Lesona 15 Anomea mo Sauniuniga a le Vasega: Saunia mo le Afio Mai o Iesu Keriso
“Lesona 15 Anomea mo Sauniuniga a le Vasega: Saunia mo le Afio Mai o Iesu Keriso,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 15 Anomea mo Sauniuniga a le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 15 Anomea mo Sauniuniga o le Vasega
Saunia mo le Afio Mai o Iesu Keriso
Ata
Iesu o loo Aoao Atu i le Itulagi i Sisifo (Ua Asiasi atu Iesu Keriso i le atu Amerika), na saunia e John Scott
O le iunite lenei o le a taulai atu i le faaali atu ma le auaunaga a Iesu Keriso i le “nuu o Nifae” (3 Nifae 11:1). O le vaega lenei sa i ai faatasi sa Nifae ma sa Lamana amiotonu o e na liliu mai i le Alii (tagai 3 Nifae 10:18–19). Ao e tomanatu i lo latou aafiaga ma le Faaola, saili ia faaloloto lau lava molimau i Lona tagata, uiga auaumama, ma le misiona paia.
O se vaega aupito sili ona tulimataia o le misiona paia a le Alii o Lona Afio Mai Faalua. Na aoao mai Peresitene Ezra Taft Benson “ua tatou maua i le Tusi a Mamona le ala tatou te sauniuni ai mo le Afio Mai Faalua” (Aoaoga a Peresitene o le Ekalesia: Ezra Taft Benson [2014], 140). I le lesona lenei o le a e maua ai le avanoa e mafaufau ai i le ala e mafai ai i le suesue i valoaga ma mea na tutupu sa taimua i le faaali atu o le Faaola i lenei nuu ia mafai ona fesoasoani e te sauniuni ai mo Lona Afio Mai Faalua.
Vaega 1
O le a se telē o la’u tapenaga o i ai mo le Afio Mai Faalua o Iesu Keriso?
Na valoia e perofeta o le Tusi a Mamona le afio mai o Iesu Keriso i le lalolagi mo le tele o augatupulaga. Na auina atu e le Alii ia Samuelu le sa Lamana e saunia tagata amioleaga o sa Nifae mo le afio mai o Keriso i le ono tausaga ao lei soifua mai Keriso e lata i Ierusalema. Sa vavalo Samuelu e uiga i nisi o faailoga ma mea ofoofogia o le a o mai faatasi ma le soifua mai ma le maliu o Iesu Keriso. (Tagai Helamana 13–15.)
Faitau le Helamana 14:6–13, ma mafaufau pe o a ni auala na faamoemoeina ai le savali a Samuelu ia sauniuni ai sa Nifae mo le afio mai o le Alii.
Na aoao mai Elder Robert D. Hales o le Korama a Aposetolo e Toasefululua e mafai e perofeta ona fesoasoani ia tatou sauniuni mo le afio mai o le Alii:
Ata
Elder Robert D. Hales
Ao lumanai lena po paia i Peteleema, o mea na tutupu i le talafaasolopito ma upu a perofeta o tisipenisione uma, na saunia ai le ala mo le afio mai muamua o le Alii ma Lana Togiola. … O i ai ea ni o tatou mata e vaai ai o mea ua tutupu ma valoaga o o tatou aso o loo sauniuni ai i tatou mo le Afio Mai Faalua? (“Sauniuniga mo le Toefuataiga ma le Afio Mai Faalua: ‘E i Ou Luga ai Pea Lo’u Lima,’” Ensign po o le Liahona, Nov. 2005, 92)
Faaalu ni nai minute e suesue ai le tusiga “Faailoga o Taimi” i le Taiala i Tusitusiga Paia (tagai scriptures.ChurchofJesusChrist.org), vaavaai mo mea ua faaalia mai e perofeta o ni faailoga o le Afio Mai Faalua o le Alii. O le a e maitauina o nisi o nei valoaga e mafai ona mafua ai le popole po o le fefefe o tagata. Ae peitai, o nei faailoga faaperofetaga ua faaalia ai foi le alofa o le Atua mo Ana fanau.
Ata
aikona, mafaufau loloto
Mafaufau Loloto i Sauniuniga mo le Vasega
O a ni aoaoga po o ni faailoga faaperofetaga o le Afio Mai Faalua ua musuia ai oe ina ia e saunia lelei ai mo le toe foi mai o le Alii? O a ni suiga e manaomia ona e faia ina ia lagona ai le saunia lelei mo le toe foi mai o le Faaola?
Vaega 2
O a ni mea e mafai ona ou faia ia tumau faamaoni ai pe a ou faaalogo i savali ia e aumaia ai le masalosalo i le paia o Iesu Keriso ma le moni o Lona Afio Mai Faalua?
Sa talitonu nisi o sa Nifae i upu a Samuelu. Na teena e isi le savali a Samuelu ma taumafai e fasioti o ia i maa ma āū. Ona sa le mafai ona lavea o ia ia i latou, sa talitonu ai le toatele o isi tagata i lana savali ma o atu ai ia Nifae ina ia papatisoina. Mulimuli ane, ina ua amata ona faataunuuina faailoga ma mea ofoofogia na faatatau i le fanau mai o Keriso, sa oo i tagata talitonu le olioli ae o tagata le talitonu sa faamaaaina o latou loto. (Tagai Helamana 16:1–15.)
Faitau le Helamana 16:13–23 ma mafaufau e faailoga upu po o fuaitau o faamatala ai le ala na faatupuina ai e tagata lē talitonu le masalosalo i faailoga o le fanau mai o Keriso.
O le talanoa ai e uiga i leo o le masalosalo, na saunoa ai Sister Bonnie L. Oscarson, o le sa avea ma Peresitene Aoao o Tamaitai Talavou:
Ata
Peresitene Bonnie L. Oscarson
E manaomia lo tatou aai ai pea [i le fua o le laau o le ola] ma aua nei faalogo ia i latou o e ulagia o tatou talitonuga po o i latou o e fiafia e fatuina ni masalosaloga po o i latou o e sailiili masei i taitai ma aoaoga faavae o le Ekalesia. O se filifiliga tatou te faia i aso uma—ia filifili le faatuatua nai lo le masalosalo. (“OO’u Talitonu Ea?” Ensign po o le Liahona, Me 2016, 89)
Ata
aikona, mafaufau loloto
Mafaufau Loloto i Sauniuniga mo le Vasega
O a ni savali ua e faalogo i ai ua faamoemoe ina ia fatufatu ai le masalosalo e uiga ia Iesu Keriso, Ana taitai filifilia, po o Lana Ekalesia toefuataiina?
Ata
aikona, suesue
Suesue mo Sauniuniga mo le Vasega
Ao e mafaufau e uiga i savali o le masalosalo na e tau i ai, faitau le 3 Nifae 1:4–15, 22 ma vaavaai pe o faapefea ona tumau mausali pea nisi o tagata talitonu e ui lava ina ulagia la latou faatuatuaga e tagata le talitonu.
Na aoao mai e Elder D. Todd Christofferson o le Korama a Aposetolo e Toasefululua le mea lenei e uiga i le tumau mausali i lo tatou faatuatua ia Keriso:
Ata
Elder D. Todd Christofferson
O le tumau ma mausali faifaipea i le faatuatua o Keriso e manaomia ai ona ulufia e le talalelei a Iesu Keriso le loto ma le agaga o le tagata, o lona uiga e le avea le talalelei na o se tasi o le tele o faatosinaga i le olaga o se tagata ae o le taulaiga manino atoa o lona olaga ma uiga faaletagata. …
Ia manatua e le aunoa le folafolaga o mea lelei e oo mai, i le taimi nei ma le lumanai, mo i latou e tumau ma mausali i le faatuatua o Keriso. (“Tumau ma Mausali i le Faatuatua o Keriso,” Ensign po o le Liahona, Nov. 2018, 31, 33)
Ata
aikona, mafaufau loloto
Mafaufau Loloto i Sauniuniga mo le Vasega
O le a se mea e mafai ona e faia e tumau mausali ai i lou faatuatua ia Keriso a o e sauniuni mo Lona toe foi mai?
