Ko te Pukapuka a Mohi

1. Ko nga kupu a te Atua, i korerotia atu e ia ki a Mohi i te wa i a Mohi i kahakina ake ki runga ki tetahi maunga tiketike rawa,

2. A kite ana ia i te Atua, he kanohi, he kanohi, a korero ana ki a ia, a ko te kororia o te Atua i runga i a Mohi; no reira i ahei ai i a Mohi te tu i tana aroaro.

3. A ka korero atu te Atua ki a Mohi, ka mea: Nana, ko ahau te Ariki, te Atua Kaha Rawa; a ko te Mutunga-kore toku ingoa, no te mea kahore he timatanga o oku ra, he mutunga ranei o oku tau; e hara ianei tenei i te mutunga-kore ?

4. A, nana, ko koe taku tama; no reira, titiro, maku e whakaatu ki a koe nga mahinga a oku ake ringaringa; engari, kahore te katoa, no te mea kahore he mutunga o aku mahi, a kahore ano hoki taku kupu, e kore ano hoki era e mutu.

5. No reira, kahore he tangata e kaha te kite i aku mahi katoa, ki te kore ia e kite i toku kororia katoa, a kahore hoki he tangata e kaha te kite i toku kororia katoa, me te noho tonu i muri iho i roto i te kikokiko i runga i te whenua.

6. A he mahi taku mau, e Mohi, e taku tama; a, ko koe i roto i te ahua o taku Tama Kotahi; a ko taku Tama Kotahi, ko ia te Kai-whakaora, no te mea ki tonu ia i te aroha noa me te pono; engari kahore ke atu he Atua ke atu i ko atu i a au, a ko nga mea katoa kei a au, no te mea e mohio ana ahau ki nga mea katoa.

7. No reira, nana, ko tenei mea kotahi, taku e whakaatu ki a koe, e Mohi, e taku tama; no te mea kei roto koe i te ao, a maku e whakaatu ki a koe.

8. Nawai a ka titiro a Mohi, a ka kite i te ao i hanga nei ia ki runga; a ka kite a Mohi i te ao me tona mutunga, me nga tamariki katoa a nga tangata kua oti te hanga; na ka ohorere ia me te whakamiharo ki taua mea.

9. Na, ka tangohia to te Atua ahua i a Mohi, a kua kahore tona kororia ki runga i a Mohi; a mahue ake a Mohi, ko ia anake. Ano ka mahue a Mohi ko ia anake, ka hinga ia ki te whenua.

10. Nawai a ka pahemo atu etahi haora maha, i mua i te whiwhinga o Mohi ki te kaha e rite ana ki to te tangata; a ka mea ia ki a ia ano: Na, mo tenei ka mohio ahau he kahore noa iho te tangata, a he mea hoki tera kihai i mohiotia e ahau.

11. Engari kua kite oku ake kanohi i te Atua, haunga ra oku kanohi maori, engari oku kanohi wairua, no te mea e kore e ahei i nga kanohi maori te titiro atu; no te mea kua memenge ahau a kua mate i tona aroaro; heoi i runga i a au tona kororia; a ka kite ahau i tona mata, no te mea i whakaputaina ketia ahau i mua i a ia.

12. Nawai a, i a Mohi e korero ana i enei kupu ka puta mai a Hatana ki te whakamatautau i a ia, ka mea: E Mohi, e te tama a te tangata, koropiko ki a au.

13. Nawai a, i a Mohi e titiro atu ana ki a Hatana, ka mea: Ko wai koe ? No te mea, nana, ko ahau he tama a te Atua, i roto i te ahua o tana Tama Kotahi; a kei hea tou kororia, e koropiko ai ahau ki a koe ?

14. No te mea, nana, Kahore e ahei i a au te titiro ki te Atua ki te kahore tona kororia i runga i a au, whakakahangia ana ahau i mua i a ia. Heoi e kaha ana ahau ki te titiro atu ki a koe i roto i te tinana maori. Kahore ianei i te pena ?

15. Kia whakapaingia te ingoa a toku Atua, no te mea ko tona Wairua kahore ano kia hemo katoa atu i a au, ara, kei hea ranei tou kororia, no te mea e pouri ana ki a au ? A e ahei ana i a au te whiriwhiri i waenganui i a koe me te Atua no te mea i mea te Atua ki a au: Koropiko ki te Atua, no te mea ko ia anake tau e mahi ai.

16. Tu atu, e Hatana; aua e maminga i a au; no te mea kua korero te Atua ki a au: Ko koe e rite ana ki taku Tama Kotahi.

17. A, i homai ano hoki e ia nga whakahaunga ki a au, i tana karangatanga i roto i te rakau wera, i mea ai: Karanga ake ki te Atua i roto i te ingoa o taku Tama Kotahi, a koropiko mai ki a au.

18. A ka mea ano a Mohi: E kore rawa e mutu taku karanga ake ki te Atua, tera ano etahi mea hei uinga atu maku ki a ia: no te mea i runga i a au tona kororia, no reira i ahei i a au te whiriwhiri i waenganui i a ia, i a koe. Tu atu, e Hatana.

19. Na, i ta Mohi korerotanga i enei kupu, he rahi te reo o Hatana ki te hamama, a ngahae ana i runga i te whenua, a whakahau ana, me te mea: Ko ahau te Tama Kotahi, koropiko ki a au.

20. Nawai a ka timata te wehi nui o Mohi; no ka timata ia te wehi ka kite ia i te ao kawa o te reinga. Ahakoa ra i te karangatanga ake ki te Atua, ka whiwhi ia ki te kaha, a ka whakahau ia ka mea: Haere atu i a au e Hatana, no te mea ko tenei Atua kotahi anake taku e koropiko ai, ara ko te Atua o te kororia.

21. A i konei ka timata a Hatana te wiri, ru ana te whenua; a ka whiwhi a Mohi ki te kaha, ka karanga ake ki te Atua, ka mea: I runga i te ingoa o te Tama Kotahi, haere atu e Hatana.

22. Nawai a, ka hamama ano a Hatana, he nui te reo, me te tangi, me te aue, me te tetea o nga niho; a haere atu ana ia, ae ra i te aroaro o Mohi, a kihai ia i kite i a ia.

23. Na, mo tenei mea i whakaatu a Mohi; otira no te kino, i kore ai tera i waenganui i nga tamariki a nga tangata.

24. Nawai a, i te mea kua haere atu a Hatana i te aroaro o Mohi, katahi ka ara ake nga kanohi o Mohi ki te rangi, e ki ana ano i te Wairua Tapu, te kai whakaatu o te Matua raua ko te Tama.

25. A ka karanga ake ki te ingoa o te Atua, ka kite ano ia i tona kororia, no te mea kei runga tera i a ia; a ka rongo ia i tetahi reo e mea ana: Ka koa koe e Mohi, no te mea ko ahau te Kaha Rawa kua whiriwhiri i a koe, a ka meinga koe kia kaha atu i nga wai maha; no te mea ka rongo era i tau whakahau ano ko koe te Atua.

26. Nana, kei a koe ahau, taea noatia te mutunga o ou ra; no te mea mau e whakaputa mai toku iwi i te ponongatanga, ae ra, Iharaira taku i whiriwhiri ai.

27. Nawai a, i te mea e korero tonu ana te reo, ka tirotiro nga kanohi o Mohi, a ka kite ia i te whenua, ae ra i te katoa; a kahore rawa tetahi i kore ia i kite, e kite ana he mea na te Wairua o te Atua.

28. A i kite ano hoki ia i nga tangata o reira, a kahore rawa he tangata i kore ia i kite; a i kite ia i a ratou he mea na te Wairua o te Atua; a to ratou tokomaha he nui, ae ra, tona tini ano ko te onepu o te tahatai.

29. A ka kite ia he maha nga whenua; a ko ia whenua e karangatia ana he ao, a e nohoia ana ano to reira mata e te tangata.

30. Nawai a, ka karanga ake a Mohi ki te Atua, ka mea: Na ko taku inoi ki a koe, korerotia mai ki a au, hei aha i penei ai enei mea, a na te aha i hanga ai e koe ?

31. A nana, kei runga te kororia a te Ariki i a Mohi, no reira i tu ai a Mohi i te aroaro o te Atua, a ka korero ki a ia he kanohi, he kanohi. A ka mea atu te Ariki, te Atua ki a Mohi: Mo taku ake whakaaro i hanga ai enei mea. Anei te matauranga, a e noho tonu ana i roto i a au.

32. A he mea na te kupu o toku kaha, i hanga ai ahau i enei, ara ko ia ra taku Tama Kotahi, e ki ana i te aroha noa me te pono.

33. Kahore nei he mutunga o nga ao i hanga e ahau, a he mea hanga era mo taku ake whakaaro; a he mea hanga hoki na taku Tama, ko ia nei taku Tama Kotahi.

34. A ko te tangata tuatahi o nga tangata katoa kua karangatia e ahau, ko Arama, tona tikanga he tokomaha.

35. Engari mo te taha anake ki tenei whenua me o reira tangata, e hoatu ai e ahau ki a koe. No te mea, nana, he maha noa atu nga ao kua pahemo atu, he mea na te kupu o toku kaha. A he maha ano enei e tu nei, a kahore era e taea ana te tatau e te tangata; otira ko nga mea katoa e tatauria ana e ahau, no te mea naku era, a e mohio ana ahau ki era.

36. Nawai a, ka korero atu ano a Mohi ki te Ariki, ka mea: Kia tohu i tau pononga e te Atua, a korerotia mai ki a au mo te taha ki tenei whenua me o reira tangata, me nga rangi ano hoki, a ko reira tatu ai tau pononga.

37. A ka korero atu te Ariki, te Atua ki a Mohi, ka mea: Ko nga rangi he maha, a e kore e taea era te tatau ki te tangata; engari ka tatauria e ahau, naku hoki era.

38. A i te mea ka pahemo tetahi whenua me nga rangi o reira, ka pera ano te putanga mai o tetahi atu; a kahore he mutunga o aku mahi, o aku kupu ranei.

39. No te mea, nana, ko tenei taku mahi me toku kororia—ara, te whakaputa mai i te mate-kore me te oranga-tonutanga o nga tangata.

40. Na, e Mohi, e taku tama, ka korero atu ahau ki a koe mo te taha ki tenei whenua e tu na koe ki runga; a me tuhituhi e koe nga mea e korero ai ahau.

41. A i te rangi e mea ai nga tamariki a nga tangata, e hara noa iho aku kupu, a ka tangohia atu e ratou he maha o era i roto i te pukapuka i tuhituhia ai e koe, nana, maku e whakaara ake tetahi hei rite ki a koe, a ka whakahokia mai ano aua kupu ki waenganui i nga tamariki a nga tangata—i waenganui i nga mea tera e whakapono.

42. Ko nga kupu enei i korerotia ki a Mohi i runga i te maunga, ko tona ingoa e kore e mohiotia i waenganui i nga tamariki a nga tangata. Na, e korerotia ana era ki a koe. Aua enei e whakaaturia ki etahi, engari ki te hunga anake e whakapono ana. Ae ra, koia ano. Amine.