E faapefea ona ou faaaogaina upu a perofeta ma aposetolo soifua e faamalosia ai lo’u faatuatua i le Togiola a Iesu Keriso?
E pei o perofeta anamua, o loo molimau mai foi perofeta ma aposetolo o aso nei ia Iesu Keriso ma valaaulia tagata uma ia faaaoga Lana Togiola. Ua taua i latou o ni “molimau faapitoa” a Iesu Keriso. E molimau le Agaga Paia pe a molimau perofeta ma aposetolo soifua ia Keriso, ma e faamanuiaina i tatou pe a tatou ola e tusa ai ma a latou aoaoga.
Saunia oe lava ia faaleagaga
Na faapefea e upu a perofeta ma aposetolo soifua ona faamalosia lou faatuatua ia Iesu Keriso? O a lauga, tusi, po o tusiga a perofeta ma aposetolo na fesoasoani ia te oe e te iloa atili ai o Ia?
O a lauga o se konafesi talu ai nei o le a fesoasoani i le autalavou e faamalosia ai lo latou faatuatua ia Iesu Keriso? E faapefea ona e faamalosia le autalavou e suesue upu a perofeta soifua ma faaaoga i o latou olaga?
A o e suesue ma le agaga tatalo i upu a perofeta ma aposetolo, o le a se mea i lou manatu o le a faamalolosia ai le faatuatua o le autalavou o loo e aoaoina?
Iakopo 7:11–12; Mosaea 13:33–35; 15:11–12 (Ua molimau mai perofeta uma ia Iesu Keriso)
MF&F 27:12; 107:23 (O aposetolo o molimau faapitoa ia Iesu Keriso)
MF&F 76:22–24 (O le molimau a Iosefa Samita ia Iesu Keriso)
Taiala i Tusitusiga Paia, “Aposetolo”
David A. Bednar, “Ua Filifilia e Molimau Atu i Lo'u Igoa, ” Ensign or Liahona, Nov. 2015, 128–31
Jeffrey R. Holland, “Pe a Faatasia le Faamasino Tonu, Alofa ma le Alofa Mutimutivale,” Ensign po o le Liahona, Me 2015, 104–6
Quentin L. Cook, “Tatou te Mulimuli ia Iesu Keriso,” Ensign po o le Liahona, Me 2010, 83–86
“O Le Keriso Soifua: O Le Molimau a Aposetolo,” Ensign po o Liahona, Ape. 2000, 2–3
Vitio: “Siitia Avega”
Aoao atu i le ala a le Faaola
Na silafia e Iesu i latou na Ia aoaoina ma na Ia silafia tagata o le a avea ai i latou. Na Ia mauaina auala faapitoa e fesoasoani ai ia i latou e aoao ma tuputupu ae ai. O a aafiaga e mafai ona e fesoasoani ia maua e le autalavou e musuia ai i latou e faataua ma manatua upu a perofeta ma aposetolo soifua?
Ia fai fesootaiga
I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:
-
Fai atu i talavou e faasoa mai ni aafiaga o le aoaoina ma le aoao atu na latou oo i ai talu ai nei i fafo o le vasega.
-
Valaaulia talavou e faitau le ulutala “Aposetolo” i le Taiala i Tusitusiga Paia ma saili fuaitau o loo faamatalaina ai le matafaioi a se Aposetolo. Saili ma faitau faatasi, mau (e pei ona o loo tuuina atu i lenei otootoga) o loo faaalia ai o perofeta ma aposetolo o molimau faapitoa a Iesu Keriso. O le a se mea o uunaia ai le autalavou e uiga i nei mau?
Aoao faatasi
O gaoioiga taitasi nei e mafai ona fesoasoani i le autalavou e malamalama ai pe faapefea e upu a perofeta ma aposetolo soifua ona faamalosia lo latou faatuatua ia Iesu Keriso. I le mulimuli ai i le taitaiga a le Agaga, filifili se tasi pe sili atu o le a aoga i lau vasega:
-
Ia saunia mo tagata o le vasega ni kopi o le vaega ua faaulutalaina “O Se Lesona Faaopoopo” mai le lauga a Elder David A. Bednar “Ua Filifilia e Molimau Atu i Lo'u Igoa.” Valaaulia i latou e filifili ma faasoa se upusii mai se perofeta soifua po o se aposetolo e fesoasoani ia latou e malamalama ai i le Togiola a le Faaola. A o latou faasoa mai upusii na latou mauaina, uunaia i latou e fuafua ni auala e mafai ona latou faasoa atu ai o latou manatu ma se tasi latou te iloaina, e pei e ala i se tusi, i se savali tusitusia, po o le tuuina i luga o ala faasalalauga faaleagafesootai.
-
Iloilo faatasi, lauga talu ai nei lava o le konafesi aoao, vaai mo taimi o loo aoao pe molimau mai ai sui o le Au Peresitene Sili ma le Korama a le Toasefululua ia Iesu Keriso ma Lana Togiola. (e mafai ona e faaaogaina le faasinoupu i le lomiga o le konafesi aoao o le Ensign po o Liahona). O le a le mea o loo uunaia ai le autalavou e uiga i molimau a perofeta ma aposetolo? Mafaufau e faasoa atu pe faapefea e nei molimau ona faamalosia lou lava faatuatua i le Faaola.
-
I luga o le laupapa, tusi le, “O Le Togiola a Iesu Keriso.” Tuu atu i sui uma o le vasega se kopi o le a le o le lauga a Elder Jeffrey R. Holland “Pe a Faatasia le Faamasino Tonu, Alofa ma le Alofa Mutimutivale” po o le lauga a Elder Quentin L. Cook “Tatou te Mulimuli ia Iesu Keriso.” Fai atu i le autalavou e faia se lisi o mea ua latou aoaoina e uiga i le Togiola o le Faaola mai i lauga. Valaaulia i latou e tusi i luga o le laupapa se otootoga e tasi le fuaiupu o mea ua latou aoaoina, ma fesili atu i talavou taitasi pe aisea ua ia mauaina ai lena aoaoga aoga.
-
Faaali se vitio se tasi pe sili atu o loo fautuaina i lenei otootoga, pe fesili atu i tagata o le vasega e auauai i le faitauina o vaega o le “O le Keriso Soifua: O Le Molimau a Aposetolo.” Valaaulia le autalavou e faalogologo pe vaavaai mo fuaitau e faamalosia ai lo latou faatuatua ia Iesu Keriso. Fautuaina le autalavou e faasoa mai pe faapefea e nei savali ona faamalosia le faatuatua o a latou uo ma tagata o le aiga.
-
Fautuaina le autalavou e tauloto se fuaitau e taua ia i latou i le “O Le Keriso Soifua: O Le Molimau a Aposetolo.” Fesili i le autalavou e tusi pe faapefea ona ese lo latou faatuatua ia Iesu Keriso pe ana faapea latou te le maua aoaoga a perofeta ma aposetolo soifua. Tuu atu ia i latou le taimi e faasoa mai ai mea na latou tusia.
Fai atu i le autalavou e faasoa mai mea na latou aoaoina i le aso. Pe ua latou malamalama ea pe faapefea e upu a perofeta soifua ona faamalosia lo latou faatuatua i le Togiola? Pe o i ai nisi a latou fesili? Pe mata e aoga le toe faaalu o se isi taimi i lenei autu?
Motugaafa faafaiaoga
“E mafai ona e fesoasoani ia i latou o loo e aoaoina ia latou mautinoa lo latou mafaia ona auai i se talanoaga pe afai e te talia lelei o [latou manatu]. Mo se faataitaiga, e te ono fai atu, ‘Faafetai mo lau tali. O se manatu lelei’ ... po o ‘O se faataitaiga lelei lena’ po o ‘Ou te faafetaia mea uma na outou fai mai ai i le aso’” (O Le Aoao Atu, e Leai se Valaauga e Sili ai [1999], 64).
Valaaulia e faatino
-
Valaaulia talavou e faasoa mai soo se lagona o latou maua i le vasega. Pe o faapefea ona faamalosia lo latou faatuatua ia Iesu Keriso pe a latou suesue i upu a perofeta ma aposetolo soifua? E faapefea ona e faamalosia i latou e faatino mea ua latou aoaoina?
-
Faasoa atu lau molimau faapea o perofeta ma aposetolo soifua o molimau faapitoa ia Keriso.