E valaauina e le Atua perofeta e molimau ia Iesu Keriso, e folafola atu le salamo, ma valaaulia tagata uma e o mai i le Faaola. O le Tusi a Mamona ua aoao mai faapea o i latou e faalogo i nei perofeta e faamanuiaina, ae o i latou e teena i latou e oo i ai le le fiafia ma le faanoanoa.
E faapefea ona ese le Ekalesia a Iesu Keriso o le Au Paia o Aso e Gata Ai mai isi lotu ona o la tatou talitonuga i se perofeta soifua?
Aisea e manaomia ai ni perofeta soifua i le aso e pei ona i ai i isi vaitaimi o le talafaasolopito o le lalolagi?
Valaaulia ni nai tamaiti aoga e feauauai i le faitauina leotele mai le 1 Nifae 1:4–15, 18 ao mulimuli i ai le vasega, ma vaavaai pe na faapefea ona valaauina ma saunia e le Alii Liae e avea ma perofeta.
O le a le mea na aafia ai Liae na saunia ai o ia e avea ma perofeta? (Na ia maua se molimau ia Iesu Keriso, ma na ia muai vaai i le faatafunaina o e amioleaga ma le alofa mutimutivale ua maua e i latou e o mai i le Atua.)
Aisea na manaomia ai e tagata o Ierusalema ni perofeta e pei o Liae? (Ao tali mai tamaiti aoga, ia mautinoa latou te faailoa mai lenei upumoni: E valaauina e le Atua perofeta ma faaalia Lona finagalo e ala ia i latou.
Valaaulia se tamaitiiti aoga e faitau le saunoaga lenei a Peresitene Ioane Teila(1808-87):
Ata
Peresitene Ioane Teila
“Tatou te manaomia se laau ola—se punavai ola—atamai ola, e amata mai i le perisitua ola i le lagi, e oo mai i le perisitua ola i le lalolagi. … Ma e mai lava i le taimi na uluai maua ai e Atamu se fesootaiga mai le Atua, i le taimi na i ai Ioane i le Motu o Patamo ma maua ai ana fesootaiga, po o Iosefa Samita foi lea na tatala i ai le lagi ia te ia, e manaomia e le aunoa ni faaaliga fou, e fetuunai lava ia talafeagai ma tulaga uiga ese o i ai ekalesia po o tagata taitoatasi.
“O faaaliga a Atamu e le’i faatonuina mai ai Noa e fau lona vaa; e le’i ta’u atua foi i faaaliga ia Noa e fai ia Lota e lafoai Sotoma; e le o tautala foi se tasi o ia faaaliga i le aveeseina mai o le fanauga a Isaraelu mai Aikupito. Na tofu uma nei tagata ma faaaliga mo i latou lava, e faapena foi Isaia, Ieremia, Esekielu, Iesu, Peteru, Paulo, Ioane, ma Iosefa. Ma e tatau foi ona faapena i tatou” (Aoaoga a Peresitene o le Ekalesia: Ioane Teila [2001], 169).
Aisea e taua ai le iloa e faaauau e le Alii i le aso ona faaalia mai Lona finagalo i Ana perofeta soifua?
E mafai faapefea ona fesoasoani le suesueina o le matafaioi a perofeta i le Tusi a Mamona ia i tatou i o tatou aso?
Faamatala atu ao tuuina mai e perofeta le tele o savali e faapitoa lava i o latou taimi, e tele savali e tuuina mai e perofeta uma lava. Valaaulia tamaiti aoga e faailoa mai ni savali faapea se lua ao latou faitau le leoa fuaitau i le laupapa. Fai i tamaiti aoga e maka ia latou tusitusiga paia le savali autu na tuuina atu e le perofeta o Apinati i fuaitau taitasi. (Manatua: O le makaina o mau o se tomai o le suesueina o tusitusiga paia e mafai ona e mafaufau e aoao atu i le kosi atoa.)
Fai i tamaiti aoga e faasoa mai mea na latou iloaina, ma aotele a latou mea na maua i le faamamafaina o lenei aoaoga faavae: O perofeta uma a le Atua e folafola atu le salamo ma molimau atu ia Iesu Keriso.
Mafaufau e valaaulia tamaiti aoga e faaalu ni nai minute e sue ai se faataitaiga o se perofeta o le Tusi a Mamona o loo folafola atu le salamo po o molimau ia Iesu Keriso. (O faataitaiga o le folafolaina atu o le salamo e aofia ai Isaia i le 2 Nifae 16:9–11; Iakopo i le Iakopo 2–3; Apinati i le Mosaea 11–12; Samuelu i le Helamana 13–16; ma Mamona i le Mamona 3. 1 Nifae 19 ma i le 2 Nifae 25; Alema i le Alema 7; ma Mamona i le Mamona 7.) Valaaulia tamaiti aoga e faasoa mai a latou faataitaiga i le vasega.
Aisea i lou manatu e folafola mai ai pea e perofeta le salamo ma molimau mai ia Iesu Keriso?
E faapefea ona fesoasoani le faalogo i nei savali ia i tatou e maua ai le faaolataga?
O le teenaina o perofeta a le Atua e taitai atu i le faanoanoa
Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:
Ata
Peresitene Ezra Taft Benson
“Ina ua ta’u atu e perofeta agasala a le lalolagi, o tagata o le lalolagi, nai lo le salamo i a latou agasala, a le o le manao e faatapuni le fofoga o le perofeta po o le amio foi e pei lava e le’i i ai le perofeta, nai lo le salamo i a latou agasala. O le lauiloa e le’i avea lava ma se suega o le upumoni. … A o tatou latalata atu i le afio mai faalua o le Alii, e mafai ona e iloa, a o faateteleina le amioleaga o tagata o le lalolagi, o le a faaitiitia ai foi le lauiloa o perofeta ia i latou” (Aoaoga a Peresitene o le Ekalesia: Ezra Taft Benson [2014], 15 ).
Aisea i lou manatu e le gauai atu ai nisi o tagata i saunoaga a se perofeta?
Valaaulia le vasega e suesue le leoa upu a Samuelu le perofeta i le Helamana 13:24-29, ma vaavaai mo mafuaaga ua teena ai e tagata lapataiga faaperofeta. E mafai ona e toe fautuaina tamaiti aoga e faailoga mea ua latou faailoaina.
I le faamatalaga a Samuelu, aisea na teena ai e sa Nifae ia perofeta a le Atua?
E ui lava tatou te le o agasala i le sauaina po o le fasiotia o perofeta, e faapefea ona mafai e nei fuaiupu ona avea o se lapataiga ia i tatou i le aso?
Fai i se tamaitiiti aoga e faitau leotele le Helamana 13:30-33 ao vaavaai le vasega mo taunuuga na valoia e Samuelu le sa Lamana o le a oo ia i latou o e teena saunoaga a perofeta. Ona valaaulia lea o le vasega e faitau le faataunuuina o lenei valoaga i le 3 Nifae 8:24–25; 9:10–11.
O le a le upumoni e mafai ona tatou otooto mai i nei fuaiupu? (E tatau ona faailoa mai e tamaiti aoga le mataupu faavae lenei: Afai tatou te teena saunoaga a perofeta a le Alii, o le a tatou oo i le faanoanoa ma le faavauvau. [Tagai foi i le 3 Nifae 28:34.])
Valaaulia se tamaitiiti aoga e faitau le saunoaga lea a Peresitene Ezra Taft Benson:
Ata
Peresitene Ezra Taft Benson
“Afai tatou te fia iloa po o le a le lelei o lo tatou tulaga ma le Alii, ona tatou fesili ifo lea ia i tatou lava, po o le a se lelei o lo tatou tulaga ma Lana taitai i le olaga lenei—o le a le latalata o le ogatasi o o tatou olaga ma le auauna faauuina a le Alii—le Perofeta soifua—le Peresitene o le Ekalesia, faapea ma le Korama a le Au Peresitene Sili” (Aoaoga: Ezra Taft Benson [2014], 150).
“O le auala tatou te tali atu ai i saunoaga a se perofeta soifua pe a ia ta’u mai ia i tatou mea e manaomia ona tatou iloa, ae sili ai le aua ne’i lagonaina, o se suega lea o lo tatou faamaoni” (Aoaoga: Ezra Taft Benson,152).
E faapefea ona fesoasoani saunoaga a Peresitene Benson e uunaia oe ia sili atu le filiga i le mulimuli i fautuaga a le perofeta soifua?
O a savali faaperofeta e te mafaufau ua i ai faatasi ma na e sili ona taua mo le Au Paia o Aso e Gata Ai i le aso?
O le mulimuli i perofeta a le Atua e aumaia ai faamanuiaga
Tau atu i tamaiti aoga na aoao e le perofeta o Apinati le Tupu o Noa ma ana faitaulaga amioleaga e uiga i le taua o le faaaoga o saunoaga a perofeta. Fai i tamaiti aoga e faitau le Mosaea 15:10-13 ao mafaufau le vasega pe faapefea ona aotele fuaiupu o se faamatalaga o le mataupu faavae.
O le a mafai faapefea ona e faaali atu upu a Apinati o se faamatalaga o le mataupu faavae? (E mafai e tamaiti aoga ona aotele lenei fuaitau faapenei: O i latou o e faalogo i saunoaga a perofeta, talitonu i le mana laveai o Iesu Keriso, ma salamo ia latou agasala e mautofi i le malo o le Atua.)
Fai i tamaiti aoga e mafaufau ma faasoa mai ni faataitaiga mai le Tusi a Mamona o ni tagata faatuatua ma vaega o e na faamanuiaina i le gauai atu i saunoaga a perofeta. O nisi faataitaiga e ono aofia ai mea nei: Na sosola ese le aiga o Liae mai le faatafunaga i le mulimuli i le fautuaga e tuua Ierusalema (2 Nifae 1:4); O Alema le Matua na faalogo i upu a Apinati ma na mafai ai ona aoao le tele o tagata (Mosaea 17:1–4; 18:1–3); Na iloa e le autau a Moronae po o fea latou te o i ai e puipuia ai i latou lava mai le autau a sa Lamana i le sailia lea o le fautuaga a Alema (Alema 43:23–24).
Tusi mau faasino nei i le laupapa (aua nei aofia ai mataupu faavae o loo i totonu o puipui):
3 Nifae 10:12 (O le saogalemu e oo mai i e mulimuli i perofeta a le Atua.)
3 Nifae 12:1–2 (Ua aoaoina i tatou e perofeta i le ala e maua ai le faamagaloga o a tatou agasala.)
Eteru 7:23–27 (Ao tatou mulimuli i le fautuaga a perofeta ma manatua le Alii, o le a Ia faamanuia i tatou e tusa ai ma o tatou manaoga.)
Tofi tamaiti aoga e faitau se tasi o fuaitau i le laupapa ma aotele mea na latou faitauina o se faamatalaga o le mataupu faavae. Ao faasoa mai e tamaiti aoga a latou faamatalaga, mafaufau e tusi faamatalaga fautuaina o mataupu faavae i talaane o mau fesootai taitasi.
Ina ia fesoasoani i tamaiti aoga ia malamalama o faamanuiaga faaopoopo e oo mai i le mulimuli i le perofeta, faaali atu le saunoaga lenei a Elder David A. Bednar o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder M. Russell Ballard
“E le o se mea itiiti, ou uso e ma tuafafine, le i ai o se perofeta a le Atua ma i tatou. O faamanuiaga maoae ma le matagofie lea e oo mai i o tatou olaga a o tatou faalogo atu i afioga a le Alii ua tuuina mai e ala mai ia te ia. … Pe a tatou faalogo i fautuaga a le Alii ua faailoa mai e ala mai saunoaga a le Peresitene o le Ekalesia, e tatau ona mautinoa ma vave a tatou tali. Ua faaali i le talafaasolopito faapea e i ai se saogalemu, filemu, manuia ma le fiafia i le tali atu i fautuaga faaperofeta”(“O Lana Upu o le a Outou Talia,” Ensign, Iulai 2001, 65).
O anafea na faamanuiaina ai oe e ala i le tali lelei ma le vave i fautuaga faaperofeta?
Ao e tulimatai atu i le lumanai, aisea i lou manatu o le a taua ai le i ai o ni perofeta i le lalolagi?
Luitauina tamaiti aoga e mafaufau loloto pe o faaalia mai ia latou lava faatinoga lo latou manao e mulimuli faamaoni i perofeta a le Alii. Fai ia i latou e mafaufau i mea latou te ono manaomia e suia i o latou olaga ina ia sili atu ai le atoatoa ona olioli i faamanuiaga ua folafolaina i e faatuatua.