1 Ao ngkai, tariu, taraia, I a tia n taetae nakoimi, n aron are kairai te Tamnei bwa N na taekinna; mangaia ae I ataia bwa a na bon koro bukiia.

2 Ao a na rangi ni kakawaki bwaai aika a koreaki mai nanon te boki ibukiia natia aomata, ai moaraa riki kanoara, aika mwakoron te bata are Iteraera.

3 Bwa e na koro bukina bwa n te bong arei ekaretia aika a kateaki, n aki kateaki ibukin te Uea, ao ngkana e taku temanna nakon are temanna: Taraia, Ngai, bon Ngai ana bwai te Uea; ao tabemwaang ana kangai: Ngai bon Ngai ana bwai te Uea, ao bon aio are a taekinna ake a katei ekaretia, ma aki kateaki ibukin te Uea—

4 Ao a na itabaraara imarenaia; ao a na itabaraara aia ibonga imarenaia, ao a na anga reirei n aron rabakauia, ao a na kaakeaa te Tamnei are Raoiroi, are ngaia ae anga te kariaiakaki n taetae.

5 Ao a na kaakea mwaakan te Atua, ma Atuan Iteraera ae Tabu; ao a na kangai nakoia aomata: Ongo iroura, ao ongora ara reirei; bwa nooria bon akea te Atua ni boong aikai, bwa te Uea ao te Tia Kabooira e a tia ni karaoa ana mwakuri, ao e a tia n anga mwaakana nakoia aomata.

6 Nooria, ongo n au tua; ao ngkana a taku bwa iai te kakai ae karaoaki ni bain te Uea, tai kakoaua; bwa n te bong aei ao bon tiaki ngaia Atuan te kakai; e bon tuai ni karaoa ana mwakuri.

7 Eng, ao a mwaiti aika a na kangai: Amwarake, mooi, ao kimwareirei, bwa ti na mate nakon te ingabong; ao a na akea te bwai ae e na riki nakoira.

8 Ao a mwaiti naba aika a na kangai: Amwarake, mooi, ao kimwareirei; ma ko riai ni maaka te Atua—e na ti kariaia karaoan te bure ae uarereke; eng, kabebetea am kewe, babakanikawaia temanna n aron tein ana taeka, kaikoaka kain rarikim; akea te bwai ae e na riki nakoim ni karaoan bwaai aikai; ao karaoi bwaai aikai ni kabane bwa nakon te ingabong ao ti na mate; ao ngkana arona bwa ti reke n te bure iai, ao e na oroira teutana te Atua, ao n tokina ti na kamaiuaki n uean te Atua.

9 Eng, ao a mwaiti akana a na reirei n te aro aio, tua aika a kewe man aki bongana ao ni burababa, ao a na onrake n te kamoamoa, ao a na kakorakoraia ni karabai mai iroun te Uea aia taeka; ao aia mwakuri bon bwain te roo.

10 Ao raraaia aomata aika itiaki e na tang mai aontano ni kaaitaraia.

11 Eng, a bane n tia ni kitana kawain te raoiroi; ao a taonaki n te buakaka.

12 Ao a bane n taonaki aia ekaretia n te buakaka ibukin te kamoamoa, ao ibukia taan reirei ni kewe, ma tua ni kewe, ao a kamoamoa aia ekaretia; ao a onrake n te kamoamoa.

13 A iraa mai irouia aika kainnano bwa e aonga n tei aia tabo n taromauri aika raraoi; ao a iraa mai irouia aika kainnano bwa e aonga n reke aia kunnikai aika raraoi; ao a bwainikirinia aika nanorinano, ibukina bwa a onrake n te kamoamoa.

14 A bwaina te bonotaninga ma ni karietatai atuuia; eng, ao a kitana te koaua ibukin te kamoamoa ao te buakaka, ao mwakuri aika a ribaki, ma mwakuri ni kabekaau, a bane n taonnako n ti tabeman nikiraia, aika ana reirei Kristo aika nanorinano; ma e ngae n anne ao a kairaki, ao a mwaiti taai ake a bwaka iai ngkai a tia n reireinaki n aron aia rabakau aomata.

15 O Taan wanawana, ma aika a rabakau, ma aika a kaubwai, ma aika onrake ni kamoamoan nanoia, ao aomata ni kabane ake a tataekin reirei ni kewe, ma aomata ni kabane aika a karaoi mwakuri ni kabekaau, ao a taekina kawain te Uea ni kaburea, a na bon reke kaia, n aron ana taeka te Uea ae te Atua ae Moan te Mwaaka, bwa a na karenakoaki nako moone!

16 A na reke kaia akana a aki kan ongo ana tangitang te aomata ae raoiroi ao n teirake ni kaaitarai bwaai aika raoiroi, ao n taku bwa akea manenaia! Bwa e na roko te bong are waekoa iai te Uea ae te Atua ni kawaria kaain te aonaba; ao n te bong are a kororake iai i nanon te bure ao a na mate.

17 Ma taraia, ngkana a rairinanoia kaain te aonaba man aia bure ma aia mwakuri aika a ribaki ao a na aki tiringaki, n aron ana taeka aia Uea Taanga ni Buaka.

18 Ma taraia, e na bwaka te ekaretia ae korakora man ribaki, ae kabekaaun te aonaba, ao e na korakora bwakana.

19 Bwa e na kamwaeieaki uean te riaboro, ao e riai bwa a na kamwaeieaki bwa aonga n rairinanoia, bwa ngkana aki ao e na kabaeiia te riaboro n ana taurekereke n aki totoki, ao e na kakorakoraki marakin nanoia, ao a na mate.

20 Bwa taraia, n te bong arei ao e na un inanoia natiia aomata, ao e na kakorakorai marakin nanoia ni kaaitarai bwaai aika a raoiroi.

21 Ao e na kamaraui nanoia tabemwaang, ao e na karaurau ni keweia bwa aongkoa a mano ni maiuakinan te aonaba, ao a na kangai: E raoi Tion; eng, e rikirake waakin Tion, e raoi—ao te riaboro e na kamwaneia tamneia, ao e na karaurau ni kairia nako moone.

22 Ao taraia, e na wii ni kababa nakoia tabemwaang, ao e na tuangiia bwa akea moone; ao e na kangai nakoia: Tiaki ngai te riaboro, bwa bon akea te riaboro—ao e na wirikiriki i nanon taningaia, ni karokoa te tai are a na bae n ana taurekereke, ao a na aki kona n reke kamaiuaia.

23 Eng, a kabaeaki ma te mate, ma moone; ao te mate, ma moone, ao te riaboro, ao aomata ni kabane ake a tia ni bae n ana taurekereke a na bane n tei imatan ana kaintoka n uea te Atua, ao a na motikaki taekaia n aron aia mwakuri, ma a na nako nakon te tabo are e a tia ni katauraoaki ibukiia, n aiaron te nei n ai ma te raanga n ai, ae te kammarakaki ae aki totoki.

24 Mangaia ae e na reke kain te aomata are taku bwa e raoi i Tion!

25 E na reke kain are e kangai: A raoi bwaai ni kabane!

26 Eng, e na reke kain ane ongeaba nakon aia reirei aomata, ao e kaakea mwaakan te Atua, ma te bwaintituaraoi ae te Tamnei ae Raoiroi!

27 Eng, e na reke kain ane kangai: Ti a tia ni karekea, ao akea riki te bwai ae ti kainnanoia!

28 Ao ni kakimototoa, a na reke kaia akana ruru, man un n ana koaua te Atua! Bwa taraia, bwa e na kukurei ni butimwaia te aomata are e kateitei iaon te bwa; ao ane e kateitei iaon te tano e na ruru bwa e rawa ni bwaka.

29 E na reke kain ane kangai: Ti a tia ni karekea ana taeka te Atua, ao ti aki manga kainnanoa ana taeka te Atua, bwa e tau are ti a tia ni karekea!

30 Bwa taraia, e kangai ana taeka te Uea ae te Atua: Nna anganiia natiia aomata teutana i mwin teutana, te reirei teuana i mwin teuana; ao a na kakabwaiaki akana a ongeaba nakon au reirei, ao ni kauki taningaia nakon au taeka n reirei, bwa e na reke irouia te wanawana; bwa N na anga nakon ane e butimwaia ae mwaiti riki; ao mai irouia ake a kangai, E a tau are ti a tia ni karekea, N na anai ake I a tia n anganiia.

31 E na maraia ane e onimakina te aomata, ke n onimakina mwaakan te aomata, ke n ongeaba nakon aia reirei aomata, ma ti ngkana anga aia reirei ni mwaakan te Tamnei are Raoiroi.

32 E na reke kaia Tientaire, n aron ana taeka te Uea ae te Atua ae aia Uea Taanga ni Buaka! Bwa e ngae ngke I arora baiu nakoia ni katoa bong, ma a na bon kaakeaai, ma n na nanoangaia, n aron ana taeka te Uea ae te Atua, ngkana a rairinanoia ao a nakoiu; bwa N na arora baiu i nanon te bong ae bwanin, n aron ana taeka te Uea ae te Atua ae aia Uea Taanga ni Buaka.