1 Me yibi buch nug kunkunuyed nga taʼabang urngin mit e awoch ko gubin mit, ni gu feked ko grain ni gubin mit nge awochngin e pi waʼamngin ni gubin mit.

2 Me yibi buch u napʼan nibe paer e chitamag u wuruʼ e binaw me non ngomaed, ni gaʼar: Musap gaed, kug likʼay nag ba likʼay; ara, nggog ni kan piliyeg e changar rog.

3 Ere muguyed, bachan e pinʼen ni kug guy, me yib tapgin e falfalaenʼ rog ngakʼ Somoel ni bachan Nephi nge Sam; ya ke yib fan ni nggu lemnag ni yow, nge pifakrow nib yoʼor, e ri yaedra thap.

4 Machane musap gow, gur Laman nge Lemuel, e be yib e murus ngog ni bachmew; ya muguyew, kug guy u malikʼay rog, bangi wuruʼ e binaw nib lumor ni rib milmor.

5 Me yibi buch nug guy beeʼ nib moʼon, nib chuw nga mad nib wechwech nib nʼuw; me yib i sakʼiy nga pʼoewcheg.

6 Me yibi buch ni non ngog, me yog ni nggu leak.

7 Me yibi buch ni faʼan gu leak mug guyeg ni gubay u milmor ni yigoʼgag.

8 Ma tomuren ni kug milekag ni boʼor e awa u milmor, mug tabab ko meybil ngakʼ Somoel ni nge wurengaenʼ ngog, u fithikʼ e pi murnguy rokʼ nib yoʼor.

9 Me yibi buch u tomuren ni kug meybil ngakʼ Somoel mug guy bangi rad nib gaaʼ radan.

10 Me yibi buch nug guy bake gakʼiy, ni waʼamngin e ra yognag ngakʼ beeʼ e falfalaenʼ.

11 Me yibi buch ni guwaen gufek waʼamngin nggu waʼ; mug nang ni rib athibthib, ko urngin mit banʼen ni kug riʼ lamen. Arragon, ma kug guy ni fare waʼamngin e rib wechwech, nga urngin mit e wechwech ni kug guy.

12 Ma faʼan guwaʼ fare waʼamngin mar gu falfalaenʼ ni rib gel; ere gu tabab i athapeg ni nge kay chon e tabinaew rog boech; ya gumnang niʼir e thʼabi felʼ u fithikʼ urngin mit e waʼamngin.

13 Ere faʼan gu chachngar ni gube sap nag chon e tabinaew rog, mug guy ba lulʼ i raen; ni yib nge yaen, u taʼaben fare ke gakʼiy ni gube kay waʼamngin.

14 Mug sap ni ngug guy e gin ni yib riy; mug guy pʼebugul ni de palog nga orel; ma ngaram nga pʼebugul e gguy e chitiningmew i Sariah riy, nge Sam, nge Nephi; ni yaed ba sakʼiy nib yaʼan e daryog ni ngar nanged e gin ni thingar sorgaed ngay.

15 Me yibi buch nug ripoy paʼag ngoraed; ma gube piningraed nib gaʼlamag ni thingar rabaed iyib ngog, ngar kayed fare waʼamngin, niʼir e thʼabi felʼ u fithikʼ urngin mit e waʼamngin.

16 Me yibi buch ni rabaed iyib ngog ngar kayed fare waʼamngin.

17 Me yibi buch ni kug baʼadag ni Laman nge Lemuel e thingar rabow ngar kayew boech fare waʼamngin; Ere gu changar nga bugul fare lulʼ, ni gube sap ni gomanga gguyrow.

18 Me yibi buch ni gguyrow, machane dabrow ni ngar bow ngog ngar kayew fare waʼamngin.

19 Mug guy baley i wasey nib kʼikʼiy, nab yaen u mirichlen fare lulʼ, iyaen ko fare ke gakʼiy ni gub sakʼiy u taʼaben.

20 Ma kug guy bochi paʼ i kanawoʼ nib kʼikʼiy mab wuʼinʼin, ni kub un ko fare layi wasey, iyib ko fare ke gakʼiy ni gub sakʼiy u taʼaben; ma kub un ko fare lulʼ iyib nga bangi rad nib gaaʼ radan, ni gowa dakean e fayleng.

21 Mug guy ni boʼor ko mathaʼeg ba ulung i gidiiʼ, ni boʼor i yaed e be nomeg ni gomanga yigi yog ni ngar thap gaed ko fachi paʼ i kanawoʼ ni yib ko fare ke gakʼiy ni gub sakʼiy u taʼaben.

22 Me yibi buch ni rabaed iyib, ngar thap gaed ko fachi paʼ i kanawoʼ ni yib ko fare ke gakʼiy.

23 Me yibi buch ni puw bangi milmor; arragon, bangi milmor ni rib gaaʼ yang, ni aramfan ni fa piʼin ni yaed be yaen ko fachi paʼ i kanawoʼ e ranoed nga wuruʼ e woʼ, ma dakur nanged e gin ni ngar sor gaed ngay mar malog gaed.

24 Me yibi buch ni kug guy boech e gidiiʼ ni ku yaed be miliyed yaed nga mʼon, marbaed iyib ngar koeled taban fare layi wasey; mar miliyed yaed iyib nga mʼon u fithikʼ farengi lumor, ni yaed be chechʼey paʼraed ko fare lay i wasey, nge madaʼ ko ngiyalʼ ni karbaed ra kayed waʼamngin fare ke gakʼiy.

25 Ma arame tomuren ni kar kayed waʼamngin fare ke gakʼiy mar sapsap gaed ni gowa kar tamraʼ gaed.

26 Ma arame kug chachngar, mug guy, nga barbaʼ fare lulʼ i raen, ba naʼun ni rib gaaʼ nib gaaʼ; ni baʼ ni gowa kan toey nga dakean e nifeng, nib tolang u dakean e buutʼ.

27 Ma rib sug ko gidiiʼ, ni pilibthir nge felʼ yangren, ni pumoʼon nge ppin; ma yalen e mad roraed e rib felʼ usun; ma yaed be paer nga ur moning gaed ma yaed be yipʼ paʼraed ngakʼ fa piʼin ni karbaed ni yaed be kay fare waʼamngin.

28 Me tomuren ni kar kayed fare waʼamngin mar tatamraʼ gaed, ni bachan fa piʼin ni yaed be moning ngoraed; ere mar mul gaed nga wuruʼ e woʼ miyaed malog.

29 Ere chiney e gag, Nephi, e dab gu weliy gubin e pi thin rokʼ e chitamag.

30 Machane, nggu ngochngoch nag i yoloey, ni aray rogon, niki guy ba ulung i gidiiʼ ni kuyaed be miliyed yaed nga mʼon; marbaed ngar koeled taban fare layi wasey; mar miliyed yaed nga mʼon ni yaed be chechʼey paʼraed ko fare layi wasey, nge madaʼ ko ngiyalʼ ni karbaed ngar awgaed nga butʼ mar kayed waʼamngin fare ke gakʼiy.

31 Ma ki guy ba ulung e gidiiʼ ni yaed be chamniy woʼraed iyib ko fare naʼun ni rib gaaʼ nib gaaʼ.

32 Me yibi buch ni boʼor i yaed e lumoch u lan fare lulʼ i raen nib toʼaer; ma boʼor i yaed e daki guyraed, ni yaed be yaen u yupaʼ i kanawoʼ nib kireb.

33 Ma rib yoʼor e gidiiʼ ni yaen nga langgin fare naʼun. Ma tomuren ni ka ranoed nga langgin fare naʼun miyaed yipʼ paʼaraed ni yaed be moning ngog nge fapi chaʼ ni yaed be kay waʼamnign fare ke gakʼiy, machane dag motoyil gaed ngoraed.

34 Ere ireray e thin ko chitamag: Ya oren e piʼin ni motoyil ngoraed, e ra mul gaed.

35 Me Laman nge Lemuel e dar kayew fare waʼamngin, aray rogon ni yoeg e chitamag.

36 Me yibi buch u tomuren ni ke muʼ e chitamag i yoeg urngin e pi thin ko likʼay rokʼ, fa fare changar rokʼ nni piliyeg, nge guy bogi banʼen nib yoʼor, me gaʼar ngomaed, bachan e pinnʼey nni piliyeg e changar rokʼ nge guy, me yib e murus ngakʼ ni rib gel ni bachan Laman nge Lemuel; arragon, be rus ni richey min chuwegrow rokʼ Somoel.

37 Me non ngorow ni boed ni ma rinʼ e labthir u fithikʼ e murnguy nge tawureng, ni gomanga ra athamgil gow ngar fol gow ko thin rokʼ, ma sana arame rayog ni runguyrow Somoel, me siyi chuwegrow; arragon, chitamag e machib ngorow.

38 Ma tomuren ni ke machib ngorow, ma ke prophesy ngorow u morngaʼagen bogi banʼen ni boʼor, me chiyliy ngorow ni ngar fol gow ko motochiyel rokʼ Somoel; ma aram, me toffan ko numon ngorow.