“Mga Ideya sa Pagpalambo sa Imong Pamilya nga Pagtuon sa Kasulatan,” Mga Ideya sa Pagtuon sa Kasulatan (2021)
“Mga Ideya sa Pagpalambo sa Imong Pamilya nga Pagtuon sa Kasulatan,” Mga Ideya sa Pagtuon sa Kasulatan
Mga Ideya sa Pagpalambo sa Imong Pamilya nga Pagtuon sa Kasulatan
Ang kanunay nga pagtuon sa kasulatan usa ka gamhanan nga paagi sa pagtabang sa imong pamilya nga makakat-on sa ebanghelyo. Unsa ka daghan ug kadugay ang inyong pagbasa isip pamilya dili sama kaimportante kay sa pagka-makanunayon sa inyong mga paningkamot. Samtang himoon ninyo ang pagtuon sa kasulatan nga importante nga bahin sa kinabuhi sa inyong pamilya, matabangan ninyo ang mga sakop sa inyong pamilya nga mas mahiduol kang Jesukristo ug motukod sa ilang mga pagpamatuod sa pundasyon sa Iyang pulong.
Ikonsiderar ang mosunod nga mga pangutana:
-
Unsaon nimo pag-awhag ang mga sakop sa pamilya sa pagtuon sa mga kasulatan sa ilang kaugalingon?
-
Unsay imong mabuhat sa pag-awhag sa mga sakop sa pamilya sa pagpakigbahin unsay ilang nakat-onan?
-
Unsaon nimo sa paghatag og gibug-aton sa mga baroganan nga imong nakat-onan diha sa mga kasulatan sa matag adlaw nga mga kahigayonan sa pagtudlo?
Hinumdumi nga ang panimalay mao ang labing maayong dapit sa pagkat-on sa ebanghelyo ug pagtudlo. Ikaw makakat-on ug makatudlo sa ebanghelyo diha sa panimalay sa mga paagi nga dili mahimo diha sa klase sa Simbahan. Pagmamugnaon samtang ikaw naghunahuna og mga paagi sa pagtabang sa imong pamilya sa pagkat-on gikan sa mga kasulatan. Ikonsiderar ang pipila sa mosunod nga mga ideya sa pagpalambo sa imong pamilya nga pagtuon sa kasulatan.
Paggamit og Musika
Kanta og mga awit nga nagsuporta sa mga baroganan nga gitudlo diha sa mga kasulatan.
Pagpaambit og Makahuloganong mga Kasulatan
Hatagi og panahon ang mga sakop sa pamilya sa pagpaambit og mga tudling sa kasulatan nga ilang nakit-an nga makahuloganon sa panahon sa ilang personal nga pagtuon.
Paggamit sa Imong Kaugalingong mga Pulong
Dapita ang mga sakop sa pamilya sa pag-summarize sa ilang kaugalingong mga pulong unsay ilang nakat-onan gikan sa mga kasulatan nga inyong gitun-an.
Gamita ang mga Kasulatan diha sa Imong Kinabuhi
Human mabasa ang usa ka tudling sa kasulatan, hangyoa ang mga sakop sa pamilya sa pagpakigbahin og mga paagi nga ang mga tudling magamit diha sa ilang mga kinabuhi.
Pangutana
Dapita ang mga sakop sa pamilya sa pagpangutana og usa ka ebanghelyo nga pangutana, ug dayon paggahin og panahon sa pagpangita og mga bersikulo nga makatabang og tubag sa pangutana.
Pagpakita og usa ka Kasulatan
Pilia ang usa ka bersikulo nga makahuloganon kanimo, ug ibutang kini sa dapit nga makita kanunay sa mga sakop sa pamilya. Pagdapit og sakop sa pamilya nga magpuli-puli sa pagpili og kasulatan nga ipakita.
Paghimo og Listahan sa Kasulatan
Isip pamilya, pagpili og pipila ka mga bersikulo nga gusto nimong hisgotan sa umaabot nga semana.
Pagmemorya og mga Kasulatan
Pilia ang usa ka tudling sa kasulatan nga makahuloganon sa imong pamilya, ug dapita ang mga sakop sa pamilya sa pagmemorya niini pinaagi sa pagbalik-balik og basa niini kada adlaw o sa paghimo og dula sa pagmemorya.
Pakigbahin og mga Leksiyon nga Maggamit og Butang
Pangita og mga butang nga may kalabutan sa mga kapitulo ug mga bersikulo nga inyong gibasa isip pamilya. Dapita ang mga sakop sa pamilya sa pagsulti mahitungod sa unsa nga paagi ang matag butang nga may kalabutan sa mga pagtulun-an diha sa mga kasulatan.
Pagpili og usa ka Hilisgotan
Papuli-puliha ang mga sakop sa pamilya sa pagpili og hilisgotan nga tun-an og dungan sa pamilya. Gamita ang Topical Guide, ang Bible Dictionary, o Ang Giya ngadto sa mga Kasulatan (scriptures.ChurchofJesusChrist.org) sa pagpangita og mga tudling sa kasulatan mahitungod sa hilisgutan.
Pagdrowing og Hulagway
Magbasa og pipila ka mga bersikulo isip pamilya, ug dayon hatagi og panahon alang sa mga sakop sa pamilya sa pagdrowing og usa ka butang nga kalabot sa unsay inyong gibasa. Gahini og panahon ang paghisgot sa gidrowing sa usag usa.
Pagdrama og usa ka Istorya
Human mabasa ang istorya, dapita ang mga sakop sa pamilya sa pagdrama niini. Pagkahuman, pakighisgot mahitungod kon sa unsa nga paagi ang istorya kalabot sa mga butang nga inyong nasinati sa tinagsa-tagsa ug isip usa ka pamilya.
Si Elder David A. Bednar mitudlo: “Ang matag pamilya nga pag-ampo, ang matag hitabo sa pamilya nga pagtuon sa kasulatan, ug ang matag home evening usa ka badlis diha sa hulagway sa atong mga kalag. Walay usa ka panghitabo nga makita nga madanihon kaayo o halandumon. Apan sama sa yellow ug sa gold ug brown nga mga linya sa pintal nagtinabangay sa usag usa ug nimugna og usa ka makadani kaayo nga buhat sa kahanas, mao nga ang atong pagkamakanunayon sa paghimo og daw gagmay nga mga butang modala ngadto sa mahinungdanong mga sangputanan nga espiritwal” (“Labaw nga Makugihon ug Mabuhaton diha sa Panimalay,” Liahona, Nob. 2009, 19–20).