1 Ma chiney e gag, Nephi, e dab gu piiʼ chipin e thaʼ ko pi chitamag u lan e giney e chep rog; ma dariy bingyalʼ ni gura piiʼ nga tomuren u dakean e pi yungi plate ney ni gube yoloey; ya bay u lan e chep nibe chaʼariy e chitamag; ere, dab gu yoloey nga langgin e guruy ney e muruwel.

2 Ya ke gaman u wunʼug ma gub falaenʼ ngay ni nggog ni gamaed pigachalpen Yosef.

3 Ma de gaʼfan ngog ni nggu piiʼ urngin babyoren e tirokʼ e chitamag, ya dabiyog i yoloey nga dakean e tiney e plate, ya gu baʼadag ni nge puf e gin ni nggu yoloey e tirokʼ Got ngay.

4 Ya nʼen ni gube lemnag e gomanga yigi wurengaenʼ e gidiiʼ ngarbaed ngakʼ fare Got ku Abraham, niʼir fare Got ku Isaac niʼir fare Got ku Jacob, me yog ni ngar thap gaed.

5 Ere, pinʼen nib mʼag u waenʼ e fayleng e dagur yoloey, ma kemus ni fapinʼen nib mʼagaenʼ Got ngay, nge piʼin ni darur mʼaged yaed ko tin u fayleng banʼen.

6 Ere, nggu motochiyel nag ngakʼ pifakag, ni dab ri suguyed e yungi plate ney ko pinʼen ni de gaʼfan ngakʼ e gidiiʼ.