1 Ami, Zeniff, ema ekekpep mi ke kpukpru usem mme Nephite, ndien nyuŋ nyenede ifiɔk mbaŋa isɔŋ Nephi, mme isɔŋ akpa inyene mme ete nnyin, ndien ke ema ekedɔŋ mi nte owo uyep ke otu mme Lamanite man ami nyep mbon ekɔŋ mmɔ, man mbon ekɔŋ nnyin ekpedi ŋwana ye mmɔ enyuŋ esobo mmɔ—edi ke ini emi ami nkokutde se ɔkɔfɔnde ke otu mmɔ ami mma nyene udɔŋ nte ekusobo mmɔ.

2 Ke ntak oro, ami nneni ye nditɔ eka mi ke ikɔt, koro ami nkoyom nte andikara nnyin anam ediomi ye mmɔ; edi koro enye ekedide owo nsɔŋ-ido ye owo afai ɔnɔ uyo ete ewot mi; edi enyaŋa mi eto ke ediduɔk ediwak iyip; koro ete aŋwana ye ete, ndien eyeneka ye eyeneka, tutu esobo akwa ibat mbon ekɔŋ nnyin ke ikɔt; ndien nnyin inyɔŋ idi, nnyin mbon emi ekesuhɔde, ika isɔŋ Zarahemla, nditiŋ mbuk emi nnɔ iban ye nditɔ nnyin.

3 Ndien edi, koro ami nkɔdɔrɔde itɔŋ ndida isɔŋ mme ete nnyin nyene, ntaŋ ediwak mmɔ emi ekenyenede udɔŋ ndidɔk nka nkenyene isɔŋ oro, ndien ifiak itɔŋɔ isaŋ nnyin ke ikɔt ndidɔk nka isɔŋ oro; edi ema emia nnyin ye akaŋ ye mme idiɔk ukut; koro nnyin mikisɔpke iti Jehovah Abasi nnyin.

4 Edi, ke ima ikiyo ke ikɔt ke ediwak usen nnyin iwuk mme tent nnyin ke ebiet emi ekewotde nditɔ eka nnyin, emi ekekperede isɔŋ mme ete nnyin.

5 Ndien edikem ete ami mfiak nka obio oro ye iren mi inaŋ, ibine edidem, man ami mfiɔk ekikere edidem, nko man ami mfiɔk mme ami mekeme ndiduk ye ikɔt mi nyuŋ nyene isɔŋ oro ke emem.

6 Ndien ami nduk mbine edidem, ndien enye anam ediomi ye ami ete ke ami mekeme ndinyene isɔŋ Lehi-Nephi, ye isɔŋ Shilom.

7 Ndien enye ŋko ɔnɔ uyo ete ikɔt esie ewɔrɔ ke isɔŋ oro, ndien ami ye ikɔt mi iduk ika ke isɔŋ oro man nnyin inyene enye.

8 Ndien nnyin itɔŋɔ ndibɔp mme ufɔk, ye ndidiɔŋ mme ibibene obio, iŋ, kpa mme ibibene obio Lehi-Nephi, ye obio Shilom.

9 Ndien nnyin itɔŋɔ nditibi isɔŋ, iŋ, kpa ye kpukpru mkpasip, ye mme mkpasip ibokpot, ye eke wheat, ye eke barley, ye eke neas, nko ye sheum, ye mkpasip kpukpru utɔ mfri; ndien nnyin itɔŋɔ nditɔt nyuŋ mforo ke isɔŋ.

10 Idahaemi ekedi abiaŋa ye ŋkari edidem Laman, ndida ikɔt mi nsin ke ufin, ke enye akayak isɔŋ oro man nnyin inyene enye.

11 Ke ntak oro edikem, ete ke ini nnyin ima ikiduŋ ke isɔŋ oro ke ufaŋ isua duopeba ete ke edidem Laman ɔtɔŋɔ ndinyomo nsia, man idito ke usuŋ ndomo kiet ikɔt mi ekɔri ke odudu ke isɔŋ oro, ndien ete mmɔ idikemeke ndikan mmɔ nyuŋ nda mmɔ nsin ke ufin.

12 Ndien mmɔ ekedi ifu ye mbon ndem; ke ntak oro mmɔ ema enyene udɔŋ ndida nnyin nsin ke ufin, man mmɔ edia eyuhɔ eto mme utom ubɔk nnyin; iŋ, man mmɔ edia usɔrɔ ke ufene iŋwaŋ nnyin.

13 Ke ntak oro edikem ete edidem Laman ɔtɔŋɔ ndidemere ikɔt esie man mmɔ eneni ye ikɔt mi; ke ntak oro mme ekɔŋ ye mme eneni etɔŋɔ ndidu ke isɔŋ oro.

14 Koro, ke ɔyɔhɔ isua ukara mi duopeta ke isɔŋ oro, ke usuk usuk isɔŋ Shilom, ke ini ikɔt mi ekenɔde ufene mmɔ mmɔŋ ye udia, enyuŋ etibide isɔŋ, akwa udim mme Lamanite ediŋwana ye mmɔ enyuŋ etɔŋɔ ndiwot mmɔ, enyuŋ emen ufene mmɔ esio, ye ibokpot eke iŋwaŋ mmɔ.

15 Iŋ, ndien edikem ete mmɔ efehe, kpukpru mbon emi mmɔ mikisimeke, tutu eduk ke obio Nephi, enyuŋ ekot mi eyom ukpeme.

16 Ndien edikem ete ami nnɔ mmɔ mme utigha, ye mme idaŋ, ye mme ofut, ye mme ikwa, ye mme eto, ye mme ikaŋ-ɔkpɔ, ye kpukpru utɔ ŋkpɔ-ekɔŋ emi nnyin ikikande inam, ndien ami ye ikɔt mi ima ika ndiŋwana ekɔŋ ye mme Lamanite.

17 Iŋ, ke odudu Jehovah ke nnyin ikika ndiŋwana ekɔŋ ye mme Lamanite; koro ami ye ikɔt mi ima iseme ke ɔkpɔsɔŋ inɔ Jehovah ite enye anam nnyin ibɔhɔ iwɔrɔ ke ubɔk mme asua nnyin, koro nnyin ima idemere iti ubɔhɔ mme ete nnyin.

18 Ndien Abasi ama okop mme eseme nnyin onyuŋ ɔbɔrɔ mme akam nnyin; ndien nnyin ima ika iso ke odudu esie; iŋ, nnyin ima ika ikiŋwana ye mme Lamanite, ndien ke usen kiet ye okoneyo kiet nnyin ima iwot tɔsin ita ye aba ye ita; nnyin ima iwot mmɔ tutu nnyin ibin mmɔ isio ke isɔŋ nnyin.

19 Ndien ami, ke idem mi, ye ke ubɔk mi, mma nwam ndibuk mme akpa mkpa mmɔ. Ndien sese, ke akwa mfuhɔ ye eseme nnyin, ema ewot nditɔ eka nnyin ikie iba ye ata ye duop ye usukkiet.