Etke ij aikuj in wōnm̧aanļo̧k wōt in kōkōm̧anm̧anļo̧k maron̄ ko an kajin eo aō?
Ekōjkan aō maron̄ kōkōm̧anm̧anļo̧k maron̄ eo aō n̄an kōnono ilo kajin eo an mijen eo aō?
Ekōjkan aō maron̄ bōk menin letok eo an lo ko?
Kōpooj Eok Make ilo Jetōb
Irooj ekar kean̄, “bwe kajjojo armej enaaj ron̄ tarlep in gospel eo ilo lo eo an make, im ilo kajin eo an make, kōn ro kapit er n̄an kajoor in” (Katak im Bujen Ko 90:11).
Laajrakin itulaļ rej wāween ko kwomaron̄ kōkajoorļo̧k tōmak eo am̧ bwe Irooj enaaj jipan̄ eok katakin im kam̧ool ilo kajin eo an mijen eo am̧.
Tōmak bwe kwar kūr jān Anij kōn juon rikanaan.
Kajjitōk kōn jipan̄ eo an Anij kōn jar em̧ool.
Niknik jerbal ilo ekkatak, kaminene, im kōjerbal kajin mijen eo am̧ kajjojo raan.
Kwon erreo kōn jemjerā eo an Jetōb Kwojarjar n̄an kōjparok kien ko im mour kōn jon̄ak ko an mijenede.
Karreoik kōttōpar ko am̧ n̄an iakwe Anij im n̄an iakwe ajri ro Nejin im kōņaan kōjeraam̧m̧an er.
Kwon Wujlepļo̧k im Niknik
Katak im katakin ilo wejepedik ilo kajin eo an mijen eo am̧ ej aikuji kijejeto niknik im menin letok ko an Jetōb. Kwon jab ilbōk eļan̄n̄e jerbal eo epen. Ebōk iien. Kijenmej ippam̧ make. Ilo am̧ wujlepļo̧k eok make n̄an katak kajin eo, kwonaaj bōk kapeel ko remenin aikuj n̄an kakūrm̧ool jibadbad eo am̧ āinwōt juon mijenede.
Kwojjab makeļo̧k ilo katak kajin mijen eo am̧. Jemedwōj Ilan̄ im Jisōs Kraist renaaj jipan̄ eok ilo am̧ kappukōt Aer jipan̄. Kappukōt im peļļo̧k n̄an jipan̄ eo an eo kampānien eo am̧membōr ro, ro kwoj katakin, mijenede ro jet, im armej ro jet.
Kanooj ron̄jake im kōnono kajin eo ilo aolep iien ko rem̧m̧an. Jab mijak in kōm̧m̧an bōd. Aolep ro me rej katak juon kajin kāāl rej kōm̧m̧an bōd. Armej ro renaaj meļeļe, im renaaj kam̧m̧oolol kōn kijejeto ko am̧ n̄an katak kajin eo aer.
Kōkōm̧anm̧anļo̧k wōt kapeel in kajin ko am̧ m̧ae jem̧ļo̧k in mijen eo am̧. Ilo an em̧m̧anļo̧k am̧ kōnono kajin eo, armej ro renaaj ļapļo̧k aer ron̄jake ta eo kwoj ba jān am̧ ba men eo. Enaaj dikļo̧k am̧ inepata kōn wāween kōnono im em̧m̧anļo̧k am̧ uwaaki aikuj ko an ro jet.
“En jab po būruōm̧ kōn ta eo kōmij ņa etan naan eo an juon mijenede. Kōkajoor eok make ilo kajin eo, im enaaj ļapļo̧k am̧ tōpar būruōn armej ro” (Jeffrey R. Holland, missionary satellite broadcast, Aug. 1998).
Wōnm̧aanļo̧k wōt n̄an kōjerbal kajin eo an mijen eo am̧ ālkin am̧ ro̧o̧l ņan kapijuknen. Irooj ekar lewaj eļap ilo kwe, im E emaron̄ kar kōjerbale n̄an maron̄ ko an kajin eo am̧ tokālik ilo mour eo am̧.
Katak Kajin In̄lij
Eļan̄n̄e kwojjab kōnono kajin In̄lij, kwoj aikuj ekkatak kake āinwōt juon mijenede. Menin enaaj kōjeraam̧m̧an eok ilo iien mijen eo am̧ im aolepān mour eo am̧. Katak Kajin In̄lij enaaj barāinwōt kōjeraam̧m̧an baam̧le eo am̧.
Kōm̧m̧ani kōttōpar ko n̄an kōkōm̧anm̧anļo̧k maron̄ in kajin eo am̧, im ukukōti iien otemjeļo̧k. Ejake juon karōk in ekkatak kajin. Kōjerbal kajin eo ilo aolep iien ko rem̧m̧an.
Kōm̧m̧an Bwe En Ļap Meļeļe in Ekkatak eo Am̧
Kōjerbal ta eo kwoj ekkatak n̄an jekjek ko an m̧ool-in mour im ilo m̧akūtkūt ko am̧ raan otemjeļo̧k. Kalimjōk wōt kajin eo me enaaj jipan̄ eok ba ta eo kwoj aikuj in ba.
Kappukōt n̄an Kōnono
Kōnono kajin eo ippān eo kampānien eo am̧ jon̄an wōt eo emaron̄. Bōk em̧m̧an eo an aolep iien ko rem̧m̧an n̄an katak im kaminene. N̄an waanjon̄ak, kwomaron̄ kajjitōk ippān juon membōr eo ej kar ro̧o̧l ak juon eo kwoj katakin n̄an jipan̄ eok kōn kajin eo. Menin ejjab bōk jikin kōnono eo ippān rikōnono ro aer kajin eo.
Jab Keidi
Jab keidi kapeel ko an kajin eo am̧ ippān ko kampānien eo am̧ ak mijenede ro jet. Keidi ej tōlļo̧k n̄an utiej bōro ak ebbweer
En Let Katak Katak ko Rekāāl
Etale iien otemjej ta eo kwar ekkatak, im kōmālmele ilo jekjek ko rekāāl. Menin enaaj jipan̄ eok keememej im kōjerbal ta eo kwoj katak.
Pija
em̧m̧aan eo ej kalimjōk bok eo
Ejake juon Karōk in Ekkatak Kajin eo
Juon karōk in ekkatak kajin eo ej jipan̄ jim̧or mijenede ro rekāāl im retijem̧ļo̧k kalimjōk ta eo remaron̄ kōm̧m̧ane kajjojo raan n̄an kōkōm̧anm̧anļok maron̄ eo aer n̄an kōnono kajin mijen eo aer. Karōk eo am̧ enaaj kitbuuj ta eo kwonaaj kōm̧m̧ane ilo iien ekkatak kajin eo am̧ im ilo aolepān raan eo.
Ļoor bun̄tōn kein ej kwaļo̧k ekōjkan am̧ maron̄ ejake juon karōn in ekkatak an kajin eo kōj kōjerbal jekjek in kōm̧m̧an-kōttōpar eo jān jebta 8. Ukukōt jekjek in n̄e ekkar.
Jar ilo kōm̧m̧ani kōttōpar ko im kōm̧m̧ani karōk ko. Kōm̧m̧ani kōttōpar ko wiik otemjeļo̧k im raan otemjeļo̧k n̄an kōkōm̧anm̧an aolep maron̄ eo am̧ n̄an kōnono im katakin gospel eo. Ekitbuuj men ko me kwoj kōņaan kōm̧m̧ani n̄an keememeji, ko āinwōt naan ko, jeje ko, jeje ko rekwojarjar, im eoon ko.
Rekoot im jikejuuļ. Jokāālet ewi wōt kein jipan̄ ko in kajin me renaaj jipan̄ kōtōprak kōttōpar ko am̧. Kein jipan̄ ko ilo kajin remaron̄ kitbuuj jeje ko rekwojarjar, tikjinede ko, grammar bok ko, TALL Embark app eo, im ko jet. Jikejuuļi iien ko n̄āāt eo kwonaaj ekkatak im kōjerbal kajin eo. N̄an waanjon̄ak, kwomaron̄ jikejuuļ n̄an kōļap am̧ riit jān Bok Mormon ium̧win 15 mint ko kajjojo raan ilo iien kōraelep eo.
Jerbali karōk ko am̧. Irooj ej iakwe kijejeto, kōn menin jerbal niknik n̄an kōtōprak kōttōpar ko am̧. Kōjparok iien ekkatak kajin eo am̧ im bar jiekuuļi n̄an tokālik eļan̄n̄e apan̄ ej waļo̧k.
Etale im etaļ ļo̧kanļo̧k. Kōmakijkij etale karōk in ekkatak eo am̧ n̄an etale ewi em̧m̧an in an jerbal. Kajjitōk ippān eo m̧ōttam̧, ritōl ro an mijen, membōr ro, im ro jet ilo eria eo am̧ n̄an elmakoti iaļ ko kwomaron̄ kōkōm̧anm̧anļo̧k. Bōk koņan ilo ekkatak ko jekijuuļi raan otemjej an kajin eo n̄an je ilo jaat eddōkļo̧k eo am̧ im kūli wāween ko n̄an kōkōm̧anm̧an.
Kōjepaane ekkatak kajin eo am̧ ippān kōttōpar ko aitok kitier n̄an ejake juon pedped in kajin im kōttōpar ko ekadu kitier n̄an m̧akūtkūt ko rejenolo̧k im armej ro kwoj katakin.
Ilo iien ekkatak kajin eo am̧ ekkā, kōjepaan wōt juon kōttōpar ko am̧ im karōk ko ilo aolep eria ko im̧aan an kajin eo kwaļo̧k itulaļ. Jokāālet ta eo kwonaaj katak ilo aolepān raan eo.
Ikar ke ekkatak kajin eo an mijen eo aō kajjojo raan wiik in? Ta eo imaron̄ kōm̧m̧ane n̄an jokkun wōt juon kōkōm̧anm̧anļo̧k kajin eo an mijen eo aō?
Karōk eo aō ej ke jipan̄ eō kōm̧anm̧anļo̧k aō kappukōt, katakin, im jerbal ippān membōr ro? Ta okoktak ko ij aikuj kōm̧m̧ani n̄an karōk eo aō?
Ta eo ij lem̧ōņōņō kake eļap tata kōn ekkatak kajin eo aō? Ta eo imaron̄ kōm̧m̧ane n̄an lem̧ōņōņō eļapļo̧k kake?
Ewi jon̄an iien eo ij aikuj in joļo̧k n̄an kaminene ron̄jake, riit, jeje, im kōnono? Ekōjkan an maron̄ em̧m̧anļo̧k aō katak naan (vocabulary), grammer, im ba naan eo (pronounciation)?
Ta m̧akūtkūt ko im kein jipan̄ ko ij kōjerbali n̄an ekkatak kajin eo? Ewi wōt ko rej jipan̄ eō eļap tata? Ta kein jipan̄ ko jet ak m̧akūtkūt ko remaron̄ in jipan̄?
Ta aikuj ko eļapļo̧k aikuj kile?
Ālkin uwaake kajjitōk kein, ukukōt karōk in ekkatak ko am̧ im lale eļan̄n̄e rej kōkōm̧anm̧anļo̧k jem̧ļo̧k ko am̧. Jetōb enaaj tōl eok ilo am̧ wōnm̧aanļo̧k wōt n̄an pukōt n̄an kōkōm̧anm̧anļo̧k ekkatak kajin eo am̧.
Katak ippān Kampānien ro M̧ōttam̧
Jipan̄ eo kampānien ro m̧ōttam̧ en̄jake wejepedik im bōk lōke ilo katak kajin eo an mijen eo ak ilo katak kajin In̄lij. M̧ool im kōmakijkij am̧ nebar kampānien ro m̧ōttam̧ im mijenede ro jett ilo eddōkļo̧k eo aer.
Leļo̧k naan in neba eļem waan im m̧ool kōn jouj. Leļo̧k n̄an er elōn̄ iien ko rem̧m̧an n̄an katakin im kam̧ool ilo wejepedik. Je ekōjkan an juon mijenede eo eļapļo̧k an iminene kar jipan̄ kampānien eo m̧ōttan ilo bwebwenato in em̧ool.
Ij kab jikrōkļo̧k ilo eria eo aō kein karuo ke eo kampānien eo m̧ōtta ekar jiron̄ eō ekar aō iien n̄al kōm̧m̧ane juon ļōmņak ilo jetōb ilo juon iien kōjota. Kampānien eo m̧ōtta kein kajuon ekar aolep iien m̧ōņōņō n̄an kōm̧m̧ane katak eo, im ikōn kōm̧m̧an m̧ōttan eo edik kuņaō ilo katak eo innām ron̄jake.
Ikar kajjieon̄ kareel eo kampānien eo m̧ōtta bwe ej aikuj letok ļōmņak ilo jetōb eo, bōtaab ekōn kōketak eō n̄an bōk ijjitōn̄ eo. Ikar kōmālmel kōn jipan̄ eo an.
Ke iien ekar itok, ikar kōpeļļo̧k jeje ko aō rekwojarjar im riit jān 3 Nipai 5 im 7. Ikar kakkōt bōtaab maron̄ in kōmeļeļeik etke ikar en̄jake bwe eooon ko aō ikar kāāleti raar aorōk, im ikar joor ke ekar dedeļo̧k aō kōm̧m̧ane. Ke juon kajjitōk kar kajjitōk kake, ikar reilo̧k n̄an eo kampānien eo m̧ōtta n̄an uwaak, bōtaab ekar jab kōpeļļo̧k lo̧n̄iin. Ekar iien ikar bwilōn̄ ippa make kōn make kwaļo̧k uwaak eo ilo kajin French eo kar meļeļe kake. Em̧ool ekar ļapļo̧k aō bwilōn̄ bwe membōr eo ekar jab āinwōt en̄jake bwe ikar jab jeļā kōn kapeel in kōnono ko aō. Ikar bōk lōke im kile bwe kajin French eo aō ekar em̧m̧anļo̧k jān aō nōbar eō make.
Wiik ko rekar mootļo̧k, im kampānien eo m̧ōtta ekar wōnm̧aanļo̧k wōt kōtļo̧k bwe in katakin—jekdo̧o̧n ke ikar jab ļōmņak imaron̄ kar kōm̧m̧ane im em̧ool men̄e ekar bōlen ļōmņak eļan̄n̄e imaron̄ kar kōm̧m̧ane. Ikar en̄jake bwe ikar erom juon kein jerbal an Jemedwōj ilo Lan̄ ijello̧kin baj juon eo m̧ōttā ejjab kōnono.
Eļan̄n̄e kwoj jerbal ippān juon mijenede kāāl, ekōjkan an em̧m̧anļo̧k am̧ maron̄ jipan̄ kampānien eo m̧ōttam̧ katak kajin eo ak katak kajin In̄lij?
Eļan̄n̄e kwoj juon mijenede kāāl, ta kain jipan̄ eo kwomaron̄ kajjitōk jān kampānien eo m̧ōttam̧?
Pija
mijenede ro rej katakin kōrā eo
Katak M̧anit im Kajin eo
M̧anit im kajin rej renan̄in eier wōt juon. Meļeļe m̧anit eo an armej ro enaaj jipan̄ kōmeļeļeik wāween eo kajin eo ej jerbal. Meļeļe in enaaj barāinwōt jipan̄ eo kōnono kōn jekjek ko rein juon an ennaan eo an Jepļaaktok eo ilo juon wāween me enaaj alikkar n̄an armej ro.
Juon iaan men ko reļļap tata kwomaron̄ kōm̧m̧an n̄an bōk lōke eo im iakwe eo an armej ro ej n̄an kautiej im nebar m̧anit eo aer ilo wāween ko rejetjet. Elōn̄ mijenede ro rem̧m̧an raar kōm̧m̧ane menin (lale 1 Korint 9:20–23).
Ekkatak Am̧ Make im Ippān Kampānien Eo M̧ōttam̧
Kōjerbal aitia eo itulaļ n̄an jipan̄ eok m̧aanjabpopo n̄an katakin juon eo m̧anit ak bwebwenato in mour eo an eoktak.
Ļōmņak kōn m̧anit eo im bwebwenato in kabun̄ eo an armej eo kwoj katakin. Kile juon jekjek an bwebwenato in mour eo an me emaron̄ in pen n̄an er n̄an meļeļe juon pedped in katak an gospel eo. Karōk wāween ko n̄an katakin pedped in katakin ilo alikkar.
Menin Letok an Lo̧ ko
Menin letok ko an Jetōb rej m̧ool. Menin letok an lo ko im ukook an lo ko elōn̄ men rej waļo̧k. Jet iaan men kein ekitbuuj, kōnono, meļeļe, im ukōt kajin ko. Rainin menin letok ko an lo ko emakijkij wōt an waļo̧k ilo an Jetōb-kōkōm̧anm̧anļo̧k katak im ekkatak n̄an jipan̄ mijenede ro katak kajin eo ilo mijen eo aer.
Jetōb Kwojarjar eo emaron̄ kwaļo̧k m̧ool eo kōn naan in kam̧ool eo am̧ men̄e jekdo̧o̧n juon kōtaan kajin emaron̄ pād ikōtam̧ im ro kwoj katakin. Ejjeļo̧k oktak, Jetōb Kwojarjar eo emaron̄ bōktok naan ko im eoon ko n̄an keememej eo am̧ im jipan̄ eok meļeļe ta eo armej ro rej ba jān būruier.
Ilo enan̄in aolepān, kwojjamin naaj bōk menin letok ko ilo an ejjeļo̧k kijejeto. Kwoj aikuj niknik kappukōt er n̄an kōjeraam̧m̧an ro jet (lale Katak im Bujen Ko 46:8–9, 26). M̧ōttan kappukōt menin letok eo an lo ko ej n̄an jerbal im kōm̧m̧ane aolep men ko kwmoaron̄e n̄an katak kajin eo. Kwon kijenmej ilo am̧ jar im ekkatak im kōmālmele kajin eo. Lōke bwe Jetōb eo naaj jipan̄ eo ilo am̧ kōm̧m̧ane juon kijejeto ekūtarre Wōr tōmak bwe kwomaron̄ bōk menin letok eo an lo ko ejipan̄ eok im ro kwoj katakin.
N̄e kwoj kakkōt n̄an kwaļo̧k eok make ilo an alikkar in wōt eo kwoj kōņaan, keememej bwe Jetōb eo ej maron̄ kōnono n̄an būruōn ajri ro nejin Anij. Būreejtōn Thomas S. Monson ekar katakin:
“Ewōr juon kajin … me jeļā kake n̄an kajjojo mijenede—kajin eo an Jetōb. Ejjab katak kake jān bok ko kar je jān armej ro rejeļā, ak ej bōk jān riit im kakilōklōk. Kajin eo an Jetōb ej itok n̄an eo ej kappukōt kōn aolepān būruōn n̄an jeļā Anij im kōjparok kien ko An rekwojarjar. Tijem̧ļo̧k ilo kajin in ej leļo̧k n̄an juon n̄an rupi kabbōjrak ko, anjo̧ ioon kapan̄pan̄ ko, im un̄ur būruōn armej” (“The Spirit Giveth Life,” Ensign, June 1997, 2).
Ekkatak an juon make im an Kam̧pānien
Kōjerbal ennaan kein n̄an etale kijejeto ko am̧ n̄an kappukōt menin letok eo an lo ko. Ļo̧o̧ke im̧we ko im kōttōpar ko n̄an jipan̄ eok kōkōm̧anm̧an katak kajin eo am̧.
Ij tōmak bwe ikar kūr jān Anij, kōn rikanaan eo An, n̄an kwaļo̧k gospel eo an ilo juon kajin kāāl. (Katak im Bujen Ko 90:11)
Ij kajjieon̄ n̄an mour erreo kōn Jetōb Kwojarjar eo n̄an kōjparok kien ko, mour kōn jon̄ak ko mijen, im ukweļo̧k raan otemjeļo̧k. (Katak im Bujen Ko 46:9, 33)
Ij ekkatak, kōmālmel, im kōjerbal kajin eo an mijen eo jon̄an wōt eo emaron̄ kajjojo raan. (1 Korint 12:31)
Ļōmņak ko n̄an Ekkatak im Kōjerbali
Ekkatak Am̧ Make
Etale kein jipan̄ kko an kajin eo ilo Missionary Portal eo. Kile juon men kwojjan̄i de kajjieon̄e, im kōm̧m̧ane juon kōttōpar n̄an kajjieon̄e ium̧win jejjo raan rej itok.
Ilo district ko̧o̧njeļ eo tok juon ami, kajjitōk ippān juon mijenede emineneļo̧k kōn juon maron̄ in kajin em̧m̧an ekar kōm̧m̧ane n̄an katak kajin eo.
Ekkatak Ippān Kampānien Eo M̧ōttam̧ im Jānij Kampānien
Kōmālmel katakin doon katak ko an mijenede ilo kajin mijen eo am̧. Ilo jinoin, mijenede ro rekāāl remaron̄ katakin ilo wāween eo elukkuun pidodo, kwaļo̧k naan in kam̧ool eo eļem waan, im kōnono eoon ko kar kakilōklōk. Ilo an lōke eo im maron̄ eo aer ļapļo̧k, renaaj maron̄ in bōk koņaer eļapļo̧k ilo katakin.
Etale aitia ko ilo jebta in im kein jipan̄ ko an kajin eo ilo Missionary Portal eo. Ekōnono kōn elmakot ko kwomaron̄ kōjerbali ilo iien ekkatak ippān eo m̧ōttam̧ ilo wiik eo tok juon.
Ilo an eo m̧ōttam̧ ron̄jake am̧ ba naan ko (pronoun) im jipan̄ eok em̧m̧anļo̧k. Kajjitōk ippān n̄an je juon kakeememej kōn jekjek ko n̄e kwoj jab meļeļe. Kōm̧m̧ane juon laajrak in naan ko, eoon ko, ak grammer eo me enaaj jipan̄. Kōmeļeļeik im kōmālmel kile kōjerbal ta eo ej ilo laajrak eo ilo m̧akūtkūt ko rej itok wōt.
Kōmālmel lukkuun ron̄jake. Karōk juon iien ilo raan n̄an lukkuun ron̄jake n̄an kile naan eo (vocabulary) im jon̄ak ko kwar katak. ̄N̄e kwoj ron̄ juon eoon ej kwaļo̧k eoktak jān wāween eo kwon kar ba, je im kōmālmel e.
Kōm̧m̧ane juon laajrak in men ko armej remaron̄ ba raan jab eo. Karōk im kōmālmeli wāween ko kwomaron̄ uwaak.
District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen
Kajjitōk ippān rikōnono ro an kajin eo n̄an pād ilo juon iaan kweilo̧k kein. Kōm̧m̧an karōk n̄an mijenede ro n̄an katakin er ilo kumi ko reddik. Kajjitōk ippān rikōnono ro an kajin eo n̄an jeje kakeememej ko im kwaļo̧k naan in kakobaba ko kōn maron̄ in kajin eo an mijenede ro.
Jitōn̄ juon ak ruo mijenede ro m̧oktaļo̧k n̄an ba kōn tōprak ko raar būki ilo ekkatak kajin eo.
Jitōn̄ juon mijenede eo emineneļo̧k n̄an kwaļo̧k ilo tukadu in jet m̧ōttan kajin eo me ekkā aer pen n̄an mijenede ro. Kōm̧m̧ann bwe en kwaļo̧k waanjon̄ak ko an kōjerbal kajin em̧m̧an, im kōm̧m̧an bwe mijenede ro ren kōmālmeli.
Kōm̧m̧an bwe mijenede ro me rej rijikin eo n̄an m̧anit eo ren kwaļok kōļmenļokjeņ ko aer.
Ritōl ro an Mijen im Rikakpilōklōk ro an Mijen
Kōmejajaik aorōk eo an jab bōjrak ekkatak kajin eo kajjojo raan.
Kōketak mijenede ro n̄an kōjerbal kajin eo an mijen eo jon̄an wōt eo emaron̄.
Kwaļo̧k m̧ōttan ko an juon karōn in ekkatak kajin mijen eo ilo juon jikejuuļ in ekkatak kar karōke. Etale menin ilo kweilo̧k ko an district ko̧o̧njeļ eo.
Pukōt iien ko rem̧m̧an n̄an kōnono ippān mijenede ro ilo kajin eo rej katak. Jān iien n̄an iien bar etale ippāer ilo kajin in.
Kajjitōk ippān ritōl ro ijo jokwe ie im membōr ro kōn aitia ko kōn ekōjkan an mijenede ro maron̄ em̧m̧anļo̧k ilo maron̄ in kajin eo aer.
Leļo̧k naan in kōmeļeļe ilo kweilo̧k eo eļap an zone eo ak ko̧o̧njeļ eo an ritōl an mijen ilo bōd ko eļap tata jeļā kaki kar kōm̧m̧ani jān mijenede ro me rej katak kajin eo an mijen eo am̧.
Katakin mijenede ro kōn menin letok ko ilo jetōb.
Lale mijenede ro n̄e rej katakin ilo kajin eo an mijen eo.