1. Nawai a, ka haere tonu te korero a Enoka, ka mea: Nana, i whakaako to tatou matua a Arama i enei mea, a he tokomaha i whakapono, a meinga ana hei tama a te Atua, a he tokomaha kihai i whakapono, a kua ngaro ki roto i o ratou hara, a titiro whakamua atu ana i runga i te wehi, me te mamae, ki te whakapaweratanga o te riri a te Atua e ringihia atu ai ki runga i a ratou.

2. A, atu i taua wa ano ka timata a Enoka te poropiti, me te mea atu ki te iwi: I a au e haere ana, a ka tu i runga i te wahi o Mahutia, a ka karanga ake ki te Ariki, ka puta mai he reo i te rangi e mea ana: Tahuri koe, e piki ki maunga Himeona.

3. Nawai a, ka tahuri ahau, a haere ana ki runga i te maunga; a i a au e tu ana i runga i te maunga, ka kite ahau i nga rangi e tuwhera ana, a kua kakahuria ahau ki te kororia;

4. A ka kite ahau i te Ariki; a tu ana ia i mua i toku mata, me te korero mai ki a au, ano he tangata e korero ana tetahi ki tetahi, he kanohi ki te kanohi, a ka mea mai ia ki a au: Titiro, a maku e whakaatu atu ki a koe te ao mo te takiwa o nga whakatupuranga maha.

5. Nawai a, ka kite ahau i te raorao o Huma, a nana, ko tetahi iwi nui e noho teneti ana, koia ra te iwi o Huma.

6. A ka mea mai ano te Ariki ki a au, ka mea: Titiro, a ka titiro atu ahau whaka-te-nota, a ka kite ahau i te iwi o Kainana e noho teneti ana.

7. A, ka mea mai ano te Ariki ki a au: Poropiti ano; a ka poropiti ano ahau, ka mea: Nana, te iwi o Kainana, he tokomaha rawa tera e haere atu ki te whawhai atu ki te iwi o Huma, a ka whakamate i a ratou, a ka whakangaromia iho ratou; a ko te iwi o Kainana, tera e wehewehe i a ratou ano i roto i te whenua, a tera te whenua e titohea, e hua kore, a e kore tetahi atu iwi e noho ki reira, heoi ano, ko te iwi anake o Kainana.

8. No te mea, nana, tera te Ariki e kanga i te whenua ki te wera, a ka mau tonu te titoheatanga o reira mo ake tonu atu; no reira i timata ai te kiri pango te puta mai ai ki nga tamariki a Kainana, no reira i kinongia ai i waenganui i nga tangata katoa.

9. Nawai a, ka mea mai ano te Ariki ki a au: Titiro; a ka titiro atu ahau, a ka kite i te whenua o Harono, me te whenua o Enoka, me te whenua o Ominara, me te whenua o Heni, me te whenua o Hema, me te whenua o Hanara, me te whenua o Hananiha, me nga tangata katoa e noho ana i reira;

10. A ka mea mai te Ariki ki a au: Haere atu ki tenei iwi, mea atu ki a ratou—Ripeneta, kei haere atu ahau ki te patu i a koutou ki te kanga, a ka mate ratou.

11. A ka homai e ia he whakahaunga ki a au, kia rumakina ahau i runga i te ingoa o te Matua, me te Tama, e ki nei i te aroha noa me te pono, me te Wairua Tapu, te kai whakaatu o te Matua raua ko te Tama.

12. Nawai a, ka hono tonu ta Enoka karanga atu ki te iwi katoa, haunga ia te iwi o Kainana, kia ripeneta;

13. A he nui rawa te whakapono o Enoka, a arahina ana e ia te iwi o te Atua, a haere mai ana o ratou hoa riri ki te whawhai ki a ratou; na ka korerotia e ia te kupu a te Ariki, a tuoioi ana te whenua, rere ana nga maunga, he mea rite tonu ki tana whakahaunga; a huri ke ana nga awa wai i o ratou rerenga; a rongoa ana te tangi a nga raiona i roto i te koraha; he nui rawa te wehi o nga iwi katoa, i te kaha rawa o te kupu a Enoka, te nui rawa hoki o te kaha o te reo i hoatu ai e te Atua ki a ia.

14. A, puta ake ana ano hoki he whenua i te hohonutanga o te Moana, no reira i tino nui rawa ai te wehi o nga hoa riri o te iwi o te Atua, a rere ana ratou, tu mai ana i tawhiti, a haere atu ana ki runga i te whenua i puta ake ai i te hohonutanga o te moana.

15. A, ko nga tangata roroa ano hoki o te whenua, tu mai ana i tawhiti noa atu; a puta atu ana he kanga ki runga ki nga iwi katoa i whawhai atu nei ki te Atua;

16. A, no taua wa mai ra ano i timata ai nga pakanga me nga hekenga toto i waenganui i a ratou; otira ko te Ariki i haere mai, a noho tahi ana i tona iwi, a noho ana ratou i runga i te tika.

17. Mau ana te wehi o te Ariki ki runga i nga iwi katoa, i te nui rawa o te kororia o te Ariki i runga i tona iwi. Na, ka manaaki te Atua i te whenua, a ka manaakitia hoki ratou i runga i nga maunga, i runga i nga wahi tiketike, a ka kake haere.

18. A, huaina ana e te Ariki tona iwi, ko Hiona, no te mea kotahi ano to ratou ngakau, kotahi ano te whakaaro, a noho ana ratou i roto i te tika; a kahore he rawa-kore i waenganui i a ratou.

19. A, hono tonu ana te kauwhau a Enoka i runga i te tika ki te iwi o te Atua. Nawai a, i roto i ona ra, hanga ana e ia tetahi pa, i karangatia ra ko te Pa o te Tapu, ara, ko Hiona.

20. Nawai a, ka korero a Enoka ki te Ariki; a ka mea atu ano ia ki te Ariki: He pono, ka noho a Hiona i runga i te kaha mo ake tonu atu. Heoi mea atu ana te Ariki ki a Enoka: Ko Hiona taku i manaaki ai, engari ko te toenga o te iwi kua kanga e ahau.

21. Nawai a, ka whakaaturia atu ano e te Ariki, ki a Enoka, te hunga katoa e noho ana i te whenua; na ka kite ia, nana, i te putanga mai o tetahi wa ka tangohia ake a Hiona ki te rangi. A ka mea atu te Ariki ki a Enoka: Nana, toku nohoanga mo ake tonu atu.

22. A, ka kite ano hoki a Enoka i te toenga o te iwi, a ko ratou nei nga tama a Arama; a kua wheranu katoa ratou, nga uri a Arama, haunga ia nga uri o Kainana, no te mea ko nga uri o Kainana he mangumangu, a kihai i whai wahi i waenganui i a ratou.

23. Na, i muri i te tangohanga ake o Hiona ki te rangi, ka kite a Enoka i nga iwi katoa o te whenua i mua i a ia;

24. Na ka puta mai tetahi whakatupuranga, ki tetahi whakatupuranga, a kei runga rawa a Enoka, a hapainga ake ana ia, a tae noa ake ki te uma o te Matua, me te Tama a te tangata, a, nana ko te kaha o Hatana kei runga i te mata katoa o te whenua.

25. A, ka kite ia i nga anahera e heke iho ana i te rangi; a ka rongo ia i tetahi reo nui e mea ana: Aue, aue te mate mo te hunga e noho ana i te whenua.

26. Na, ka kite ia i a Hatana; me tetahi mekameka i tona ringa, a arai ana tera i te mata o te whenua katoa ki te pouritanga; a ka anga ake ona kanohi ki runga, ka kata, a ka koa ana anahera.

27. A ka kite a Enoka i nga anahera e heke iho ana i te rangi, e whakaatu ana mo te Matua, me te Tama; me te Wairua Tapu e tau ana ki runga i te tokomaha, a tangohia ake ana ratou he mea na nga kaha o te rangi, ki roto ki Hiona.

28. Nawai a, ka titiro iho te Atua o te rangi ki runga ki te toenga o te iwi, a ka tangi ia; a ka whakaatu a Enoka i tera, ka mea: He aha te take i tangi ai nga rangi, i whakaheke i o ratou roimata ano he ua ki runga i nga maunga?

29. A, ka mea atu a Enoka ki te Ariki: Pehea i ahei ai koe te tangi, ina hoki he tapu koe, no tua whakarere, a ake tonu atu?

30. A, me he mea e taea ana e te tangata te tatau nga wahi o te whenua, ae ra ki nga miriona o nga ao e rite ana ki tenei, a e hara tera i te timatanga o te nui o au hanganga; a kei te totoro tonu atu au arai; a kei reira ano koe, a kei reira ano tou uma; he tika ano hoki koe; he mahi tohu tau, e atawhai ana mo ake tonu atu;

31. A, kua tangohia ake e koe a Hiona ki tou ake uma, i tangohia mai i au hanganga katoa, no tua whakarere, a mo ake tonu atu; heoi kahore he mea ko atu i te rangimarie, i te tika, me te pono kei te nohoanga o tou torona; a ka haere te mahi tohu i mua i tou mata, a kahore he mutunga; a hei aha ia i ahei ai koe te tangi?

32. A, ka mea te Ariki ki a Enoka: Nana, ko ou teina; he mahinga ratou na oku ake ringaringa, a i hoatu e ahau ki a ratou te matauranga, i roto i te ra i hanga ai ratou e ahau; a i roto i te Kaari o Erene i hoatu ai e ahau ki te tangata tona ake tikanga.

33. He kupu atu tenei naku ki ou teina, a kua hoatu ano hoki tetahi whakahaunga kia aroha ratou tetahi ki tetahi, a me whiriwhiri ratou i a au, i to ratou Matua, otira nana, kahore o ratou aroha, a e kino ana ki o ratou ake toto;

34. Na, ko te kapura o taku riri ka pa atu ki a ratou; a i roto i te wera o taku riri ka tukua e ahau nga waipuke ki runga i a ratou, no te mea ko taku riri nanakia e pa atu ana ki a ratou.

35. Nana, ko ahau te Atua; ko te Tangata o te Tapu toku ingoa; ko te Tangata Runanga toku ingoa; ko te Mutunga-kore, ko te Mau tonu ano hoki toku ingoa.

36. No te mea e kaha ana ahau ki te totoro atu i oku ringaringa me te mau ki nga mea katoa kua hanga nei e ahau; a e kaha ana ano hoki toku kanohi ki te wero i a ratou, a i roto i nga mahinga katoa a oku ringaringa kahore ano he mahi kino hei rite ki te nui o te kino i waenganui i ou teina.

37. Otira, nana, ko o ratou hara hei runga i nga matenga o o ratou matua; a ko Hatana he matua ki a ratou, a ko te weriweri te tukunga iho ki a ratou; a ko reira nga rangi tangi ai ki a ratou, ae ra nga mahinga katoa a oku ringaringa; no reira, e kore ianei nga rangi e tangi i te kitenga ka mamae enei?

38. Otira, nana, ko enei e tau nei ou kanohi ki runga, tera e ngaro ki roto i nga waipuke; a nana, ka tutakina ratou; kua whakaritea ano hoki e ahau he whare herehere mo ratou.

39. A, ko ia i whiriwhiria e ahau kua inoi mai i mua i toku mata. No reira e mamae ana ia mo o ratou hara; me he mea ka ripeneta ratou i te ra o te hokinga mai ki a au o taku i Whiriwhiri ai, a taea noatia taua ra e noho ratou i roto i te mamae;

40. No reira, koia nei te tangi a nga rangi, ae ra, a nga mahinga katoa a oku ringaringa.

41. Nawai a, ka korero atu ano te Ariki ki a Enoka, a korerotia ana ki a Enoka nga mahinga katoa a nga tamariki a nga tangata; no reira a Enoka i mohio ai, me te titiro ki a ratou mahi kino, me o ratou weriweri, na ka tangi, ka totoro atu ona ringaringa, a ka pupuhi tona ngakau, ki rawa hoki; a manukanuka ana a roto i a ia; a ngarue ana nga mea katoa.

42. A, ka kite ano hoki a Enoka i a Noa me tona hapu; me nga uri a nga tama katoa a Noa tera e whakaorangia ki te whakaoranga tinana;

43. Na, ka kite a Enoka i a Noa e hanga ana i tetahi aka; na ka ahuareka te Ariki ki taua mea, ka pupuri ki roto i tona ringa; a ka puta mai nga waipuke ki runga ki te toenga o nga hunga kino, a horomia ake ratou.

44. A i to Enoka kitenga i tenei, kawa ana tona wairua, tangi ana ki ona teina, a ka mea atu ki nga rangi: E kore rawa ahau e pai kia whakamarietia; heoi ka mea atu te Ariki ki a Enoka: Kia ara ake to ngakau, kia koa; a titiro.

45. Nawai a, ka titiro atu a Enoka; timata i a Noa ka kite ia i nga hapu katoa o te whenua; a ka karanga atu ia ki te Ariki, ka mea: Ahea puta mai ai te ra o te Ariki ? Ahea nga toto o te Tika maringi ai, kia whakatapua ai te hunga e tangi ana, kia whiwhi ai ki te oranga-tonutanga ?

46. Na, ka mea te Ariki: Kei waenganui o nga wa, kei nga ra o te kino me te rapunga utu.

47. A nana, ka kite a Enoka i te ra o te taenga mai a te Tama a te Tangata, ae ra, i roto i te kikokiko; a ka hari tona wairua, ka mea: Kua whakairia ake te Tika, a kua patua te Reme no te hanganga ra ano o te ao; a na roto i te whakapono e noho ana ahau i roto i te uma o te Matua, a nana, kei a au a Hiona.

48. Nawai a, ka titiro atu a Enoka ki runga ki te whenua; a ka rongo ia i tetahi reo no nga whekau o reira, e mea ana; Aue, aue ahau, te whaea o nga tangata, e mamae ana ahau, e ngoikore ana, he mea no nga mahi tutu a aku tamariki. Ahea ahau okioki ai, whakamakia ai hoki i nga pokenga kua puta atu nei i roto i a au ? Ahea toku Kai-hanga whakatapu ai i a au, kia okioki ai ahau, me tetahi wa e u ai te tika i runga i toku mata ?

49. A i te rongonga a Enoka i te tangi a te whenua, ka tangi hoki ia, a karanga atu ana ki te Ariki, ka mea: E te Ariki, e kore ianei koe e aroha ki te whenua ? A, e kore ianei hoki e manaaki i nga tamariki a Noa ?

50. Nawai a, ka hono tonu te karanga a Enoka ki te Ariki, e mea ana: E inoi atu ana ahau ki a koe, e te Ariki, i runga i te ingoa o tau Tama Kotahi, ara a Ihu Karaiti, kia tohungia e koe a Noa me ana uri, kia kaua ano te whenua e hurihia e nga waipuke.

51. A kore rawa i ahei i te Ariki te whakakahore; a kawenata ana ia ki a Enoka, a oati ana ki a ia i tetahi oati, ka araia atu e ia nga waipuke; a tera ia e karanga atu ki nga tamariki a Noa;

52. A, tukua atu ana e ia he kawenata pumau, tera ka kitea tonutia he morehu o ana uri i roto i nga iwi katoa, i te mea e tu ana te whenua;

53. Na, ka mea te Ariki: Ka koa ia ma roto nei i ana uri puta mai ai te Mihaia; no te mea, e mea ana ia—Ko ahau te Mihaia, te Kingi o Hiona, te Kamaka o te Rangi, ko tona whanuitanga kahore he mutunga; a ko te tangata e haere mai ra te kuwaha, me te piki ake ma runga i a au, e kore rawa e taka; no reira, ka koa ratou, te hunga i korerotia e ahau, no te mea ka puta mai ratou me nga waiata o te haringa mutunga-kore.

54. Nawai a, ka karanga atu ano a Enoka ki te Ariki, ka mea: Ina haere mai te Tama a te Tangata i roto i te kikokiko, ka okioki ranei te whenua ? Taku inoi ki a koe, whakaaturia mai enei mea ki a au.

55. A, ka mea atu te Ariki ki a Enoka: Titiro; a ka titiro atu ia, a ka kite i te Tama a te Tangata e whakaarahia ake ana i runga i te ripeka, i runga i te ritenga a nga tangata;

56. A ka rongo ia i tetahi reo nui; me nga rangi kua araia; na, tangi ana nga mahinga katoa a te Atua; a ngunguru ana te whenua; a tuwhera ana nga kamaka; ara ana nga Hunga Tapu, a karaunatia ana ki te ringa matau o te Tama a te Tangata ki nga karauna kororia;

57. A, me nga wairua katoa i roto i te whare herehere ka puta mai, a tu ana i te ringa matau o te Atua; a ko te toenga he mea rahui ki nga mekameka o te pouritanga, kia taea ra ano te whakawakanga i te ra nui.

58. A, ka tangi ano a Enoka, a ka karanga atu ano ki te Ariki, ka mea: Ahea okioki ai te whenua ?

59. A ka kite a Enoka i te Tama a te Tangata e kake ake ana ki te Matua; a ka karanga atu ia ki te Ariki, ka mea: E kore ianei koe e hoki mai ano ki runga ki te whenua ? A, i te mea ko te Atua koe, a e mohio ana ahau ki a koe, a kua oati koe ki a au, me te whakahau i a au, me inoi ahau i runga i te ingoa o tau Tama Kotahi; nau ahau i hanga, a kua homai ano ki a au kia whai wahi ki tou torona, a e hara i te mea naku ake, engari i ma roto i tou aroha noa; no reira ahau i inoi ai ki a koe me he mea e kore koe e hoki mai ano ki runga i te whenua.

60. A, ka mea atu te Ariki ki a Enoka: E ora ana ahau, ae ra hoki, tera au e haere atu i nga ra whakamutunga; i nga ra o te kino, o te rapu utu, ki te whakatutuki i te oati i meatia e ahau ki a koe mo te taha ki nga tamariki a Noa;

61. A tera e puta mai ai te ra e okioki ai te whenua, otira i mua ake o taua ra ka whakapouritia nga rangi, a ko tetahi arai o te pouritanga ka hipoki i te whenua; a ka ngaueue nga rangi, me te whenua ano hoki; a he nui nga whakapaweratanga i waenganui i nga tamaraki a nga tangata, engari ko toku iwi, ka tohungia e ahau;

62. A ka tukua iho e ahau te tika i te rangi; a ka whakaputaina ake te pono e ahau i roto i te whenua, hei kai whakaatu mo taku Tama Kotahi; me tona aranga ake i te mate; ae ra, me te whakaarahanga ake ano hoki o nga tangata katoa; a ko te tika me te pono ka meinga e ahau hei tahi i te whenua ano he waipuke, hei kohikohi mai i aku i whiriwhiri ai i nga pito e wha o te whenua, ki te wahi e whakaritea ai e ahau, hei Pa Tapu, kia whitiki ai toku iwi i o ratou hope, me te tatari atu ki te wa o toku haerenga mai; no te mea ko reira toku tapenakara, tera e karangatia ko Hiona, he Hiruharama Hou.

63. Na ka mea te Ariki ki a Enoka: Ko reira koe me tou pa katoa tutaki ai ki a ratou ki reira, a ko reira tatou tango ai i a ratou ki to tatou uma; a ka kite ratou i a tatou, a ka hinga tatou ki runga i o ratou kaki, a ka hinga ratou ki runga i o tatou kaki, a ka kihi tatou tetahi ki tetahi;

64. A ko reira toku nohoanga, ara ko Hiona e puta mai ki waho o nga mea hanga katoa, kua hanga nei e ahau; a kotahi mano nga tau e okioki ai te whenua.

65. Nawai a, ka kite a Enoka i te ra o te taenga mai o te Tama a te Tangata, i nga ra whakamutunga, kia noho i runga i te whenua, i roto i te tika, mo nga tau kotahi mano;

66. Otira, i mua ake o te ra i kite ia i nga whakapawera nui i waenganui o te hunga kino; i kite ano hoki ia i te moana, e raruraru ana, a he ake nga ngakau o nga tangata, e titiro whakamua atu ana i runga i te wehi ki nga whakawakanga o te Atua Kaha Rawa, e puta mai ai ki runga i te hunga kino.

67. Na ka whakaaturia atu e te Ariki ki a Enoka nga mea katoa, ae ra, tae noa atu ki te mutunga o te ao; a ka kite ia i te ra o te hunga tika, te haora o to ratou hokonga me te whiwhinga ki te raneatanga o te koa;

68. A ko nga ra o Hiona i nga ra o Enoka, e toru rau e ono tekau ma rima nga tau.

69. A haereere tahi a Enoka ratou ko tona iwi katoa me te Atua, a noho ana ia i roto i a Hiona; nawai a, kua kore a Hiona, no te mea kua tangohia ake e te Atua ki tona ake uma; a puta ana i reira te korero, Kua rere a Hiona.