1 Ut anajwan kik’ulman naq eb’ li ralal laj Alma xkoheb’ sa’ xyanqeb’ li tenamit, re xjultikankil li aatin chiruheb’. Ut laj Alma ajwi’ ink’a’ kiru chi hilank, ut xko’o ajwi’ a’an.

2 Anajwan maak’a’ chik taqaye chirix lix jultikahomeb’, ka’ajwi’ naq ke’xjultika li aatin, ut li yaal, jo’ chanru li musiq’ej re profeetil aatin ut re k’utb’esink; ut ke’jultikan jo’ chanru lix ^asantil k’anjelil li Dios li b’oqb’ileb’ wi’.

3 Ut anajwan ninsutq’i sa’ li esil chirixeb’ li pleet ke’wan wi’ laj Nefita rik’ineb’ laj Lamanita, sa’ xwaqxaqlaju chihab’ rawa’b’ejileb’ laj raqol aatin.

4 Xb’aan naq k’ehomaq reetal, kik’ulman naq eb’ laj ^aTzoramita ke’ok choq’ aj Lamanita; jo’kan naq sa’ xtiklajik li xwaqxaqlaju chihab’ eb’ lix tenamiteb’ laj Nefita ke’ril naq chalkeb’ re laj Lamanita sa’ xb’eeneb’, jo’kan naq ke’xkawresi rib’ re pleetik; relik chi yaal, ke’xch’utub’eb’ lix teep aj pleet sa’ li ch’och’ Jerxon.

5 Ut kik’ulman naq ke’chal laj Lamanita chi mil; ut ke’k’ulun sa’ li ch’och’ Antionum, a’an xch’och’eb’ laj Tzoramita; ut jun winq aj Tzerahemnah xk’ab’a’ najolomink reheb’.

6 Ut anajwan, rik’in naq eb’ laj Amalekita q’axaleb’ wi’chik aj maak ut aj kamsinel sa’ xch’ooleb’ chiruheb’ laj Lamanita xjuneseb’ rib’, jo’kan ut, laj Tzerahemnah kixxaqab’eb’ li xb’eenil aj taqlanel sa’ xb’eeneb’ laj Lamanita, ut a’aneb’ aj Amalekita ut aj Tzoramita chixjunileb’.

7 Anajwan a’in kixb’aanu re taaruuq chixk’uulankil lix kaqaleb’ xch’ool choq’ reheb’ laj Nefita, re taaruuq tixk’ameb’ a’an rub’el xwankil re taa’uxmanq xk’oxlahom.

8 Xb’aan naq k’ehomaq reetal, lix k’oxlahom, a’an reek’asinkileb’ laj Lamanita chi josq’o’k rik’ineb’ laj Nefita; a’in kixb’aanu re tixmaq’ xnimal li wankilal sa’ xb’eeneb’, ut re ajwi’ naq tixk’ul wankilal sa’ xb’eeneb’ laj Nefita, rik’in xk’amb’aleb’ chi moosil.

9 Ut anajwan lix k’oxlahomeb’ laj Nefita a’an xk’uulankil lix ch’och’eb’, ut li rochocheb’, ut li ^arixaqileb’, ut li ralal xk’ajoleb’, re te’xkoleb’ rix chiru ruq’eb’ li xik’ neke’ilok reheb’; ut jo’kan ajwi’ re taaruuq te’xk’uula li k’a’ru xk’ulub’eb’ ut li kanab’anb’ileb’ chixb’aanunkil, relik chi yaal, ut jo’kan ajwi’ li ^bach’ab’aak wankeb’ wi’, re te’ruuq chixloq’oninkil li Dios jo’ chanru li rajomeb’.

10 Xb’aan naq ke’xnaw naq wi te’t’ane’q sa’ ruq’eb’ laj Lamanita, naq ani ^ataaloq’oninq re li Dios sa’ ^bmusiq’ej ut sa’ li yaal, li tz’aqal ut li yo’yookil Dios, eb’ laj Lamanita te’xsach raj.

11 Relik chi yaal, ut ke’xnaw ajwi’ naq numtajenaq lix kaqaleb’ xch’ool laj Lamanita choq’ reheb’ li ^aras riitz’ineb’, a’eb’ li tenamit aj Anti-Nefi-Lehi, a’aneb’ xtenamit laj Ammon yeeb’ileb’ re—ut eb’ a’an ink’a’ ke’raj xchapb’al li k’anjeleb’aal re pleet, relik chi yaal, ke’ok sa’ jun sumwank ut ink’a’ ajwi’ te’xq’et—jo’kan ut, wi te’t’ane’q sa’ ruq’eb’ laj Lamanita te’sache’q raj.

12 Ut eb’ laj Nefita ink’a’ ke’raj xkanab’ankil naq te’sache’q; jo’kan naq ke’xk’e li ch’och’ reheb’ choq’ reechanihomeb’.

13 Ut eb’ lix tenamit laj Ammon ke’xk’e reheb’ laj Nefita jun nimla raqal li k’a’ru reheb’, re taawanq k’a’ru taak’anjelaq reheb’ lix teep aj pleet; ut chi jo’kan kiteneb’aak sa’ xb’eeneb’ laj Nefita, xjuneseb’ rib’, chi xaqliik chiruheb’ laj Lamanita, a’aneb’ chi junajinb’il xkomoneb’ laj Laman ut laj Lemuel, ut eb’ li ralal laj Ismael, ut chixjunileb’ li ke’risi chaq rib’ rik’ineb’ laj Nefita, a’aneb’ laj Amalekita ut laj Tzoramita, ut li ^aralal xk’ajoleb’ laj tij re laj Noe.

14 Anajwan eb’ li alal k’ajolb’ej a’an ka’ch’in chik ma juntaq’eet xk’ihaleb’ rik’ineb’ laj Nefita, jo’kan naq eb’ laj Nefita kiteneb’aak sa’ xb’eeneb’ xyalb’al ru rik’ineb’ li ras riitz’in, toj reetal rik’in hoyok kik’.

15 Ut chirix naq ke’xch’utub’ rib’ li teep aj pleet reheb’ laj Lamanita sa’ li ch’och’ Antionum, k’ehomaq reetal, eb’ li teep aj pleet reheb’ laj Nefita kawresinb’ileb’ chixk’ulb’aleb’ sa’ li ch’och’ Jerxon.

16 Anajwan, li najolomink reheb’ laj Nefita, malaj li winq li xaqab’anb’il choq’ xb’eenil aj taqlanel sa’ xb’eeneb’ laj Nefita—anajwan li xb’eenil aj taqlanel kixk’ul li taqlank sa’ xb’een chixjunil li teep aj pleet reheb’ laj Nefita—ut aj Moroni xk’ab’a’;

17 Ut laj Moroni kixk’ul chixjunil li taqlank, ut li jolomink sa’ xb’een lix pleeteb’. Ut yal oob’ xka’k’aal chihab’ xyu’am naq kixaqab’aak choq’ xb’eenil aj taqlanel sa’ xb’eeneb’ li teep aj pleet reheb’ laj Nefita.

18 Ut kik’ulman naq kixk’uleb’ laj Lamanita sa’ xnub’aal Jerxon, ut kawresinb’il lix tenamit rik’in yok’leb’ ch’iich’, ut rik’in k’onk’ookil ch’iich’, ut rik’in li k’iila paay chi k’anjeleb’aal re pleet.

19 Ut naq ke’ril li teep aj pleet reheb’ laj Lamanita naq eb’ lix tenamit laj Nefi, malaj ut naq laj Moroni kixkawresi lix tenamit rik’ineb’ li xramb’al ru ch’oolej, ut rik’in ramleb’ chiruq’eb’, relik chi yaal, ut rik’in ramleb’ re xkolb’al xjolomeb’, ut jo’kan ajwi’ naq tiqtookeb’ rik’in pim ruhil t’ikr—

20 Anajwan lix teep aj pleet laj Tzerahemnah moko kawresinb’ileb’ ta rik’in k’a’ruhaq xkomon a’an, ka’ajwi’ lix yok’leb’ ch’iich’ wan ut lix k’onk’ookil ch’iich’, li roq tzimaj ut lix tzimajeb’, lix pekeb’ ut lix jok’eb’; ut ^at’ust’uukeb’, ka’ajwi’ jun tz’um lanlo chixyiitoqeb’; relik chi yaal, t’ust’uukeb’ chixjunil, ka’ajwi’ eb’ laj Tzoramita ut laj Amalekita ink’a’;

21 A’b’anan eb’ a’an moko kawresinb’ileb’ ta rik’in xramb’al ru ch’oolej, chi moko rik’in ramleb’—jo’kan ut, numtajenaqeb’ xxiw chiru li teep aj pleet reheb’ laj Nefita sa’ xk’ab’a’ lix kolb’a-ib’ aq’eb’, us ta q’axal numtajenaq rajlankileb’ chiruheb’ laj Nefita.

22 K’ehomaq reetal, kik’ulman anajwan naq maak’a’eb’ xch’ool chi chalk sa’ xb’eeneb’ laj Nefita sa’ xnub’aal Jerxon; jo’kan naq ke’el chaq sa’ li ch’och’ Antionum chiru li yamyookil ch’och’, ut ke’xchap xb’e sa’ xsutam li yamyookil ch’och’, aran chixk’atq xyo’leb’aal li nima’ Sidon, re naq te’ruuq chi chalk sa’ li ch’och’ Manti ut te’reechani li ch’och’; xb’aan naq ink’a’ neke’xk’oxla naq te’xnaw li teep aj pleet re laj Moroni b’ar xkoheb’.

23 A’b’an kik’ulman, naq toja’ xikenaqeb’ chiru li yamyookil ch’och’, laj Moroni kixtaqlaheb’ laj muqmuukil k’ehol eetal sa’ li yamyookil ch’och’ re rilb’al lix teepeb’; ut laj Moroni jo’kan ajwi’, rik’in naq naxnaw chirix lix profeetil aatin laj Alma, kixtaqla junjunq li winq rik’in, re xtz’aamankil chiru naq tixpatz’ re li Qaawa’ ^ab’ar te’xik li teep aj pleet reheb’ laj Nefita re xkolb’al rib’eb’ chiruheb’ laj Lamanita.

24 Ut kik’ulman naq li raatin li Qaawa’ kichal rik’in laj Alma, ut laj Alma kixye reheb’ laj k’amol esil re laj Moroni, naq eb’ li teep aj pleet reheb’ laj Lamanita yookeb’ chi b’eek sa’ xsutam li yamyookil ch’och’, re te’ruuq chi ok junpak’al sa’ li ch’och’ Manti, re naq te’xtikib’ xpleetinkil li jun raqal re li tenamit li q’uneb’ xmetz’ew. Ut xkoheb’ laj taql a’an, ut ke’xq’axtesi li esil re laj Moroni.

25 Anajwan laj Moroni, chirix xkanab’ankil jun raqal lix teep aj pleet sa’ li ch’och’ Jerxon, maare anchal taachalq jun raqal reheb’ laj Lamanita sa’ li ch’och’ ut te’reechani li tenamit, kixk’am li jun raqal chik re lix teep aj pleet ut kib’eek chi junpak’al sa’ li ch’och’ Manti.

26 Ut kixtaqla naq chixjunileb’ li ani wankeb’ sa’ li jun raqal chi ch’och’ a’an te’xch’utub’ rib’ chixpleetinkileb’ laj Lamanita, re ^axkolb’al rix lix ch’och’eb’ ut lix tenamit, li k’a’ru xk’ulub’eb’ ut ach’ab’aak wankeb’ wi’; jo’kan naq kawresinb’ileb’ choq’ re li hoonal te’chalq wi’ laj Lamanita.

27 Ut kik’ulman naq laj Moroni kixtaqla naq lix teep aj pleet taawanq chi muqmu sa’ li ru taq’a li wan chixk’atq lix maril li nima’ Sidon, li wan junpak’al li nima’ Sidon sa’ rokeb’ saq’e sa’ li yamyookil ch’och’.

28 Ut laj Moroni kixk’ojob’eb’ laj muqmuukil k’ehol eetal chixsutam, re taaruuq tixnaw jo’q’e taachalq lix teepaleb’ laj Lamanita.

29 Ut anajwan, rik’in naq laj Moroni kixnaw lix k’oxlahomeb’ laj Lamanita, naq lix k’oxlahomeb’ a’an xsachb’aleb’ li ras riitz’in, malaj xk’eeb’aleb’ rub’el xwankileb’ a’an, ut xk’amb’aleb’ chi moosil re te’ruuq chixxaqab’ankil jun li awa’b’ejihom choq’ reheb’ sa’ xb’een chixjunil li ch’och’;

30 Ut rik’in ajwi’ naq naxnaw naq li rajomeb’ laj Nefita a’an ka’ajwi’ xkolb’al rix lix ch’och’eb’, ut li ^aach’ab’aak wankeb’ wi’, ut lix igleeseb’, jo’kan naq kixk’oxla naq moko maak ta naq tixkoleb’ rix rik’in k’oxlanb’il pleet; jo’kan ut, rik’ineb’ laj muqmuukil k’ehol eetal kixtaw k’a’ru li b’e te’xk’am laj Lamanita.

31 Jo’kan naq kixjach ru lix teep aj pleet, ut jun raqal kixk’am aran sa’ li ru taq’a, ut kixmuqeb’ sa’ releb’ saq’e, chixk’atq li tzuul Riplah sa’ xtz’e li saq’e;

32 Ut li jun ch’ol chik kixmuq sa’ li ru taq’a sa’ rokeb’ saq’e, chi junpak’al li nima’ Sidon sa’ rokeb’ saq’e, ut chi jo’kan toj taq’a sa’ xnub’aal li ch’och’ Manti.

33 Ut chi jo’kan, chirix xk’ojob’ankil lix teep aj pleet jo’ chanru li rajom, ak kawresinb’il chixk’ulb’aleb’.

34 Ut kik’ulman naq ke’taqe’ laj Lamanita chixk’atq li tzuul sa’ xnim li saq’e, b’ar muqmu wi’ jun raqal li teep aj pleet re laj Moroni.

35 Ut naq eb’ laj Lamanita ak numenaqeb’ chiru li tzuul Riplah, ut ke’chal sa’ li ru taq’a, ut ke’ok chixq’axb’al li nima’ Sidon, li teep aj pleet li muqmu chixk’atq li tzuul sa’ xtz’e li saq’e, li jolominb’il xb’aan jun winq aj ^aLehi xk’ab’a’, ut a’an kixb’eresi lix teep aj pleet chi uub’ej ut kixsuteb’ rix laj Lamanita sa’ releb’ saq’e, chirixeb’.

36 Ut kik’ulman naq eb’ laj Lamanita, naq ke’rileb’ laj Nefita chi chalk chirixeb’, ke’xsutq’isi rib’ ut ke’ok chixyalb’al ru rik’in lix teep aj pleet laj Lehi.

37 Ut kitikla li k’anjel re kamsink chi ka’pak’al, a’b’anan xuwajel wi’chik kiwan sa’ xb’eeneb’ laj Lamanita, xb’aan naq k’utk’u lix ^at’usameb’ chiru lix kawil tenomeb’ laj Nefita rik’ineb’ lix yok’leb’ ch’iich’ ut lix k’onk’ookil ch’iich’eb’, li nak’amok chaq li kamk ka’ch’in chik ma rik’in li junjunq chi lob’.

38 Ut chi junpak’al chik, yalaq jo’q’e nat’ane’ jun li winq sa’ xyanqeb’ laj Nefita, xb’aaneb’ lix yok’leb’ ch’iich’ ut xsachik xkik’eleb’, xb’aan naq ramb’ileb’ ru chiru xcha’al lix xaqalileb’ li q’axal q’un ru, malaj ut li jar xcha’al li tz’ejwalej li q’axal q’un ru ramb’il ru chiru xlob’eb’ laj Lamanita, xb’aan lix ^aramb’al ru ch’oolejeb’, ut lix ramleb’ chiruq’eb’, ut lix ramb’al xjolomeb’; ut chi jo’kan eb’ laj Nefita ke’xb’aanu li k’anjel re kamsink sa’ xyanqeb’ laj Lamanita.

39 Ut kik’ulman naq ke’chal xxiweb’ laj Lamanita, sa’ xk’ab’a’ li nimla sache’k sa’ xyanqeb’, toj reetal naq ke’ok chi eelelik sa’ xjayal li nima’ Sidon.

40 Ut ke’taaqeek xb’aan laj Lehi ut eb’ lix winq; ut ke’tiikisiik xb’aan laj Lehi sa’ xha’il Sidon, ut ke’xq’ax lix ha’il Sidon. Ut laj Lehi kixxaqab’eb’ lix teep aj pleet chire li nima’ Sidon re naq ink’a’ te’q’axoq.

41 Ut kik’ulman naq laj Moroni ut lix teep aj pleet ke’xk’uleb’ laj Lamanita sa’ li ru taq’a, chi junpak’al li nima’ Sidon, ut ke’ok chi t’ane’k sa’ xb’eeneb’ ut chixkamsinkileb’.

42 Ut eb’ laj Lamanita ke’eelelik wi’chik chiruheb’, sa’ xjayal li ch’och’ Manti; ut ke’k’ule’ wi’chik xb’aaneb’ li teep aj pleet re laj Moroni.

43 Ut sa’ a’in li wankeb’ wi’, eb’ laj Lamanita ke’pleetik chi numtajenaq; relik chi yaal, maajun wa nawb’ileb’ chaq laj Lamanita chi pleetik rik’in xkomon xnumtajenaqil lix metz’eweb’ ut xkawileb’ xch’ool, ink’a’, chalen chaq sa’ xtiklajik.

44 Ut k’eeb’ileb’ xch’ool xb’aaneb’ laj ^aTzoramita ut eb’ laj Amalekita, a’aneb’ li xb’eenil aj taqlanel ut aj jolominel reheb’, ut xb’aan laj Tzerahemnah, a’an li xb’eenil aj taqlanel reheb’, malaj li xb’eenil aj jolominel ut li nataqlan reheb’; relik chi yaal, ke’pleetik chanchan josq’ aj xul, ut naab’al reheb’ laj Nefita ke’kamsiik xb’aan ruq’eb’; relik chi yaal, xb’aan naq ke’xjacheb’ sa’ xyi naab’al lix ramb’al xjolomeb’, ut ke’xk’ob’ naab’al lix ramb’al ru xch’ooleb’, ut ke’xch’ot naab’al li ruq’eb’; ut chi jo’kan ke’sak’ok laj Lamanita sa’ xnimaleb’ xjosq’il.

45 A’b’anan, eb’ laj Nefita q’axal chaab’il wi’chik li na’leb’ musiq’anb’ileb’ wi’, xb’aan naq moko yookeb’ ta chi ^apleetik choq’ re li reyil chi moko li wankilal; yookeb’ b’an chi pleetik choq’ re li rochocheb’ ut li ^bach’ab’aak wankeb’ wi’, li rixaqileb’ ut lix kok’aleb’, ut chixjunil k’a’ru reheb’; relik chi yaal, li k’anjel neke’loq’onink wi’, ut lix igleeseb’.

46 Ut yookeb’ chixb’aanunkil li k’a’ru neke’reek’a naq ^ateneb’anb’ileb’ wi’ chiru lix Dios; xb’aan naq li Qaawa’ kixye chaq reheb’, ut reheb’ ajwi’ lix yuwa’eb’, naq: ^bWi maak’a’ eemaak rik’in li ^cxb’een rahob’tesink, chi moko rik’in li xkab’, moko teekanab’ ta eerib’ chi kamsiik xb’aan ruq’eb’ li xik’ neke’ilok eere.

47 Ut jo’kan wi’chik, li Qaawa’ kixye naq: ^aTeekol rix lee junkab’al toj reetal rik’in hoyok kik’. Jo’kan ut, xb’aan li ajom a’in naq eb’ laj Nefita yookeb’ chixyalb’aleb’ ru rik’ineb’ laj Lamanita, re xkolb’al rib’eb’, ut lix junkab’aleb’, ut lix ch’och’eb’, lix tenamiteb’, ut li k’a’ru xk’ulub’eb’, ut lix paab’aaleb’.

48 Ut naq ke’ril lix winq laj Moroni lix nimaleb’ xxik’ ut lix josq’ileb’ laj Lamanita, kik’ulman naq okeb’ raj re chi ka’ch’ino’k xch’ool ut chi eelelik chiruheb’. Ut laj Moroni, naq kixk’e reetal li yookeb’ chixk’oxlankil, kixtaqla xk’eeb’aleb’ xch’ool rik’in li k’oxlahom a’in—relik chi yaal, rik’in xk’oxlankil lix ch’och’eb’, ut li ach’ab’aak wankeb’ wi’, relik chi yaal, li rach’ab’ankileb’ chiru moosil.

49 Ut kik’ulman naq ke’sutq’i sa’ xb’eeneb’ laj Lamanita, ut ^ake’xjap re chi junajeb’ xyaab’ xkux chiru li Qaawa’ lix Dios, choq’ re li ach’ab’aak wankeb’ wi’ ut lix kolb’aleb’ chiru moosil.

50 Ut ke’ok chixxaqab’ankil rib’ chiruheb’ laj Lamanita rik’in wankilal, ut sa’ li hoonal ajwi’ a’an naq ke’xjap re chiru li Qaawa’ choq’ re li rach’ab’ankileb’, ke’ok laj Lamanita chi eelelik chiruheb’, ut ke’eelelik toj sa’ xha’il li Sidon.

51 Anajwan, eb’ laj Lamanita q’axal k’iheb’ wi’chik, relik chi yaal, numenaq wiib’ sut xk’ihaleb’ chiru rajlankileb’ laj Nefita, a’b’anan ke’tiikisiik, jo’kan naq ch’utub’anb’ileb’ sa’ jun molam sa’ li ru taq’a, sa’ xb’een li uul chire li nima’ Sidon.

52 Jo’kan naq eb’ li teep aj pleet re laj Moroni ke’xsutiheb’ rix, relik chi yaal, sa’ xka’pak’al li nima’, xb’aan naq k’ehomaq reetal, sa’ xjayal li releb’ saq’e wankeb’ lix winq laj Lehi.

53 Jo’kan ut, naq laj Tzerahemnah kirileb’ lix winq laj Lehi chire li nima’ Sidon sa’ releb’ saq’e, ut eb’ li teep aj pleet re laj Moroni chirix li nima’ Sidon sa’ rokeb’ saq’e, naq sutsuukeb’ rix xb’aaneb’ laj Nefita, ke’chape’ rik’in nimla xiw.

54 Anajwan laj Moroni, naq kiril xnimaleb’ xxiw, kixtaqlaheb’ lix winq naq te’xkanab’ xhoyb’al xkik’eleb’.