1 Anajwan kik’ulman naq chirix roso’jik laj Korihor, laj Alma, rik’in naq kirab’i resil naq eb’ laj Tzoramita yookeb’ chixpo’b’al ru lix b’e li Qaawa’, ut naq laj Tzoram, li najolomin reheb’, yoo chixk’amb’al xch’ooleb’ li tenamit re ^ate’xkub’si rib’ chiru li ^bpak’b’il dios mem, ki’ok wi’chik chi ^cyajerk xch’ool xb’aan xmaa’usilaleb’ li tenamit.

2 Xb’aan naq k’a’jo’ ^anarahob’tesiik xch’ool laj Alma rik’in xnawb’al naq wan maa’usilal sa’ xyanq lix tenamit; jo’kan naq numtajenaq xrahil xch’ool xb’aan xjachikeb’ laj Tzoramita rik’ineb’ laj Nefita.

3 Anajwan eb’ laj Tzoramita ke’xch’utub’ chaq rib’ sa’ jun li ch’och’ Antionum xk’ab’a’, li wan chirix li ch’och’ Tzarahemla sa’ releb’ saq’e, li moko najt ta xnub’aal rik’in xmaril li palaw, li wan chirix li ch’och’ Jerxon sa’ xtz’e li saq’e, li wan ajwi’ xnub’aal chire li yamyookil ch’och’ sa’ xtz’e li saq’e, ut a’ yamyookil ch’och’ a’an nujenaq rik’ineb’ laj Lamanita.

4 Anajwan eb’ laj Nefita q’axal ke’xxuwa naq eb’ laj Tzoramita te’ok chiraatinankil rib’ rik’ineb’ laj Lamanita, ut naq xb’aan a’an taa’uxq li nimla sachk sa’ xyanqeb’ laj Nefita.

5 Ut anajwan, rik’in naq li ^aaatin ^bjultikanb’il k’a’jo’ naq ^cnaxk’ameb’ xch’ool li tenamit chixb’aanunkil li k’a’ru tiik—relik chi yaal, k’a’jo’ wi’chik xwankil sa’ xb’een xk’a’uxleb’ li tenamit chiru li yok’leb’ ch’iich’, malaj k’a’aq chik ru li na’uxman reheb’—jo’kan naq laj Alma kixk’oxla naq aajel ru naq te’xyal xchaab’ilal li raatin li Dios.

6 Jo’kan naq kixk’am chirix laj Ammon, ut laj Aaron, ut laj Omner; ut laj Himni kixkanab’ sa’ li iglees aran Tzarahemla; a’b’an eb’ a’ oxib’ a’an kixk’am chirix, ut jo’kan ajwi’ laj Amulek ut laj Tzeesrom, li wankeb’ chaq Melek; ut wiib’ reheb’ li ralal kixk’am ajwi’ chirix.

7 Anajwan li asb’ej reheb’ li ralal ink’a’ kixk’am chirix, ut a’an aj ^aHelaman xk’ab’a’; a’ut lix k’ab’a’eb’ li kixk’am chirix, a’aneb’ laj Xiblon ut laj Korianton; a’in ut xk’ab’a’eb’ li ani xkoheb’ chirix sa’ xyanqeb’ laj ^bTzoramita, re xjultikankil li aatin chiruheb’.

8 Anajwan eb’ laj Tzoramita ^arisihomeb’ chaq rib’ rik’ineb’ laj Nefita; jo’kan naq eb’ a’an ak jultikanb’il li raatin li Dios chiruheb’.

9 A’b’anan ^ake’t’ane’ chaq sa’ li nimla sachk, xb’aan naq moko k’eeb’ileb’ ta xch’ool chixpaab’ankil lix taqlahom li Dios, ut lix k’uub’anb’il aatin, jo’ chanru lix chaq’rab’ laj Moises.

10 Chi moko ke’ab’in chiru li na’leb’ b’anunb’il sa’ li iglees, re kanaak wulaj wulaj sa’ li tijok ut tz’aamank chiru li Dios, re naq ink’a’ te’ok sa’ li aaleek.

11 Relik chi yaal ut, q’axal k’i li na’leb’ ke’xpo’ wi’ ru lix b’e li Qaawa’; jo’kan ut, xb’aan a’in, laj Alma ut eb’ lix komon xkoheb’ sa’ li ch’och’ re xjultikankil li aatin chiruheb’.

12 Anajwan, naq wulajenaqeb’ sa’ li ch’och’, k’ehomaq reetal, sachsookeb’ xch’ool ke’kana rik’in xtawb’al naq eb’ laj Tzoramita ke’xyiib’ chaq li ch’utleb’aal, ut neke’xch’utub’ rib’ sa’ jun kutan chiru li xamaan, a’an xkutankil li Qaawa’ neke’xye re; ut neke’loq’onin jo’ chanru li maajun wa ilb’il xb’aan laj Alma ut eb’ lix komon;

13 Xb’aan naq ke’xkab’la chaq jun li na’ajej sa’ xyi lix ch’utleb’aaleb’, jun li xaqarib’aal na’ajej, li taqenaq chi najt sa’ xb’een li jolomej, ut jun ajwi’ li winq naru na’ok sa’ xb’eenil.

14 Jo’kan ut, ani naraj ^aloq’onink tento taaxik ut taaxaqliiq sa’ xb’eenil, ut tixtaqsi li ruq’ sa’ xjayal li choxa, ut tixjap re chi kaw xyaab’ xkux, ut tixye:

15 Santil santil Dios; naqapaab’ naq laa’at li Dios, ut naqapaab’ naq santat, ut wanjenaqat choq’ musiq’ej, ut musiq’ejat, ut naq toj musiq’ejaqat chi junelik.

16 At santil Dios, naqapaab’ naq kajach qu rik’ineb’ li qas qiitz’in, ut ink’a’ naqapaab’ li na’leb’ kanab’anb’il chaq reheb’ li qas qiitz’in, li numsinb’il chaq reheb’ xb’aan xka’ch’inal xna’leb’eb’ lix yuwa’eb’; naqapaab’ b’an naq ^axasik’ qu re toowanq choq’ ^baasantil alal aak’ajol; ut jo’kan ajwi’ naq kak’e chiqanaw naq maajun Kristo taawanq.

17 Laa’at b’an juntaq’eetat ewer, anajwan, ut chi junelik, ut ^axasik’ qu re tookole’q, naq chixjunileb’ chiqasutam sik’b’ileb’ ru re te’kute’q xb’aan laa josq’il taq’a sa’ xb’alb’a; ut li santilal a’in, at Dios, naqab’antioxi chawu; ut naqab’antioxi ajwi’ chawu naq xasik’ qu, re naq ink’a’ toojalb’ehiiq chixtaaqenkil li jo’maajo’il na’leb’ kanab’anb’il chaq reheb’ li qas qiitz’in, li nab’ak’ok reheb’ re te’xpaab’ li Kristo, li naxsachb’esiheb’ xch’ool re naq najt te’xik aawik’in, at qaDios.

18 Ut naqab’antioxi wi’chik aawe, at Dios, naq laa’o jun sik’b’il ru ut santil tenamit. Amen.

19 Anajwan kik’ulman naq chirix naq laj Alma ut eb’ lix komon ut eb’ li ralal ke’rab’iheb’ li tij a’in, ke’sach xch’ool chi q’axal numtajenaq.

20 Xb’aan naq k’ehomaq reetal, li junjunq chi winq naxik ut naxq’axtesi li junaj chi tij a’in.

21 Anajwan li na’ajej Rameumptom yeeb’il re xb’aaneb’, ut chi k’utb’il xyaalalil li aatin, a’an li santil xaqarib’aal.

22 Anajwan sa’ li xaqarib’aal a’an neke’xq’axtesi chaq, chixjunjunqaleb’ li winq, li junaj chi tij a’an chiru li Dios, ut neke’xb’antioxi chiru lix Dios naq sik’b’ileb’ ru xb’aan, ut naq a’an ink’a’ kixjalb’ehiheb’ chixtaaqenkil li na’leb’ kanab’anb’il chaq re li ras riitz’ineb’, ut naq moko k’amb’il ta xch’ooleb’ re xpaab’ankil li k’a’aq re ru chalel, li maak’a’ neke’xnaw chirix.

23 Anajwan, chirix naq chixjunileb’ li tenamit ke’b’antioxin chi jo’kan, ke’sutq’i sa’ rochocheb’, ut ^amaajun wa chik ke’aatinak chirix lix Dios toj reetal naq ke’xch’utub’ wi’chik rib’ wan wi’ li santil xaqarib’aal, re b’antioxink jo’ chanru neke’xb’aanu.

24 Anajwan naq laj Alma kiril a’in ^akiraho’ lix ch’ool; xb’aan naq kiril naq a’aneb’ jun tenamit aj maak ut po’b’ileb’ xch’ool; relik chi yaal, kiril naq k’eeb’ileb’ xch’ool chirix li oor, ut chirix li plaat, ut chirix li k’iila paay chi chaab’il eechej.

25 Relik chi yaal, ut kiril ajwi’ naq ^ataqsinb’ileb’ xch’ool sa’ xnimob’resinkil rib’ chi naab’al, sa’ xq’etq’etileb’ xch’ool.

26 Ut a’an kixtaqsi xyaab’ xkux chiru choxa, ut ^akixjap re chixyeeb’al: Aay, jo’ najtil chik, at Qaawa’, taakanab’ naq eb’ laa moos te’wanq arin taq’a sa’ li tz’ejwalej re rilb’al xkomon li nimla maa’usilal a’in sa’ xyanqeb’ li ralal xk’ajoleb’ li winq?

27 K’e reetal, at Dios, ^aneke’elajin chawu, a’b’an lix ch’ooleb’ sub’b’il rib’ sa’ xq’etq’etileb’. K’e reetal, at Dios, neke’elajin chawu rik’in xtz’uumaleb’ re, a’b’an ^bxnimob’resihomeb’ rib’, toj chi numtajenaq, rik’in li jo’maajo’il k’a’aq re ru re li ruchich’och’.

28 K’e reetal, at inDios, li raq’eb’ li terto xtz’aq, ut lix kok’ matq’ab’ ut ^axk’aamaleb’ xkux li ruq’eb’, ut lix q’ol oor, ut chixjunil li k’a’aq re ru terto xtz’aq li utz’u’ujinb’ileb’ wi’; ut k’e reetal, k’eeb’ileb’ xch’ool chirix a’an, a’ut neke’elajin chawu ut neke’xye—Naqab’antioxi, at Dios, xb’aan naq laa’o jun tenamit sik’b’il ru aab’aan, naq jalaneb’ chik te’oso’q.

29 Relik chi yaal, ut neke’xye naq xak’e chixnaweb’ naq maajun Kristo taawanq.

30 At Qaawa’ Dios, jo’ najtil chik taakanab’ naq xkomon li maa’usilal ut li q’etok paab’aal a’in taawanq sa’ xyanq li tenamit a’in? At Qaawa’, chak’ehaq taxaq inmetz’ew, re tinkuy xnumsinkil xmajelal inkawilal. Xb’aan naq nalaj inkawilal, ut a’ maa’usilal sa’ xyanq li tenamit a’in naxrahob’tesi li waam.

31 At Qaawa’, numtajenaq xrahil inch’ool; chak’ojob’aq taxaq li waam ^arik’in li Kristo. At Qaawa’, chak’ehaq taxaq chiwanq inmetz’ew, re tinnumsi rik’in kuyuk li ch’a’ajkilal a’in li taachalq sa’ inb’een, xb’aan xmaa’usilal li tenamit a’in.

32 At Qaawa’, chak’ojob’aq taxaq li waam, ut chinaakanab’ taxaq chi usaak, ut jo’kaneb’ ajwi’ li wech aj k’anjel li wankeb’ wik’in—relik chi yaal, laj Ammon, ut laj Aaron, ut laj Omner, ut jo’kan ajwi’ laj Amulek ut laj Tzeesrom, ut jo’kaneb’ ajwi’ li ^awiib’eb’ li walal—relik chi yaal, chixjunileb’ a’in chak’ojob’aqeb’ taxaq xch’ool, at Qaawa’. Relik chi yaal, chak’ojob’aq taxaq raameb’ rik’in li Kristo.

33 Chak’ehaq taxaq reheb’ naq che’wanq xmetz’ew, re te’xnumsi li ch’a’ajkilal li taachalq sa’ xb’eeneb’ xb’aan xmaa’usilal li tenamit a’in.

34 At Qaawa’, ^achak’ehaq taxaq qe naq cho’usaaq sa’ xk’amb’aleb’ wi’chik aawik’in rik’in li Kristo.

35 K’e reetal, at Qaawa’, nim xloq’al li ^araameb’, ut naab’al reheb’ qas qiitz’ineb’; jo’kan ut, chak’ehaq qe, at Qaawa’, wankilal ut xchaab’ilal li na’leb’ re taqak’ameb’ wi’chik aawik’in a’ qas qiitz’in a’in.

36 Anajwan kik’ulman naq chirix naq laj Alma kixye li aatin a’in, naq ^akixk’e li ^bruq’ sa’ xb’eeneb’ chixjunil li wankeb’ rik’in. Ut k’ehomaq reetal, naq kixk’e li ruq’ sa’ xb’eeneb’, ke’nujak rik’in li Loq’laj Musiq’ej.

37 Ut chirix a’an ke’xjachi rib’ li jun rik’in li jun chik, ut ^amoko ke’xk’oxla ta k’a’ru te’xtzeka, malaj k’a’ru te’ruk’, malaj k’a’ru te’xtiqib’ wi’ rib’.

38 Ut li Qaawa’ kixk’e li taak’anjelaq reheb’ re naq ink’a’ te’tz’okaaq, chi moko te’chaqiq re; relik chi yaal, ut kixk’eheb’ ajwi’ xmetz’ew, re naq maajun paay chi ^ach’a’ajkilal te’xnumsi, ka’ajwi’ naq sub’b’il rib’ sa’ sahil ch’oolejil chirix li Kristo. Ut ki’ux a’in jo’ chanru lix tij laj Alma, ut a’in xb’aan naq kitijok rik’in ^bpaab’aal.