1 Ma ku bayay: Mmotoyil gaed ma ngam fol gaed rog, O gimed e gidiiʼ ku Israel, gimed gubin e piʼin ni kam chuw gaed min tulufmed ni bachan e pi denen ko fapi pastor ko gidiiʼ rog; arragon, gimed gubin e piʼin ni kam chuw gaed, ni kam garar gaed iyaen, ni gimed boech e gidiiʼ rog, O gidiiʼ ku Israel. Mmotoyil gaed, O gimed e pi donguch, ngog, ma ngam fol gaed rog gimed e pi gidiiʼ ni gimed bay u palog; fare Somoel e ke piningeg ni kug bay u mayal; me tunguy fithingag ni kug bay u mayal ko chitinag.

2 Ma ke ngongoliy lʼugnag ni boed e sayden nib mʼuth; ni ke mithgeg nga foen i paʼ, me falʼegeg ni ba gane gatʼing nib pochpoch doew; me mithgeg nga langgin tafen e gane gatʼing rokʼ;

3 Me gaʼar ngog: Gur e tapigpig rog, O Israel, ni gur e bay ni liyoer ngog ni bacham.

4 Ma arame gguʼar, kug muruwel ni dariy angin, kug nʼaeg gelingig nib gaʼfan ma dariy angin; riyulʼ ni pufthin rog e bay rokʼ Somoel, nge muruwel rog e bay rokʼ e Got rog.

5 Nge chiney, e yoeg Somoel—ni sunmiyeg nga mayal ni thingar gu mang tapigpig rokʼ, ni nggu sulweg Jacob ngakʼ bayay—ni dawor riy ni nge sul piyu Israel nga taʼabang, machane ri gub gaʼfan u mit Somoel, nge Got rog e ire bayi mang gelingig.

6 Ma arame gaʼar: Rib moem ni gur e ngam mang tapigpig rog ni ngam sunmiy e ganong ku Jacob, ma nge yoeg ni ngan sulweg e piʼin ni ke magaey ku Israel, ni ra magaey gaed. Ma bay kug piiʼem ni gur e tamilang ngakʼ fapi Gentiles, ni nge yog ni ngam mang woʼen e thap rog ngakʼ gubin e gidiiʼ u fayleng.

7 Ni aray rogon ni yoeg Somoel, fare Tabiyul ku Israel, niʼir Fachaʼ nib Thothup rokʼ, niʼir e gidiiʼ e ma dariy fan nag, niʼir e pi nam ra fananikayed, ngakʼ e tapigpig rokʼ e piʼin nib tafalʼeg e motochiyel: Pi pilung e bay ruguyed gur mi yaed sakʼiy ngalang, pi pagael ni fak e pilung e bay ra liyoer gaed ngom, ni bachan fare Somoel nib yulʼyulʼ.

8 Ni aray rogon ni yoeg fare Somoel: Ngiyalʼ nib mʼag anʼug ngay e bay gu motoyil ngomed, O gimed e pi donguch nu maday, ngo lan ba rran ni ngan thap riy e kug ayuwegmed riy; ma bay kug ayliymed, mug piiʼ e tapigpig rog ngomed ni fan nga ba mʼag ko gidiiʼ, ni ngan yarmiy fare fayleng, ni ngar tafanyed e yungi nam ni dariy beeʼ riy.

9 Ni nge yog ni ngam gaʼar ko fapi kalbus: Maroed iyaen; maroed ngakʼ e piʼin yaed be paer u milmor: Mʼug gaed. Bay ranoed ni ke puf rograed ni nga ranoed ko gin nib mʼagaenʼraed ngay, nge tagilʼ e chathowol roraed e bay ko gubin e pi yungi nʼen nib tolang.

10 Ma dabra mʼaed ko makʼiy ara balel, ku arragon ko gowel ara raʼen e yalʼ ni dabra mʼaed riy; ya chaʼ nibe runguyraed e ire ra powiʼiyraed, ni mus ko raen ma bayi powiʼiyraed riy.

11 Ma bay gu falʼeg ni gubin e pi burey rog ni woʼ, nge pi yupaʼ i kanawoʼ rog e ri bayi felʼ.

12 Ma aram, O gidiiʼ ku Israel, musap gaed, pi chaʼaney e bay rabaed u bangi banʼen nib palog; ere muguyed, yaedra yib u lan e leluʼoch ngu lan e ngael; ni ireray e pichaʼ ni yaedra yib ko fare nam nu Sinim.

13 Mu tang gaed, O piyu tharmiy; ma ngam falfalaenʼ gaed, O piyu fayleng; ya rifrifanʼay e piʼin ni yaed bay u lan e ngek e bay ni sunmiy; marbaed ni yaed be tang, O pi burey; ya dab kun liiʼraed; ya fare Somoel e ke falʼeg laniyaenʼ e gidiiʼ rokʼ, ma bayi runguy e piʼin ni yaed be gafgow.

14 Machane, musap gaed, Zion e ke gaʼar: Fare Somoel e ke keruʼuyeg, nge Somoel rog e ke pagtilig—machane bayi dag ni dawori pag.

15 Ya rayog ni baʼ beeʼ nib ppin ni nge pagtilin e bitir ni kuma unum e thuth, ma dabi runguy e bitir rokʼ ni diyen nag? Arragon, gomanga yaedra pagtilin, me gag e dab gu pagtilmed, O gidiiʼ ku Israel.

16 Musap gaed, kug yoloey fithingmed nga lan paʼag; pi rungrung romed e ba ʼulʼul iyaen u pʼoewcheg.

17 Pi bitir romed e bay ra mithmith gaed nib papay nib togopluw ngakʼ e piʼin yaed be gafgow nagmed; nge piʼin ni yaed ma thangmed e bay ranoed ngar chuw gaed.

18 Puged oewchmed ngalang ngam sapsap gaed ngam guyed; gubin e pi chaʼaney ma kar kunuyed yaed nga taʼabang, ma bay rabaed ngomed. Ma nʼumngin i napʼan ni kugub fos, ni be yoeg fare Somoel, gimed e bay mu longbiyed raed ngomed, ni boed ni yima rinʼ ko churwaʼ, ni ma fek beeʼ nib ppin ni nge mabgol nge nunuw ngay.

19 Ya pi yungi nʼen ni tagilʼmed ni dakuriy fan ma dakuriy beeʼ riy, nge farengi nam romed ni kan gatheay, e kari achichig e chiney ni ngan paer riy; nge piʼin yaed ma gatheay e paer romed e bayra palog gaed nga orel.

20 Fapi bitir ni gur e bay mu fakayraed, u tomuren ni ke malog e tin sommʼon, e bay kunog bayay nga lan telim: Fare ginnʼem e kay gi gel e wuʼinʼin riy ngog, mu piiʼ bayang ngog ni nggu paer riy.

21 Ma arame bay moeg u lan gumʼirchaʼem ni ngam gaʼar: Miniiʼ e piiʼ e tiney e bitir ngog, ni gabe guy ni dakuriy e bitir rog, ma kan nʼigeg, ni gub kalbus, ma dar mudugil e gin nug be paer riy? Nge miniiʼ e ki i chathowoliy e pi bitir rog ney? Mu guyed, ni digeyeg nga ʼug paer ni yi goʼogag; ere piʼiney, e uw e kuʼur moyed riy?

22 Ni aray rogon ni yoeg fare Somoel ni Got: Musap gaed, gag e bay gu pug paʼag ngalang ngakʼ fapi Gentiles, ma bay gu tay e dodow rog ngakʼ e pi gidiiʼ; ma bay ri feked e pi pagael ni fakmed nga lan ngorngor raed, nge pi ppin ni fakmed e bay ni fekraed u dakean poeraed.

23 Ma pi pilung e bay ra manged e pi matam ni machathowol romed, ma pi leʼengraed e bay ra manged e pi matin ni machathowol romed; bay ra siroʼ gaed ngomed ni kar yipʼed oewchraed nga butʼ, mar lilʼlʼed e ab u rifrifan aymed; ma arame bay mu nanged ni gag fare Somoel; ya piʼin ni dabra tamraʼ gaed e yaedra soen nigeg.

24 Gul rayog ni ngan fek fare falipaʼ rokʼ e chaʼ nib yargael, ara ngan pag e piʼin ni ke yoeg e motochiyel ni nge kalbus?

25 Machane aray rogon ni yoeg fare Somoel, ni mus ko pi kalbus rokʼ fachaʼ ni yargael ma bay ni pagraed, nge fare falipaʼ rokʼ e chaʼ ni ma makʼar murus niki yira pag; ya gura togopluw ngakʼ e chaʼ ni be togopluw ngomed, mug thapeg pifakmed.

26 Ma gura duruwʼiy e piʼin ni yaed be yargael ngomed nga doewngiraed; ma bay ra chingawʼ gaed nga rachaʼraed ni boed ni yi ma rinʼ ko waeyin nib athibthib; nge gubin e gidiiʼ ma ra nang ni gag, fare Somoel, ni Tathapeg romed, nge Tabiyul romed, ni Fachaʼ nem rokʼ Jacob ni gubin ma rayog rokʼ.