Kadedeļo̧k Jerbal eo kōn Kōttōpar ko im Karōk ko

Bōlen kwar ļōmņak kōn ewi wōt jerbal in mijenede ko am̧ rellōn̄ rej aorōk tata. En̄in ej juon kajjitōk n̄an ļōmņak kake ilo am̧ kōm̧m̧ani kōttōpar ko im karōk kajjojo wiik im kajjojo raan. N̄an jipan̄ uwaake, ļōmņak kōn jibadbad eo am̧ āinwōt juon mijenede:

“Karuwaineneik ro jet n̄an itok n̄an Kraist kōn jipan̄ er bōk gospel eo em̧ōj kōjepļaaktok kōn tōmak ilo Jisōs Kraist im Pinmuur e An, ukweļo̧k, peptaij, bōk menin letok an Jetōb Kwojarjar, im niknik n̄an jem̧ļo̧kin.”

Kōm̧m̧an bwe jibadbad in mijenede en tōl kōttōpar ko im karōk ko am̧. Kalimjōk wōt ekōjkan am̧ maron̄ jipan̄ kajjojo armej kōjerbal anemkwoj in kāālet eo aer n̄an erom rioktak n̄an Rilo̧mo̧o̧r eo im bōk gospel eo An.

Kappukōt tōl eo an Jetōb im kapilōk ippān kampānien eo m̧ōttam̧ ilo am̧ kōm̧m̧ani kōttōpar ko im kōm̧m̧ani karōk ko. Innām bar etale karōk ko am̧ im kōjerbal iien ilo jetjet.

Pija

Būreejtōn Dallin H. Oaks

“Jejjab kwaļo̧k im katakin n̄an maron̄ in ‘bōktok armej n̄an Kabun̄ in’ ak n̄an kōļapļo̧k oraan ro uwaan Kabun̄ in. Jejjab kwaļo̧k im katakin baj wōt n̄an kareel armej n̄an mour mour ko rem̧m̧anļo̧k. … Jej karuwaineneik aolep n̄an itok n̄an Kraist kōn ukweļo̧k im peptaij im kapene n̄an maron̄ kōpeļļo̧k kōjām ko an aelōn̄ in selestial n̄an ļaddik ro im leddik nejin Anij. Ejjeļo̧k bar juon emaron̄ kōm̧m̧ane menin” (Dallin H. Oaks, “The Purpose of Missionary Work,” missionary satellite broadcast, Apr. 1995).

Ritōl ro an Kabun̄ in rara kalikkar jiljino kakōļļe ko raorōk n̄an oktak. Kakōļļe ko raorōk rej jipan̄ eok kalimjōk wōt eddōkļo̧k eo ilo jetōb an ajri ro nejin Anij. Kōttōpar eo aer rej n̄an jipan̄ eok kajokkun wōt juon kijejeto ko am̧ raan otemem ippān jibadbad in mijenede eo am̧.

Kakōļle ko raorōk n̄an oktak rej kwaļo̧k itulaļ.

Pija mijenede ro rej idik pein juon em̧m̧aan.	Armej ro Rekāāl Rej Katak. Kajjojo armej (rejjab peptaij) me rej bōk juon katak ilo juon wiik (bōtaab kar jab katakin ilo allōn̄ kok jilu remootļo̧k) im bōk juon iien emakeļo̧k n̄an bar ro̧o̧l. Juon katak ekkā an koba jar (n̄e ejetjet), katakin diktata juon pedped in katak an gospel eo, im leļo̧k juon kūr.
Pija mijenede ro rej katakin	Katak ko ippān juon Membōr ej Bōk Koņaan. Elōn̄ katak ko ilo juon wiik me juon armej (ejjab petpaij) katak katakin im juon membōr ekar bōk koņan.
Pija baam̧le ilo m̧ōn jar eo	Armej Ro Kar Katakin Me Rej Pad Ilo Kweilo̧k In Kwojkwoj Eo. Kajjojo armej (ejjab peptaij) kwoj katakin me kar pād ilo kweilo̧k in kwojkwoj eo ilo juon wiik.
Pija jar an baam̧le	Armej ro kōn juon Raan in Peptaij. Kajjojo armej ro raar errā n̄an peptaij im kapen ilo juon raan ejenolo̧k.
Pija peptaij	Armej Ro Rej Peptaij im Kapen. Kajjojo membōr kāāl me raar bōk kain̄i ko an peptaij im kapen im n̄an ro me boom̧ eo kar jilkinļo̧k kōn electronic ilo juon wiik. (Lale jebta 12 kōn meļeļe eo an juon rioktak kōn peptaij im kōn meļeļe eo n̄an kōm̧m̧ani rekoot ko.)
Pija kōrā ro ilo m̧ōn jar eo	Membōr Kāāl Ro Rej Pād Ilo Kweilo̧k In Kwojkwoj Eo. Kajjojo membōr kāāl me Boom̧ eo an Baptism andn Confirmation kar jilkinļo̧k ilowaan allōn̄ ko 12 remootļo̧k me raar pād ilo kweilo̧k in kwojkwoj eo ilo juon wiik.

Ilo tukadu in, er ro m̧oktata n̄an jipan̄ armej ro kāālet n̄an bōk koņan ilo men kein. Kaioļapļap kijejeto ko am̧ ilo m̧akūtkūt kein:

• Ro me rej jipan̄ eok lo armej ro rekāāl n̄an katakin

• Ro me rej jipan̄ armej ro bun̄ m̧aanļo̧k ilo kōm̧m̧an im kōjparok bujen ko

• Ro me rej jipan̄ armej ro me raar peptaij im kapene ilo iiō ej jem̧ļo̧kļo̧k

Eļan̄n̄e kwojjab maron̄ lo ekōjkan an kijejeto ko am̧ maron̄ jipan̄ juon armej eddōkļo̧k ilo juon wāween eo me ej waļo̧k ilo kakōļļe ko raorōk am̧, bar etale eļan̄n̄e m̧akūtkūt eo ej em̧m̧an n̄an kōjerbal iien eo am̧.

N̄an armej ro me kwoj joļo̧k edik iien ippāer, wōnm̧aanļo̧k wōt n̄an lale itok limo eo aer ilo gospel eo. Kwomaron̄ kajjitōk ippān membōr ro n̄an pukōtļo̧k er. Kwomaron̄ barāinwōt kōjerbal technology n̄an kōketak er im wōnm̧aanļo̧k wōt n̄an jerbal in karejar n̄an er. Lale “Kōjerbal Technology” ilo jebta 9 kōn elōn̄ļo̧k aitia ko.

Pija

Elder Quentin L. Cook

“Jibadbad eo eļaptata an karōk im kōm̧m̧ani kōttōpar ko ej n̄an kōm̧m̧an rikaļoor ro—en̄in ej, n̄an kōkwojarjar rioktak ro me rej kōm̧m̧an im kōjparok bujen ko rekwojarjar, jino kōn juon bujen peptaij eo ej tōlļo̧k n̄an bujen ko an tampeļ” (Quentin L. Cook, “Purpose and Planning,” mission leadership seminar, June 25, 2019).

Ilo iien karōk ko wiik otemjeļo̧k, kwe im eo m̧ōttam̧ ej kōm̧m̧ani kōttōpar ko n̄an aolep kakōļļe ko raorōk. Kōttōpar in kakōļļe ko raorōk am̧ rej aikuj kwaļo̧k ikdeelel eo am̧ n̄an jipan̄ elōn̄ļo̧k armej ro en̄jake kōjeraam̧m̧an ko an oktak.

Kōm̧m̧ani kōttōpar ko im kōm̧m̧ani karōk ko n̄an kōm̧m̧ani men ko ilo maron̄ eo am̧ me remaron̄ jelet tōprak ko an kakōļļe eo aorōk. N̄an waanjon̄ok:

• Kwomaron̄ kōm̧m̧ane juon kōttōpar in kakōļļe eo aorōk n̄an jino katakin juon oran armej ro rekāāl ilo wiik eo. Men̄e kwoj tōpar kōttōpar jab in ej pedped ioon anemkwoj in kāālet an armej ro jet. Bōtaab kōm̧m̧an ta eo ilo maron̄ eo am̧ n̄an kadedeļo̧k. Juon wāween n̄an kōm̧m̧ane juon kōttōpar n̄an kōnono kōn jet oran armej ro rekāāl kajjojo raan. Innām karōk ekōjkan am̧ naaj kōm̧m̧ane. Lale aitia ko ilo Appendix 2 an jepta in im ilo jepta 9.

• Kwomaron̄ kōm̧m̧ani kōttōpar ko in kakōļle ko raorōk n̄an kōm̧m̧an bwe juon oran emake an membōr ro rekāāl im armej ro kwoj katakin ren pād ilo kweilo̧k in kwojkwoj eo. Men̄e rej itok ak jaab ej pedped ioon anemkwoj in kāālet eo aer. Bōtaab kōm̧mane ta eo kwomaron̄e n̄an kareel jem̧ļo̧k ko an kakōļļe kein raorōk. Karōk n̄āāt eo n̄an karuwaineneik er im ekōjkan am̧ etale ippāer.

• Kwomaron̄ kōm̧m̧ane juon kōttōpar in kakkōļe eo aorōk n̄an an membōr ro bōk koņaer ilo juon oran katak ko remakeļo̧k ilo wiik eo. Men̄e kwoj tōpar kōttōbar jab eo pedped ioon membōr ro im armej ro kwoj katakin er. Bōtaab kōm̧m̧ane ta kwomaron̄e n̄an kareel jem̧ļo̧k eo an kakōļļe in aorōk. Kōm̧m̧ane juon kōttōpar n̄an jerbal ippān ritōl ro an ward eo n̄an kōm̧m̧an bwe membōr ren pād. Innām karōk ekōjkan am̧ naaj kōtōbalbal m̧aanjabpopo eo aer.

Āinwōt juon m̧ōttā, kom̧ro ej kōm̧m̧ani kōttōpar ko an kakōļļe eo aorōk n̄an eria eo am̧ make. Pedped ioer ilo (1) eddōļo̧k eo an ro me kwoj katakin er (2) aikuj eo n̄an pukōt armej ro rekāāl n̄an katakin. Pukōt armej ro rekāāl n̄an katakin ej juon aikuj ejjab jem̧ļo̧k.

Kōttōpar ko an kakōļļe eo aorōk an aolepān mijen rej pedped ioon kōttōpar ko kōm̧m̧ani jān kajjojo kampānien.

Kwaļo̧k Gospel eo Aō app eo enaaj jipan̄ eok kalimjōk wōt armej ro ilo am̧ kōm̧m̧ani kōttōpar ko an kakōļļe eo aorōk. App in enaaj barāinwōt jipan̄ eok ekkatak jān kōttōpar ko m̧oktaļo̧k im kwaļo̧k eddōkļo̧k eo am̧ n̄an kōttōpar ko kiiō.

Kōttōpar ko an kakkōļļe eo aorōk im tōprak ko rej make ribooti n̄an ritōl ro am̧ ilo mijen im mijenede ro reddik ritōl kōn Kwaļo̧k Gospel eo Aō app eo.

Mejmejkaruo n̄an jab kwaļo̧k juon kōttōpar an kakkōļļe eo aorōk n̄an ro jet. Kalimjōk eo ejjab wōnm̧aanļo̧k wōt ilo aolep kakōļļe ko raorōk naaj jipan̄ eok jab m̧ūjkōk karuwaineneik ro jet n̄an itok n̄an Kraist im kōm̧m̧ani bujen ko.

Pija

Būreejtōn Thomas S. Monson

“N̄e jerbal eo ej jon̄e, jerbal eo ej em̧m̧anļo̧k. N̄e jerbal eo ej jon̄e im riboote, dettan em̧m̧anļo̧k ej m̧ōkajļo̧k” (kar kouti jān Thomas S. Monson, “Thou Art a Teacher Come from God,” Improvement Era, Dec. 1970, 101).

Ikdeelel eo an Irooj ej bwe kwon “jerbal … ilo aolep laļn̄ijn̄ij” ilo jerbal in mijenede eo am̧ (Katak im Bujen Ko 107:99). Nikink ilo juon kijejeto eo ejjab m̧ujkōk, eperan.

Niknik jerbal ilo kōttōpar ko an kakōļļe eo aorōk. Kajjitōk ippān armej ro n̄an kōm̧m̧ani kallim̧ur ko me rej tōlļo̧k n̄an oktak. Kijejeto niknik ko am̧ remaron̄ im̧we er n̄an jerbal bwe naaj jipan̄ er itok n̄an Kraist (lale 2 Nipai 2:14-16).

Katakin gospel eo ilo wāween ko me rej tōpar aikuj an armej ro. Katak eo, n̄e meļeļe kake kōn Jetōb eo, emaron̄ ļapļo̧k jān jabdewōt men n̄an im̧we er n̄an jerbal.

Ilo ejja iien eo wōt, kile kōttōpar ko an kakōļļe eo aorōk ej pedped ioon anemkwoj in kāālet eo an ro jet. Iien otemjej kautiej anemkwoj in kāālet eo an armej ro.

Keememej bwe kakōļļe ko raorōk rejjab jem̧ļo̧k eo an kōttōpar eo. Ijello̧kin, rej jutak kōn eddōk in jetōb eo an armej ro rej pojak in peptaij, kapen, im oktak eo aitok kitien. Lukkuun eddōkļo̧k eo an armej ro naaj pedped ioon kāālet ko aer. Kwoj rie eddōkļo̧k eo aer kōj kōjerbal tōmak ilo Kraist ilo etaer ilo am̧ kōm̧m̧ani kōttōpar ko, karōk, im niknik jerbal, im kwaļo̧k n̄an er juon iaļ eim̧we.

Jekjek kein renaaj jipan̄ eok kōm̧man im kadedeļo̧k kōttōpar ko.

Pija

jaat in kōm̧m̧an-kōttōpar

1. Jar ilo kōm̧m̧ani kōttōpar ko im kōm̧m̧ani karōk ko. Kōm̧m̧ani kōttōpar ko me rej m̧ool bōtaab renaaj idajon̄jon̄ eok im aikuj tōmak. Jab kōm̧m̧ani kōttōpar ko me relukkuun eļļap ak lukkuun in iddik. Karōk ekōjkan am̧ naaj kōtōprak er.

2. Ļo̧o̧ke im jikejuuļ. Ļo̧o̧ke kōttōpar ko am̧ im karōk ko ilo juon jikejuuļ emelij.

3. Jerbali karōk ko am̧. Niknik jerbal n̄an kadedeļo̧k kōttōpar ko am̧. Kōjerbal tōmak ilo Irooj n̄an jipan̄ eok.

4. Etale im bar etaļe. Etale eddōkļo̧k eo im ļo̧o̧ke kijejetok ko am̧ aolep iien. Jokāālet ta eo n̄an kōm̧m̧ane eoktakļo̧k im ekōjkan kōkōm̧anm̧anļo̧k. Ukukōt karōk ko n̄e emenin aikuj.

Ilo am̧ kōjerbal jekjek in kōm̧m̧an-kōttōpar eo, Irooj enaaj kōļapļo̧k kijejeto ko am̧. Kwonaaj eddōkļo̧k ilo maron̄ eo am̧ āinwōt juon kein jerbal ilo Pein. Kwonaaj bōktok eļap em̧m̧an ilo ajri ro nejin Jemedwōj Ilan̄.

Jar ilo kappukōt tōl eo an Jetōb ilo am̧ kōjerbal jekjek eo an kōm̧m̧an-karōk n̄an aolep ļamļam ko an jerbal in mijenede. Jet iaer ekoba:

• Jipan̄ armej ro kwoj katakin er kōm̧m̧an wōnm̧aanļo̧k (lale Appendix 1 ilo jepta in).

• Pukōt armej ro rekāāl n̄an katakin (lale Appendix 2 ilo jebta in).

• Jerbal ippān membōr ro im jerbal n̄an armej ro ilo jukjuk in pād eo im ward eo (lale jebta 9 im 13).

• Jerbal ilo bōro kuk ippān kampānien eo m̧ōttam̧ (lale aitōm 6 ilo “M̧wen̄an an Karōk Wiik Otemjļo̧k”).

• Kōkajoorļo̧k tōmak eo am̧ il Jisōs Kraist.

• Kōkōm̧anm̧anļo̧k jeļā im maron̄ ko am̧, ekoba kajin eo ekkatak (lale jebta 7).

Jab kōm̧m̧ani kōttōpar ko an kakōļļe eo aorōk n̄an mijenede ro jet. Ijo ke, kwomaron̄ juon unin tōl im kōketak n̄an er ilo kōjerbal pedped in katak ko an kōm̧m̧an kōttōpar ilo aer kōm̧m̧ani kōttōpar ko aer make.

Mejmejkaruo n̄an jab kōm̧m̧an keidi ippān ro jet.

Jab kōjerbal kōttōpar eo ededeļo̧k āinwōt juon kout, n̄an kile jān public, ak n̄an kajim̧we ilo̧bwilej ak kajook juon.

Pija

Būreejtōn Spencer W. Kimball

“Jej tōmak ilo kōm̧m̧ani kōttōpar ko. Jej mour kōn kōttōpar ko. … [Juon] kōttōpar aorōk ej n̄an bōkļo̧k gospel eo n̄an aolep armej. … Kōttōpar eo ad ej n̄an bōk mour indeeo. Ej kōttōpar eo eļap tata ilo laļ in” (Spencer W. Kimball, regional representatives’ seminar, Apr. 3, 1975, 6).

Kōm̧mane juon m̧wen̄an in karōk wiik otemjeļo̧k ippān eo m̧ōttam̧ ilo raan eo im awa eo karōke jān mijen būreejtōn eo am̧. Ļoor bun̄tōn ko itulaļ.

1. Jar im kappukōt im̧we. Kajjitōk ippān Jemedwōj Ilan̄ n̄an tōl eok n̄an kōm̧m̧ani karōk ko me renaaj jipan̄ kadedeļo̧k jibadbad ko An. Kajjitōk Ippān n̄an kōjeraam̧m̧an kijejeto ko am̧ n̄an jipan̄ armej ro eddōkļo̧k im itok n̄an Kraist.

2. Kōm̧m̧ani kōttōpar ko im kōm̧m̧ani karōk ko n̄an aolep kakōļļe aorōk kōjerbal Kweļo̧k Gospel eo Aō app eo. Kōjerbal jekjek eo an kōm̧m̧an-kōttōpar kar kōmeļeļeik m̧oktaļo̧k ilo jepta in. Jino kōn:

   • Armej ro me raar peptaij im kapen ilowaan iiō eo ļo̧k.

   • Armej ro me ewōr juon raan in aer peptaij.

   • Armej ro kwoj katakin er me rej pād ilo kweilo̧k in kwojkwoj eo.

   • Armej ro rekāāl katakin er.

   • Membōr ro rej bar ro̧o̧ltok, baam̧le ko ejjab aolep ren membōr, im ro rej pojān elder.

   • Armej ro kar katakin er m̧okta.

   Lale Appendix 1 ilo jebta in kōn aitia kok kōn kōjerbal jekjek eo an kōm̧m̧an-kōttōpar ilo jerbal ippān armej ro kwoj katakin.

3. Kōjerbal jekjek eo an kōm̧m̧an-kōttōpar n̄an lo armej ro n̄an katakin (lale Appendix 2 ilo jebta in im jebta 9 n̄an jipan̄ kōn kappok).

4. Kōjerbal jekjek eo an kōm̧m̧an-kōttōpar n̄an kalōk jemjerā ko ippān ritōl ro an ward eo im membōr ro. Kōm̧m̧ani kōttōpar ko im kōm̧m̧ani karōk ko kōn ekōjkan am̧ naaj rie er ilo kijejeto ko aer n̄an leto letak gospel eo (lale aitia ko ilo jepta 9 and 13). Kōppopo n̄an kweilo̧k in kōtōbalbal eo wiik otemjeļo̧k an ward eo (lale jepta 13).

5. Etale karōk ko im kōttōpar ko am̧ ilo Kwaļo̧k Gospel eo Aō app eo. Kapen ijjitōn̄ ko am̧ im kweilo̧k ko.

6. Kōm̧m̧ane juon ko̧o̧njeļ an kampānien. Menin ekkā an koba m̧ōttan kein:

   • Eļan̄n̄e kōņaan, kwaļo̧k kōttōpar ko am̧ make rejetjet im kajjitōk ippān eo m̧ōttam̧ kōn jipan̄ ilo kadedeļo̧k er.

   • Ekōnono kōn kajoor eo kōn jemjerā eo am̧. Ekōnono kōn jabdewōt apan̄ ko kōn am̧ pokake ak jerbal ilo bōro kuk. Ņa mejļan jabdewōt idaptōk kōn (1) kōtļo̧k bwe kajjojo armej n̄an lukkuun kwaļo̧k kōļmenļo̧kjeņ ko an, (2) meļeļe im bōk n̄ūrbōktak ko an kajjojo armej, im (3) ejake juon jem̧ļo̧k ippān doon me ej kōnono eļap tata kōn n̄ūrbōktak ko raorōk.

   • Kwaļo̧k ippān kampānien eo m̧ōttam̧ ta eo kwoj ļōmņak kajoor ko aer. Kajjitōk elmakot ko ekōjkan am̧ maron̄ em̧m̧anļo̧k.

   • Kōm̧m̧ani kōttōpar ko me renaaj kōkōm̧anm̧anļo̧ jemjerā eo amiro.

   Ko̧o̧njeļ ko an kōmpānien remaron̄ jipan̄ eok ejaki kapeel ko raorōk me kwomaron̄ kōjerbali ilo mour eo am̧ make im baam̧le eo am̧, jerbal in jipan̄ ilo Kabun̄ in, jikin jerbal, im ro jet m̧ōttam̧.

7. Kōjem̧ļo̧k kōn jar.

Kōm̧m̧ani kōttōpar ko im kōm̧m̧ani karōk ko ippān kampānien eo m̧ōttam̧ ium̧win 30 minit aolep jibbon̄. Ļoor bun̄tōn ko itulaļ.

1. Jar im kappukōt im̧we.

2. Etale eddōkļo̧k eo n̄an kōttōpar ko an kakōļļe eo aorōk.

3. Etale karōk ko am̧ n̄an jipan̄ amrej ro kwoj katakin er. Karōk laajrak eo an kijejeto ko am̧ n̄an jipan̄ ro me rej eļap aer eddōkļo̧k. Ukukōt kōttōpar ko im karōk ko raan otemjej n̄e aikuj.

4. Kallim̧ur n̄an jerbal ko kwonaaj būki raan eo n̄an pukōt armej ro rekāāl n̄an katakin im n̄an jipan̄ armej ro kwoj katakin.

5. Karōk ekōjkan am̧ naaj jerbal ippān ritōl ro ijo jokwe ie im membōr ro.

6. Kōjem̧ļo̧k kōn jar.

Kōjparok ļo̧o̧k ko ej m̧ōttan lale ilo niknik ilo eria eo am̧ kōn iakwe im n̄ūrbōktak. Kōjparok ļo̧o̧k ko am̧ ilo jetjet im kōkāāli. Menin enaaj jipan̄ eok keememej ta eo kwoj aikuji n̄an kōm̧m̧an n̄an jipan̄ armej.

Kwaļo̧k Gospel eo Aō app eo ej kōtļo̧k bwe kwoj kōtōbalbal im kwaļo̧k meļeļe ko raorōk ippān ritōl ro ijo jokwe ie im membōr ro ilo eddōkļo̧k eo an armej ro im jerbal.

Ļoor unin tōl ko an date im privacy n̄e ļo̧o̧ki kōttōpar ko im karōk ko ilo Kwaļo̧k Gospel eo Aō app eo im kein jerbal ko kar būrini. Kōn meļeļe ko, lale Jon̄ak ko an Mijenede n̄an Erom̧ Rikaļoor ro an Jisōs Kraist, 7.5.

Kajjitōk ippam̧ make ļoor kajjitōk kein m̧okta jān am ļo̧o̧ke ak kwaļo̧k meļeļe ko ilo Kwaļo̧k Gospel eo Aō app eo, email, social media, kakeememej ko, ak kōnono ko jet.

• Ekōjkan an armej en̄jake kōn ta eo ij ļo̧o̧ke?

• Ekōjkan aō en̄jake eļan̄n̄e juon armej ekar kwaļo̧k kain meļeļe in kōn n̄a ippān ro jet?

• Ij ke ļoor kakien ko an Kabun̄ in im date privacy kein kok n̄an eria eo aō eļan̄n̄e ij ļo̧o̧ke ak kwaļo̧k meļeļe in?

• Ļōmņak kōn jentōn kein jān leta eo am̧: “Ilo am̧ wujlepļo̧k iien eo am̧ im am̧ n̄an jerbal n̄an Irooj, door itulikūm̧ aolep kōņaan ko am̧ make, Irooj enaaj kōjeraam̧m̧an eo kōn eļapļo̧k jeļā im naan in kam̧ool kōn Jisōs Kraist im gospel eo An kar kōjepļaaktok.” Kajjitōk ippam̧ make kajjitōk kein, im ļo̧ke im̧we ko am̧.

  • Ejiet aō kōm̧m̧ane wujlepļo̧k eo an iien eo aō im aō n̄an jerbal n̄an Irooj?

  • Ta kōjeraam̧m̧an ko ikar en̄jaki?

  • Ekōjkan an naan in kam̧ool eo aō kar kajoorļo̧k?

  • Ekōjkan aō maron̄ em̧m̧anļo̧k?

• Bōk jikin iien n̄an ļōmņak kōn raan eo am̧ āliktata ilo jikin mijen. N̄e raan eo ej itok:

  • Ta eo kwoj kōņaan bwe jemjerā eo am̧ ippān Jemedwōj Ilan̄ im Jisōs Kraist en āinwōt?

  • Ta eo kwoj kōņaan in erom?

  Ilo jōnōļ in ekkatak eo am̧ je uwaak eo n̄an kajjojo kajjitōk kein. Kōjerbal jekjek eo an kōm̧m̧an-kōttōpar n̄an karōk ta eo kwomaron̄ kōm̧m̧ane kiiō n̄an jerbale kōttōpar kein. Ļo̧oke karōk ko am̧.

• Kōjerbal Kwaļo̧k Gospel eo Aō app eo, uwaaki kajjitōk ko itulaļ:

  • Aolep ļo̧o̧k ko rej ke kāāl im jetjet?

  • Juon mijenede eo ekāāl n̄an eria eo enaaj ke jeraam̧m̧an jān ļo̧o̧k eo am̧ kōn kijejeto ko am̧ n̄an pukōt armej ro rekāāl n̄an katakin?

  • Eļan̄n̄e kwar tōn etale app eo kiiō, enaaj ke kar jipan̄ eok jeļā ewi armej ro? Enaaj ke kar jipan̄ eok jeļā kōn eddōkļo̧k eo aer?

• Kajjitōk ippān mijenede ro n̄an kwaļo̧k en̄jake ko aer kōn kōttōpar ko raar kōm̧m̧ani im karōk ko raar kōm̧m̧ani n̄an jipan̄ armej ro eddōkļo̧k. Waanjon̄ak ko remaron̄ koba kōttōpar ko im karōk ko n̄an jipan̄ armej ro:

  • Ejake eļapļo̧k tōmak ilo Rilo̧mo̧o̧r eo.

  • Ukweļo̧k im kōm̧m̧ani oktak ko n̄an epakeļo̧k Anij.

  • Peptaij im kapen.

  • Bar ro̧o̧ltok n̄an Kabun̄ in im kōkāāl bujen peptaij eo aer.

• Riiti juon iaan jekjek kein n̄an mijenede ro. Kōm̧m̧an bwe mijenede ro ren ajej n̄an kumi ko reddik. Kōm̧m̧an bwe kajjojo kumi en kōjebal bun̄tōn 1 im 2 in jekjek eo an kōm̧m̧an-kōttōpar n̄an jipan̄ armej ro ilo waanjon̄ak kein eddōk m̧aanļo̧k n̄an petiaj im kapen. Kōm̧m̧an bwe kajjojo kumi ren kwaļo̧k aitia ko aer.

  • Armej eo kwoj katakin ej bōk kūr eo n̄an pād ilo jar wiik in.

  • Armej eo ekar bōk kūr eo an peptaij im kar kōm̧m̧ane juon kōttōpar ippām n̄an peptaij.

  • Armej eo ekar bōk kūr eo am̧ n̄an riiti Bok in Mormon im ekar kallim̧ur n̄an ritii 1 Nipai 1.

• Kajjitōk ippān mijenede ro n̄an kōjerbal Kwaļo̧k Gospel eo Aō app eo n̄an jipan̄ er kōm̧m̧ani kōttōpar ko rem̧ool im bōtaab kōttōpari kōn:

  • Etale bwebwenato im eddōk eo etto an kakōļļe eo aroōk.

  • Kōm̧m̧ani kōttōpar ko raan otemjej, wiik otemjej, allōn̄ otemjej.

  • Atet armej n̄an kōttōparko an kakōļļe aorōk eo.

  Kōnono kōn ekōjkan an bun̄tōn̄ kein maron̄ jipan̄ mijenede ro wejepedikļo̧k aer karōk ilo aer jipan̄ eddōkļo̧k eo an armej ro. Kajjitōk ippān mijenede ro n̄an ļōmņak kōn men kein:

  • Ekōjkan am̧ naaj kōjerbal Kwaļo̧k Aō Gospel app eo ilju jekļaj ilo am̧ karōk?

  • Ta wāween ko jet kwar loi n̄an kōjerbal app eo em̧m̧anļo̧k?

• Kōmakijkij etale Kwaļo̧k Gospel eo Aō app eo an mijenede. Kajjitōk ippāer n̄an kwaļo̧k ekōjkan aer kōjerbale n̄an lale kōttōpar ko im karōk ko aer im n̄an jipan̄ armej ro eddōkļo̧k.

• Jān iien n̄an iien lale m̧wen̄an ko an karōk wiik otemjeļo̧k ak raan otemjeļo̧k.

Jar ilo ļōmņak kōn aikuj ko ilo jetōb an armej ro kwoj katakin. Kōm̧mani kōttōpar ko im kōm̧m̧ani karōk ko n̄an jipan̄ er kakūrm̧ool aikuj kein. Kōjerbal Kwaļo̧k Gospel eo Aō app eo n̄an etale eddōkļo̧k eo an kajjojo armej. Kōjerbal kakōļļe ko raorōk n̄an oktak n̄an kile jerbal ko me renaaj jipan̄ kajjojo armej n̄an bōk bun̄tōn eo tok juon ilo itok n̄an Kraist.

Ilo am̧ kōm̧m̧ani kōttōpar ko im kōm̧m̧ani karōk ko, kajjitōk ippam̧ make kajjitōk ko āinwōt kein:

• Ta kāālet ko armej eo ej kōm̧m̧ane me ej kwaļo̧k eddōkļo̧k in tōmak ilo Jisōs Kraist?

• Ta en̄jake ko armej eo ewōr an ippān Jetōb eo?

• Ta apan̄ ko remaron̄ jelm̧ai?

• Ta eo eļapļo̧k jemaron̄ ekkatak jān armej in n̄an jipan̄ e?

• Ta eo ej aikuj in kōm̧m̧an n̄an jipan̄ armej in kōļapļo̧k tōmak ilo Jisōs Kraist, en̄jake im kile Jetōb eo, ukweļo̧k, im peptaij?

• Ekōjkan ad maron̄ pojak n̄an kweilo̧k in kōtōbalbal eo wiik otemjej an ward eo n̄an kbaik ritōl ro im membōr ro an ward eo ilo jipan̄ armej in? (Lale jebta 13).

• Ta kōttōpar ko an kakōļļe aorōk eo emaron̄ jipan̄ kōm̧m̧an bwe en waļo̧k tōmak eo ad ilo Irooj?

Kōjerbal Kwaļo̧k Gospel eo Aō app eo n̄an ļo̧o̧ke im jikejuuļi kōttōpar ko im karōk ko am̧ ilo tipdikier. Menin enaaj jipan̄ eok karōk jerbal eo im kūli m̧akūtkūt ko n̄an būki kajjojo raan. Ļoor kakien ko an date im privacy n̄an eria eo am̧.

Ilo am̧ ļo̧o̧ke im jikejuuļi karōk ko am̧, kajjitikin eok make kajjitōk ko āinwōt kein:

• Ta men ko rejenolo̧k jemaron̄ kōm̧m̧ani rainin im wiik in n̄an rie eddōkļo̧k eo an armej eo?

• Ta katak (ak katak) eo naaj jipan̄ armej in ejake tōmak eo ekajoorļo̧k ilo Kraist. Ekōjkan ad maron̄ katakin katak in in bwe en meļeļe kake im ej katakin jān Jetōb Kwojarjar eo?

• Ekōjkan im n̄āāt eo jenaaj kapene ijjitōn̄ ko?

• Ta kūr ko jej aikuj lilo̧k ak etale ļokaer? Ekōjkan im n̄āāt eo jenaaj etale ļo̧kaer?

• Ekōjkan im n̄āāt eo jenaaj jipan̄ armej eo etal n̄an jar, riiti jeje ko rekwojarjar, jar, im kōjparok kallim̧ur ko me rej tōlļo̧k n̄an kōm̧m̧ani bujen ko ippān Anij?

• Ekōjkan an membōr ro bōk koņaer?

• Ta kein jipan̄ ko ilo online jemaron̄ kwaļo̧ki ippān armej eo?

• Ta jortoklik karōk ko jemaron̄ kōm̧m̧ani eļan̄n̄e juon men ejjab etal ilo kar karōk?

Kōm̧m̧an bwe en wōr juon jar ilo būruōm̧ aolepān raan eo ilo am̧ jerbale karōk ko am̧. Jetōb eo enaaj jipan̄ eok jeļā ia eo n̄an etal, ta eo n̄an kōm̧m̧an, ta eo n̄an ba, im ta okoktak ko n̄an kōm̧m̧ani.

Ilo raan eo, kajjitōkin eok make kajjitōk ko āinwōt kein:

• Ekōjkan ad maron̄ jerbal kōn tōmak, lōke Irooj n̄an jipan̄ kōj im kōļapļo̧k kijejeto ko ad n̄an jerbal n̄an ajri ro Nejin?

• Ekōjkan ad maron̄ lo̧ļe im peran n̄en jerbale karōk ko ad?

• Ekōjkan ad maron̄ ukukōt karōk ko ad ekkar n̄an aikuj ko im jekjek ko an armej ro?

Karōk ko rejjamin aolep iien etal āinwōt ad kōjatdikdik. Kwon meļak im kōjerbal jortoklik karōk ko n̄e aikuj.

Ippān eo m̧ōttam̧, etale eddōkļo̧k n̄an kōttōpar ko kwar kōm̧m̧ani n̄an katakin armej ro im jipan̄ er eddōkļo̧k. Karōk wāween ko n̄an etal iļo̧kanļo̧k. Ukukōt karōk ko am̧ n̄e aikuj ilo am̧ kajjieon̄ tōpar kōttōpar ko am̧.

Kajjitikin eok make kajjitōk ko āinwōt kein:

• Armej ro jej katakin er rej wōnm̧aanļo̧k wōt ke n̄an kōm̧m̧ani bujen ko ippān Anij?

• Ta apan̄ ko rej jelm̧ai? Ta n̄ūrbōktak ko aer?

• Ta eo jemaron̄ kōm̧m̧ane rainin n̄an jipan̄ er im kōketak er n̄an jerbal—ilo kanem armej ak kōn technology?

• Ewōr ke aer en̄jake ko ippān Jetōb eo?

• Rej ke ekkejel n̄an ritōl ro im membōr ro an Kabun̄ in im kalōk jemjerā ko? Wōn eo emaron̄ bōk koņaan ilo iien eo tok juon n̄e jej katakin?

• Ta eo jemaron̄ ekkatak jān kabbōjrak ko?

• Ewi jon̄an an em̧m̧an ad kōm̧m̧ane ilo tōpar kōttōpar ko ad? Ewōr ke jabdewōt men jej aikuj ukōte ak ukōt ad kōm̧m̧ane?

• Ej iien eo in ke n̄an kadikļo̧k aer kepaak er?

Lale jebta 11 kōn elōn̄ļo̧k pedped in katak ko im aitia ko kōn ekōjkan ad etale ilo̧kan im jipan̄ armej ro eddōkļo̧k.

Ippān eo m̧ōttam̧, jar ilo ļōmņak kōn ta eo Jemedwōj Ilan̄ enaaj kar kōm̧m̧an bwe lo elōn̄ļo̧k armej ro n̄an katakin. Kōm̧m̧an menin kajjojo wiik im kajjojo raan. Kwon tōmak bwe E ej kōpooj armej ro n̄an katakin (lale Katak im Bujen Ko 100:3–8.

Kōm̧m̧ani karōk in pukōt kajjojo raan. Kōm̧m̧ani karōk ko kōn m̧akūtkūt ko ilo maron̄ eo am̧ me rej kareel jem̧ļo̧k ko an kakōļļe aorōk eo. Waanjon̄ak ko ekoba:

• Elōn̄ jete armej ro rekāāl kwonaaj kōnono ippāer kōn gospel eo kajjojo raan.

• Elōn̄ jete kōttan am̧ naaj kajjitōk ippān membōr ro, armej kwoj katakin er, im armej kwoj kepaak er eļan̄n̄e rejeļā kajjien juon eo me emaron̄ itok limo ilo ennaan eo am̧.

• Ewi m̧ōkaj in am̧ naaj lale ro liwaj ak ennaan ko jei ilo social media.

Etale Kwaļo̧k Gospel eo Aō app eo im kajjitikin eok make kajjitōk ko āinwōt kein:

• Ta eo Jemedwōj Ilan̄ enaaj kar kōņaaan bwe jen kōm̧m̧ane rainin im wiik in n̄an pukōt armej ro n̄an katakin?

• Ta kōttōpar ko an kakōļļe aorōk eo raan otemjeļo̧k im wiik otemjeļo̧k jemaron̄ kōm̧m̧ane n̄an pukōt armej ro n̄an katakin?

• Ewi wōt m̧akūtkūt in kappok eo em̧m̧an tata n̄an awa in an rainin im jikin eo?

• Ekōjkan ad maron̄ im̧we im rie ro uwaan ward eo ilo kijejeto ko aer n̄an leto letak gospel eo kōn pedped in katak ko an iakwe, kwaļo̧k, im karuwainene?

• Ewi wōt memebōr ro rekāāl jemaron̄ kepaak er n̄an jipan̄ er pād ilo kweilo̧k in kwojkwoj eo? Ewōr ke jabdewōt m̧ōttaer remaron̄ karuwaineneik?

• Ekōjkan ad maron̄ jerbal ippān ward ko̧o̧njeļ eo ak ro rej bōk koņaer ilo kweilo̧k in kōtōbalbal eo wiik otemjeļo̧k an ward eo n̄an kile ro uwaan baam̧le ejjab aolep rej membōr, membōr ro rej bar ro̧o̧ltok, im ro rej pojān elder n̄an kepaak er?

• Ewi wōt armej ro kiio katakin, amrej kar katakin in er m̧okta, im armej ro kar litok jemaron̄ kepaak er? Ekōjkan ad naaj kepaak er? (Ilo kanem armej, kōn technology, kōn talboon, ak ilo wāween ko jet)

• Ta jet iaan wāween ko rekāāl jemaron̄ kappok armej?

• Ta tōļan ko am̧ make im kajoor ko jemaron̄ kōjerbali?

• Ekōjkan ad maron̄ kōkōm̧anm̧anļo̧k maron̄ eo ad n̄an pukōt armej ro n̄an katakin?

• Ekōjkan ad maron̄ jipan̄ ro me jej kepaak er en̄jake kareel eo an Jetōb Kwojarjar?

N̄an waanjon̄ak ko kōn m̧akūtkūt in kappok ko, lale jepta 9, 10, im 13.

Kōjerbal Kwaļo̧k Gospel eo Aō app eo n̄an jipan̄ eok kile m̧akūtkūt in kappok ko me raar wejepedik ilo N̄an waanjon̄ak, kwomaron̄ ke lo ekōjkan an am̧ kar lo rioktak ro kiiō.

Kappukōt im̧we eo im peļļo̧k n̄an im̧we ko rekāāl im aitia ko. Jab ļoor ejja jekjek eo wōt. Mijenede ro me ejjab bōjrak aer lo armej ro rekāāl n̄an katakin emakijkij aer kōjebal elōn̄ wāween ko kajjojo wiik. Rej jerbale ejjab bōjrak.

Ippān eo m̧ōttam̧, kōjerbal Kwaļo̧k Aō Gospel app eo n̄an ļo̧o̧ke im jikejuuļi kōttōpar ko im karōk ko am̧ ilo tipdik in Ļo̧o̧ke im jikejuuļi karōk ko am̧ naaj jipan̄ eok kile ta m̧akūtkūt ko n̄an būki im n̄āāt eo n̄an būki.

Kajjitōkin eok make kajjitōk ko āinwōt kein:

• N̄āāt im ekōjkan ad naaj kepaak armej ro? Ta jekjek eo em̧m̧an tata? Jikin ta eo em̧m̧an tata? Iien ta ko rem̧m̧an tata an raan eo n̄an wāween ko rooktak n̄an pukōt armej ro?

• Ekōjkan an maron̄ wōr ad iien bwebwenato eļap meļeļeier ippān armej ro jej ioon er?

• Ekōjkan im n̄āāt eo jenaaj lo online kōjerbal social media im technology ko jet?

• N̄āāt eo jenaaj kepaak ro kar letok er?

• Ta jortoklik karōk ko jenaaj kōm̧m̧ani n̄e karōk ko jet rejjab tōprak?

Niknik kajjieon̄ kōtōprak kōttōpar ko am̧ n̄an pukōt armej ro n̄an katakin. Kōm̧m̧ane juon jar ilo būruōm̧ ilo aolepān raan eo. Peļļo̧k n̄an iak-iakwe im kōnono n̄an armej ro kwoj ioon er. Jetōb eo enaaj jipan̄ eok jeļā ia eo n̄an etal, ta eo n̄an kōm̧m̧an, ta eo n̄an ba, im ta okoktak ko n̄an kōm̧m̧ani.

Ilo raan eo, kajjitōkin eok make kajjitōk ko āinwōt kein:

• Ekōjkan ad maron̄ jerbal kōn tōmak, lōke Irooj n̄an jipan̄ kōj im kōļapļo̧k kijejeto ko ad n̄an jerbal n̄an ajri ro Nejin?

• Ekōjkan ad maron̄ lo̧ļe im peran n̄en jerbale karōk ko ad?

• Ekōjkan ad maron̄ ukukōt karōk ko ad ekkar n̄an aikuj ko im jekjek ko an armej ro?

• Ekōjkan ad maron̄ jipan̄ armej ro en̄jake kareel eo an Jetōb Kwojarjar?

Karōk ko rejjamin aolep iien etal āinwōt ad kōjatdikdik. Kwon meļak im kōjerbal jortoklik karōk ko n̄e aikuj.

Ilo aolepān raan eo im wiik eo, jar ilo am̧ etale eddōkļo̧k eo ilo tōpar kōttōpar ko am̧ n̄an kappukōt armej n̄an katakin. Kajjitōkin eok make kajjitōk ko āinwōt kein:

• Ewi jon̄an an em̧m̧an n̄an ad kōm̧m̧an n̄an tōpar kōttōpar ko ad im ļoor karōk ko ad?

• Ta oktak ko jej aikuj kōm̧m̧ani n̄an tōpar kōttōpar ko ad n̄an kappok armej?

• Ekōjkan ad maron̄ jab po ilo juon jekjek me ejjab em̧m̧an n̄an kappok armej n̄an katakin?

• Ta juon men eo ekāāl jemaron̄ kajjieon̄e ilo tōre an raan eo?

• Ta jet iaan aitia ko jemaron̄ kōnono kaki ilo kweilo̧k in kōtōbalbal wiik otemjeļo̧k an ward eo n̄an jipan̄ kōj lo armej ro n̄an katakin? (Lale jebta 13).

Āinwōt juon kampānien, kōjerbal “Kijejeto in Kappok ko” jaat eo ilo jebta 9 n̄an etale kijejeto in kappok ko am̧ wiik otemjeļo̧k im raan otemjeļo̧k. Kile men ko me em̧m̧an am̧ kōm̧m̧ani, im ļōmņak ekōjkan am̧ maron̄ em̧m̧anļo̧k.

Ilo aolepān raan eo, bōjrak ium̧win jejjo minit ko n̄an kile pein Anij ilo jerbal eo am̧.