Ŋwed Mormon

1 Ndien idahaemi eneni ikiduhe aba ke kpukpru isɔŋ Zarahemla, ke ufɔt kpukpru owo emi edidem Benjamin ekenyenede, ke ntre edidem Benjamin enyene emem aka iso ke ofuri nsuhɔ usen esie.

2 Ndien edikem ete enye ekenyene nditɔ iren ita; ndien enye okot enyiŋ mmɔ Mosiah, ye Helorum, ye Helaman. Ndien enye anam ete ekpep mmɔ ke kpukpru usem mme ete esie, man oto koro mmɔ ekeme ndidi mme owo emi enyenede ifiɔk; ŋko man mmɔ efiɔk kabaŋa mme prophecy emi eketiŋde ke inua mme ete mmɔ, emi ekeyakde enɔ mmɔ ke ubɔk Jehovah.

3 Ndien enye ŋko ekpep mmɔ kabaŋa mme ŋwed emi ekemiŋde ke mme usan brass, ɔdɔhɔ ete: Nditɔ mi iren, ami nyom nte mbufo eti ete ke ekpedi ikidihe ke ntak mme usan emi, emi edɔŋɔde mme ŋwed emi ye mme ibet emi, nnyin ikpibɔ ndutuhɔ ke unana ifiɔk, kpa ke ini emi, ikpidiɔŋɔke ndibe ŋkpɔ Abasi.

4 Koro ikidihe memem ete ete nnyin, Lehi, akpakande eti kpukpru mme ŋkpɔ emi, ndikpep mmɔ nnɔ nditɔ esie, ibɔhɔke ekedi ke uŋwam mme usan emi; koro ke ntak ekekpepde enye ke usem mme Egyptian ke ntre enye akan okot mme ŋkpɔ emi emiŋde emi, onyuŋ ekpep mmɔ ɔnɔ nditɔ esie, man oto koro mmɔ ekpep nditɔ mmɔ, ndien ke ntre mme ibet Abasi esu, tutu ɔsuhɔre esim ini emi.

5 Ami ndɔhɔ mbufo, nditɔ mi iren, ekpedi ikidihe ke ntak mme ŋkpɔ emi, emi ekekpemede enyuŋ etimde enim ke ubɔk Abasi, man nnyin ikot inyuŋ ifiɔk mme ndedibe ŋkpɔ esie, inyuŋ inyene mme ibet esie kpukpru ini ke iso nnyin, ete ke kpa mme ete nnyin ekpeketaha ke unana ndinim, ndien nnyin ikpitie nte nditɔ ete nnyin, mme Lamanite, emi mifiɔkke ŋkpɔ ndomo kiet ibaŋa mme ŋkpɔ emi, mme kpa emi mibuɔtke idem ke mmɔ ke ini ekpepde mmɔ mme ŋkpɔ emi, ke ntak ido mme ete mmɔ, emi midihe nnen nnen.

6 O nditɔ mi iren, ami nyom nte mbufo eti ete ke mme ŋkpɔ emi edi akpanikɔ, ndien ŋko ke mme ŋwed emi edi akpanikɔ. Ndien sese, ŋko mme usan ŋwed emi Nephi ekewetde, emi edɔŋɔde mme ŋwed ye mme ikɔ mme ete nnyin tɔŋɔde ke ini emi mmɔ ekekpɔŋde Jerusalem tutu esim idaha emi, ndien ke mmɔ edi akpanikɔ; ndien nnyin imikeme ndifiɔk akpanikɔ mmɔ ke ntak emi nnyin inyenede mmɔ ke iso nnyin.

7 Ndien idahaemi, nditɔ mi iren, ami nyom nte mbufo eti ndisin ifik eduŋɔde mmɔ, man mbufo enyene udori do; ndien ami nyom nte mbufo enim mme ibet Abasi, man mbufo eforo ke isɔŋ nte asaŋade ye mme eŋwɔŋɔ emi Jehovah akanamde ɔnɔ mme ete nnyin.

8 Ndien ediwak ŋkpɔ efen ke edidem Benjamin ekekpep nditɔ iren esie, emi owo miwetke ke ŋwed emi.

9 Ndien edikem ete ke ini edidem Benjamin ama eketre ndikpep nditɔ iren esie, ke enye ɔkɔri ɔsɔŋ, ndien enye okut ete ke ana isɔp ika usuŋ ofuri ererimbot; ke ntre, enye ama ekere ke ɔfɔn ete enye ayak ukara ɔnɔ eyen esie kiet.

10 Ke ntre, enye anam eda Mosiah edi ke iso esie; ndien emi edi mme ikɔ emi enye eketiŋde ɔnɔ enye, ete: Eyen mi, ami moyom nte afo ɔnɔ ntɔt ke ofuri isɔŋ emi ke ufɔt kpukpru owo emi, mme mbon Zarahemla, ye mbon Mosiah emi eduŋde ke isɔŋ, ete yak mmɔ eboho ɔtɔ kiet; koro mkpɔŋ ami nyɔnɔ ikɔt mi emi ntɔt ke inua mi nte ke afo edi edidem ye andikara mbon emi, emi Jehovah Abasi nnyin ɔnɔde nnyin.

11 Ndien ke ediande do, ami nyɔnɔ mbon emi enyiŋ, man oto do mmɔ enyene ukpuhɔhɔre ekan kpukpru mme owo emi Jehovah Abasi okosiode ke isɔŋ Jerusalem; ndien emi ami nnam ke ntak emi mmɔ ekesinde ifik ke ndinim mme ibet Jehovah.

12 Ndien ami nnɔ mmɔ enyiŋ emi edide tutu amama owo isɔhike isio, ibɔhɔke oto ke ndudue.

13 Iŋ, ndien ke ndidian do ami ndɔhɔ fi, nte ke edieke mbon emi emi Jehovah ɔdiɔŋde ata eti eti eduɔde eduk ke ndudue, enyuŋ ekabare edi idiɔk ye mbon esinde efube, nte ke Jehovah ayasana mmɔ ayak, man do mmɔ ekabare edi mmem mmem nte nditɔ eka mmɔ; ndien enye iditimke mmɔ aba inim ke anana mbiet ye utibe odudu esie, nte enye ekebemde iso etim mme ete nnyin enim.

14 Koro ami ndɔhɔ fi, nte ke edieke enye mikinyanakere ubɔk esie ke nditim mme ete nnyin nnim mmɔ ekpeduɔ eduk ke ubɔk mme Lamanite, enyuŋ edu ke idak mbon esuade mmɔ.

15 Ndien edikem ete ke ini edidem Benjamin ama eketre nditiŋ mme ikɔ emi nnɔ eyen esie, ete ke enye ama ɔnɔ enye uyo abaŋa kpukpru ŋkpɔ kabaŋa ukara.

16 Ndien ke ndidian do, enye ŋko ɔnɔ enye uyo kabaŋa mme ŋwed emi ekemiŋde ke mme usan brass; ye ŋko mme usan ŋwed emi Nephi ekewetde; ye ŋko, ofut Laban, ye nyori mme ada usuŋ, emi akadade mme ete nnyin usuŋ ebe ke wilderness, emi ekenamde ke ubɔk Jehovah man oto do eda mmɔ, owo kiet kiet nte asaŋade ye ntiŋ-enyin ye ifik emi mmɔ enɔde enye.

17 Ke ntak oro, ke nte mmɔ mibuɔtke idem mmɔ ikiforoke inyuŋ ikaha iso ke isaŋ mmɔ, edi ebin mmɔ enɔ edem edem, enyuŋ eda iyaresit Abasi enɔ idem mmɔ; ndien ke ntre emia mmɔ ye akaŋ ye mme idiɔk ukut, ndidemere mmɔ ke nditi utom mmɔ.

18 Ndien idahaemi, edikem ete Mosiah aka onyuŋ anam nte ete esie ɔnɔde enye uyo, onyuŋ ɔtɔt kpukpru mme owo emi ekedude ke isɔŋ Zarahemla man oto do mmɔ eboho idem mmɔ ɔtɔkiet, ndidɔk ŋka temple nkokop mme ikɔ emi ete esie editiŋde inɔ mmɔ.