1 Musap gaed, chiney e yibi buch ni fapi gidiiʼ ku Nephi e rigel e falfalaenʼ roraed, ni bachan fare Somoel niki chuwegraed bayay u paʼ e pi toʼogor roraed; ere ra oged e magaer ngakʼ fare Somoel ni Got roraed; arragon, ra baley niged e abich roraed ma yaed be meybil ni boʼor yay, ma yaed be liyoer ku Got u fithikʼ e falfalaen nib gel.

2 Me yibi buch nu lan e bin ragag nge mereb e duw ko fare lung ko fapi tapuf-oloboch nga dakean fapi gidiiʼ ku Nephi, ni Alma e yib ngakʼ fak ni Helaman nge gaʼar ngakʼ: Be mich u wunʼum fapi thin ni kug weliy ngom ni morngaʼagen fapi chep ni kuʼun chaʼariy?

3 Me gaʼar Helaman ngakʼ: Arragon, be mich u wunʼug.

4 Me gaʼar Alma bayay: Be mich u wunʼum ngakʼ Yesus Kristus, niʼir e bay yib?

5 Me gaʼar: Arragon, be mich u wunʼug gubin e pi thin ni kam weliy.

6 Me gaʼar Alma ngakʼ bayay: Gara fol ko pi motochiyel rog?

7 Me gaʼar: Arragon, gura fol ko pi motochiyel rom u poloʼ i gumʼirchaʼeg.

8 Ma arame gaʼar Alma ngakʼ: Nge felʼ waʼatham; ma fare Somoel e ra monʼog nigem u dakean e giney e nam.

9 Machane musap, bay banʼen ni nggu yiʼiy nag ngom; machane nʼen ni nggu yiʼiy nag ngom e dab mu weliy ngan nang; arragon, nʼen ni nggu yiʼiy nag ngom e dab ni weliy ngan nang, ni aram rogon nge yaeni madaʼ ko ngiyalʼ ni fare yiʼiy e ke muguʼul; ere mu yoloey e pi thin ni nggog.

10 Ere baʼaray fapi thin: Musap, gube nang ni pi gidiiʼ ney, ni fapi Nephites, u rogon fare nangaenʼ ko yiʼiy ni bay rog, nu lan aningeg miriʼay e duw nga tomren ni nge yibi mʼug Yesus Kristus ngoraed, ma bay ra mul gaed ko mich.

11 Arragon, ma arame bay ruguyed e mael nge mʼar ni ubchiyaʼ, arragon, uyngol nge puʼoeg rachaʼ, nge yaeni madaʼ ko ngiyalʼ ni fapi gidiiʼ ku Nephi e kar mʼay gaed—

12 Arragon, rabuch e biney ni bachan e yaedra mul ko mich mar mul gaed nga fithikʼ e pi muruwel nu milmor, nge dirngal ni galong, nge gubin mit e kireb; arragon, gube yoeg ngom, ni bachan e yaedra denen ni togopluw ko tamilang nge nangaenʼ, arragon, gube yoeg ngom, ni aram ko re rran nem iyib, nge madaʼ ko bin aningeg e mfen e dabi mʼaey, u mʼon ni nge yibi taw ko re denen ney nib gaaʼ.

13 Ere napʼan nra taw e re rran nem, ma musap, fare ngiyalʼ i nʼen e kari chugur iyib ni piʼin bay e chiney, ara pifak e piʼin ni yaed bu un e chiney ko mathaʼeg nga fithikʼ fapi gidiiʼ ku Nephi, e dab kun uneg raed ko mathaʼeg nga fithikʼ fapi gidiiʼ ku Nephi bayay.

14 Machane piʼin ra magaey, ma dab ni gatheayraed u lan fare rran nib gaaʼ mab gel e gafgow riy, e bay ni unegraed ko mathaʼeg nga fithikʼ fapi Lamanites, ma bay ra woededraed, ma yaed gubin ma kemus ni buchʼuw i yaed e yira piningraed ni gachalpen fare Somoel; ma yaed e ra gayraed fapi Lamanites nge yaeni madaʼ ko ngiyalʼ ni kar mʼay gaed. Ere chiney, e bachan e denen, ere re prophecy ney e ra muguʼul.

15 Ere chiney e yibi buch u tomuren ni muʼ Alma i yoeg e pinnʼey ngakʼ Helaman, me yibliy, nge fatin baʼaram e pagael ni fak; ma ki yibliy e butʼ ni fan ngakʼ e piʼin nib matʼaw.

16 Me gaʼar: Aray rogon ni yoeg fare Somoel ni Got—Nge kireb waʼathan e nam, arragon, re nam ney, ni fan e pi nam, nge mfen, nge thin, nge gidiiʼ, ni ngan gatheay, ni piʼin ma rinʼ e kireb, ma napʼan ni kar luk gaed nga fithikʼ e kireb; ni woed ni kugog faram ere nge paer riy ni aram rogon; ya ireray e re gechig nge tawaʼath ku Got nga dakean e nam, ya fare Somoel e dabiyog ni nge sap ko denen ni mus ko tin ba achichig ma dabiyog.

17 Ere chiney, e napʼan ni yoeg Alma e pi thin ney me yibliy fare galasia, arragon, gubin e piʼin ni yaedra yuluyed yaed ko fare mich e ngiyalʼ nem iyaen nga mʼon.

18 Ere napʼan ni ke rinʼ Alma e biney me chuw nge yaen nga wuruʼ fare binaw nu Zarahemla, ni gowa nge yaen nga lan fare binaw nu Melek. Me yibi buch ni dakun rungʼag morngaʼagen; ma morngaʼagen e yamʼ ni tay ara gumʼeyag ntay ngakʼ e dariy banʼen ni gamaed manang riy.

19 Ma musap, kemus ni bin baʼaray e gamaed manang, niʼir beeʼ nib moʼon nib matʼaw; me wer thiin u fithikʼ gidiiʼen fare galasia ni ke fek fare Kan ni Thothup ngalang, ara fare Somoel e ke kʼeyag, ni woed Moses. Ya musap, fapi chep nib thothup e yoeg ni fare Somoel e fek Moses; ere gamaed be lemnag niki fek Alma, u dakean e yaʼel; ere, arayfan ni dariy banʼen ni gamaed manang u morngaʼagen ni ke yimʼ nge gumʼeyag rokʼ.

20 Me yibi buch u napʼan ni tabab e bin ragag nge mereb e duw ko fare lung ko fapi tapuf-oloboch nga dakean fapi gidiiʼ ku Nephi, ma arame yaen Helaman iyaen u fithikʼ fapi gidiiʼ ni nge yoeg fare thin ngoraed.

21 Ya musap, bachan fapi mael roraed ngakʼ fapi Lamanites nge nochi togopluw ni maʼangech nib yoʼor nge sachamcham ni ke yibi aw nga fithikʼ fapi gidiiʼ, ere yibi tʼuf ni ngan weliy fare thin ku Got u fithikʼraed, arragon, nge ba motochiyal ni ngan falʼeg ni gaʼangin fare galasia.

22 Ere, Helaman nge pi walagen e ranoed ngar yarmiyed fare galasia bayay u gaʼangin yang fare nam, arragon, u langgin gubin e binaw u gaʼangin yang e nam nib milsuwon ngakʼ fapi gidiiʼ ku Nephi. Me yibi buch ni ra dugiliyed e priests nge sensey u gaʼangin yang fare nam, u gubin e pi galasia.

23 Me yibi buch u tomuren ni ke muʼ Helaman nge pi walagen i dugliy e priests nge sensey ko fapi galasia me yibi sum ba togopluw ni maʼangech u fithikʼraed, ni dabra motoyil gaed ko fapi thin ku Helaman nge pi walagen;

24 Ya ra yowlop gaed, ni kar nʼufed yaed ngalang u lan gumʼirchaʼraed, ni bachan e kar falaʼab gaed; ere rigel e falaʼab roraed u rogon ni yaed be guy, ma dabra motoyil gaed ko thin roraed, ni nga ranoed ni yaed ba yalʼuw u pʼoewchen Got.