დაეხმარე ადამიანებს, აიღონ და შეასრულონ ვალდებულებები

ეძიე სულიწმინდის მითითება იმის შესახებ, თუ რა მოწვევები გაავრცელო და როდის გაავრცელო ისინი. გაითვალისწინე, სწორად გაგებული რომელი სწავლება ან მოძღვრება დაეხმარება ადამიანს შენი მოწვევის მიღებაში. სწორ დროს განხორციელებულმა სწორმა მოწვევამ შესაძლოა ადამიანს რწმენა გაუძლიეროს. აღნიშნულმა ქმედებებმა შეიძლება გამოიწვიოს გულის ძლიერი ცვლილება (იხ. მოსია 5:2; ალმა 5:12–14).

შენ მიერ გავრცელებული მოწვევა შეიძლება მცირე იყოს, მაგალითად, წმინდა წერილის რომელიმე თავის წაკითხვა ან ზიარების შეკრებაზე დასწრება. ან ეს მოწვევა შეიძლება იყოს ისეთი მნიშვნელოვანი, როგორიც ნათლობა. მოწვევა უნდა შეეფერებოდეს იმ ადგილს, სადაც ადამიანი თავის სულიერ მოგზაურობაში იმყოფება.

სულიწმინდის დახმარებით გავრცობილი მოწვევები ეფუძნება ერთმანეთს, რათა დაეხმაროს ადამიანს სულიერ წინსვლაში (იხ. 2 ნეფი 28:30; მოძღვრება და აღთქმები 93:12–13). ჰკითხე საკუთარ თავს: „რა ვალდებულებას ასრულებს ეს ადამიანი? შემდეგ რისი გაკეთება სჭირდება წინსვლისთვის?“

მოუსმინე ადამიანებს, რომლებსაც ესაუბრები ან ასწავლი. იმის მიხედვით, რაც გესმის და რასაც გრძნობ, ეძიე სულიწმინდის მითითება იმის შესახებ, თუ რა მოწვევა დაეხმარება თითოეულ ადამიანს წმინდა აღთქმების დადებაში.

მოწვევა ქრისტესადმი რწმენას მოითხოვს. გწამდეს, რომ ის დალოცავს ადამიანებს, როდესაც ისინი მიიღებენ და შეასრულებენ შენს მოწვევას.

ადამიანები უფრო მეტად შეიცვლებიან, როცა მათ მოიხმობ, რათა იმოქმედონ სახარების ჭეშმარიტების მიხედვით და დაეხმარები დაინახონ, როგორ დალოცავს მათ ცვლილება. ისინი შეიცვლებიან იმდენად, რომ იგრძნობენ სულიწმინდას და განიცდიან იესო ქრისტეს სახარებით ცხოვრების სიხარულს.

როდესაც ესაუბრები ადამიანებს, პირადად თუ ინტერნეტით, იფიქრე იმაზე, თუ რა მოწვევას შეუძლია გააძლიეროს მათი რწმენა ქრისტესადმი და იგრძნონ სულიწმინდა. ზოგჯერ ეს შეიძლება იყოს ისეთი მარტივი, როგორც შენთან ხელახლა შეხვედრა ან ეკლესიის ღონისძიებაზე მისვლა.

როდესაც ემზადები გაკვეთილის ჩასატარებლად, გაითვალისწინე თითოეული ადამიანის საჭიროებები და წინსვლა. დარწმუნდი, რომ შენი გაკვეთილის გეგმა შეიცავს ერთ ან მეტ მოწვევას, რომელიც დაეხმარება ადამიანს წინსვლაში.

ნუ განავრცობ ერთდროულად ბევრ მოწვევას. ადამიანს დრო სჭირდება, რათა იმოქმედოს, განვითარდეს და ისწავლოს თითოეული მოწვევიდან.

გაბედულად, მაგრამ არა ბრძანებლურად, მოიწვიე ადამიანები ვალდებულებების ასაღებად (იხ. ალმა 38:12). პატივი ეცი პიროვნების არჩევნის თავისუფლებას.

მოწვევა ხშირად იწყება სიტყვით „შეგიძლიათ“, რაც „კი-არა“ პასუხს მოითხოვს. მოწვევა უნდა იყოს კეთილი, კონკრეტული და გასაგები. მოწვევამ უნდა მიიყვანოს ადამიანები ან გაუძვეს მათ ვალდებულებების აღებამდე, იმოქმედონ იესო ქრისტესადმი რწმენით.

მიუხედავად იმისა, რომ შენი მოწვევა ინდივიდუალური ხასიათის იქნება თითოეული პიროვნებისთვის, გაითვალისწინე შემდეგი მაგალითები:

• ეკლესიაში სიარული გაძლევთ დროსა და ადგილს, რათა თაყვანი სცეთ ღმერთს და იგრძნოთ მისი სული. როცა განახორციელებთ ცვლილებებს მხსნელთან მიახლოების მიზნით, ეს გეხმარებათ გახდეთ მხარდამჭერი თემის ნაწილი. ამ კვირას ჩვენთან ერთად დაესწრებით ზიარების შეკრებას?

• ახლა, როცა უკვე განვიხილეთ წმინდა წერილების შესწავლის მნიშვნელობა, წაიკითხავთ [წმინდა წერილის კონკრეტული მონაკვეთი]? ჩაიწერთ მიღებულ შთაბეჭდილებებს ან გაჩენილ შეკითხვებს? თქვენს ფიქრებსა და მოსაზრებებს შემდეგ შეხვედრაზე მივუბრუნდებით.

• ჩვენ განვიხილეთ მხსნელის ცხოვრება და მისი მცნებები. მიბაძავთ ჩვენი მხსნელის მაგალითს მის ეკლესიაში მონათვლითა და პირობის დადებით? (იხ. „ნათლობისა და წევრად დამტკიცების მოწვევა”, თავი 3.)

• თქვენ გამოხატეთ ინტერესი და გსურთ, ცხოვრებაში უფრო მეტად დაუკავშირდეთ ღმერთს. ილოცებთ რწმენით მომდევნო დღეების განმავლობაში, რათა გამოსცადოთ ლოცვის კურთხევები?

• ვიდეო მასალა გვაქვს, რომელიც დაგეხმარებათ. გაჩვენოთ თუ ბმული გამოგიგზავნოთ? უყურებთ? შეიძლება, ხვალ შეგეხმიანოთ და გავიგოთ, რას ფიქრობთ?

ეძიე სულიწმინდის კარნახი, როდესაც განიხილავ მოწვევის კეთილ, კონკრეტულ და მკაფიო მოწვევის ბუნებრივ გზებს.

გამოსახულება

ქალბატონები ერთმანეთს ეხუტებიან

მოკლე ყოველდღიური კონტაქტის დაგეგმვა

ადამიანების აღთქმების შესრულებაში დახმარება იწყება თქვენი პირველი შეხვედრიდან და სწავლებიდან. სთხოვე, ჩაიწერონ თავიანთი ვალდებულებები მობილურში, კალენდარში ან იმაში, რასაც დაუტოვებ.

ჰკითხე, შეგიძლია თუ არა შენ ან წევრს, რომელიც მონაწილეობდა, დაამყაროთ მოკლე ყოველდღიური კონტაქტი სასწავლო შეხვედრებს შორის. აუხსენი, რომ ამ კონტაქტების მიზანია მათი მხარდაჭერა და აღწერე რამდენიმე გზა, რომლითაც შეგიძლია ამის გაკეთება. ეს კონტაქტები მოძღვრება და აღთქმები 84:106-ში მოცემული პრინციპის მიყოლის ერთ-ერთი გზაა.

განსაზღვრე კონტაქტის ყველაზე ეფექტური მეთოდი, მაგალითად, ხანმოკლე შეხვედრა, სატელეფონო ზარი, sms-ი ან სოციალურ ქსელებში შეტყობინება. ტექნიკური საშუალებები უამრავ ვარიანტს გვთავაზობს დამატებითი შეხსენებისა და მხარდაჭერისთვის.

ყოველი მოწვევისთვის ჩაწერე შენიშვნები „იქადაგე ჩემი სახარების“ აპლიკაციაში იმის შესახებ, თუ როგორ უნდა მოიქცე მომდევნო დღეს. მეორე დღის დაგეგმვისას ეძიე სულიწმიდის გაძღოლა, როდესაც განიხილავ, როგორ დაეხმარო ადამიანებს ვალდებულებების შესრულებაში.

გახადე ყოველდღიური კონტაქტი ადამიანებთან პოზიტიური და წამახალისებელი. ილოცე მათთვის. გამოავლინე სიყვარული და მათი გაგება, როცა ვალდებულებების შესრულებაში ეხმარები. უპასუხე შეკითხვებზე და დაეხმარე წინააღმდეგობების დაძლევაში. თუ დრო გექნებათ, ერთად წაიკითხეთ ნაწყვეტები მორმონის წიგნიდან. გაუზიარე ეკლესიის შესაფერისი წყაროები, მათ შორის, ეკლესიის მუსიკა, რომელმაც შეიძლება გაახალისოს ისინი. პატივი ეცი მათ დროსა და სურვილებს.

გააცანი ისინი ეკლესიის სხვა წევრებს. საჭიროების შემთხვევაში სთხოვე წევრებს, დაეხმარონ ადამიანებს აღთქმების შესრულებაში (იხ. თავი 10).

შეაქე ადამიანები, რომლებიც მუშაობენ თავიანთი ვალდებულებების შესასრულებლად. დაანახე, როგორი კმაყოფილია უფალი მათი ძალისხმევით. ეს ადამიანები საკუთარ ცხოვრებას ცვლიან, რასაც ბევრი მუშაობა და მოთმინება სჭირდება. დაეხმარე, აღმოაჩინონ მიღებული კურთხევები. გამოხატე თავდაჯერებულობა მათი მომავალი წარმატების მიმართ.

დაანახე ადამიანებს შენი სიყვარული, თუ მათ ვერ შეასრულეს ვალდებულებები. შესთავაზე მხარდაჭერა ყოველდღიური კონტაქტის დროს. მაგალითად, თუ პიროვნებამ მიიღო მორმონის წიგნის რომელიმე თავის წაკითხვის მოწვევა, მაგრამ ჯერ არ გაუკეთებია ეს, შესთავაზე ერთად წაკითხვა. დაეხმარე ადამიანს, გამოცდილებით აღმოაჩინოს, თუ როგორ დალოცავს მის ცხოვრებას ვალდებულებების შესრულება.

შეიძლება ადამიანს ბევრი მცდელობა დასჭირდეს ვალდებულების შესასრულებლად და მათ დასახმარებლად, შესაძლოა, რამდენიმე შეხვედრა დაგჭირდეთ. იმსჯელე, როგორ გადალახონ წინააღმდეგობები ვალდებულებების შესასრულებლად. იყავი მომთმენი და გვერდში დაუდექი, ნუ გააკრიტიკებ და ნუ განიკითხავ.

როდესაც პიროვნებას შემდგომ კონტროლს გაუწევ სთხოვე, გაგიზიაროს ვალდებულებების შესრულებასთან დაკავშირებული გამოცდილება. ჰკითხე, რა ისწავლეს და იგრძნეს. ეს მათ დაეხმარება გააცნობიერონ სულიწმიდის გავლენა ცხოვრებაში და განსაზღვრონ შემდეგი ნაბიჯი.

ადამიანებთან ყოველდღე დაკავშირებისას, შენი მიზნის მნიშვნელოვანი ნაწილია სულიწმინდის გავლენის მოწვევა მათ ცხოვრებაში. დაეხმარე, ამოიცნონ სულიწმინდა, როცა მათთან არ იმყოფები. შენმა ყოველდღიურმა კონტაქტმა უნდა გააძლიეროს სწავლების დროს მიღებული სულიერი შეგრძნებები. ისინი მოიქცევიან, როცა იგრძნობენ სულიწმინდის ძალასა და გავლენას.

მოქცევის პროცესი ორიენტირებულია ქრისტეს მსგავს სიყვარულზე (იხ. 4 ნეფი 1:15). ეძიე გულმოწყალების ძღვენი. გულწრფელი სიყვარულის გამოვლენა დაეხმარება ადამიანებს, ცხოვრებაში იგრძნონ სულიწმინდის არსებობა. შენ მიერ სიყვარულის გამოხატვის გამო მათ შეიძლება მიიღონ მოწვევა და შეასრულონ ვალდებულებები, რომლებიც მათ მოქცევისკენ წაიყვანს.

როდესაც სხვებს ასწავლი და შეიყვარებ, მხსნელისკენ შენი პირადი მოქცევაც გაღრმავდება და განმტკიცდება.

სხვა ადამიანის მოქცევაში დახმარება წმინდა საქმეა. შენ იპოვი უწყვეტ სიხარულს, როცა საკუთარ თავს მიუძღვნი ამ საქმეს და სხვების მსახურებას (იხ. მათე 10:39; მოსია 2:17; ალმა 27:17–18; მოძღვრება და აღთქმები 18:10–16).

• განსაზღვრე მცნება გაკვეთილი 4-დან. მოძებნე და ჩაიწერე უკანასკნელ დღეთა წინასწარმეტყველების ციტატები და ნაწყვეტები წმინდა წერილებიდან, რომლებიც აღწერენ დაპირებულ კურთხევებს, რომლებიც დაკავშირებულია ამ მცნებასთან. მოიფიქრე კურთხევები, რომლებიც უკვე მიიღე ამ მცნების დაცვით და ჩაიწერე ისინი შენს სამუშაო რვეულში.

• როდესაც დაუკავშირდები შენს ოჯახს ან სხვებს, ჰკითხე, როგორ მიიღეს დალოცვები კონკრეტული მცნებების დაცვით (მაგალითად, კვირადღის სიწმინდის დაცვა, მეათედის კანონის დაცვა ან ისეთი მცნების დაცვა, რომელიც რთული დასაცავია კონკრეტული პიროვნებისთვის, რომელსაც ასწავლი).

• უპასუხე შემდეგ კითხვებს, რომლებიც დაგეხმარება იმ სფეროების განსაზღვრაში, სადაც შეგიძლია გააუმჯობესო მოწვევები. შეადგინე გაუმჯობესების გეგმები.

  • იციან ადამიანებმა ჩემი მათდამი სიყვარულის შესახებ?

  • მჯერა, რომ დალოცვებს მიიღებენ ჩვენი მოწვევების მიხედვით მოქმედების შემთხვევაში?

  • ვუთმობ შესაბამის დროს და ყურადღებას ადამიანებთან ყოველდღიური კონტაქტის დამყარებას, რათა დავეხმარო მათ ვალდებულებების შესრულებაში?

  • ჩვენი გაკვეთილის გეგმები მოიცავს კონკრეტულ მოწვევას?

• გადახედე ერთ-ერთი მისიონერული გაკვეთილის მოწვევას. თითოეული მოწვევისთვის, უპასუხე შემდეგ შეკითხვებს:

  • რა დალოცვები აღუთქვა უფალმა მათ, ვინც ამ ვალდებულებას ასრულებს?

  • როგორ დაეხმარება ამ პრინციპის დაცვა ადამიანებს რწმენისა და მოწმობის გაზრდაში?

  • როგორ დაეხმარება ეს ვალდებულება ადამიანებს, მოინანიონ და იყვნენ უფრო მგრძნობიარენი სულიწმინდის მიმართ?

• დაგეგმვის იარაღებიდან შეადგინე იმ ადამიანების სია, რომლებსაც ბოლო ორი დღის განმავლობაში დაუკავშირდი. ჩართე მოსწავლეები და წევრები.

  • თითოეული პიროვნებისთვის, ჩამოწერე მოწვევები და მათ მიერ აღებული ვალდებულებები.

  • იფიქრე, კიდევ რომელი მოწვევის გავრცელება შეგეძლო.

  • იმსჯელე, რატომ შეძელი ამ ადამიანებისგან ვალდებულების მიღება, სხვებისგან კი ვერა.

  • რას მოიმოქმედებ, რათა მოახდინო ამ მოწვევების შემდგომი კონტროლი?

• განიხილე ეფექტური და შემოქმედებითი იდეები შენს მოსწავლეებთან ყოველდღიური კონტაქტისთვის. როგორ იმუშავეს მისიონერებმა წევრებთან ეფექტურად? რომელია ბეჭდური თუ ციფრული მასალა სასარგებლო? რა შეგიძლია გააკეთო, თუ ადამიანი სახლში არ არის ან ძალიან დაკავებულია და შეხვედრას ვერ ახერხებს?

• განიხილე მისიონერების მიერ მცნებების ეფექტური სწავლების გზები გაკვეთილი 4-ში.

• როცა შესაძლებელია, დაესწარით მისიონერებს სწავლებისას. დაეხმარეთ მათ, მოახდინონ ფოკუსირება ადამიანების დახმარებაზე, აიღონ და შეასრულონ ვალდებულებები.

• წაახალისეთ მეურვეობის მღვდლობის ხელმძღვანელები, ორგანიზაციის ხელმძღვანელები და წევრები, დაამყარონ ყოველდღიური კონტაქტი ადამიანებთან, რომლებსაც მისიონერები ასწავლიან — თუ ეს ადამიანები დათანხმდებიან ამას.