1 Mo nao i bin hapen se long sikstin yia stat long taem we Kraes i kam, Lakonius, gavna blong graon, i bin kasem wan leta long lida mo gavna blong grup ia blong ol man blong stil; mo hemia i ol toktok we hem i raetem, i talem:

2 “Lakonius, we i hae olgeta mo jif gavna ova long graon, luk, mi raetem leta ia long yu, mo givim long yu bigfala pres tumas, from we yu stap strong, mo tu, from ol pipol blong yu oli stap strong, blong holemtaet wanem we yufala i ting se hem i raet mo fridom blong yufala; yes, yufala stanap gud, olsem se han blong wan god i sapotem yufala blong difendem fridom blong yufala, mo ol samting blong yufala, mo kantri blong yufala, o ol samting we yufala i singaotem olsem.

3 Mo i luk olsem wan sore long mi, Lakonius we yu hae olgeta, we bae yu krangke tumas mo yu mekem samting blong nating blong ting se yu save stanap agensem plante man we i no fraet we oli stap andanit long oda blong mi, we naoia i stap, oli stanap rere wetem ol tul blong faet blong olgeta, mo oli stap wet, we oli wantem tumas blong harem toktok ia—‘Go daon long Ol Man blong Nifae mo prapa kilimded gud olgeta.’

4 Mo mi, from mi save long fasin blong olgeta we spirit blong olgeta i no fraet nating, from we mi bin testem olgeta long fil blong faet, mo from mi save se oli no laekem yufala blong oltaem, from plante rong we yufala i bin mekem long olgeta, from hemia, sapos bae oli kam daon agensem yufala, bae oli visitim yufala mo prapa spolem gud yufala evriwan.

5 From hemia, mi raetem leta ia, mi klosem leta ia wetem han blong mi nomo, from mi stap tingbaot gudfala laef blong yufala, from yufala i stap strong long samting ia we yufala i bilivim se i raet, mo strong spirit blong yufala long fil blong faet.

6 From hemia, mi raet long yu, mi wantem se yu lego long hemia long ol pipol blong mi, ol bigtaon blong yu, ol graon blong yu, mo ol samting blong yu, sapos no, bae oli visitim yu wetem naef blong faet mo we bae panis i mas kam long yu.

7 O long ol narafala toktok, lego yufala i kam long mifala, mo joen wetem mifala mo kam blong save ol ^asikret wok blong mifala, mo kam ol brata blong mifala blong mekem se yufala i save stap olsem mifala—i no ol slef blong mifala, be ol brata blong mifala mo ol fren blong mifala blong save yusum ol samting blong mifala.

8 Mo luk, mi ^apromes long yu, sapos yufala i mekem samting ia, wetem wan strong promes, bae mi no prapa spolem gud yufala, be sapos yufala i no mekem samting ia, mi promes long yu wetem wan strong promes, se long nekis manis bae mi givim oda long ol ami blong mi se oli mas kam agensem yu, mo bae oli no stopem han blong olgeta mo bae oli no letem yufala i stap laef, be bae oli kilim yufala i ded, mo bae oli letem naef blong faet i foldaon long yufala kasem taem we bae yufala i nomo gat.

9 Mo luk, mi mi Gidianhae; mo mi mi gavna blong hemia, ^asikret grup blong Gadianton; we grup mo ol wok blong hem mi save se oli ^bgud; mo oli blong ol ^ddei blong bifo mo oli bin pasem daon olgeta long mifala.

10 Mo mi raetem leta ia long yu, Lakonius, mo mi hop se bae yufala i lego ol graon blong yufala mo ol samting blong yufala, mo bae blad i no ron, blong mekem se ol pipol blong mi oli save tekembak ol raet mo gavman blong olgeta, we oli bin pulaot long yu from fasin nogud blong yu blong holembak long olgeta, ol raet blong olgeta blong gavman, mo sapos yufala i no mekem samting ia, bae mi pembak ol rong blong olgeta. Mi mi Gidianhae.”

11 Mo nao i bin hapen se taem Lakonius i kasem leta ia, hem i sapraes tumas, from Gidianhae i no fraet blong toktok, i askem strong se hem i mas tekem graon blong Ol Man blong Nifae, mo tu, i talem strong se hem i mas kilim ol pipol mo blong pembak ol rong blong olgeta we oli no kasem eni rong, be nomo se olgeta nomo oli bin ^amekem rong long olgetawan, taem we oli pulaot oli gowe long ol nogud mo rabis stilman.

12 Nao luk, Lakonius ia, gavna, i bin wan stret man, mo i no save fraet long ol samting we wan ^astilman i stap askem strong mo ol strong tok blong hem blong kilim man; from hemia, hem i no mekem folem wanem i stap long leta blong Gidianhae, gavna blong ol man blong stil, be hem i mekem se ol pipol blong hem oli mas prea long Lod blong kasem paoa agensem taem we ol stilman bae oli kam daon agensem olgeta.

13 Yes, hem i sendem wan mesej long medel blong evri pipol, blong oli mas karem i kam tugeta ol woman blong olgeta, mo ol pikinini blong olgeta, ol grup blong animol blong olgeta mo ol buluk blong olgeta, mo evri samting blong olgeta, be i no graon blong olgeta, oli kam long wan ples.

14 Mo hem i mekem se oli mas bildim ol strongfala fanis wol raonem olgeta, mo paoa blong ol fanis wol ia oli mas strong gud. Mo hem i mekem se ol ami, blong Ol Man blong Nifae tugeta wetem blong Ol Man blong Leman, o blong olgeta evriwan we oli kaontem olgeta wetem Ol Man blong Nifae, bae oli mas putum olgeta olsem ol gadman raonabaot blong lukaotem olgeta, mo blong protektem olgeta long ol stilman dei mo naet.

15 Yes, hem i talem long olgeta: “Olsem we Lod i stap laef, sapos yufala i no sakem sin from evri rabis fasin blong yufala, mo prea long Lod, bae i no gat wei nating blong hem i mekem yufala i kam fri aot long ol han blong ol Gadianton stilman.”

16 Mo ol toktok mo ol profesi blong Lakonius oli bigfala mo gudfala tumas, oli mekem se fraet i kam long evri pipol; mo oli traehad wetem paoa blong olgeta blong mekem folem ol toktok blong Lakonius.

17 Mo i bin hapen se Lakonius i jusum ol jif kapten ova evri ami blong Ol Man blong Nifae, blong givim oda long olgeta long taem we ol stilman bae oli kamaot long waelples agensem olgeta.

18 Nao oli jusum jif kapten ia we i hae moa long medel blong evri jif kapten mo bigfala komanda blong evri ami blong Ol Man blong Nifae, mo nem blong hem i ^aGidgidonae.

19 Nao hem i kastom blong evri Man blong Nifae blong jusum olsem ol jif kapten blong olgeta (be i no long ol taem blong fasin nogud blong olgeta), wan man we i gat spirit blong revelesen, mo tu, blong ^aprofesi; from hemia, Gidgidonae ia i bin wan hae profet long medel blong olgeta, mo semtaem, hem i stap olsem jif jaj.

20 Nao ol pipol oli talem long Gidgidonae: “Prea long Lod, mo bae yumi go antap long ol bigfala hil mo long waelples blong mekem se yumi save atakem ol stilman mo prapa kilim ded gud olgeta long ol stret graon blong olgeta.”

21 Be Gidgidonae i talem long olgeta: “Lod i no ^aletem; from sapos yumi go antap agensem olgeta, Lod bae i ^bgivim yumi long han blong olgeta; from hemia, bae yumi mekem yumi rere long medel blong ol graon blong yumi, mo bae yumi pulum ol ami blong yumi oli kam tugeta, mo bae yumi no go agensem olgeta, be bae yumi wet kasem taem we oli kam agensem yumi; from hemia, olsem we Lod i stap laef, sapos yumi mekem samting ia, bae hem i givim olgeta long han blong yumi.”

22 Mo i bin hapen se long nambaseventin yia, long las pat blong yia, mesej blong Lakonius i bin go aot truaot long ful fes blong graon mo oli tekem ol hos blong olgeta, mo ol hos wilkat blong olgeta, mo ol buluk blong olgeta, mo evri grup blong sipsip blong olgeta, mo ol grup blong ol animol blong olgeta, mo ol sid blong olgeta, mo evri samting blong olgeta, mo oli maj i go long grup blong ol taosen mo ol ten blong ol taosen, kasem taem we olgeta evriwan oli go kasem ples we ol lida blong olgeta oli bin jusum blong oli mas kam tugeta long hem, blong difendem olgeta agensem ol enemi blong olgeta.

23 Mo graon we oli bin jusum, i graon blong Sarahemla, mo graon we hem i stap bitwin graon blong Sarahemla mo graon blong Plante, yes, kasem boda we i stap bitwin graon Plante mo graon Emti.

24 Mo i bin gat plante taosen mo taosen blong ol pipol we oli singaotem olgeta Ol Man blong Nifae, we oli kam tugeta long graon ia. Nao Lakonius i bin mekem se oli mas kam tugeta long graon long Saot, from bigfala strong nogud tok we oli sakem long ^agraon long Not.

25 Mo oli mekem olgetawan oli stap strong agensem ol enemi blong olgeta; mo oli stastap long wan graon, mo long wan grup, mo oli fraet long ol toktok we Lakonius i bin talemaot, inaf blong mekem se oli sakem evri sin blong olgeta; mo oli mekem ol prea blong olgeta long Lod, God blong olgeta, blong hem i ^asevem olgeta long taem we bae ol enemi blong olgeta oli kam daon agensem olgeta blong faet.

26 Mo oli bin harem nogud tumas from ol enemi blong olgeta. Mo Gidgidonae i mekem se oli mas mekem ol ^atul blong faet blong evri kaen, mo oli mas stap strong wetem ol klos blong faet, mo wetem ol sil, mo smol sil we i raon, folem ol toktok blong hem.