1. Nawai a, ka korero atu te Ariki ki a Mohi, ka mea: Nana, ka whakakitea atu e ahau ki a koe mo te taha ki tenei Rangi me tenei Whenua; tuhituhia nga kupu e korero ai ahau. Ko ahau te timatanga me te whakamutunga, te Atua Kaha Rawa; he mea na taku Tama Kotahi i hanga ai enei e ahau; ae, i te timatanga i hanga ai e ahau te rangi me te whenua e tu na koe i runga.

2. A kahore he ahua o te whenua, i te takoto kau; a ka meinga e ahau te pouritanga kia puta mai ki runga ki te mata o te hohonu; a ka whakapaho toku Wairua i runga i te kare o nga wai; no te mea, ko ahau te Atua.

3. A, ka mea ahau, te Atua: Kia marama; na ka marama.

4. A, ka kite ahau, te Atua i te maramatanga, a he pai te maramatanga. A ka wehewehe ahau, te Atua i te marama, i te pouritanga.

5. A ka huaina e ahau, e te Atua te marama he Awatea; a ko te pouritanga i huaina e ahau he Po; a i meinga tenei e ahau he mea na taku kupu a toku kaha, a oti ana tenei i a au e korero ana; a ko te ahiahi raua ko te ata te ra tuatahi.

6. A ka mea ano ahau, te Atua: Kia whai kikorangi a waenganui o nga wai, a pera ana, ae ra i a au e korero ana; a ka mea ano ahau: A, kia wehea e tera a waenganui o nga wai; a ka oti;

7. A hanga ana e ahau, e te Atua, te kikorangi me te wehewehe i nga wai, ae ra, i nga wai nunui i raro i te kikorangi, i nga wai i runga ake i te kikorangi, a meinga ana tera rite tonu ki taku i mea ai.

8. A ka huaina e ahau, e te Atua, te kikorangi he Rangi; a ko te ahiahi raua ko te ata te ra tuarua.

9. A ka mea ahau, te Atua: Meinga te wai i raro i te rangi kia huihui ki te wahi kotahi, a pera ana; a ka mea ahau, te Atua: Meinga kia puta ake te whenua maroke; a pera ana.

10. A ka huaina e ahau, e te Atua te whenua maroke he Whenua; a ko te huihuinga o nga wai i huaina e ahau he Moana; a ka kite ahau te Atua i nga mea katoa i hanga e ahau, he pai.

11. A ka mea ahau te Atua: Kia pihi ake te taru hou i te whenua, te otaota whai purapura, me te rakau hua, e hua ana ona hua, he mea rite tonu ki a ia, kei roto nei i a ia ona purapura, i runga i te whenua, a pera ana ki taku i korero ai.

12. Na, ka whakaputaina ake te taru hou e te whenua, te otaota hoki e hua ana ona, he mea rite tonu ki a ia, me te rakau whai hua, kei roto nei i a ia ona purapura, he mea rite tonu ki a ia; a ka kite ahau, te Atua i nga mea katoa kua hanga e ahau, e pai ana;

13. A ko te ahiahi raua ko te ata te ra tuatoru.

14. Na, ka mea ahau te Atua: Kia whai mea whakamarama te kiko o te rangi, hei wehe i te awatea, i te po; a hei tohu ano aua mea, hei taima, hei ra, hei tau;

15. A hei whakamarama aua mea i te kiko o te rangi, hei whakamarama mo te whenua; a ka oti.

16. Na, ka hanga e ahau, e te Atua nga whakamarama nui e rua; ko te maramatanga nui hei tohutohu i te awatea, a ko te maramatanga tuaiti hei tohutohu i te po; a ko te maramatanga nui he ra, a ko te maramatanga tuaiti he marama; me nga whetu ano hoki i hanga kia rite ki taku kupu.

17. A whakanohoia ana aua mea e ahau, e te Atua ki te kiko o te rangi, hei whakamarama mo te whenua,

18. A hei tohutohu te ra i te awatea, a ko te marama hei tohutohu i te po, kia wehea te marama i te pouritanga; a ka kite ahau, te Atua i nga mea katoa i hanga e ahau e pai ana.

19. A ko te ahiahi raua ko te ata te ra tuawha.

20. Na, ka mea ahau te Atua: Kia ngahue ake i roto i nga wai te mea ora e ngoki ana, kia rere ano hoki te manu i runga i te whenua i te mata o te kiko o te rangi.

21. Na, ka hanga e ahau, e te Atua, nga tohora nui, me nga mea ora katoa, nga mea ngokingoki i ngahue ake i roto i nga wai, o ia ahua, o ia ahua, me nga manu whai parirau katoa, o ia ahua, o ia ahua; a ka kite ahau te Atua i nga mea katoa, e pai ana.

22. Na ka manaaki ahau te Atua i a ratou ka mea: Kia hua koutou, kia tini, kia kapi hoki nga wai o nga moana i a koutou, kia tini ano hoki nga manu ki runga i te whenua;

23. A ko te ahiahi raua ko te ata te ra tuarima.

24. Na, ka mea ahau te Atua: Kia whakaputaina ake e te whenua te mea ora o ia ahua, o ia ahua, te kararehe, me te mea ngokingoki, me te kirehe o te whenua, o ia ahua, o ia ahua, a ka oti.

25. Na, ka hanga e ahau, e te Atua te kirehe o te whenua, o ia ahua, o ia ahua, me te kararehe o ia ahua, o ia ahua; me nga mea ngokingoki katoa o te whenua o ia ahua o ia ahua; a ka kite ahau te Atua i enei mea katoa, e pai ana.

26. Na, ka mea ahau te Atua ki taku Tama Kotahi, i a au hoki ia no te timatanga ra ano: Kia hanga taua i te tangata kia rite ki a taua, hei to taua hoki te ahua; a ka oti. A ka mea ahau te Atua: Kia meinga ratou hei rangatira mo nga ika o te moana, mo te manu hoki o te rangi, mo nga kararehe hoki, mo te whenua katoa, mo nga mea ngokingoki katoa, e ngokingoki ana i runga i te whenua.

27. Na, ka hanga ahau te Atua i te tangata kia rite ki toku ake ahua, kia rite ki te ahua o taku Tama Kotahi i hanga ai ia e ahau; i hanga raua e ahau, he tane, he wahine.

28. Na, ka manaaki ahau te Atua i a raua, ka mea ki a raua: Kia hua, kia tini, kia whakakapi ano te whenua, kia mate hoki ona tara, kia meinga, hei rangatira i runga i nga ika o te moana, i runga i nga manu o te rangi, i runga i nga mea ora katoa e haere nei i runga i te whenua.

29. A, ka mea ahau te Atua ki te tangata: Na kua hoatu nei e ahau ki a korua, nga otaota katoa e whai purapura ana i runga i te mata o te whenua katoa, me nga rakau katoa, he hua rakau tona e whai purapura ana; hei kai ena ma korua.

30. Me nga otaota poke-kore katoa, hei kai ma nga kararehe katoa o te whenua, ma nga manu katoa o te rangi, ma nga mea katoa hoki e ngokingoki ana i runga i te whenua, kua hoatu nei e ahau he oranga; a ka oti, rite tonu ki taku i mea ai.

31. A ka kite ahau, te Atua i nga mea katoa kua hanga nei e ahau, a, nana, nga mea katoa kua hanga e ahau, tino pai; a ko te ahiahi raua ko te ata te ra tuaono.