1 Me yibi buch ni oren e piʼin ni dubraed ni ngar motoyil gaed ko fapi thin ku Helaman nge pi walagen e ra kunuyed yaed nga taʼabang ngar togopluw gaed ngakʼ pi walagraed.

2 Ere chiney e musap, ri gel e damomuw ngoraed, ni arame ra nomeged ni ngar liiʼedraed ngar mʼaed.

3 Chiney e chaʼ ni gaaʼ rokʼ e piʼin ni kar damomuw gaed ngakʼ pi walagraed e beeʼ nib moʼon nib gaaʼ mab yargael; ma fithingan e Amalickiah.

4 Ma Amalickiah e be athapeg ni nge mang pilung; ma fapi gidiiʼ ni ke damomuw e kuyaed be athapeg ni nge mang pilung roraed; ma yaed e yoʼor ko tin nib sobutʼ e tapuf-oloboch ko binaw, ma yaed be gay e gin nra yib gelingraed riy.

5 Ma kar uned u foen e pi sabaenbaen ku Amalickiah, ni faʼan yaedra ayuweg mar guyed rogon ni nge mang pilung roraed ma ra tay raed ni ngar manged gaaʼ ko fapi gidiiʼ.

6 Ere aray rogon ni wawliyraed Amalickiah ni ngar togopluw gaed, ni yug aram rogon fapi machib ku Helaman nge pi walagen machane ra feked yathin, arragon, ni yug aram rogon gelingin e ayuw roraed ko fare galasia machane ra feked yathin, ni yaed e pi priest nib tolang ko galasia.

7 Ma bayoʼor e piʼin ni gidiiʼen e galasia ni michaenʼraed ko fapi thin nib sabaenbaen ku Amalickiah, ere ra chuw gaed ko fare galasia; ere aram rogon fapi gagyeg ko fapi gidiiʼ ku Nephi e rib gel e yoyowol nge riyaʼ riy, ni yug aram rogon ni kar gel ra gel gaed ko fapi Lamanites, nge pi falfalaenʼ ni kar tayed ra tayed ni bachan e ra thap gaed nga wuruʼ e kalbus u paʼ fare Somoel.

8 Ere kad guyed fini papay e gidiiʼ ni yaed ma pagtilin fare Somoel ni Got roraed, arragon, fini papay ni ngan rinʼ e tin nib kireb, me wawliyey nga orel fare moʼoniyanʼ.

9 Arragon, ma kad guyed ni tin thʼabi kireb banʼen e rayog ni taʼbeeʼ nib kireb e ra gagyeg nag nge yib tagilʼ u fithikʼ e gidiiʼ.

10 Arragon, kad guyed ni Amalickiah, e beeʼ nib moʼon nib sasaliyeb ma beeʼ nib moʼon nib yoʼor e thin rokʼ nib sabaenbaen, ere wawliy nga orel gumʼirchaʼen e gidiiʼ nib yoʼor ni ngar rinʼed e tin nib kireb banʼen; arragon, ma nga kur gayed rogon ni ngar gatheayed fare galasia ku Got, ma nga kur gatheayed fare dayif ko puf-matʼawon ni ke piiʼ Got ngoraed, ara re tawaʼath ni ke piiʼ Got nga dakean e fayleng ni fan ngakʼ e piʼin nib matʼaw.

11 Ere chiney e yibi buch u napʼan ni Moroni, ni fare pilung ko commander ko fapi salthaw ko Nephites, e rungʼag e pi togopluw ney, mari damomuw ngakʼ Amalickiah.

12 Ere yibi buch ni guchthiy e mad rokʼ; nge fek bang riy; me yoloey bbugi thin nga dakean—ni gaʼar, ngad tayed u wunʼdaed e Got rodaed, nge mich rodaed, nge puf-matʼawon rodaed, nge gapas rodaed, nge pi leʼengidaed, nge pi bitir rodaed—me mʼag nga tabon boechi laey i rean.

13 Me mʼag e head-plate rokʼ nga loelugen, nge breastplate rokʼ, nge shield rokʼ, me bichiy e mad ko mael rokʼ nga lukungun; me fek fachi laey i rean, ni bay riy u tabon fachi yang i mad rokʼ ni kan guchthiy, (ni be yoeg ni fare pow ko puf-matʼawon) me siroʼ nib wup oewchen nga butʼ, me meybil nib almarin ngakʼ e Got rokʼ ni fan ko fare tawaʼath ko puf-matʼawon ni nge yibi aw nga dakean pi walagen, u nʼumngin i napʼan ni bay ba ulung i Kristiano ni ke magaey ni ngar tafanyed fare binaw—

14 Ya aray rogon ni gubin e piʼin ni riyulʼ nib michaenʼraed ngakʼ Kristus, ma yaed ba mang ko fare galasia ku Got, ni ma piningraed e piʼin ni dar manged ko fare galasia.

15 Ma piʼin ni yaed ba mang ko fare galasia e yaed ba yulʼyulʼ; arragon, gubin e piʼin nib riyulʼ nib michaenʼraed ngakʼ Kristus e ra feked nga dakeanraed, u fithikʼ e mʼagaenʼ, fithingan Kristus, ara Kristiano ni yima pining ngoraed, ni bachan e mich roraed ngakʼ Kristus ni bay yib.

16 Me ere, ngiyalʼ ney, e Moroni e meybil ni morngaʼagen fapi Kristiano, nge fare Puf-rogon ko nam e gomanga yog ni mʼagaenʼ Got ngay.

17 Me yibi buch u napʼan ni piiʼ ir ni poloʼ ngakʼ Got, me yoeg fithingan gubin e binaw ni bay nga yimuch ko fare binaw ni Kanpag, arragon, ere ngan ngoch nag i yoeg, gubin e binaw, ni ruw rabaʼ ni baʼan yimuch nge baʼan leluʼoch—Bangi binaw ni kan melʼeg, nge fare binaw ko puf-matʼawon.

18 Ere gaʼar: Riyulʼ ni Got e dabi pagdaed, gadaed e piʼin ni yibe dariy fan nagdaed ni bachan e kad feked fithingan Kristus nga dakeandaed, ni nga nitʼ daed nga butʼ min gatheay daed, nge yaeni madaʼ ko ngiyalʼ ni kad miliyed nga dakeandaed u dakean e pi denen rodaed.

19 Ere napʼan ni Moroni e ke yoeg e pi thin ney, me yaen iyaen u fithikʼ fapi gidiiʼ, ni be chichngeg fagi mad rokʼ ni kan guchthiy u lan e lang, ni nge yog ni guy gubin e gidiiʼ e pi yol ni kan yoloey nga dakean, ma be non nib gaaʼ laman, nibe gaʼar:

20 Musap gaed, piʼin ra tay e re pow ney u dakean e nam, e ngar baed nga mʼon u gelingin Somoel, ngar michmich gaed nga lan ba mʼag ni yaedra chaʼariy e pi matʼawraed, nge taliw roraed, ni gomanga yog ni tawaʼath nagraed fare Somoel ni Got.

21 Me yibi buch u napʼan ni ke muʼ Moroni i weliy e pi thin ney, ma musap gaed, fapi gidiiʼ e rabaed ni yaed be miil iyib nga taʼabang ni kar mʼaged madan e mael roraed nga lukungraed, ni yaed be guchthiy e mad roraed ni pow, ara ba mʼag, ni dabra keruʼuyed fare Somoel ni Got roraed; ara, ngan pingeg i yoeg, faʼan yaedra thʼaeb e pi motochiyel rokʼ Got, fa ra mul gaed nga fithikʼ e ngongol nib kireb, mar tamraʼ gaed ngay ni ngar feked nga dakeanraed fithingan Kristus, ma fare Somoel e ra thʼethʼaebraed ni woed ni kar guchthiyed e mad roraed.

22 Ere ireray e re mʼag ni kar og niged yaed ngay, mar yinʼed e mad roraed nga charen i rifrifan ay Moroni, ni yaed be gaʼar: Kug falʼeged ba mʼag u thilmaed e Got romaed, ni yira gatheaymaed, ni woed pi walagmaed u lan fare binaw ni bay ko leluʼoch, ni faʼan gamaed ra mul nga fithikʼ e ngongol nib kireb; arragon, ma rayog ni nge tharbog maed nga charen i rifrifanʼay e pi toʼogor romaed, ni woed ni ku gunʼed e mad romaed nga charen i rifrifanʼem ni ngan yaen u dakean, ni faʼan gamaed ra mul nga fithikʼ e ngongol nib kireb.

23 Ere Moroni e gaʼar ngoraed: Musap gaed, gadaed e piʼin ni kad magaey gaed ko bitir ku Jacob; arragon, gadaed e piʼin kad magaey gaed ko bitir ku Yosef, niʼir e guchthiy pi walagen e mad rokʼ nge yoʼor yang; arragon, ere chiney musap gaed, ngad tayed u wunʼdaed ni ngad fol gaed ko pi motochiyel ku Got, ara pi mad roraed e ra guchthiy pi walagdaed, ma ninʼ daed nga kalbus, ara ni piiʼ daed ni chuwaeyʼ, fa ni liiʼdaed ngad mʼaed.

24 Arragon, ngad ayuweged e puf-matʼawon rodaed ni tin ke magaey e gidiiʼ ku Yosef; arragon, ngad tayed u wunʼdaed fapi thin ku Jacob, u mʼon ni nge yimʼ, ya musap gaed, i guy ni bayang ko tin ke magaey ko fare mad ku Yosef e ni ayuweg ma dawori wod. Ere gaʼar—Boed rogon e giney ni magaey ko mad rokʼ fakag ni kan ayuweg, ere aram rogon bang nra magaey rokʼ pifak fakag nra ayuwegraed Got, me fekraed ngakʼ, u napʼan e tin ni kubay rokʼ pifak Yosef ni bay ni liiʼraed ngar mʼaed, ni boed rogon e gin ni ke magaey ko mad rokʼ.

25 Ere chiney e musap gaed, biney e be piiʼ e kirbaenʼ ngog; machane, kug falfalaenʼ ngakʼ fakag, ni bachan e tin baʼaram i pifak ni bay ni fekraed ngakʼ Got.

26 Ere chiney e musap gaed, ireray e thin ku Jacob.

27 Ere chiney e miniiʼ e manang, ya sana rayog ni piʼin ni ke magaey rokʼ pifak Yosef, e yira gatheayraed ni boed e mad rokʼ, ni ireram e piʼin ni kar chuw gaed romaed? Arragon, ma ra yog ni nge buch ni gadaed, ni faʼanra dab da yulʼyulʼ gaed ko mich rodaed ngakʼ Kristus.

28 Ere chiney e yibi buch u napʼan ni ke yoeg Moroni e pi thin ney ma aram me yaen, ma ki malʼog nga lan gubin yang ko fare binaw ni bay e togopluw riy, nge kunuy nga taʼabang gubin fapi gidiiʼ ni yaed baʼadag ni ngar chaʼariyed e puf-matʼawon roraed, ni ngar sakʼiy gaed ngar togopluw gaed ngakʼ Amalickiah nge piʼin ni kar chuw gaed, ni kanoeg e Amalickiahites ngoraed.

29 Me yibi buch u napʼan ni Amalickiah e guy ni fapi gidiiʼ ku Moroni ni yaed boʼor ngakʼ fapi Amalickiahites—ma ki guy e gidiiʼ rokʼ nib maerwaer u wunʼraed morngaʼagen fare justice ko fare gagyeg niʼir e kar og niged yaed ngay—ere, bachan e be magar nag ni dabiyog ni nge muguʼuliy, ere fek e tin baʼaram e pi gidiiʼ rokʼ nib mʼagaenʼraed ni ngar uned ngakʼ nga ranoed nga lan fare binaw ku Nephi.

30 Ere chiney i Moroni e lemnag ni detʼuf ni fapi Lamanites e nga kur yoʼor gaed boech ni aram gelingraed; ere lemnag ni nge thabey fapi gidiiʼ ku Amalickiah, ara nge fekraed nge sulwegraed, ma nge liiʼ Amalickiah ngemʼ; arragon, ya manang ni ra kʼaring fapi Lamanites ngar damomuw gaed ngoraed, me kʼaringraed ngar baed ngoraed ko mael; ya biney e manang nra rinʼ Amalickiah ni nge yog ni muguʼuliy e tin nibe nomeg.

31 Ere Moroni e lemnag nib tʼuf ni nge fek e salthaw rokʼ, ni kar mukun gaed nga taʼabang, ma kar feked talin e cham roraed, ma kar og niged yaed nga langgin ba mʼag ni ngar ayliyed e gapas—ere yibi buch ni fek e salthaw rokʼ nga ranoed ni kar feked e pi tent roraed nga lan wuruʼ e binaw, ni ngar ninged e woʼ ku Amalickiah u lan wuruʼ e binaw.

32 Ere yibi buch ni rinʼ ni boed rogon ni baʼadag, ma ranoed iyaen nga lan wuruʼ e binaw, mar gur gaed nga mʼon ko fapi salthaw ku Amalickiah.

33 Me yibi buch ni Amalickiah nge buchʼuw ko fapi gidiiʼ rokʼ e ra miil gaed, ma tin ni magaey roraed e rathap gaed nga lan paʼ Moroni min fekraed nga lan fare binaw nu Zarahemla.

34 Chiney, e Moroni e beeʼ nib moʼon ni ke dugliy fapi pilung ko tapuf-oloboch nge lungun e gidiiʼ ni yoʼor, ere bay gelingin ni nge gagyeg nag fapi salthaw ko Nephites u rogon ni baʼadag, ni nge yarmiy me gagyeg nag matʼawon nga dakeanraed.

35 Me yibi buch ni piʼ i rokʼ fapi Amalickiahites ni dar og niged yaed nga langgin ba mʼag ni ngar piiʼed e ayuw ko fare puf-rogon, ni nge yog ni paer roraed ba am nib puf-rogon, e guy rogon ni ngan liiʼraed ngar mʼaed; ere kemus ni buchʼuw e piʼin ni siyeg fare mʼag ko puf-rogon.

36 Ma ki yibi buch, ni guy rogon farengi pow ko puf-matʼawon ni ngan tining ngalang nga taban gubin e wulyang ni bay u gaʼangin yang fare nam, ni ke tafnaʼ fapi Nephites; ere aray rogon ni Moroni e yarmiy fare dodow ko puf-matʼawon u fithikʼ fapi Nephites.

37 Mar tabab gaed bayay ko paer u fithikʼ e gapas u lan fare binaw; ere aram rogon ni ra tayed ni bay e gapas u lan fare binaw nge chuchugur nga tomuren e bin ragag nge mereb e duw ko fare lung ko fapi tapuf-oloboch.

38 Ere Helaman nge fapi tolang ko priest e kur tayed nib yaram lan fare galasia; arragon, ni aram rogon u lan aningeg e duw ni ra pired u fithikʼ e gapas nge falfalaenʼ u galasia.

39 Ere yibi buch nib yoʼor e piʼin ni yimʼ, nib dugil e mich roraed ngay ni pi yaʼel roraed e bayuliyraed fare Somoel i Yesus Kristus; ere aray rogon ni ra chuw gaed u fayleng ni yaed ba falfalaenʼ.

40 Ma bay boech e gidiiʼ ni yimʼ ko mʼar, ni bay ba ngiyalʼ u lan fare duw ni ri ubchiyaʼ u lan fare binaw—machane de yoʼor e piʼin ni yimʼ ko mʼar, ni bachan e bayoʼor e gakʼiy nge likʼngin ni tay Got ni ngan fanay ni falay ni ngan chuweg e mʼar ngay, niʼir e be gagyeg e gidiiʼ ngay u rarogon e yafang—

41 Ere boʼor e piʼin ni yimʼ ni ke pilibthir; ma piʼin ni yimʼ u fithikʼ e michaenʼ ngakʼ Kristus e yaed ba falfalaenʼ rokʼ, ni boed rogon nib tʼuf ni ngar rinʼed.