ປຈສ, ອົບພະຍົບ 4:21. ປຽບທຽບໃສ່ກັບ ອົບພະຍົບ 4:21; 7:3, 13; 9:12; 10:1, 20, 27; 11:10; 14:4, 8, 17; ພຣະບັນຍັດສອງ 2:30
ພຣະຜູ້ເປັນເຈົ້າບໍ່ຮັບຜິດຊອບສຳລັບໃຈທີ່ແຂງກະດ້າງຂອງຟາຣາໂອ. ເບິ່ງ ປຈສ, ອົບພະຍົບ 7:3, 13; 9:12; 10:1, 20, 27; 11:10; 14:4, 8, 17 ນຳອີກ; ຂໍ້ອ້າງອີງແຕ່ລະຂໍ້, ເມື່ອແປຢ່າງຖືກຕ້ອງ, ສະແດງໃຫ້ເຫັນວ່າ ຟາຣາໂອເອງໄດ້ເຮັດໃຈແຂງກະດ້າງ.
21 ແລະ ພຣະຜູ້ເປັນເຈົ້າໄດ້ກ່າວກັບໂມເຊວ່າ ເມື່ອເຈົ້າກັບໄປປະເທດເອຢິບ, ຈົ່ງເບິ່ງວ່າເຈົ້າເຮັດການມະຫັດສະຈັນທັງປວງຢູ່ຕໍ່ໜ້າຟາຣາໂອ, ຊຶ່ງເຮົາໄດ້ວາງໄວ້ໃນມືຂອງເຈົ້າ, ແລະ ເຮົາຈະເຮັດໃຫ້ເຈົ້າຮຸ່ງເຮືອງ; ແຕ່ຟາຣາໂອຈະເຮັດໃຈແຂງກະດ້າງ, ແລະ ລາວຈະບໍ່ປ່ອຍໃຫ້ຜູ້ຄົນໄປ.
ປຈສ, ອົບພະຍົບ 4:24–27. ປຽບທຽບ ໃສ່ກັບ ອົບພະຍົບ 4:24–27
ເມື່ອພຣະຜູ້ເປັນເຈົ້າຂູ່ວ່າ ຈະຂ້າໂມເຊ ເພາະເພິ່ນບໍ່ໄດ້ເຮັດພິທີຕັດໃຫ້ລູກຊາຍຂອງເພິ່ນ, ນາງສິບໂປຣາ ເມຍຂອງເພິ່ນ ໄດ້ເຮັດພິທີຕັດແທນເພິ່ນ. ໂມໄຊສາລະພາບບາບຂອງເພິ່ນ.
24 ແລະ ເຫດການໄດ້ບັງເກີດຂຶ້ນ, ຄືພຣະຜູ້ເປັນເຈົ້າໄດ້ປະກົດຕໍ່ເພິ່ນ ໃນບ່ອນພັກແຮມ ໃນລະຫວ່າງການເດີນທາງ. ພຣະຜູ້ເປັນເຈົ້າໄດ້ພຣະພິໂລດໃຫ້ໂມເຊ, ແລະ ໄດ້ໝາຍທີ່ຈະຂ້າເພິ່ນ; ເພາະເພິ່ນບໍ່ໄດ້ເຮັດພິທີຕັດໃຫ້ລູກຊາຍຂອງເພິ່ນ.
25 ແລ້ວສິບໂປຣາ ໄດ້ຈັບເອົາຫີນຄົມ ແລະ ເຮັດພິທີຕັດ ໃຫ້ລູກຊາຍຂອງຕົນ, ແລະ ໄດ້ເອົາກ້ອນຫີນ ໄປແປະໄວ້ໃກ້ຕີນຂອງເພິ່ນ, ແລະ ໄດ້ເວົ້າວ່າ, ເຈົ້າແມ່ນ ຜົວທີ່ຂ້ອຍໄດ້ມາດ້ວຍເລືອດແທ້ໆ.
26 ແລະ ພຣະຜູ້ເປັນເຈົ້າໄດ້ໄວ້ຊີວິດຂອງໂມເຊ ແລະ ປ່ອຍເພິ່ນໄປ, ຍ້ອນສິບໂປຣາ, ເມຍຂອງເພິ່ນ, ໄດ້ເຮັດພິທີຕັດໃຫ້ລູກຊາຍ. ແລະ ນາງໄດ້ເວົ້າວ່າ, ເຈົ້າແມ່ນຜົວທີ່ຂ້ອຍໄດ້ມາດ້ວຍເລືອດ. ແລະ ໂມເຊໄດ້ອັບອາຍ, ແລະ ໄດ້ຫລົບໜ້າຈາກພຣະຜູ້ເປັນເຈົ້າ, ແລະ ໄດ້ກ່າວວ່າ, ຂ້ານ້ອຍໄດ້ເຮັດບາບຢູ່ຕໍ່ພຣະພັກຂອງພຣະຜູ້ເປັນເຈົ້າ.
27 ແລະ ພຣະຜູ້ເປັນເຈົ້າໄດ້ກ່າວກັບອາໂຣນວ່າ, ຈົ່ງອອກໄປພົບໂມເຊທີ່ຖິ່ນແຫ້ງແລ້ງກັນດານ, ແລະ ເພິ່ນໄດ້ໄປພົບເພິ່ນ, ທີ່ພູເຂົາຂອງພຣະເຈົ້າ; ບ່ອນທີ່ພຣະເຈົ້າໄດ້ປະກົດຕໍ່ເພິ່ນ; ແລະ ອາໂຣນ ໄດ້ກອດຈູບເພິ່ນ.