“ສຳລັບຜູ້ນຳ—ການຊ່ວຍໃຫ້ຄູສອນປະສົບຜົນສຳເລັດ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ: ສຳລັບທຸກຄົນທີ່ສິດສອນຢູ່ໃນບ້ານ ແລະ ໃນສາດສະໜາຈັກ (2022)
“ສຳລັບຜູ້ນຳ—ການຊ່ວຍໃຫ້ຄູສອນປະສົບຜົນສຳເລັດ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ
ສຳລັບຜູ້ນຳ—ການຊ່ວຍໃຫ້ຄູສອນປະສົບຜົນສຳເລັດ
ການປະຕິສຳພັນແບບສອງຕໍ່ສອງ
ສ່ວນຫລາຍແລ້ວວິທີທີ່ດີທີ່ສຸດທີ່ຈະສະໜອງຄວາມຕ້ອງການສະເພາະຂອງຄູສອນແມ່ນຜ່ານທາງການປະຕິສຳພັນແບບສອງຕໍ່ສອງ. ຍົກຕົວຢ່າງ, ໃນຖານະຜູ້ນຳ, ທ່ານສາມາດສົນທະນາຈັກບຶດໜຶ່ງກັບຄູສອນກ່ອນ ຫລື ຫລັງຈາກຫ້ອງຮຽນ ເພື່ອສົນທະນາຫລັກທຳຂອງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ. ທ່ານສາມາດກະກຽມສຳລັບການສົນທະນານີ້ໂດຍການເບິ່ງຄູສອນສິດສອນ. ສະແຫວງຫາທີ່ຈະເຂົ້າໃຈຄວາມເຂັ້ມແຂງຂອງຄູສອນໃຫ້ດີກວ່າເກົ່າ ແລະ ຄົ້ນຫາວິທີທີ່ທ່ານສາມາດໃຫ້ການສະໜັບສະໜູນ.
ການສ້າງຄວາມເຂັ້ມແຂງຂອງຄູສອນກໍສຳຄັນເທົ່າໆກັບການລະບຸໂອກາດສຳລັບການປັງປຸງ. ມັນຈະເປັນປະໂຫຍດທີ່ຈະເລີ່ມຕົ້ນການສົນທະນາກັບຄູສອນໂດຍການຂໍໃຫ້ເຂົາເຈົ້າພິຈາລະນາດ້ວຍຕົວເອງວ່າ ອັນໃດຈະເປັນໄປດ້ວຍດີ ແລະ ບ່ອນໃດທີ່ເຂົາເຈົ້າຮູ້ສຶກວ່າສາມາດກ້າວໜ້າ.
ຂະນະທີ່ທ່ານພົບກັບຄູສອນ, ໃຫ້ພິຈາລະນາວິທີທີ່ຈະເພີ່ມຄວາມເຂັ້ມແຂງໃຫ້ແກ່ເຂົາເຈົ້າ ແລະ ຊຸກຍູ້ເຂົາເຈົ້າດ້ວຍຄວາມເມດຕາ ແລະ ຄວາມຮູ້ບຸນຄຸນສຳລັບການຮັບໃຊ້ຂອງເຂົາເຈົ້າ.
ການປະຊຸມສະພາຄູສອນ
ແຕ່ລະຫວອດຄວນຈັດການປະຊຸມສະພາຄູສອນເປັນໄຕມາດ ຊຶ່ງໃນນັ້ນຄູສອນສາມາດປຶກສາຫາລືນຳກັນກ່ຽວກັບຫລັກທຳຂອງການສິດສອນເໝືອນດັ່ງພຣະຄຣິດ. ການປະຊຸມສະພາຄູສອນກໍສາມາດຈັດຂຶ້ນສຳລັບພໍ່ແມ່ນຳອີກ (ເບິ່ງ General Handbook: Serving in The Church of Jesus Christ of Latter-day Saints, 13.5, ChurchofJesusChrist.org).
ການປະຊຸມເຫລົ່ານີ້ຄວນຖືກຈັດຂຶ້ນເມື່ອໃດ?
ການປະຊຸມສະພາຄູສອນສາມາດຈັດຂຶ້ນລະຫວ່າງຫ້ອງຮຽນ 50 ນາທີ ໃນວັນອາທິດ.
-
ຄູສອນຫ້ອງຖານະປະໂລຫິດ, ຄູສອນຫ້ອງສະມາຄົມສະຕີສົງເຄາະ, ແລະ ຄູສອນຫ້ອງກຸ່ມຍິງໜຸ່ມ ສາມາດໄປຮ່ວມ ໃນວັນອາທິດທຳອິດ ຫລື ທີສາມ, ຕາມທີ່ຜູ້ນຳໃນທ້ອງຖິ່ນກຳນົດ.
-
ຄູສອນໂຮງຮຽນວັນອາທິດ ສາມາດໄປຮ່ວມໃນວັນອາທິດທີສອງ ຫລື ທີສີ່, ຕາມທີ່ຜູ້ນຳໃນທ້ອງຖິ່ນກຳນົດ.
-
ຄູສອນຊັ້ນປະຖົມໄວສາມາດໄປຮ່ວມໃນວັນອາທິດໃດກໍໄດ້, ຕາມທີ່ຝ່າຍປະທານຊັ້ນປະຖົມໄວ ແລະ ຝ່າຍປະທານໂຮງຮຽນວັນອາທິດຂອງຫວອດກຳນົດ. ຖ້າປາດຖະໜາ, ບັນດາຄູສອນຊັ້ນປະຖົມໄວສາມາດຊຸມນຸມກັນຕ່າງຫາກ ຈາກຄູສອນຄົນອື່ນໆ ເພື່ອປຶກສາຫາລືກັນ ກ່ຽວກັບແງ່ມຸມສະເພາະເລື່ອງການສິດສອນເດັກນ້ອຍ. ສິ່ງນີ້ສາມາດເກີດຂຶ້ນລະຫວ່າງຊ່ວງເວລາຮ້ອງເພງ 20 ນາທີ, ກ່ອນ ຫລື ຫລັງຈາກການປະຊຸມວັນອາທິດຕາມປົກກະຕິ, ຫລື ໃນວັນອື່ນຂອງອາທິດ. ການປະຊຸມສະພາຄູສອນສາມາດຈັດຂຶ້ນຫລາຍກວ່າໜຶ່ງເທື່ອໃນແຕ່ລະໄຕມາດສຳລັບຄູສອນຊັ້ນປະຖົມໄວ ເພື່ອວ່າເຂົາເຈົ້າທຸກຄົນຈະບໍ່ໄດ້ປະຫ້ອງຮຽນໄປ ໃນອາທິດດຽວກັນ. (ໝາຍເຫດ: ຕາມຄວາມຕ້ອງການ, ຝ່າຍປະທານຊັ້ນປະຖົມໄວຈະມອບໝາຍຄູສອນແທນ, ສົມທົບຫ້ອງຮຽນ, ຫລື ຈັດການໃນແບບອື່ນ ເພື່ອໃຫ້ຄູສອນຊັ້ນປະຖົມໄວໄດ້ໄປຮ່ວມການປະຊຸມສະພາຄູສອນ.)
-
ການປະຊຸມສະພາຄູສອນສຳລັບພໍ່ແມ່ສາມາດຈັດຂຶ້ນໃນວັນອາທິດໃດກໍໄດ້, ຕາມທີ່ສະພາຫວອດກຳນົດ.
ໃຜຄວນເຂົ້າຮ່ວມ?
ທຸກຄົນທີ່ສິດສອນກຸ່ມ ແລະ ຫ້ອງຮຽນ ຢູ່ໃນຫວອດຄວນເຂົ້າຮ່ວມ, ພ້ອມດ້ວຍຜູ້ນຳຖານະປະໂລຫິດ ຫລື ຜູ້ນຳອົງການຢ່າງໜ້ອຍໜຶ່ງຄົນ ທີ່ມີຄວາມຮັບຜິດຊອບເໜືອກຸ່ມ ຫລື ຫ້ອງຮຽນ. ຖ້າຈຳເປັນ, ຜູ້ເຂົ້າຮ່ວມສາມາດແຍກອອກເປັນຫລາຍກຸ່ມຕາມຄວາມຕ້ອງການຂອງຜູ້ທີ່ເຂົາເຈົ້າສິດສອນ. ຍົກຕົວຢ່າງ, ຄູສອນຂອງກຸ່ມຊາວໜຸ່ມ ຫລື ຂອງເດັກນ້ອຍຈະໄດ້ຮັບຜົນປະໂຫຍດຈາກການປະຊຸມແຍກຕ່າງຫາກເປັນບາງຄັ້ງ ເພື່ອສົນທະນາກ່ຽວກັບບັນຫາສະເພາະກັບການສິດສອນຊາວໜຸ່ມ ຫລື ເດັກນ້ອຍ.
ສ່ວນການປະຊຸມສະພາຄູສອນສຳລັບພໍ່ແມ່, ສະພາຫວອດຈະກຳນົດວ່າຈະເຊື້ອເຊີນພໍ່ແມ່ບາງຄົນໂດຍສະເພາະ ຫລື ເປີດການເຂົ້າຮ່ວມສຳລັບທຸກຄົນທີ່ຢາກເຂົ້າຮ່ວມ.
ໃຜເປັນຜູ້ນຳພາການປະຊຸມເຫລົ່ານີ້?
ສະພາຫວອດ, ດ້ວຍຄວາມຊ່ວຍເຫລືອຈາກຝ່າຍປະທານໂຮງຮຽນວັນອາທິດ, ຈະດູແລການປະຊຸມສະພາຄູສອນ. ເຂົາເຈົ້າຈະປຶກສາຫາລືກັນກ່ຽວກັບຄວາມຕ້ອງການຂອງຄູສອນ ແລະ ຜູ້ຮຽນ ອີງຕາມສິ່ງທີ່ເຂົາເຈົ້າໄດ້ສັງເກດເຫັນໃນຫ້ອງຮຽນ ແລະ ໃນການປະຊຸມ. ເຂົາເຈົ້າຈະທຳງານດ້ວຍກັນເພື່ອກຳນົດຫລັກທຳ ແລະ ແນວທາງປະຕິບັດໃດ ຈາກປຶ້ມ ການສິດສອນໃນວິທີຂອງພຣະຜູ້ຊ່ວຍໃຫ້ລອດ ອັນທີ່ຈະສະໜອງຄວາມຕ້ອງການທີ່ເຂົາເຈົ້າເຫັນໄດ້ດີທີ່ສຸດ.
ຕາມປົກກະຕິແລ້ວ, ປະທານໂຮງຮຽນວັນອາທິດຈະເປັນຜູ້ນຳພາການປະຊຸມສະພາຄູສອນ. ເຖິງຢ່າງໃດກໍຕາມ, ສະມາຊິກຫວອດຄົນອື່ນໆກໍສາມາດຖືກມອບໝາຍໃຫ້ນຳພາການປະຊຸມເປັນບາງຄັ້ງ. ຝ່າຍປະທານກຸ່ມ ແລະ ຝ່າຍປະທານອົງການຈະສົ່ງເສີມຫລັກທຳ ແລະ ແນວທາງປະຕິບັດທີ່ໄດ້ສົນທະນາໃນການປະຊຸມກັບຄູສອນຂອງເຂົາເຈົ້າ.
ແມ່ນຫຍັງຄວນເກີດຂຶ້ນໃນການປະຊຸມສະພາຄູສອນ?
ການປະຊຸມສະພາຄູສອນຄວນເຮັດຕາມຮູບແບບດັ່ງຕໍ່ໄປນີ້:
-
ແບ່ງປັນ ແລະ ປຶກສາຫາລືນຳກັນ. ເຊື້ອເຊີນໃຫ້ຄູສອນແບ່ງປັນປະສົບການ ການສິດສອນເມື່ອບໍ່ດົນມານີ້, ຖາມຄຳຖາມທີ່ກ່ຽວຂ້ອງກັບການສິດສອນ, ແລະ ແບ່ງປັນແນວຄິດໃນການເອົາຊະນະການທ້າທາຍຕ່າງໆ. ການປະຊຸມສ່ວນນີ້ສາມາດລວມທັງການທົບທວນຫລັກທຳທີ່ໄດ້ສົນທະນາໃນການປະຊຸມເທື່ອກ່ອນ.
-
ຮຽນຮູ້ນຳກັນ. ເຊື້ອເຊີນໃຫ້ຄູສອນສົນທະນາຫລັກທຳຂໍ້ໜຶ່ງດັ່ງຕໍ່ໄປນີ້ ທີ່ນຳສະເໜີຢູ່ໃນແຫລ່ງຊ່ວຍນີ້: ເນັ້ນໃສ່ພຣະເຢຊູຄຣິດ, ຮັກຄົນທີ່ທ່ານສິດສອນ, ສິດສອນໂດຍພຣະວິນຍານ, ສິດສອນຄຳສອນ, ແລະ ເຊື້ອເຊີນການຮຽນຮູ້ທີ່ພາກພຽນ. ຈະກ່າວເຖິງຫລັກທຳໃນລຳດັບໃດກໍໄດ້, ແລະ ເວັ້ນເສຍແຕ່ຖືກຊີ້ນຳໂດຍສະພາຫວອດ, ຜູ້ເຂົ້າຮ່ວມໃນການປະຊຸມສາມາດເລືອກຫລັກທຳຂໍ້ຕໍ່ໄປເພື່ອສົນທະນາ. ທ່ານສາມາດໃຊ້ເວລາຫລາຍກວ່າໜຶ່ງເທື່ອໃນການປະຊຸມກ່ຽວກັບຫລັກທຳໃດໜຶ່ງຖ້າຈຳເປັນ.
-
ວາງແຜນ ແລະ ເຊື້ອເຊີນ. ຊ່ວຍຄູສອນວາງແຜນວິທີທີ່ເຂົາເຈົ້າຈະນຳໃຊ້ຫລັກທຳທີ່ເຂົາເຈົ້າໄດ້ສົນທະນາ. ຕາມຄວາມເໝາະສົມ, ທ່ານສາມາດຝຶກທັກສະທີ່ທ່ານໄດ້ສົນທະນານຳອີກ. ເຊື້ອເຊີນໃຫ້ເຂົາເຈົ້າບັນທຶກ ແລະ ປະຕິບັດຕາມຄວາມປະທັບໃຈທີ່ເຂົາເຈົ້າໄດ້ຮັບກ່ຽວກັບວິທີທີ່ຈະນຳໃຊ້ຫລັກທຳໃນການສິດສອນຂອງເຂົາເຈົ້າ—ລວມທັງໃນຄວາມພະຍາຍາມຂອງເຂົາເຈົ້າທີ່ຈະສິດສອນຢູ່ໃນບ້ານເຮືອນຂອງເຂົາເຈົ້າ. ຊຸກຍູ້ໃຫ້ເຂົາເຈົ້າເລີ່ມຕົ້ນສຶກສາຫລັກທຳຂໍ້ຕໍ່ໄປທີ່ຈະສົນທະນາ.
ໃຫ້ຫລາຍທີ່ສຸດເທົ່າທີ່ຈະເປັນໄປໄດ້, ການປະຊຸມສະພາຄູສອນຄວນເປັນແບບຫລັກທຳຖືກສົນທະນາ.
ການປະຊຸມສະພາຄູສອນສາມາດຊ່ວຍໃຫ້ຄູສອນເຂົ້າໃຈດີກວ່າເກົ່າ ແລະ ນຳໃຊ້ຫລັກທຳການສິດສອນເໝືອນດັ່ງພຣະຄຣິດ.
ການປະຖົມນິເທດຄູສອນທີ່ໄດ້ຮັບການເອີ້ນໃໝ່
ໃນຖານະຜູ້ນຳ, ທ່ານມີໜ້າທີ່ຮັບຜິດຊອບທີ່ຈະ “ພົບກັບຄູສອນທີ່ໄດ້ຮັບການເອີ້ນໃໝ່” ໃນອົງການຂອງທ່ານ ແລະ “ຊ່ວຍໃຫ້ເຂົາເຈົ້າກະກຽມສຳລັບການເອີ້ນຂອງເຂົາເຈົ້າ” (General Handbook, 17.3, ChurchofJesusChrist.org). ການປະຊຸມເຫລົ່ານີ້ເປັນໂອກາດແນະນຳຄູສອນຕໍ່ການເອີ້ນທີ່ສັກສິດຂອງເຂົາເຈົ້າ ແລະ ດົນໃຈເຂົາເຈົ້າດ້ວຍວິໄສທັດເຖິງການສິດສອນໃນວິທີຂອງພຣະຜູ້ຊ່ວຍໃຫ້ລອດໝາຍຄວາມວ່າແນວໃດ. ໃນຖານະຜູ້ນຳ, ທ່ານສາມາດຊ່ວຍໃຫ້ຄູສອນໃໝ່ກະກຽມທີ່ຈະຮັບໃຊ້ ໂດຍການເຮັດດັ່ງຕໍ່ໄປນີ້:
-
ສະແດງຄວາມໝັ້ນໃຈວ່າ ພຣະຜູ້ຊ່ວຍໃຫ້ລອດຈະຊ່ວຍເຂົາເຈົ້າໃນການເອີ້ນຂອງເຂົາເຈົ້າ (ເບິ່ງ ຄຳສອນ ແລະ ພັນທະສັນຍາ 88:78).
-
ມອບປຶ້ມແຫລ່ງຊ່ວຍນີ້ໃຫ້ຄູສອນໃໝ່, ແລະ ຊຸກຍູ້ໃຫ້ເຂົາເຈົ້າຊອກຫາວິທີທີ່ຈະນຳໃຊ້ຫລັກທຳຂອງມັນໃນການສິດສອນຂອງເຂົາເຈົ້າ.
-
ແບ່ງປັນກັບຄູສອນໃໝ່ອັນໃດກໍຕາມກ່ຽວກັບອົງການຂອງທ່ານ ທີ່ຈະເປັນປະໂຫຍດສຳລັບເຂົາເຈົ້າທີ່ຈະຮູ້ຈັກ.
-
ຕາມຄວາມຕ້ອງການ, ໃຫ້ບອກຄູສອນໃໝ່ວ່າເຂົາເຈົ້າຈະສອນຫ້ອງໃດ ແລະ ຄວນເລີ່ມບົດຮຽນໃດ. ໃຫ້ຂໍ້ມູນໃດໆທີ່ເຂົາເຈົ້າຕ້ອງການກ່ຽວກັບຫ້ອງຮຽນຂອງເຂົາເຈົ້າ ແລະ ສະມາຊິກໃນຫ້ອງຮຽນ.
-
ອະທິບາຍໃຫ້ຄູສອນໃໝ່ຮູ້ວ່າ ທ່ານສາມາດຊ່ວຍເຂົາເຈົ້າໃນການເອີ້ນຂອງເຂົາເຈົ້າ. ໃຫ້ການສະໜັບສະໜູນໃນຫ້ອງຮຽນ ແລະ ເຂົ້າເຖິງແຫລ່ງການສິດສອນຖ້າຈຳເປັນ.
-
ສະເໜີທີ່ຈະສັງເກດຫ້ອງຮຽນຂອງຄູສອນເປັນບາງຄັ້ງ, ແລະ ໃຫ້ຄຳຕິຊົມຕາມການກະຕຸ້ນຈາກພຣະວິນຍານ.
-
ເຊື້ອເຊີນໃຫ້ຄູສອນເຂົ້າຮ່ວມການປະຊຸມສະພາຄູສອນໃນແຕ່ລະໄຕມາດ.