1 Jiná kinsa chunka tawayojk, kinsa chunka phisqayoj watataj pasarqaña, Jesuspa ajllasqasnintaj tukuy chay llajtaj muyuynimpi Cristoj iglesianta wakicherqanku. Pikunachus paykunaman jamorqanku, pikunatajchus cheqamanta Diosman kutirikorqanku, paykunaqa Jesuspa sutimpi bautizasqas karqanku; jinataj Santo Espirituta jap’erqanku.

2 Jinataj kinsa chunka sojtayoj watapi tukuy runas Señorman kutirichisqas karqanku, tukuy jallp’a patapipis, nefitakuna lamanitakunapis, manataj maqanakuykunas, nitaj phiñanakuykunas paykuna ukhupi karqachu, sapa runataj cheqanta ruwarqa sapa ujwan.

3 Paykuna ukhupitaj tukuy imata igual kaporqanku; chayrayku mana qhapaj, jinataj mana pobrespis karqachu, manataj preso runas karqankuchu, astawanqa libre runas karqanku, chayraykutaj janaj pachaj t’inkanta tukuy jap’iyta aterqanku.

4 Jinataj kinsa chunka qanchisniyoj watapis pasarqa, sonqo tiyaytaj jallp’api kallarqapuni.

5 Jesuspa ajllasqasnintaj jatuchas milagrosta ruwarqanku, onqosqasta thañicherqanku, wañusqasta kawsaricherqanku, suchu runasta puricherqanku, ciego runasta qhawaricherqanku, llojt’u runasta uyaricherqanku; jinapis tukuy laya milagrosta runaspa wawasnin chawpipi ruwarqanku; jesuspa sutimpitaj milagrosta ruwarqanku.

6 Kay jinataj kinsa chunka pusajniyoj wata tukukorqa, jinallataj kinsa chunka isq’onniyoj wata, tawa chunka watataj, tawa chunka ujniyoj wata, tawa chunka iskayniyoj wata, arí, jinallapuni karqa tawa chunka isq’onniyoj watas pasajtin, jinallataj phishqa chunka ujniyoj wata, phishqa chunka iskayniyoj wata; arí, jinallataj karqa phishqa chunka isq’onniyoj wata pasanankama.

7 Señorqa paykunata jallp’api allinta yanaparqa; arí, jatun llajtasta ruwanankupaj, maypichus llajtas ninawan ruphasqas karqanku, chaypi.

8 Arí, jatun Zarahemla nisqa llajtatapis watejmanta llajtacharqanku.

9 Chaywampis ashkha llajtas karqa, mayqenkunachus chinkarichisqas karqanku, yakustaj p’amparqanku; chayrayku kay llajtasqa mana watejmanta ruwasqaschu karqanku.

10 Jinataj, Nefij llajtan kallpachasqa karqa, usqhaytataj mirarqa, ancha sumaj, k’acha llajtamantaj tukorqa.

11 Kasarakusqas, kasaraypi qosqastaj karqanku. Señor paykunaman nisqasninman jinataj bendecisqas karqanku.

12 Manañataj Moisespa leynimpa kamachisqasninman, llimphuchana ruwanasninman jinatajchu purerqanku; astawanqa Señor Diosninku paykunaman kamachisqasninman jina purerqanku, ayunaspa, Diosmanta mañakuspa, tantakuspataj Diosmanta mañakunankupaj, Señorpa nisqanta uyarinankupajtaj.

13 Jinataj, tukuy llajtantimpi, tukuy jallp’antimpi manaña tratanakuy karqachu; astawanqa jatun milagros ruwasqas karqanku Jesuspa yachachisqasnimpurapi.

14 Jinataj qanchis chunku ujniyoj wata tukukorqa, jinataj qanchis chunka iskayniyoj watapis, arí, jinalla qanchis chunka isq’onniyoj wata pasanankama; arí, pachaj watapis tukukorqaña, Jesuspa yachachisqasnintaj, pikunatachus pay ajllarqa, tukuyninku paraisoman ripusqankuña, chaywampis chay kinsa kajkuna, pikunachus quedakunanku karqa, paykunaqa quedakorqanku; waj yachachisqas paykunaj cuentankupi kamachisqas karqanku; jinapis ashkha runas chay miray kajkunamanta wañuporqankuña.

15 Manañataj phiñanakuy karqachu llajtantimpi, Diospa munakuynin runaspa sonqosninkupi kasqanrayku.

16 Manañataj munapayay, ni maqanakuykunas, ni ch’ajwaykunas, ni qhenchachakuykunas, ni llullakuykunas, ni wañuchiykunas, ni mayqen laya sajra ruwaykunas karqachu; cheqamantataj tukuy Diospa makinwan ruwasqanmanta mana aswan kusikuyniyoj llajta kanmanchu karqa.

17 Mana suwas karqachu, mana wañuchejkuna karqachu, manataj lamanitakuna karqachu, jinataj mana ni mayqen laya — itakuna karqachu; astawanqa ujlla karqanku, Cristoj wawasnin, Diospa reinon chayaqeyoj runas karqanku.

18 ¡May bendecisqataj karqanku! Señorqa tukuy ruwayninkupi paykunata bendicerqa; arí, bendecisqas, yanapasqastaj karqanku pachaj chunkayoj wata pasanankama, Cristomanta ñawpaj miraytaj pasarqaña; manataj phutikuy karqachu tukuy llajtantimpi.

19 Jinataj Nefi, pichus kay qhepa escribisqata waqaychaj (Nefij planchasnimpi escriberqataj) payqa wañuporqa, Amos sutiyoj wawantaj cuentampi waqaychaj karqa; paypis Nefij planchasnimpi escribillarqataj.

20 Payqq chay planchasta waqaycharqa pusaj chunka tawayoj wataspaj, sonqo tiyaytaj llajtapi kallarqapuni; runasmanta uj chhikallataj iglesiamanta t’aqakorqanku, sutikorqankutaj lamanitas; chayrayku watejmanta llajtapi lamanitakuna karqa.

21 Jinataj Amospis wañupullarqataj, (Cristoj jamusqanmanta pachaj isq’on chunka tawayoj wataña pasarqa). Paypa wawantaj, Amos sutikojllataj, cuentampi escribisqata waqaycharqa, paypis Nefij planchasnimpi escribillarqataj; Nefij librompi escribisqallataj karqa, mayqenchus kay libro.

22 Jinataj iskay pachaj wataña pasarqa; tukuy iskay kaj miraykunataj wañorqanku, pisillataj mana wañorqankuchu.

23 Kunantaj ñoqa, Mormon, willayta munaykichis runas mirasqankuta, llajtantinman junt’asqankuta, chayta yachanaykichista munayman, jiná ancha qhapajman tukorqanku, cristopi allin kasqankurayku, qhapajman tukusqankutapis yachanaykichista munayman.

24 Kunantaj kay iskay pachaj ujniyoj watapi paykunapurapi wakin orgullosos karqanku, qhapaj p’achaswan p’achallikuspa, tukuy imaymana kajkunata apaykachaspataj.

25 Chaymantapachataj kapuyninkunas, mikhunasninkuwan manaña igualtachu kaporqanku.

26 Qhapaj runas wajcha runasmanta t’aqakuyta qallarerqanku; iglesiastataj kikinkupaj, qhapajchakunankupaj ruwarqanku, Cristoj cheqa iglesiantataj negayta qallarerqanku.

27 Iskay pachaj chunkayoj wata pasajtinñataj ashkha iglesias llajtapi karqa; arí, ashkha Cristota rejsej tukoj iglesias karqa, chaywampis evangeliompa kuraj partenta negarqanku, tukuy imaymana sajra ruwanasta jap’inankupaj, sajra runasmantaj qosharqanku imastachus mana paykunapajchu, chaykunata, pikunamantajchus mana qosqachu kanan karqa mana llimphus kasqankurayku.

28 Kay iglesiataj, anchata mirarqa sajrata ruwasqanrayku, Satanaspa atiyninraykutaj, pichus sonqonkuta jap’erqa.

29 Mosojmanta jatarimullarqataj Cristota negaj iglesia; Cristoj cheqa iglesiantataj negarqa Cristopi creesqankurayku, chaykunaraykutaj paykunata qhatiykacharqanku; paykunapurapi milagros ruwasqas kasqankuraykutaj paykunata chejnerqanku.

30 Chayrayku Jesuspa ajllasqasninta, pikunachus paykunawan quedakorqanku, paykunata kamacherqanku carcelman churarqanku, Diospa atiyninwantaj, carcelkunata iskaypi parterqanku, paykunapurapitaj milagrosta ruwasp purerqanku.

31 Chaywampis, kay milagroswampis, runas sonqonkuta rumiyacherqanku, paykunata wañurachiyta munarqankutaj, nisqanman jina, imaynatachus Jerusalempi judiokuna Jesucristota wañurachiyta munarqanku, chay jinallataj karqa.

32 Nina hornomantaj paykunata wijch’orqanku, sanitullataj paykuna llojsimorqanku.

33 Sajra animalkunaj cuevanmantaj paykunata wijch’orqanku, sajra animalwantaj pujllarqanku, wawa ovejawan pujllan jinata; sanu kaspataj chawpinkumanta llojsimorqanku.

34 Chaywampis runas sonqonkuta rumiyacherqanku, imaraykuchus ashkha sacerdotes, llulla profetaswan paykunata ashkha iglesiasta ruwanankupaj pusarqanku, sajra ruwanasta ruwachillarqankutaj, Jesuspa llajtantataj maqarqanku, chaywampis Jesuspa llajtan mana kutichiskorqachu. Chay jinamantataj wataman watamanta mana creeypi, sajra ruwaykunapiwan urmarqanku, iskay pachaj kinsa chunkayoj wata pasanankama.

35 Jinataj kay watapi, arí, iskay pachaj kinsa chunka ujniyoj watapi, runaspurapi uj jatun t’aqakuy karqa.

36 Jinataj kay watapi nefitakuna sutichasqa runas jatarerqanku, paykunataj Cristopi cheqa creejkuna karqanku; paykunataj karqanku sutichasqas lamanitakunanejta — jacobitakuna, josefitakuna, zoramitakunataj.

37 Chayrayku Cristopi cheqa creejkuna, cristota cheqa yupaychajkunapis (paykuna chawpipitaj Jesuspa kinsa quedakunankupaj ajllasqasnin), paykunaqa nefitakuna, jacobitakuna, josefitakuna, zoramitakunataj sutichasqas karqanku.

38 Chay jinataj pikunachus evangeliota qhesacharqanku, paykunaqa lamanitakuna, lemuelitakuna, ismaelitakunataj sutichasqas karqanku; paykunataj mana creeypi mana urmarqankuchus, astawanqa munayninkuman jina Cristoj evangeliompa contrampi jatarerqanku; wawasninkutataj mana creenankupaj yachacherqanku qallariymantapacha mana creej tatasninku jina kanankupaj.

39 Jinataj tatasninkoj sajra ruwasqankurayku millay ruwasqankuraykutaj, qallariypi jinalla, Diospa wawasninta chejninankupaj yachachisqas karqanku, qallariymantapacha lamanitakuna Nefij wawasninta chejninankupaj yachachisqas karqanku.

40 Jinataj iskay pachaj tawa chunka tawayoj watas tukukorqanku, kay jinataj llajtaj ruwaynin karqa. Llajtaj aswan sajra kajninkuna kallpayojman tukorqanku, jinapis Diospa llajtanmanta aswan ashkha yapakorqanku.

41 Jinataj iglesiasta ruwarqankuraj, chaykunata k’achacharqanku tukuy imaymana valesqa goriswan. Chay jinamantataj iskay pachaj phishqa chunkayoj watas tukukorqanku, jinallataj iskay pachaj sojta chunkayoj watas tukukorqanku.

42 Jinataj llajtaj sajra kajninkuna Gadiantompa pakaypi jurayninkunata, pakaypi ruwayninkunatawan jatarichiyta qallarerqanku.

43 Nefij llajtan wajyasqa runastaj sonqonkupi orgulloso kayta qallarerqanku ashkha kapuyninkunarayku, jiná qhasi orgullosoman tukorqanku hermanosninku jinaman, pikunachus lamanitakuna karqanku.

44 Chay ratumantapachataj Jesucristoj ajllasqasnenqa mundoj juchasninmanta phutikuyta qallarerqanku.

45 Kinsa pachaj wata pasajtinñataj Nefij llajtampis, lamanitakunapis igualesman tukorqanku; ancha sajra runasman tukorqanku.

46 Jinataj, Gadiantompa suwasnin tukuy llajtantimpi purerqanku; Jesuspa ajllasqasnillantaj sumaj runas karqanku. Llajtataj ashkha qorita, qolqetawan tantarqa, tukuy laya negociospitaj purerqa.

47 Kinsa pachaj phishqayoj wata pasajtinñataj (runastaj sajra ruwayninkunapi karqanku), chaypacha Amos wañuporqa, hermanontaj, Ammaron sutiyoj, cuentampi escribisqasta waqaycharqa.

48 Kinsa pachaj iskay chunkayoj watas tukukojtinñataj Aamaron, Santo Espiritunejta pusachisqa karqa, santa escriturasta pakarqa, arí, tukuy miraymanta miraymana jaywasqa santa escriturasta Cristoj jamusqanmanta kinsa pachaj iskay chunkayoj watakama.

49 Payqa chaykunata Señorman pakarqa watejmanta Jacobqa wawasninmanta puchunman rikhurimunankupaj, Señorpa sut’inchayninkunaman jina. Kay jinata tukukun Ammarompa escribisqan.