk ta eo kwoj aikuji n̄e iien eo ejetjet.
Dāpij En̄jake ko ilo Jetōb Rekwojarjar
Āinwōt juon mijenede, emaron̄ ļapļo̧k am̧ jeļā kōn en̄jake ko ilo jetōb jāņ am̧ kar jeļā m̧otakļo̧k ilo mour eo am̧. En̄jake kein rekwojarjar im em̧ool n̄an kōkōm̧anm̧anļo̧k eo am̧ make, kōmeļeļe, ak kajimwe.
Elōn̄ en̄jake kein em̧m̧an tata kōjparoki ilo ittiņo̧. Kwaļo̧ki wōt n̄e Jetōb eo ej kwaļo̧ki bwe kwomaron̄ kōjeraam̧m̧an ro jet kō kōm̧mane āindein (lale Alma 12:9; Katak im Bujen Ko 63:64; 84:73).
Kōjerbal Ekajet eo Am̧ Make Em̧m̧an Tata ilo Jet Waanjon̄ak ko
Jet iien jej kōņaan bwe jen tōl jān Jetōb eo ilo aolep men ko. Ijo ke, emakijkij an Irooj kōņan bwe jen jerbal kōjerbal ekajet eo ad make em̧m̧an tata (lale Katak im Bujen Ko 60:5; 61:22; 62:5). Būreejtōn Dallin H. Oaks ekar katakin:
“Juon ikdeleel n̄an tōl jān Irooj ej juon kajoor, ak ej aikuj itok ippān tok jeļā eo bwe Jemedwōj Ilan̄ ej kōjekdoon elōn̄ jokālet ko kōn wōt jokālet ko ad make. Jokālet an juon make ej juon iaan kein jipan̄ n̄an eddōkļo̧k me jekar aikuj jelm̧aeiki ilo mour in. Armej ro me rej kajjieon̄ leļo̧k aolep jokālet n̄an Irooj im akweļap kōn revelesōn ilo aolep kāālet ejjab to enaaj lo jekjek ko me rej jar n̄an bōk tōl im rejjab bōke. N̄an waanjon̄ak, ekkā an waļo̧k ilo elōn̄ jekjek ko me kāālet ko rejjab lukkuun aorōk ak kālet kein jim̧ōr rekkar.
“Jej aikuj ekkatak kake ilo ļōmņak ko ad, ilo ad kōjerbal kajoor in maron̄ ļōmņak me Rikōm̧anm̧an eo ekar letok n̄an kōj. Innām jej aikuj jar n̄an bōk tōl im jerbal ekkar n̄an e eļan̄n̄e jej bōke. Eļan̄n̄e jej jab bōk tōl, jej aikuj m̧akūtkūt ekkar n̄an jokālet eo ad ejjejet. Armej ro rej wōnm̧aanļo̧k n̄an pukōt tōl an m̧adenļo̧k ilo unin kōnono ko eo Irooj eaar jab kāālet e n̄an tōl kōj emaron̄ make kōm̧m̧ane juon uwaak kōn ettōņak ko aer make ak ikitōltōl, ak remaron̄ in bōk juon uwaak jen m̧adenļo̧k ko reriab” (“Our Strengths Can Become Our Downfall,” Ensign, Oct. 1994, 13–14).
Ekkatak Jeje ko Rekwojarjar
Pedped ioon Jetōb eo ekanooj in aorōk bwe Irooj ej kakkōl kōj n̄an jab kaarmejet ak kowaan Jetōb. Ta eo kwoj ekkatak jān eoon kein an jeje ko rekwojarjar?
Ajije juon peij n̄an ruo kaļōm̧ ko. Kakōļļeik juon kaļōm̧ “Ta eo Irooj ekar Kōm̧m̧ane” im kaļōm̧ eo juon “Ta eo Liai im Niapi raar Kōm̧m̧ane” Riiti bwebwenato eo kōn Liaona eo im libbo̧ņ eo ekar būlo̧k (1 Nipai 16:9–31) ak bwebwenato kōn an Nipai jek juon wa (1 Nipai 17:7–16; 18:1–6). Kōllaajrake iien ko jān bwebwenato eo ilo kaļōm̧ eo ejetjet. Ļōmņak kōn ta eo bwebwenato emaron̄ katakin eok kōn piktok eo an im̧we.
Lale jōnōļ eo am̧ im pukōt iien ko ke kwar tōl jān Jetōb eo ak kar en̄jake juon menin letok an Jetōb. Ļōmņak kōn n̄āāt eo, ia eo im etke en̄jake kein raar waļo̧k. Ekōjkan an kar pein Irooj waļo̧k? Ewi wāween ami kar en̄jake? Keememej en̄jake kein remaron̄ jipan̄ eok kile Jetōb.
Ekkatak Alma 33:1–12 im Alma 34:17–31. Ta kajjitōk ko Alma im Amulek raar uwaaki? (Etale Alma 33:1–2.) Ekōjkan aer kar uwaaki kajjitōk kein? Ta kam̧ool ko raar liļo̧k?
Irooj ekar kallim̧ur bwe Jetōb eo enaaj tōl kōj ilo elōn̄ wāween ko raorōk. Ilo am̧ riiti eoon kein, kile jekjek ko an jerbal eo am̧ me rej aikuji tōl eo an Jetōb. Ta eo pedped in katak ko ilo eoon kein rej meļeļe in n̄an ekkatak eo am̧ make im ippān kampānien eo m̧ōttam̧? n̄an kweilo̧k an district ko̧o̧njeļ, kweilo̧k ko reļļap an zone, iiien peptaij ko, im kweilo̧k ko jet?
Kōnono kōn jar ko kom̧ij kōm̧m̧ani āinwōt kampānien ko. Rej ke tōl jān Jetōb Kwojarjar eo? Ekōjkan ami kar bōk uwaak ko n̄an jar ko ami āinwōt juon kampānien? N̄e kwoj jar āinwōt kampānien, kom̧ij ke:
Tōmak bwe Anij enaaj lewaj n̄an ko̧m̧ ta eo kom̧ij kajjitōk kake ilo jimwe im ekkar n̄an Ankilan?
Kile im leļo̧k kam̧m̧oolol kōn uwaak ko n̄an jar ko ami?
Jar kōn armej ro kōn etaer im ļōmņak kōn aikuj ko aer?
Jar kōn doon im n̄an an Jetōb tōl kom̧?
Kile uwaak ko n̄an jar ko ami?
Jar kōn juon kallim̧ur n̄an jerbali im̧we ko kom̧ij būki?
Ekōnono kōn ekōjkan ami naaj m̧oolļo̧k ilo kappukōt Jetōb.
Ekōnono kōn wāween ko rooktak jān doon me amrej ro rej kōmeļeļeik kareel eo an Jetōb Kwojarjar. Kōjparok juon ļo̧o̧k ilo jōnōļ in ekkatak eo am̧ kōn kakobaba ko me ro kwoj katakin raar kōm̧m̧ani kōn en̄jake ko aer kōn Jetōb. Ekōjkan am̧ maron̄ jipan̄ ro jet kile kareel in ekwojarjar?
District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen
N̄e ejetjet, kōm̧m̧an bwe mijenede ro ren kwaļo̧k juon bwebwenato ak en̄jake raar ron̄ ilo juon kweilo̧k in kwojkwoj kiiō, en̄jake in katakin, ak iien ko jet. Bwebwenato ko ilo jetōb im en̄jake ko an armej ro jet rej ba remaron̄ jipan̄ eok ejake tōmak im kile bwe kareel eo an Jetōb ej lukkuun jedematmat im emakijkij an waļo̧k.
Kajjitōk ippān mijenede ro n̄an kōm̧m̧ane juon kōnono kōn mijen eo im kajoor eo an Jetōb Kwojarjar.
Ekōnono kōn ekōjkan kwaļo̧k jipan̄ in kam̧m̧oolol eokwoj loe edik bōtaab elukkuun aorōk Irooj ej kōjeraam̧m̧an eo (lale Ether 3:5; Katak im Bujen Ko 59:21). Ekōnono kōn wāween ko n̄an kwaļo̧k kam̧m̧oolol.
Ļōmņak in kajjitōk ippān juon membōr kāāl n̄an kōm̧m̧ane juon kōnono kōn ekōjkan an kar kareel jān Jetōb eo n̄e ekkatak kōn Kabun̄ in. Kajjitōk ippān armej eo n̄an kwaļo̧k en̄jake ko wōt me ej en̄jake rejetjet.
Ritōl ro an Mijen im Rikakpilōklōk ro an Mijen
Kwomaron̄ kajjitōk ippān mijenede ro n̄an kobaik en̄jake ko ilo jetōb rejetjet ilo leta eo aer n̄an kwe kajjojo wiik.
Ilo intōrpiu ko ak ilo bwebwenato ko, jān iien n̄an iien kajjitōk ippān mijenede ro kōn jar ko aer ilo jibbon̄ im jota. Eļan̄n̄e ekkar, kapilōk ippāer kōn ekōjkan aer kōm̧m̧an bwe jar ko aer en ļapļo̧k meļeļeier.
Kajjitōk ippān mijenede ro kōn ekōjkan aer jipan̄ ro rej katakin en̄jake im kile Jetōb eo.