1 Idahaemi edikem ete ke ini nditɔ iren Mosiah ema ekenam kpukpru ŋkpɔ emi, mmɔ eda ekpri ibat owo ye mmɔ enyuŋ enyɔŋ ebine ete mmɔ, edidem, enyuŋ eduak ete enye ayak mmɔ, ye mmɔ emi mmɔ esatde, edɔk eka isɔŋ Nephi man mmɔ ekwɔrɔ mme ŋkpɔ emi mmɔ ekekopde, ŋko man mmɔ ekwɔrɔ ikɔ Abasi enɔ nditɔ eka mmɔ, mme Lamanite—

2 Ete ke ndusuk ke mmɔ ekeme ndida mmɔ ndiifiɔk Jehovah Abasi mmɔ, enyuŋ enam mmɔ efiɔk ukwaŋ-ŋkpɔ mme ete mmɔ; ndien ete ke ndusuk ke mmɔ eyekɔk mmɔ ebaŋa usua mmɔ kabaŋa mme Nephite, man eda mmɔ ŋko edi daresit ke Jehovah Abasi mmɔ, man mmɔ ekabare edi ufan ye kiet eken, ndien man eneni okudu aba ke ofuri isɔŋ emi Jehovah Abasi mmɔ ɔkɔnɔde mmɔ.

3 Idahaemi mmɔ ema enyene udɔŋ ete yak ekwɔrɔ erinyaŋa enɔ kpukpru owo, koro mmɔ ikikemeke ndiyɔ ete ukpɔŋ owo ndomo kiet atak; iŋ, kpa mme idem ekikere ete ke ukpɔŋ ndomo kiet ana ɔyɔ anana utit ndutuhɔ ama anam mmɔ enyek enyuŋ enyek idem.

4 Ndien ke ntem ke Spirit Jehovah akanam mmɔ, koro mmɔ ekedi ata mme oburobut anam idiɔk ŋkpɔ. Ndien Jehovah okut ete ke ɔfɔn ke anana utit mbɔm esie ndisuhɔ mmɔ; edi mmɔ ema ebɔ ufen ediwak ye ndutuhɔ ke ukpɔŋ ke ntak mme ukwaŋ-ŋkpɔ mmɔ, ebɔde ufen ediwak enyuŋ efehe ndik ete ke eyebin mmɔ eduɔk ke nsinsi.

5 Ndien edikem ete mmɔ ema ekpe ete mmɔ ubɔk ke ediwak usen man mmɔ edɔk eka isɔŋ Nephi.

6 Ndien edidem Mosiah aka onyuŋ okobup Jehovah mme enye ayak nditɔ esie edɔk eka ke ufɔt mme Lamanite man ekwɔrɔ ikɔ.

7 Ndien Jehovah ɔdɔhɔ Mosiah ete: Yak mmɔ edɔk eka, koro ediwak eyebuɔt idem ke mme ikɔ mmɔ, ndien mmɔ eyenyene nsinsi uwem; ndien ami nyanam nditɔ fo ebɔhɔ ke ubɔk mme Lamanite.

8 Ndien edikem ete Mosiah ayak ete mmɔ eka enyuŋ enam nte asaŋade ye ebeŋe mmɔ.

9 Ndien mmɔ eda isaŋ mmɔ eduk ke wilderness ndidɔk ŋka ŋkɔkwɔrɔ ikɔ ke ufɔt mme Lamanite; ndien ami nyɔnɔ mbuk mbaŋa edinam mmɔ ke emi ama ebe.

10 Idahaemi edidem Mosiah ikinyeneke owo ndomo kiet ndinɔ ukara, koro nditɔ esie ndomo kiet ikiduhe emi edibɔde ukara.

11 Ke ntak oro enye emen mme ŋwed emi ekemiŋde ke mme usan brass, ŋko ye mme usan Nephi, ye kpukpru ŋkpɔ emi enye ekenimde onyuŋ etimde enim nte asaŋade ye mme ibet Abasi, ke ini enye ama okosio esin onyuŋ anam ewet mme ŋwed emi okodude ke mme usan gold emi ikɔt Limhi ekekutde, emi ekeyakde enɔ enye ke ubɔk Limhi;

12 Ndien emi enye akanam ke ntak akwa nyomonsia ikɔt esie; koro mmɔ ema enyene udɔŋ ebe se edomode ndifiɔk mbaŋa mme owo oro emi ekesobode.

13 Ndien idahaemi enye osio mmɔ esin oto ke itiat iba emi ekebɔde edian ke mben iba eke utigha.

14 Idahaemi ekenam mme ŋkpɔ emi tɔŋɔ ke eritɔŋɔ, ndien ekeyak mmɔ enɔ tɔŋɔ ke emana ye emana, ke ntak ndikabare mme usem;

15 Ndien ubɔk Jehovah ekekpeme onyuŋ etim mmɔ enim, man enye owut kpukpru owo emi edinyenede isɔŋ mme ukwaŋ-ŋkpɔ ye mme mbubiam ikɔt esie;

16 Ndien ekot owo ekededi emi enyenede mme ŋkpɔ emi okut ŋkukut, nte ke ini eset.

17 Idahaemi ke ini Mosiah ama okokure ndisioŋo mme ŋwed emi nsin, sese, enye ɔnɔ mbuk mbon emi ekesobode, tɔŋɔ ke ini emi ekesobode mmɔ afiak edem esim ini ekebɔpde akamba tower, ke ini emi Jehovah eketimerede usem mme owo ndien esuan mmɔ ke aŋwa ke ofuri iso ererimbot, iŋ, ndien kpa tɔŋɔ ke ini oro fiak edem tutu esim ini ekebotde Adam.

18 Idahaemi mbuk emi ama anam ikɔt Mosiah eseme ata eti eti, iŋ, mmɔ ekeyɔhɔ ye mfuhɔ; ɔnɔ mmɔ ediwak ifiɔk, ke emi mmɔ ema edaresit.

19 Ndien eyewet mbuk emi kemi ama ebe; koro sese, ɔfɔn ete yak kpukpru owo efiɔk mme ŋkpɔ emi ewetde ke mbuk emi.

20 Ndien idahaemi, nte ŋketiŋde nnɔ mbufo, nte ke ini edidem Mosiah ama akanam mme ŋkpɔ emi, enye ataŋ mme usan brass, ye kpukpru ŋkpɔ emi enye ekekpemede, onyuŋ ayak mmɔ ɔnɔ Alma, emi ekedide eyen Alma; iŋ, kpukpru ŋwed, ŋko ye mme akabare ikɔ, onyuŋ ayak mmɔ ɔnɔ enye, onyuŋ ɔnɔ enye uyo ete enye ekpeme onyuŋ etim mmɔ enim, ndien ŋko ewet ŋwed mme owo, ayak mmɔ ɔnɔ tɔŋɔ ke emana kiet sim efen, kpa nte ekeyakde mmɔ enɔ tɔŋɔ ke ini emi Lehi ɔkɔkpɔŋde Jerusalem.