Li na’leb’ re xchaab’ilob’resinkil li tzolok aajunes

Sa’eb’ li loq’laj hu wankeb’ li raatin li Dios. Naq yookat chixtzolb’aleb’, patz’ re laa Choxahil Yuwa’ naq tatxb’eresi ut naq tixk’e aawe lix Musiq’ re taataweb’ ru.

Sa’eb’ li loq’laj hu naxye naq chixjunil li k’a’aq re ru wan naxch’olob’ xyaalal li Kristo (chi’ilmanq 2 Nefi 11:4; Moises 6:63), chi jo’kan, sik’ li Kristo sa’eb’ li esilal, li seraq’, ut li k’a’ru k’utb’il sa’eb’ li loq’laj hu. K’oxla xk’eeb’al reetalil malaj reetalinkileb’ li raqal li neke’aatinak chirix li Kolonel ut chan ru xtaaqenkil.

Maare wan naq taataw naq junjunq li aatin sa’eb’ li loq’laj hu neke’xtoch’ aach’ool, chanchan naq tz’iib’anb’ileb’ choq’ aawe laa’at. Maare taaweek’a naq neke’aatinak chawix ut neke’reek’asi aach’ool. Naru nakak’e reetalileb’ sa’eb’ laa loq’laj hu, malaj nakatz’iib’a resileb’ sa’ jun chik li hu re tzolok.

Wan naq li na’leb’ chirix li evangelio (wan naq tzol’leb’ nayeeman re) wan chi yeeb’il, malaj wan chi k’utb’il sa’ jun li seraq’ malaj jun jaljookil ru aatin. Patz’ aawib’, “K’a’ru li na’leb’ re li evangelio li yoo chi k’utmank sa’eb’ li raqal a’in?”

K’e reetal li nakak’oxla ut nakaweek’a, us ta maare jalan wi’ rik’in li aatin li yookat chirilb’al. Wan naq li k’a’ru nakak’ul chi jo’kan a’an ajwi’ li taaraj laa Choxahil Yuwa’ naq taatzol ut taaweek’a.

Jalam-uuch

jun ixq natzolok sa’ li loq’laj hu 2

K’oxla chan ru naq li k’a’ru yeeb’il resil malaj k’utb’il nak’anjelak sa’ laa yu’am. Naru nakapatz’ aawib’, “K’a’ru xink’ul laa’in li chanchan ajwi’ li yookin chirilb’al?” malaj “Chan ru naru tinb’aanu jo’ xb’aanu li kristiaan a’in sa’eb’ li loq’laj hu?”

Li patz’ok chirix li evangelio naru tatxtenq’a chixsik’b’al ru k’a’ru taatz’il rix. Naq nakatzoleb’ li loq’laj hu, naru nachal li patz’om sa’ laa k’a’uxl. Maare taawanq li patz’om chirix li k’a’ru yookat chirilb’al, malaj chirix li k’a’ru yoo chi k’ulmank sa’ laa yu’am. K’oxlaheb’ li patz’om a’in, ut sik’ lix sumenkileb’ naq yookat chixtzolb’aleb’ li loq’laj hu. Chirix li tzolok, patz’ k’a’ chik ru naraj li Dios naq taatzol, ut oyb’eni lix sumenkil li taachalq anajwan ut moqon.

Re xtawb’al chik li na’leb’ chirixeb’ li raqal li nakawil, naru nakawoksiheb’ li aatin toj rub’el li junjunq chi perel, li K’utul Raqal reheb’ li Loq’laj Hu, ut xkomoneb’ chik li k’anjeleb’aal.

Naru nakataw li chaab’il na’leb’ chirix jun raqal sa’eb’ li loq’laj hu wi taak’oxla k’a’ru yoo chi k’ulmank sa’ li raqal a’an malaj b’ar yoo chi k’ulmank. Xnawb’al b’ar ke’chal chaq ut k’a’ru ke’xpaab’ jun tenamit yeeb’il resil xb’aan jun profeet naru tatxtenq’a chixtawb’al k’a’ru aj-e li raatin li profeet a’an.

Jalam-uuch

jun winq natzolok sa’ li loq’laj hu

K’iila paay chan ru naq naru nakatz’iib’a resil li na’leb’ nakak’ul naq yookat chi tzolok. Naru nakak’e reetalil jun aatin malaj jun ch’uut chi aatin, ut nakatz’iib’a li k’a’ru nakak’oxla chiruheb’ laa loq’laj hu. Naru ajwi’ nakatz’iib’a sa’ jalan chik li hu li k’a’ru nakak’oxla, nakaweek’a, ut li na’leb’ nakak’ul. Malaj naru nakatz’iib’a k’a’ru xapatz’ naq maji’ nakat-ok chi tzolok, ut lix sumenkileb’ laa patz’om li xatb’eresiik wi’.

Il ru li k’a’ru neke’xk’ut li profeet ut li apostol re roso’jikeb’ li kutan chirixeb’ li raqal chi na’leb’ nakataw sa’eb’ li loq’laj hu. Naru xtawb’al li raatineb’ sa’ li “Jolomil ch’utub’aj-ib’,” “Eb’ li revista,” ut jalan chik li ch’uut sa’ li Biblioteca del Evangelio.

Ileb’ ru li seraq’ sa’eb’ li loq’laj hu, ut sik’ xtawb’aleb’ ru (jo’q’e, b’ar, ani xyehok re, ut ani aj-e). Eb’ li hu wan wi’ xjalam-uucheb’ li seraq’ reheb’ li loq’laj hu jwal chaab’ileb’, choq’ reheb’ ajwi’ li kok’al ut li maji’ neke’xnaw chi us li loq’laj hu.

Li aatinak chirix li na’leb’ xak’ul naq yookat chi tzolok aajunes nak’anjelak chixtzolb’aleb’ laa komon, ut chixkawob’resinkil aana’leb’ chirix li k’a’ru xawil.

Li xtzolb’aleb’ li loq’laj hu naru nokoxmusiq’a ut nokoreek’asi chixjalb’al chan ru nokowan. Ab’i li k’a’ru naxye li Musiq’ej naq yookat chi tzolok, ut k’e aach’ool chixb’aanunkil li k’a’ru naxye.