“Nganong Magtuon man sa mga Kasulatan?” Mga Ideya sa Pagtuon sa Kasulatan (2021)
“Nganong Magtuon man sa mga Kasulatan?” Mga Ideya sa Pagtuon sa Kasulatan
Nganong Magtuon man sa mga Kasulatan?
Kon kita makugihon nga magtuon sa mga kasulatan, kita mas maduol ngadto kang Jesukristo ug mas makasabot sa Iyang ebanghelyo ug maulaong sakripisyo. Si propeta Nephi midasig kanato niini nga paagi:
“Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon.” (2 Nephi 31:20).
Ang mga pagtulon-an gikan sa mga kasulatan makatabang kanato nga mahibalik ngadto sa atong Langitnong Amahan. Ang atong propeta sa ulahing mga adlaw mihangyo kanato sa kanunay nga magtuon niini isip usa ka indibidwal ug, kon mahimo, isip mga pamilya. Sila midapit kanato sa pagkat-on gikan sa mga kasinatian niadtong anaa sa mga kasulatan ug gamiton ang mga istorya ug mga pagtulon-an sa kasulatan ngadto sa atong kinabuhi karon, sama sa gitambag ni Nephi sa 1 Nephi 19:23. Ang karaan ug ang mga propeta sa modernong panahon midapit kanato sa pagtuon sa mga kasulatan ug sa “pagbusog sa mga pulong ni Kristo” (2 Nephi 32:3).
Si Presidente Russell M. Nelson mitudlo usab niining importante nga kamatuoran bahin sa “pagbusog” sa mga kasulatan:
“Ang pagbusog nagpasab[ot] og labaw pa sa pagtilaw. Ang pagbusog nagpasab[o]t og pagtagamtam. Atong tagamtamon ang mga kasulatan pinaagi sa pagtuon niini diha sa diwa sa maanindot nga pagdiskubre ug sa matinud-anon nga pagsunod. Kon kita magbusog sa mga pulong ni Kristo, matisok kini ‘diha sa [undanong] mga papan nga mga kasingkasing sa tawo’ [2 Mga Taga-Corinto 3:3]. Mahimo na kining mahinungdanong bahin sa atong kinaiyahan” (“Living by Scriptural Guidance,” Ensign, Nob. 2000, 17).
Kon kita kanunay nga moapil sa personal ug pamilya nga pagtuon sa kasulatan, kita ug ang atong mga pamilya magiyahan, mapanalipdan, ug mapalig-on batok sa daghang mga hagit sa atong panahon.