გამოიყენე მორმონის წიგნის ძალა

გამოსახულება

თაღოვანი კარი საჭექი ქვით

მორმონის წიგნი ჩვენი რელიგიის საჭექი ქვაა

წინასწარმეტყველ ჯოზეფ სმითის სწავლებით, მორმონის წიგნი არის „ჩვენი რელიგიის საჭექი ქვა“ (მორმონის წიგნის შესავალი). სხვა შემთხვევაში მან ასევე თქვა: „გააქრეთ მორმონის წიგნი და გამოცხადებები და რა იქნება ჩვენი რელიგია? არაფერი“ (Teachings of Presidents of the Church: Joseph Smith [ეკლესიის პრეზიდენტთა სწავლებანი: ჯოზეფ სმითი] [2007 წ], 196).

თაღი არის ძლიერი არქიტექტურული ნაგებობა, რომელიც დამზადებულია სოლისებრი ნაწილებისგან, რომელნიც ერთმანეთს ეყრდნობა. შუა ნაწილი ანუ „საჭექი ქვა“, როგორც წესი, სხვა სოლებზე დიდია და ისაა საყრდენი.

პრეზიდენტ ეზრა ტაფთ ბენსონის სიტყვებით, მორმონის წიგნი მინიმუმ სამი გზითაა ჩვენი რელიგიის საჭექი ქვა:

ქრისტეს მოწმე. „მორმონის წიგნი არის იესო ქრისტეზე ჩვენი მოწმობის საჭექი ქვა, ხოლო ქრისტე არის ჩვენი ყოველი საქმის ქვაკუთხედი. იგი ძალითა და სიცხადით მოწმობს მის რეალობაზე“.

მოძღვრების სისრულე. „უფალმა თავად ბრძანა, რომ მორმონის წიგნი შეიცავს „იესო ქრისტეს სახარების სისრულეს“ [მოძღვრება და აღთქმები 20:9; 27:5]. … მორმონის წიგნში აღმოვაჩენთ ჩვენი ხსნისათვის საჭირო [მოძღვრების] სისრულეს. და [ის] ისწავლება მარტივი ენით, რათა ხსნისა და ამაღლების გზების გაგება ბავშვებმაც კი შეძლონ“.

მოწმობის საფუძველი. „ისევე, როგორც თაღი იშლება, თუ საჭექი ქვა ამოღებულია, ასევე მთელი ეკლესია დგას ან ეცემა მორმონის წიგნის ჭეშმარიტებაზე. … თუ მორმონის წიგნი ჭეშმარიტია … უნდა დავეთანხმოთ აღდგენის მტკიცებულებას“. (Teachings of Presidents of the Church: Ezra Taft Benson [ეკლესიის პრეზიდენტთა სწავლებანი: ეზრა ტაფთ ბენსონი] [2014 წ], 129, 131, 128.)

როდესაც ვიღებთ მოწმობას, რომ მორმონის წიგნი ღვთის სიტყვაა, ჩვენ ასევე შეგვიძლია მივიღოთ მოწმობა იმისა, რომ ჯოზეფ სმითი წინასწარმეტყველი იყო. მისი მეშვეობით ღმერთის მღვდლობის უფლებამოსილება აღდგა ზეციური მაცნეების მეშვეობით. ღმერთმა ასევე უბოძა უფლებამოსილება ჯოზეფ სმითს, რომ შეექმნა იესო ქრისტეს ეკლესია. გამოცხადება დღესაც გრძელდება, ცოცხალი წინასწარმეტყველების მეშვეობით.

გამოსახულება

ახალგაზრდა კაცი კითხულობს წმინდა წერილს

პირადი მოქცევისას მორმონის წიგნი უმნიშვნელოვანესია

მოქცევის სასიცოცხლოდ მნიშვნელოვანი ნაწილია სულიწმინდის ძალით მოწმობის მიღება, რომ მორმონის წიგნი ჭეშმარიტია. გულწრფელად წაკითხვისა და შესწავლის დროს იგრძნობ, როგორ აფართოებს მისი სიტყვები სულს. მისი სიტყვები ნათელს მოჰფენს შენ მიერ ცხოვრების, ღვთის გეგმისა და იესო ქრისტეს გააზრებას (იხ. ალმა 32:28). ილოცე ამ წიგნის შესახებ ნამდვილი განზრახვითა და ქრისტესადმი რწმენით. და ასე თუ მოიქცევი, მიიღებ მოწმობას სულიწმინდის მეშვეობით, რომ ეს არის ღვთის სიტყვა (იხ. მორონი 10:4–5).

მორმონის წიგნის შესახებ შენი მოწმობა გამოიწვევს ღრმა და მუდმივ რწმენას მის ძალაში, დაგეხმაროს სხვების მოქცევაში. დაეხმარე შენს მოწაფეებს, აღმოაჩინონ ის სინათლე, რომელსაც გრძნობენ, როცა გულწრფელად კითხულობენ მას. ხაზი გაუსვი წიგნის ძლიერ მოწმობას იესო ქრისტეს შესახებ. წაახალისე ისინი ილოცონ, რათა მიიღონ საკუთარი დასტური ამ წიგნის ჭეშმრიტების შესახებ.

შენი სწავლების მთავარი აქცენტი უნდა იყოს ადამიანების წახალისება, ეძიონ სულიწმინდისგან დასტური მორმონის წიგნის შესახებ. მორმონის წიგნს მათი ცხოვრების შეცვლა სამუდამოდ შეუძლია.

წინასწარმეტყველ ჯოზეფ სმითის სიტყვებით, „მორმონის წიგნი დედამიწაზე არსებულ ყველა წიგნთა შორის ყველაზე სწორი წიგნია“ (მორმონის წიგნის შესავალი). ის მოწმობს ქრისტეს შესახებ და ნათლად ასწავლის მის მოძღვრებას (იხ. 2 ნეფი 31; 32:1–6; 3 ნეფი 11:31–39; 27:13–22). ის ასწავლის სახარების სისრულეს. მორმონის წიგნში ნასწავლი სახარების პირველი პრინციპები და წეს-ჩვეულებები არის უხვი ცხოვრებისკენ მიმავალი გზა.

აღდგენილი სახარების სწავლებისას მორმონის წიგნი ძირითად წყაროდ გამოიყენე. ქვემოთ მოცემულ დიაგრამაში ჩამოთვლილია მორმონის წიგნის ზოგიერთი ჭეშმარიტება, რომელსაც შენ ასწავლი.

მორმონის წიგნის მთავარი მიზანია დამოწმება იესო ქრისტეს შესახებ. ის ადასტურებს მისი ცხოვრების, მისიის, აღდგომისა და ძალის რეალობას. ის გვასწავლის ჭეშმარიტ მოძღვრებას ქრისტესა და მისი გამოსყიდვის შესახებ.

რამდენიმე წინასწარმეტყველმა, რომელთა ნაწერები შენახულია მორმონის წიგნში, პირადად იხილა ქრისტე. იარედის ძმამ, ნეფიმ და იაკობმა იხილეს წინამიწიერი ქრისტე. უამრავი ადამიანი იმყოფებოდა ნეფიელებს შორის მხსნელის მსახურების დროს (იხ. 3 ნეფი 11–28). მოგვიანებით კი, მორმონმა და მორონიმ აღმდგარი ქრისტე იხილეს (იხ. მორმონი 1:15; ეფერი 12:39).

როდესაც ადამიანები წაიკითხავენ მორმონის წიგნს და ილოცებენ მის შესახებ, ისინი უკეთ შეიცნობენ მხსნელს და განიცდიან მის სიყვარულს. მათი მოწმობა მის შესახებ გაიზრდება. მათ ეცოდინებათ, როგორ მიუახლოვდნენ მას და გადარჩნენ. (იხ. 1 ნეფი 15:14–15.)

გამოსახულება

პრეზიდენტი რასელ მ. ნელსონი

„მორმონის წიგნი უზრუნველყოფს იესო ქრისტეს გამოსყიდვის ყველაზე სრულ და სანდო გაგებას, რაც კი შეიძლება სადმე მოიძებნოს. ის გვასწავლის, თუ რას გულისხმობს იყო ხელახლა შობილი. … ჩვენ ვიცით, რატომ ვართ დედამიწაზე. ეს და სხვა ჭეშმარიტებები მორმონის წიგნში უფრო ძლიერად და დამაჯერებლად ისწავლება, ვიდრე ნებისმიერ სხვა წიგნში. მორმონის წიგნი მოიცავს იესო ქრისტეს სახარების სრულ ძალას” (რასელ მ. ნელსონი, „მორმონის წიგნი: როგორი იქნებოდა თქვენი ცხოვრება მის გარეშე?” ლიახონა, ნოემ., 2017 წ, 62).

მორმონის წიგნთან დაკავშირებით წინასწარმეტყველმა ჯოზეფ სმითმა თქვა, რომ „კაცი [ან ქალი] ღმერთს უფრო მიუახლოვდება მისი მცნებების დაცვით, ვიდრე ნებისმიერი სხვა წიგნით“ (მორმონის წიგნის შესავალი). როდესაც მუდმივად ასწავლი და იწვევ ადამიანებს იცხოვრონ მორმონის წიგნის პრინციპებით, შენ ეხმარები მათ იესო ქრისტესადმი რწმენის განვითარებასა და ღმერთთან უფრო ახლოს მისვლაში.

მორმონის წიგნი ქმნის მოწმობას და იწვევს პირად გამოცხადებას. გამოიყენე მორმონის წიგნი, რათა დაეხმარო ადამიანებს სულიერი გამოცდილების მიღებაში, განსაკუთრებით კი, სულიწმინდისგან მოწმობის მიღებაში იმის შესახებ, რომ ეს წიგნი ღვთის სიტყვაა.

სწავლებისას პრიორიტეტი მიანიჭე ნაწყვეტებს მორმონის წიგნიდან. მათ, სულიწმინდის მეშვეობით, მოქცევის ძალა გააჩნია. როდესაც სახარებას მორმონის წიგნის გამოყენებით ასწავლი, შენი სწავლება გულისა და გონების ძალასა და სიცხადესთან რეზონანსში შევა.

პრეზიდენტმა გორდონ ბ. ჰინკლიმ გვასწავლა, რომ „მათ, ვინც ლოცვის თანხლებით წაიკითხეს [მორმონის წიგნი] - იქნება მდიდარი თუ ღარიბი, სწავლული თუ უსწავლელი - მისი ძალით გაიზარდნენ“. მან ასევე გვასწავლა:

„ყოველგვარი ეჭვის გარეშე გპირდებით, რომ თუ ლოცვით წაიკითხავთ მორმონის წიგნს, მიუხედავად იმისა, რამდენჯერ გაქვთ ის წაკითხული, თქვენს გულებში უფრო მეტად შემოვა უფლის სული. მოვა გაძლიერებული გადაწყვეტილება, იაროთ მისი მცნებების მორჩილებით და მოვა უფრო ძლიერი დამოწმება ღვთის ძის ცოცხალი რეალობის შესახებ“. („მორმონის წიგნის ძალა”, „Ensign”, ივნისი, 1988 წ, 6).

გამოსახულება

მისიონერები კითხულობენ წმინდა წერილს

მორმონის წიგნი სულის საკითხებს ეხება

მორმონის წიგნის სულიწმინდის გაძღოლით წაკითხვას შეუძლია დაეხმაროს ადამიანებს იპოვონ პასუხები ან შთაგონება მათ პირად ან სულიდან წამოსულ კითხვებზე. დაეხმარე ადამიანებს დაინახონ, როგორ პასუხობს ცხოვრებისეულ შეკითხვებს მორმონის წიგნი.

ქვემოთ ჩამოთვლილია რამდენიმე ასეთი კითხვა და პარალელურად მოცემულია შესაბამისი შენიშვნები მორმონის წიგნიდან.

• ღმერთი არსებობს? ვინ არის ღმერთი? (მოსია 4:9; ალმა 18:24–40; 22:4–23; 30:44)

• იცის ღმერთმა ჩემ შესახებ და ზრუნავს ჩემზე? როგორ ვიგრძნო მისი სიყვარული? როგორ ვიგრძნო მასთან მეტი სიახლოვე? (2 ნეფი 26:24; მოსია 4:9–12; ენოსი 1:1–12; ალმა 18:32; მორონი 10:32–33)

• რა არის ცხოვრების მიზანი? (2 ნეფი 2:25; ალმა 34:32)

• რატომ არის ზოგჯერ ცხოვრება ასეთი რთული? როგორ ვიპოვო ძალა გასაჭირის დროს? (1 ნეფი 17:3; 2 ნეფი 4:20–21; ალმა 36:3; ეფერი 12:27)

• როგორ ვიპოვო სიმშვიდე შფოთვის დროს? (მოსია 24:13–15; ჰელამანი 5:47)

• როგორ ვიყო უფრო ბედნიერი? (მოსია 2:41; ალმა 22:15–16)

• როგორ გავხდე უკეთესი ადამიანი? (მოსია 26:30–31; ალმა 5:12–13; 7:23–24; ეფერი 12:27)

• როგორ ვიგრძნო ღვთის პატიება? (ენოსი 1:2–8; ალმა 36:17–21)

• რა ხდება სიკვდილის შემდეგ? (2 ნეფი 9:3–6, 11–13; ალმა 11:42–44; 40:11)

მორმონის წიგნი ასევე გვაწვდის პასუხებს სხვა ისეთ მნიშვნელოვან კითხვებზე, როგორიცაა:

• როგორ ვიზრუნო ჩემი ოჯახის სულიერ კეთილდღეობაზე? (1 ნეფი 1:1; 8:36–38; მოსია 2:5–6; 4:14–15; 3 ნეფი 18:21)

• როგორ დავეხმარო შვილებს გაძლიერებაში, რომ გაუძლონ ცდუნებას? (1 ნეფი 15:23–25; ჰელამანი 5:12; 3 ნეფი 18:15, 18–21, 24–25)

• როგორ დამეხმარება ღვთის მცნებების დაცვა, მქონდეს უფრო ბედნიერი და ნაყოფიერი ცხოვრება? (2 ნეფი 2:25–28; 4:35; მოსია 2:41; 4 ნეფი 1:15–18)

გამოსახულება

პრეზიდენტი დალინ ჰ. ოუქსი

„მისიონერებმა უნდა იცოდნენ, როგორ გამოიყენონ მორმონის წიგნი საკუთარ კითხვებზე პასუხების გასაცემად, რათა მათ ეფექტურად გამოიყენონ ის და სხვებსაც დაეხმარონ ამაში. … მათ უნდა გააცნობიერონ მორმონის წიგნის ძალა აღდგენილი სახარების სწავლებისას, ჯერ მისი საკუთარ ცხოვრებაში გამოყენებით და შემდეგ მოსწავლეებთან გაზიარებით“ (დალინ ჰ. ოუქსი, „რჩევა მისიის ხელმძღვანელებს“, სემინარი მისიის ახალი ხელმძღვანლებისთვის, 25 ივნისი, 2022 წ).

უფალმა ბრძანა: „უნდა ასწავლო[თ] ჩემი სახარების პრინციპები, რომლებიც არის ბიბლიაში და მორმონის წიგნში, რომელშიც არის ჩემი სახარების სისრულე“ (მოძღვრება და აღთქმები 42:12). უკანასკნელ დღეთა წმინდანებს „სჯერათ, რომ ბიბლია არის ღვთის სიტყვა, რამდენადაც იგი სწორად არის თარგმნილი” (რწმენის სიმბოლოები 1:8; იხ. ასევე 1 ნეფი 13:29). ბიბლია არის წმინდა წერილი. მორმონის წიგნი კი, მისი თანმხლები წმინდა წერილია, რომელიც შეიცავს იესო ქრისტეს სახარების სისრულეს.

ბიბლია და მორმონის წიგნი ერთმანეთს ავსებს და ამდიდრებს (იხ. ეზეკიელი 37:16–17; 1 ნეფი 13:40; მორმონი 7:8–9). წმინდა წერილის ორივე ტომი არის უძველესი წინასწარმეტყველების მიერ ჩაწერილი სწავლებების კრებული. ბიბლია მოგვითხრობს ღვთის ურთიერთმოქმედების შესახებ აღმოსავლეთ ნახევარსფეროში მცხოვრებ ხალხთან ათასობით წლის განმავლობაში. მორმონის წიგნი კი, მოგვითხრობს ღვთის ურთიერთმოქმედების შესახებ ადამიანებთან ძველ ამერიკის კონტინენტზე ათას წელზე მეტი ხნის განმავლობაში.

გამოსახულება

პიროვნება წმინდა წერილის შესწავლისას

და რაც ყველაზე მნიშვნელოვანია, ბიბლია და მორმონის წიგნი — ორივე იესო ქრისტეზე მოწმობს და ერთმანეთს ავსებს. ბიბლია გვაწვდის ცნობას ჩვენი მხსნელის დაბადების, მოკვდავი მსახურებისა და გამოსყიდვის შესახებ — მისი სიკვდილისა და აღდგომის ჩათვლით. მორმონის წიგნი კი, მოიცავს წინასწარმეტყველებებს მხსნელის დაბადებისა და მისიის შესახებ, სწავლებებს მის გამოსყიდვაზე და ჩანაწერს მისი მსახურების შესახებ ამერიკის კონტინენტზე. მორმონის წიგნი ადასტურებს და ავრცობს ბიბლიის მოწმობას იმის შესახებ, რომ იესო არის ღვთის მხოლოდშობილი ძე და სამყაროს მხსნელი.

ბიბლიაც და მორმონის წიგნიც ასწავლის მოწმეთა რჯულს: „ორი მოწმის ან სამი მოწმის პირით დამტკიცდება ყოველი სიტყვა“ (2 კორინთელთა 13:1; იხ. ასევე 2 ნეფი 11:2–3). ამ რჯულის შესაბამისად, წმინდა წერილის ეს ორივე წიგნი მოწმობს იესო ქრისტეს შესახებ (იხ. 2 ნეფი 29:8).

ვინც არ კითხულობს ან ვერ იაზრებს მორმონის წიგნს, გაუჭირდება მისი ჭეშმარიტების შესახებ დასტურის მიღება. შეგიძლია მათთან ერთად წაიკითხო და დაეხმარო ამ წიგნის გააზრებაში. წაიკითხე მოსწავლეებთან დანიშნული შეხვედრის დროს, შემდგომი კონტროლის შეხვედრაზე ან ტექნიკური საშუალებების გამოყენებით. ასევე, შეგიძლია სთხოვო წევრებს, მათთან ერთად წაიკითხონ. დიდად დაგეხმარება მორმონის წიგნის შესახებ ვიდეო მასალის ნახვა და შემდეგ შესაბამისი თავების წაკითხვა.

ილოცე დახმარების მიღებისთვის, როდესაც აირჩევ იმ ნაწყვეტებს, რომლებიც ეხმიანება ადამიანების საზრუნავსა და საჭიროებებს. წაიკითხე და განიხილე მოკლე ნაწყვეტები, როგორიცაა: 1 ნეფი 3:7 ან მოსია 2:17. ასევე, წაიკითხე და განიხილეთ უფრო გრძელი ნაწყვეტები, მაგ.: 2 ნეფი 31, ალმა 7, ან 3 ნეფი 18. წაახალისე ადამიანები, წაიკითხონ მორმონის წიგნი თავიდან, მათ შორის სამი და რვა მოწმის დამოწმება და წინასწარმეტყველ ჯოზეფ სმითის მოწმობა.

გამოსახულება

საკვირაო სკოლის გაკვეთილი

მოსწავლეებთან ერთად მორმონის წიგნის კითხვისას გაითვალისწინე შემდეგი რეკომენდაციები:

• კითხვის დაწყებამდე ილოცე. ითხოვე დახმარება გააზრებისთვის. ილოცე, რათა სულიწმინდამ დაუდასტუროს მათ ამ წიგნის ჭეშმარიტება.

• მორიგეობით წაიკითხეთ. წაიკითხე მათთვის მოსახერხებელი სიჩქარით. განმარტე უცნობი სიტყვები და ფრაზები.

• დროდადრო შეჩერდით და განიხილეთ წაკითხული.

• განმარტე ნაწყვეტის ისტორია და კონტექსტი, მაგალითად, ვინ საუბრობს, როგორი პიროვნებაა, როგორია სიტუაცია მის გარშემო. თუ მორმონის წიგნის შესაბამისი ვიდეო მასალა მოიძებნება, აჩვენე მათ.

• ხაზი გაუსვი მოსაძიებელ ძირითად გზავნილებს ან მოძღვრებას.

• გააზიარე შენი მოწმობა, შესაფერისი შთაგონებები, შეგრძნებები და პირადი გამოცდილება.

• ასწავლე მოძღვრება პირდაპირ მორმონის წიგნის წინასწარმეტყველთა სიტყვებით. ეს დაეხმარება ადამიანებს, იგრძნონ წიგნის სულიერი ძალა.

• დაეხმარე ადამიანებს, წაკითხული „მიუსადაგონ“ საკუთარ ცხოვრებას (1 ნეფი 19:23). დაეხმარე მათ დაინახონ, როგორ შეესაბამება წმინდა წერილი პირადად მათ.

ამ პრინციპების გამოყენებით შენ ადამიანებს მორმონის წიგნის დამოუკიდებლად წაკითხვის უნარისა და სურვილის განვითარებაში დაეხმარები. ხაზი გაუსვი იმას, რომ წიგნის ყოველდღიური კითხვა მონათვლისა და მოქცევისკენ წინსვლის მთავარი ელემენტია.

დაეყრდენი დაპირებას, რომელიც მოცემულია მორმონი 10:3–5-ში. წაახალისე ადამიანები, გულწრფელად წაიკითხონ მორმონის წიგნი და ილოცონ ნამდვილი მოწადინებით რათა გაიგონ, რომ ის ჭეშმარიტია. განმარტე, რომ ნამდვილი მოწადინებით კითხვა ნიშნავს მზაობას სულიწმინდისგან მიღებული პასუხის მიხედვით მოქმედებას. ყოველ ადამიანი, რომელიც გულწრფელად კითხულობს და ნამდვილი მოწადინებით ლოცულობს მორმონის წიგნის შესახებ, სულიწმინდის ძალით მიიღებს ცოდნას მისი ჭეშმარიტების შესახებ.

შენ ასევე უნდა გამოიყენო ეს დაპირება რეგულარულად, რათა განამტკიცო საკუთარი მოწმობა მორმონის წიგნის შესახებ. შენი მოწმობა მოგცემს თავდაჯერებას, რომ ვინც ამ დაპირებას გამოიყენებს, მიიღებს დასტურს, რომ ეს წიგნი ღმერთის სიტყვაა.