1 Chiney e ngad suloed nga salapen Amalickiah nge piʼin ruʼuned ngakʼ ko miil nga lan wuruʼ e binaw; ya musap gaed, ke fek fa piʼin ruʼuned ngakʼ, nga ranoed nga lan fare binaw ku Nephi nga fithikʼ fapi Lamanites, mar kʼaringed fapi Lamanites ngar damomuw gaed ngakʼ fapi gidiiʼ ku Nephi, nib almarin ni arame fare pilung ko fapi Lamanites e piiʼ e thin nge yaen u gaʼangin yang e nam rokʼ, nga fithikʼ gubin e gidiiʼ rokʼ, ni ngar kunuyed yaed nga taʼabang bayay ni nga ranoed ko mael ngakʼ fapi Nephites.

2 Me yibi buch u napʼan ni yaen fare bugithin iyaen u fithikʼraed mar rus gaed nib gel; arragon, mar rus gaed ni ngar kireb niged laniyaenʼ fare pilung, ma ku yaed be rus ni nga ranoed ko mael ngakʼ fapi Nephites me mul e yafos roraed u paʼraed. Ere yibi buch ni ra lemniged ni dab rrinʼed, ara oren i yaed e dabra fol gaed ko pi motochiyel rokʼ fare pilung.

3 Me yibi buch ni fare pilung e puwaenʼ ni bachan e dabra fol gaed; ere piiʼ ngakʼ Amalickiah matʼawon ni nge gagyeg nag e tin baʼaram e salthaw rokʼ ni kar fol gaed ko tin be yoeg, me yoeg ngakʼ ni nge yaen nge tawasariy raed ngar feked talin e cham roraed.

4 Ere chiney e musap gaed, ireray e athap rokʼ Amalickiah; ya ir beeʼ nib moʼon ni ma yaen u liyiben ni nge rinʼ e tin nib kireb banʼen ere tʼaer liyiben u lan gumʼirchaʼen ni nge chuweg fare pilung ko fapi Lamanites u gilʼilungun.

5 Ere chiney e ke yog ngakʼ matʼawon ni nge gagyeg nag fatin baʼaram e Lamanites ni yaed e ba falaenʼ fare pilung ngoraed; ma ki gay rogon ni nge mʼagaenʼ fatin baʼaram ni dar fol gaed ngakʼ; ere yaen nga bangi nʼen ni kanoeg e Onidah ngay, ya ireram e gin ni ke miil gubin fapi Lamanites ngay; ya kar pirʼeged ni be yib e salthaw, ma, yaed be lemnag ni yaed be yib ni ngar liiʼed yaed, ere ra miil gaed nga Onidah, ko gin bay e talin e cham roraed riy.

6 Ma kar dugiliyed beeʼ nib moʼon ni nge mang ba pilung ma beeʼ ni nge gagyeg nagraed, ni bachan e kar turguyed u laniyaenʼraed ni ke dugil ni dabra paged ngan tawasar ngoraed nga ranoed ko cham ngakʼ fapi Nephites.

7 Me yibi buch ni ra mukun gaed nga taʼabang nga baʼan dakean fare burey ni kanoeg e Antipas ngay, ni ngar falʼeged rograed ko mael.

8 Chiney e dar nomeg Amalickiah ni nge fek e mael iyaen ngoraed ni boed rogon ni motochiyel nag fare pilung; machane musap gaed, i nomeg ni nge guy rogon ni nge mʼagaenʼ fapi salthaw ko fapi Lamanites ngakʼ, ni gomanga yog ni tay ir ni ke mang gaaʼ roraed me chuweg fare pilung ko lung rokʼ me suwey fare lung.

9 Ere musap gaed, yibi buch ni guy rogon e salthaw rokʼ ni ngar nʼufed e pi tent roraed u lan fare loway u charen fare burey ni Antipas.

10 Me yibi buch u napʼan ni ke nepʼ me lʼoeg e tamalʼog nib miith nge yaen ko fare burey ni Antipas, ya baʼadag ni nge yoeg e milwol ngakʼ fachaʼ ni gaaʼ rokʼ fa piʼin ni yaed bay u dakean fare burey, ni fithingan e Lehonti, ni nge yib nga enggin e burey, ya baʼadag ni nge non ngakʼ.

11 Me yibi buch u napʼan ni thap e milwol ngakʼ Lehonti me siyeg ni dabi yaen nga butʼ nga enggin fare burey. Me yibi buch ni Amalickiah e ki malʼog bayay ko yan lʼagruw yay, ni baʼadag ni nga noeg ngakʼ ni nge yib nga butʼ. Me yibi buch niki siyeg Lehonti; ma ki malʼog bayay ko yan dalip yay.

12 Me yibi buch u napʼan ni pirʼeg Amalickiah ni dabiyog ni guy rogon Lehonti nge yib nga butʼ nge chuw u dakean fare burey, me yaen ko fare burey, nge chuchugur ko gilʼ e tamagif rokʼ Lehonti, ma ki lʼoeg bayay ko yan aningeg yay fare tamalʼog rokʼ ngakʼ Lehonti, ni baʼadag ni nge yib nga butʼ, ma rayog ni nge fek e matanag rokʼ ngar uned ngakʼ.

13 Me yibi buch u napʼan ni yib Lehonti nga butʼ ngakʼ Amalickiah ni ke un e matanag rokʼ ngakʼ, me yoeg ngakʼ ni baʼadag ni nge fek e salthaw rokʼ iyib nga butʼ ni nepʼ, ngar yinʼed nga longob fapi gidiiʼ ni yaed e ke piiʼ fare pilung matʼawon ni nge gagyeg nagraed, ni nge yog ni piiʼraed nga lani paʼ Lehonti, ni faʼanra fek (Amalickiah) ni nge mang e bin lʼagruw e gaaʼ ko fare ulung i salthaw ni gubin.

14 Me yibi buch ni Lehonti e yib nga butʼ nge salthaw rokʼ ngar langabiyed fapi gidiiʼ ku Amalickiah, ya nge yog ni liyeg raed fapi salthaw ku Lehonti u mʼon ni ngar odgaed ni kakadbul.

15 Me yibi buch u napʼan ni kar guyed ni kan liyegraed, mar wenig gaed ngakʼ Amalickiah ni nge pag ngar cheag gaed ngakʼ pi walagraed, ni gomanga siy ni liiʼraed. Ma ireray e renʼen ni be athapeg Amalickiah.

16 Me yibi buch ni piiʼ e gidiiʼ rokʼ, ni arame ke togopluw ko nʼen ni yoeg fare pilung. Ma ireray e renʼen ni i athapeg Amalickiah, ni nge yog ni muguʼuliy rogon i liyeb nag ni nge chuweg fare pilung ko lung rokʼ.

17 Ere chiney e ba yalen u fithikʼ fapi Lamanites, ni faʼanra yimʼ e chaʼ ni gaaʼ roraed, ma ngan dugliy e chaʼ ni migid ngakʼ nga tanggin ni nge mang ire gaaʼ roraed.

18 Me yibi buch ni Amalickiah e yoeg ngakʼ rebe tapigpig rokʼ ni nge buchʼuw mbuchʼuw nag e yub ngakʼ Lehonti, nge yimʼ.

19 Ere chiney, e napʼan ni yimʼ Lehonti, ma fapi Lamanites e ra dugiliyed Amalickiah ni nge mang gaaʼ roraed nge pilung ni commander roraed.

20 Me yibi buch ni Amalickiah e ranoed fapi salthaw rokʼ (ya ke yog ngakʼ e tin ni athapeg) ko fare nam ku Nephi, ko fare binaw ku Nephi, niʼir e bin pilung e binaw.

21 Ere fare pilung e yib ni yaed e matanag rokʼ nga wean ni ngar madaʼ gaed Amalickiah, ya be lemnag ni Amalickiah e ke muguʼuliy e tin ni chiyliy ngakʼ, ma Amalickiah e ke kunuy nga taʼabang buʼulung i salthaw nib gaaʼ ulung ni ngar mael gaed fapi Nephites.

22 Machane musap gaed, napʼan ni yib fare pilung nga wean ni ngar madaʼ gow me yoeg Amalickiah ko tapigpig rokʼ ni ngar mʼonaed ngar madaʼ gaed fare pilung. Ma ranoed ngar siroʼ gaed ngakʼ fare pilung, ni boed ni kan liyoer ngakʼ ni bachan falʼngin.

23 Me yibi buch ni fare pilung e kʼiyeg paʼ ni ngar puw gaed ngalang, ya ba yalen ko fapi Lamanites, nib pow ko gapas, nib yalen ni kar feked ko fapi Nephites.

24 Me yibi buch u napʼan ni puw e chaʼ ni mʼon u butʼ ngalang, ma arame ruchuy e yaer nga gumʼirchaʼen fare pilung; me thig nge aw nga butʼ.

25 Ere fapi tapigpig ko fare pilung e ra miil gaed; ma fapi tapigpig ku Amalickiah e ra tolul gaed ni yaed be gaʼar:

26 Musap gaed, fapi tapigpig ko fare pilung e kar ruchuyed e yaer nga gumʼirchaʼen fare pilung, ke thig nga butʼ ma kar miil gaed; musap gaed, mired ngam guyed.

27 Me yibi buch ni Amalickiah e yoeg ko salthaw rokʼ ni nga ranoed ngar guyed ko mang e ke buch ko fare pilung; ma napʼan ni rabaed ra taw gaed ko re ginnʼem, mar pirʼeged fare pilung nib mol u butʼ nib thiy nga rachaʼen, ere Amalickiah e dake damomuw nag ir, me gaʼar: Chaʼ ni baʼadag fare pilung me yaen, nge tuluf nge koel fapi tapigpig rokʼ ni ngan liiʼraed ngar mʼaed.

28 Me yibi buch ni gubin e piʼin nib adag fare pilung, e napʼan ni rungʼaged e pi thin ney, marbaed ngar tulufed fapi tapigpig ko fare pilung.

29 Ere chiney e napʼan ni guy fapi tapigpig ko fare pilung ba ulung i salthaw ni kar lʼoelʼoeged raed, mar rus gaed bayay, mar miil gaed nga lan wuruʼ e binaw, marbaed nga lan fare binaw nu Zarahemla ngar peth gaed ko fapi gidiiʼ ku Ammon.

30 Ma fare ulung i salthaw ni ur tulufed raed e ra suloed, u tomuren ni kar lʼoelʼoeged raed nib almarin; ere aray rogon ni Amalickiah e liyeb nag nge mʼagaenʼ fapi gidiiʼ ngakʼ.

31 Me yibi buch ni yaeni rebo rran riy me yaen ni ir nge pi salthaw rokʼ nga lan fare binaw ku Nephi, ngar suweyed fare binaw.

32 Ere chiney e yibi buch ni faʼen leʼengin e pilung, e napʼan ni rungʼag ni fare pilung e kan liiʼ—ya ke lʼoeg Amalickiah e tamalʼog nge yaen ngakʼ faʼen leʼengin e pilung nge yoeg ngakʼ ni fare pilung e ke yimʼ ni pi tapigpig rokʼ e kar liiʼed, ma ke lʼoeg e salthaw rokʼ ngar tulufed raed, machane dar yog gaed, ere kar miil gaed—

33 Ere, napʼan ni thap e biney milwol ngakʼ faʼenʼ leʼengin e pilung me piiʼ e milwol nge yaen ngakʼ Amalickiah, ni baʼadag ni nga dabi liiʼ e gidiiʼ ko fare binaw; ma ku baʼadag ni nge yibi mʼug ngakʼ; ma ku baʼadag ni nge un e mich riy ngakʼ ni nge micheg rogon e yamʼ ni tay fare pilung.

34 Me yibi buch ni Amalickiah e fek fare tapigpig niʼir e liiʼ fare pilung, nge gubin e piʼin ni ur moyed rokʼ, ma ranoed ngakʼ faʼen leʼengin e pilung, ko gin nib paer riy u butʼ; ma yaed gubin nra micheged ni fare pilung e yimʼ ni fapi tapigpig rokʼ e ra liiʼed; ma kur gaʼar gaed: Kar miil gaed; gathi be micheg ni yaed e kar cham gaed? Ere aray rogon ni riyulʼ u waenʼ faʼen leʼengin e pilung rogon e yamʼ ni tay fare pilung.

35 Me yibi buch ni Amalickiah e gay rogon ni nge mʼagaenʼ faʼen leʼengin e pilung ngakʼ, me fek nge leʼengiy; ere aray rogon ni yaen u liyiben, ngo dakean e ayuw ko fapi tapigpig rokʼ, me lʼeag paʼ ko fare lung; arragon, min weliy nge nang e yoʼor niʼir e pilung u gaʼangin yang e nam, u fithikʼ gubin e pi gidiiʼ ko Lamanites, ni yaed ba chagil, ni fapi Lamanites nge fapi Lemuelites nge fapi Ishmaelites, nge gubin fa piʼin ni kar chuw gaed ko fapi Nephites, ko ngiyalʼ ni immoy Nephi ko lung iyib nga butʼ nge madaʼ ko ngiyalʼ ney.

36 Chiney e pichaʼaney ni kar chuw gaed ko fapi Nephites, e bay roraed e llowaenʼ nge morngaʼag ni boed ni bay ko fapi Nephites, arragon, ku yaed ba naʼab ko fare llowaenʼ ni morngaʼagen Somoel, machane, ka yigi reb rogon, ya denʼuw napʼan ni kar chuw gaed ma yug bagael e ʼelʼel u gumʼirchaʼ roraed ma darur kalgaed ngaenʼraed, mab gel e malboch roraed, nge kireb, nge galngach roraed boech rokʼ fapi Lamanites—ma kar yunʼuyed e chingnag ni woed yalen fapi Lamanites; ma kar pingeged e paʼan gameed, nge gubin mit e dirngal ni galong; arragon, kari mʼay u wunʼraed fare Somoel ni Got roraed.