Benneg 39
Paltiing a naited ken ni James Covill babaen ni Joseph Smith a Propeta, iti Fayette, Nueva York, idi 5 ti Enero 1831 (History of the Church, 1:143–145). Nakitulag ni James Covill, a nagserbi a Bautista iti agarup nga uppat-a-pulo a tawen, iti Apo a tungpalenna ti ania man nga ibilin kenkuana ti Apo babaen ni Joseph a Propeta.
1–4, Adda bileg dagiti Santo nga agbalin nga annak ti Dios; 5–6, Ti yaawat iti ebanghelio yaawat ken ni Cristo; 7–14, Mabilin ni James Covill nga agpabuniag ken agtrabaho iti bangkag ti Apo; 15–21, Ikasaba dagiti katulongan ti Apo ti ebanghelio sakbay ti Maikadua a Yaay; 22–24, Maummongto dagiti umawat iti ebanghelio ita ken iti agnanayon.
1 Imdengan ken denggem ti timekna manipud iti agnanayon agingga iti agnanayon, ti Naindaklan a Siak, uray pay ni Jesucristo—
2 Ti silaw ken ti biag ti lubong; ti silaw nga agrimat iti kasipngetan ket saan a maawatan ti sipnget;
3 Kaarngi ti immay iti kangitingitan ti panawen dagiti bukodko, ket didak inawat dagiti bukodko;
4 Ngem kas iti kaadu ti immawat kaniak, inikkak iti bileg nga agbalin nga annakko; ket kas iti kaadu ti inikkak ti kaadu ti immawat kaniak, iti bileg nga agbalin nga annakko.
5 Ket pudno, pudno, kunak kenka, isu nga umawat iti ebangheliok awatennak; ket isu a di umawat iti ebangheliok dinak awaten.
6 Ket daytoy ti ebangheliok—panagbabawi ken panagbuniag babaen iti danum, kalpasanna umay ti panagbuniag iti apuy ken ti Espiritu Santo, nga isu ti Mangliwliwa, a mangipakita iti amin a banag, ken mangisuro kadagiti makapatalna a banag iti pagarian.
7 Ket ita, adtoy, kunak kenka, katulongak a James, kinitak dagiti aramidmo ket am-ammoka.
8 Ket pudno kunak kenka, a nalinteg ita ti pusom kaniak iti daytoy a kanito; ket, adtoy, insagutak ti ulom kadagiti naindaklan a bendision;
9 Nupay kasta, naimatangam ti nakaro a leddaang, ta sinupringnak iti namin-adu a daras gapu iti kinapalangguad ken panaggamgammo iti lubong.
10 Ngem, adtoy, dimtengen dagiti aldaw a pannakaisalakanmo, no dumngegka iti timekko, nga agkuna kenka: Bumangonka ket agpabuniagka, ket ugasam dagiti basolmo, umawagka iti naganko, ket maawatmonto ti Espirituk, ken ti bendision a naindaklan a dimo pay pulos naam-ammuan.
11 Ket no aramidem daytoy, insaganaka iti nain-indaklan nga aramid. Ikasabam ti pakabuklan ti ebangheliok, nga impatulodko kadagitoy maudi nga aldaw, ti katulagan nga impatulodko a mangtunton kadagiti taok, nga adda iti balay ti Israel.
12 Ket mapasamakto a maitedto kenka ti bileg; maaddaankanto iti napigsa a pammati, ket addaakto kenka ken mapanakto iti sangom.
13 Natudinganka nga agtrabaho iti bangkagko, ken mangbangon iti simbaanko, ken mangyeg iti Zion, ket agrag-onto kadagiti turod ken rumang-ay.
14 Adtoy, pudno, pudno, kunak kenka, saanka a natudingan a mapan kadagiti pagilian iti dumaya, ngem natudinganka a mapan iti Ohio.
15 Ket no la ket ummongento dagiti taok ti bagbagida iti Ohio, nangisaganaak iti bendision a di ammo dagiti annak ti tattao, ket maibukbokto kadagiti uloda. Ket manipud dita mapanto dagiti tao iti amin a pagilian.
16 Adtoy, pudno, pudno, kunak kenka, nga inawagandak dagiti tao iti Ohio a napnuan pammati, a pampanunotenda a yetnagkonto ti panangukomko kadagiti pagilian, ngem diak matallikudan ti balikasko.
17 Gapuna rugianyo ti agtrabaho iti kabaelanyo ken ayabanyo dagiti napudno nga agtrabaho iti bangkagko, tapno magaikan iti maudi a gundaway.
18 Ket no la ket agbabawi ken awatenda ti pakabuklan ti ebangheliok, ket mapasantoda, pengdakto ti imak a mangukom.
19 Gapuna, mapanka, a mangyararaw iti napigsa a timek, nga agkuna: Asidegen ti pagarian ti langit; a mangyararaw: Hosanna! madaydayaw ti nagan ti Kangatuan a Dios.
20 Mapanka a mamuniag iti danum, a mangisagana iti dalan iti sangok para iti panawen a yaayko;
21 Ta asidegen ti panawen; saan nga ammo ti tao ti aldaw wenno oras; ngem awan duadua nga umay.
22 Ket isu a mangawat kadagitoy a banag awatennak; ket maummongdanto kaniak ita ken iti agnanayon.
23 Ket manen, mapasamakto a kas iti kaadu ti buniagam iti danum, ipataymonto dagiti dakulapmo, ket awatendanto ti sagut ti Espiritu Santo, ket ur-urayendanto dagiti tanda ti yaayko, ken ammodakto.
24 Adtoy, umayak a di agtantan. Pudno a kasta. Amen.