Enospa Libron

1 Ajinataj karqa ñoqa, Enos, tatay cheqa runa kasqanta yacharqani, imaraykuchis parlaynimpi yachachiwarqa, jinallataj Señorpa kasuynimpi, yachaynimpiwan ima. Chayrayku Diospa sutin yupaychasqa kachun.

2 Willasqaykichistaj Diospa ñawpaqempi kallpachakusqaymanta, manaraj juchasniy pampachasqas kashajtinku.

3 Uyariychis, sach’as ukhuman k’ita animalesta wañuchej rerqani, tataypa parlasqasnintaj, mayqenkunatachus wiñay kawsaymanta, allin kawsajkunaj kusikuyninkumantawan yachachiswarqa, chaykuna sonqoy ukhuman yaykorqanku.

4 Espirituytaj yarqhachikorqa, Ruwajniypa ñawpaqempi qonqorikorqanitaj, payman sumajta qhaparerqanitaj, kikiypaj mañakuspa. P’unchaynintintaj payman qhaparerqani, arpi, tutayajtintaj jatunta qhaparerqaniraj janaj pachaman chayanankama.

5 Uj parlaytaj ñoqaman chayamuwarqa nispa: Enos, juchasniyki pampachasqas kanku, bendecisqataj kanki.

6 Ñoqataj, Enos, yacharqani Dios mana llullakuyta atisqanta, chayrayku manaña juchayojchu karqani.

7 Ñoqataj nerqani: ¿Señor, imaynatataj ruwakorqa kay?

8 Niwarqataj: Cristopi feniyoj kasqaykiraykuk, pitachus manaraj uyarinkichu, nitaj rikunkichu. Ashkha watasmantawantaj aychapi rikhurimonqa, chayrayku riy, feniykinejta salvakunki.

9 Jinataj chay parlasqanta uyarispaña, ñoqa munarqani hermanosniy, nefitas allin kanankuta, chayrayku paykunapaj tukuy kallpaywan Diosmanta mañaporqani.

10 Jinataj espiritupi mañakushajtiy, watejmanta Señorpa parlaynenqa yuyayniyman chayamuwarqa nispa: Hermanosniykita visitasaj kamachisqasniyta junt’asqankuman jina. Kay jallp’ata paykunaman qorqani, kay jallp’ataj llimphuchasqa. Juchallikusqankuraykullataj kay jallp’ata maldecisaj. Chayrayku hermanosniykita visitasaj nisqayman jina, juchasninkutataj kikin umasninkuman phutiywan kutichisaj.

11 Ñoqataj, Enos, chay parlasqanta uyariytawampacha Cristopi feniy mana kuyoj kayta qallarerqa. Ñoqataj mana samaspa paymanta mañakorqani, hermanosniypaj, pikunachus lamanitas kanku.

12 Jinataj mana samaspa Diosmanta mañakusqaytawan, llank’asqaytawantaj Señorqa niwarqa: Feniykirayku munayniykita ruwasaj.

13 Kunantaj kayta munarqani pay ruwanampaj. Ñoqaj llajtaychus, nefitas, juchaman urmankuman chayqa, imaynapis tukuchisqataj kankuman chayqa, lamanitastaj mana tukuchisqaschu llajtaymanta, nefitas, escribisqata. Ajinataj kanman makimpa kallpannejta, ichapis uj jamoj p’unchaypi lamanitasman apasqa kanman salvasqas kanankupaj.

14 Imaraykuchus kunan p’unchaypi llanqhalla karqanku ruwasqasniyku paykunata cheqa feman kutichinaykupaj. Paykunataj phiñakuspa juramentowan nerqanku atispaqa, escribisqasniykuta, ñoqaykutawan, tatasniykoj yachayninkutawan tukuchinkuman.

15 Chayrayku ñoqa Soñor Dios escribisqasniykuta waqaychayta atisqanta yachaspa, paymanta mañakuspalla karqani, imaraykuchis niwarqa: Imatachus feniyoj kaspa mañakunki, Cristoj sutimpi, jap’inaykita creespa, chayta jap’inkipuni.

16 Ñoqataj feniyoj karqani, Diosmanta mañakorqanitaj escribisqasta waqaychanampaj. Ñoqawan tratocharqataj cahykunala almanitasman rikhurichimunanta paypa tiempompi.

17 Ñoqataj, Enos, yacharqani tratochasqanman jina kananta. Chayrayku ñoqaj espirituy samarqa.

18 Señortaj ñoqaman niwarqa: Tatasniykipis kikillantataj mañakuwarqanku. Feninkuman jinataj paykunapaj ruwasqa kanqa, imaraykuchus feninku qampata jina karqa.

19 Jinataj ñoqa, Enos, Nefij llajtampi purerqani, sut’incharqanitaj imachus jamunanmanta. Willallarqanitaj imatachus uyarerqani, rikorqanitaj.

20 Willallanitaj Nefij llajtanqa mana samaspa lamanitasta Diospi cheqa feman kutichiyta ruwasqankuta. Chaywampis ruwasqasniyku llanqhalla karqanku. Paykuna chejniyninkumanta mana kuyorqankuchu, paykunaqa sajrallata ruwayta munarqanku, chayrayku animal jina, phiña, yawarmanta ch’akichiskojman tukorqanku, ch’ichi runas, lantista yupaychajkunataj. K’ita animalesta mikhorqanku; carpaspi tiyakorqanku; ch’in pampasnejpi puriykacharqanku qaramanta chumpillawan chumpiykuspa, chujchanku k’utusqa kaspataj q’ala kanankama. Yacharqankutaj arcowan, maqanakuna cosaswan, hachawantaj ruwayta. Ashkhas paykunamantataj chawa aychallata mikhorqanku. Ñoqaykutataj wañuchiyta munaspalla karqanku.

21 Jinataj Nefij llajtanqa jallp’api tarporqanku, tukuy imaymana granota, tukuy imaymana poqoytawan poqochispa. Tukuy imaymana uywasta, vacastawan, cabrastawan, k’ita cabrastawan, ashkha caballostawan ima uywarqanku.

22 Ñoqayku ukhupitaj ashkha profetas karqa. Llajtataj sinchi umayoj karqa, entiendeyta mana aterqachu.

23 Sinchista k’amiylla, maqanakusmanta, tratanakusmanta, tukuchisnasmantawan sut’inchay, yachachiytaj, jinataj wañuyta, wiñay tiempota, Diospa juiciosninmanta, atiyninmantawan mana samaspa yuyarichiy, arí, tukuy kaykuna — paykunaman sut’inta parlayllataj yuyarichispalla Señorta manchachikunankupaj. Arí kaykunalla paykunata usqhayta tukuchiyninkuman rinankumanta jark’ankuman. Kay jinatataj escribini paykunamanta.

24 P’unchayniykunapitaj rikorqani lamanitas, nefitaswan maqanakojta.

25 Jinataj viejoyarqani. Tatayku Lehi jerusalenmanta llojsisqanmanta, pachaj qanchis chunka isq’onniyoj watas pasarqankuña.

26 Yacharqanitaj usqhayta sepulturaman uraykunayta. Diospa atiyninrayku kay llajtaman yachachinay karqa, sut’inchanay karqataj, Cristopi cheqa kajman jinataj palabranta willanay karqa. Tukuy p’unchayniykunapitaj chayta willarqani, chaypitaj tukuy mundoj cosasninmanta astawanraj kusikorqani.

27 Pisi p’unchaymantawantaj ripuni samanay lugarman, mayqen lugarchus Kacharichejniywan kashan. Imaraykuchus yachani payllapi samanayta. Maytapuni kusikuni wañoj aychayqa mana wañojman tukunanmanta; paypa ñawpaqempi sayarisajtaj. Chaypacha paypa uyanta rikusaj kusikuywan, niwanqataj: Ñoqaman jamuy, qan bendecisqa kanki, qampaj wakichisqaña lugar tiyan Tataypa wasimpi. Amen.