1 Ngan yana, kamatuoran, nasiring ako ha iyo, nga kaangayan niyo nga usisahon ine nga mga butang. Oo, ngan usa nga kasugoan an ighahatag ko ha iyo nga usisahon niyo ha kamadoroto ine nga mga pulong; tungod kay mahinungdanon adton mga tugon ni Isaias.

2 Kay piho nga hiya in nagyakan nga nahidadabi an ngatanan nga mga nahuna-huna mahitungod han akon mga tawo tikang ha sulod balay ni Israel; sanglit kinahanglan nga hiya in magyakan liwat ngadto han mga Gentil.

3 Ngan an ngatanan nga nahuna-huna nga iya ginyakan in nahinabo ngan mahinanabo, subay han mga tugon nga iya ginluwas.

4 Sanglit pamatii an akon mga tugon; igsurat an mga butang nga iginsumat ha iyo; subay han takna ngan kaburut-on han Amay in mahingangadto ha mga Gentil.

5 An hin-o man nga manmamati han akon mga tugon ngan magbasul ngan mabunyagan, hiya in matatalwas. Pag-usisahon adton mga propeta, tungod kay damo ha ira an nagpamatuod hine nga mga nahuna-huna.

6 Ngan yana ine nahitabo nga han igyakan ni Jesus ine nga mga tugon hiya in nagsiring hin otro ha ira, kahuman niya ig-isplikar adton ngatanan nga baraan nga mga kasuratan ngadto ha ira nga ira kinarawat, hiya in nagsiring ngadto ha ira: Kitaa, an iba nga baraan nga mga kasuratan karuyag ko nga iyo igsurat, kundi waray kamo.

7 Ngan ine nahitabo nga hiya in nagsiring kan Nephi: Dad-a ngadi an mga sinurat nga iyo gintatago.

8 Ngan han pagdad-a ni Nephi han mga sinurat, ngan gintaltag ha iya atubangan, iya ginsiplatan adto ngan nagsiring:

9 Kamatuoran nasiring ako ha iyo, akon ginsugo an akon suruguon nga hi Samuel, an Lamanite, nga hiya in magpamatuod ngadto hine nga mga tawo, ngan hadto nga panahon nga paghimayaon han Amay an iya ngaran ha akon nga diin damo nga mga baraan in mabuhat tikang ha kamatayon, ngan magpapakita ngadto ha kadam-an, ngan magtututdo ngadto ha ira. Ngan hiya in nagsiring ngadto ha ira: Dire ba ine sugad hadto?

10 Ngan adton iya mga disipolo in bumaton nga nagsiring: Oo, Ginoo, hi Samuel in nagtagna subay han imo mga tugon, ngan adto in natuman ngatanan.

11 Ngan hi Jesus in nagsiring ngadto ha ira: Paonan-o nga waray niyo igsurat ine nga mga nahuna-huna, nga damo an mga baraan in nabanhaw ngan nagpakita ngadto ha kadam-an ngan nagtutdo ngadto ha ira?

12 Ngan ine nahitabo nga nahinumduman ni Nephi nga ine nga mga nahuna-huna in waray igsurat.

13 Ngan ine nahitabo nga hi Jesus in nagsugo ha ira nga ine in kinahanglan nga igsurat; sanglit ine in iginsurat subay han iya pagsugo.

14 Ngan yana nahitabo nga igin-isplikar ni Jesus adton mga baraan nga kasuratan ha usa la, ngan ira iginsurat adto, ngan hiya in nagsugo ha ira nga igtutdo ine nga mga nahuna-huna nga iya igin-isplikar ngadto ha ira.