ປຈສ, ເພງສັນລະເສີນ 14:1–7. ປຽບທຽບໃສ່ກັບ ເພງສັນລະເສີນ 14:1–7
ຜູ້ຂຽນເພງສັນລະເສີນເຫັນຄວາມຈິງທີ່ສູນເສຍໄປໃນຍຸກສຸດທ້າຍ ແລະ ຄອງຄອຍການສ້າງຕັ້ງຂອງຊີໂອນ.
1 ຄົນໂງ່ກ່າວໃນໃຈຂອງເຂົາວ່າ ບໍ່ມີມະນຸດຄົນໃດໄດ້ເຫັນພຣະເຈົ້າ. ເພາະພຣະອົງບໍ່ສະແດງຕົນເອງຕໍ່ເຮົາ, ສະນັ້ນຈຶ່ງບໍ່ມີພຣະເຈົ້າ. ຈົ່ງເບິ່ງ, ພວກເຂົາເສື່ອມຊາມ; ພວກເຂົາໄດ້ເຮັດວຽກງານທີ່ໜ້າກຽດຊັງ, ແລະ ບໍ່ມີຄົນໃດໃນພວກເຂົາທີ່ເຮັດສິ່ງດີ.
2 ເພາະພຣະຜູ້ເປັນເຈົ້າໄດ້ຫລຽວລົງມາຈາກສະຫວັນເບິ່ງລູກຫລານມະນຸດ, ແລະ ໂດຍສຸລະສຽງຂອງພຣະອົງ, ພຣະອົງໄດ້ກ່າວກັບຜູ້ຮັບໃຊ້ຂອງພຣະອົງວ່າ ເຈົ້າຈົ່ງຊອກຫາໃນບັນດາລູກຫລານມະນຸດ ວ່າມີຄົນໃດແດ່ທີ່ເຂົ້າໃຈພຣະເຈົ້າ. ແລະ ລາວໄດ້ເປີດປາກກ່າວກັບພຣະຜູ້ເປັນເຈົ້າວ່າ, ຈົ່ງເບິ່ງ, ຄົນທັງປວງເຫລົ່ານີ້ ກ່າວວ່າພວກເຂົາເປັນຂອງພຣະອົງ.
3 ພຣະຜູ້ເປັນເຈົ້າໄດ້ຕອບ, ແລະ ກ່າວວ່າ, ພວກເຂົາທັງໝົດໄດ້ຫລົງທາງໄປແລ້ວ, ພວກເຂົາໄດ້ພາກັນເປັນຄົນສົກກະປົກ, ເຈົ້າບໍ່ສາມາດຫລຽວເຫັນຄົນໃດໃນບັນດາພວກເຂົາທີ່ເຮັດຄວາມດີ, ບໍ່ເລີຍ, ບໍ່ມີແມ່ນແຕ່ຈັກຄົນ.
4 ທັງໝົດທີ່ພວກເຂົາມີເພື່ອເປັນຄູສອນຂອງພວກເຂົາແມ່ນຜູ້ທີ່ເຮັດຄວາມຊົ່ວຮ້າຍ, ແລະ ຄູສອນຂອງພວກເຂົາບໍ່ມີຄວາມຮູ້. ພວກເຂົາເປັນຄົນທີ່ລ້າງຜານຜູ້ຄົນຂອງເຮົາ. ພວກເຂົາກິນອາຫານ ແລະ ບໍ່ເຄີຍອະທິຖານຫາພຣະຜູ້ເປັນເຈົ້າຈັກເທື່ອ.
5 ພວກເຂົາຢູ່ໃນຄວາມຢ້ານກົວຢ່າງໃຫຍ່ຫລວງ, ເພາະພຣະເຈົ້າປະທັບຢູ່ໃນລຸ້ນຄົນທີ່ຊອບທຳ. ພຣະອົງເປັນຜູ້ປຶກສາຂອງຄົນຍາກຈົນ, ເພາະພວກເຂົາອັບອາຍເນື່ອງດ້ວຍຄົນຊົ່ວ, ແລະ ໜີມາຫາພຣະຜູ້ເປັນເຈົ້າ, ເພື່ອເປັນບ່ອນຫລົບໄພຂອງພວກເຂົາ.
6 ພວກເຂົາອັບອາຍໃນຄຳປຶກສາຂອງຄົນຍາກຈົນ ເພາະພຣະຜູ້ເປັນເຈົ້າເປັນບ່ອນຫລົບໄພຂອງພວກເຂົາ.
7 ໂອ້ ເພື່ອວ່າຊີໂອນຈະຖືກສ້າງຕັ້ງຂຶ້ນຈາກສະຫວັນ, ຄວາມລອດຂອງອິດສະຣາເອນ. ໂອ້ ພຣະຜູ້ເປັນເຈົ້າ, ເມື່ອໃດພຣະອົງຈະສ້າງຕັ້ງຊີໂອນຂຶ້ນ? ເມື່ອພຣະຜູ້ເປັນເຈົ້ານຳການເປັນຊະເລີຍຂອງຜູ້ຄົນຂອງພຣະອົງກັບຄືນມາ, ຢາໂຄບຈະປິຕິຍິນດີ, ອິດສະຣາເອນຈະຍິນດີ.