E mafai faapefea ona ou ola tutoatasi faaleagaga?

Ia suesue ma le agaga tatalo ia mau ma punaoa nei. O le a le mea o le a fesoasoani i le autalavou ia malamalama ai i le taua o le ola tutoatasi faaleagaga?

Mataio 25:1–13 (O le faataoto i taupou e toasefulu)

Mamona 9:27 (E tatau ona tatou galueaiina lo tatou lava olataga)

Moronae 10:3–5 (E mafai ona tatou iloa le mea moni mo i tatou lava)

MF&F 58:26–28 (Ua ia i tatou le saolotoga ia i tatou lava e aumaia ai le amiotonu)

MF&F 130:18–19 (O le filiga ma le usiusitai e fesoasoani ia i tatou e maua ai le malamalama ma le atamai)

Dean M. Davies, “O Faamanuiaga o le Tapuai,” Ensign po o le Liahona, Nov. 2016, 93–95

Dieter F. Uchtdorf, “O Le Mana o se Molimau Patino,” Ensign po o le Liahona, Nov. 2006, 37–39.

Jörg Klebingat, “Faalatalata Atu i le Nofoalii o le Atua ma le Lototele,” Ensign po o leLiahona, Nov. 2014, 34–37

David A. Bednar, “Faaliliuina i le Alii,” Ensign po o leLiahona, Nov. 2012, 106–9

Vitio: “ O I Latou O E Atamamai”; tagai foi i leDoctrine and Covenants and Church History Visual Resource DVDs

Aoao atu i le ala a le Faaola

Na faatuatuaina e le Faaola Ona soo, saunia i latou, ma tuu atu ia i latou tiutetauave taua e aoao atu, faamanuia, ma auauna atu i isi. E mafai faapefea ona e saunia le autalavou e aoao atu i isi mea sa latou aoaoina?

Ata

Vitio: “Iloa ma Alofa ia i Matou”

Matamata atili

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi?

• Valaaulia le autalavou e faasoa mai se mea na latou faia talu ai nei e faaaoga ai mea o loo latou aoaoina i le Aoga Sa i a latou suesuega faaletagata lava ia o le talalelei.

• Fai atu i se tasi o le vasega e faitau le parakalafa i le amataga o lenei lesona, ma fautuaina isi o le vasega e faalogo mo ni tali i le fesili “O le a le ola tutoatasi faaleagaga?” Tuu atu i tagata o le vasega ni nai minute e tusi ai i lalo tali i le fesili, ma faatagaina tagata o le vasega e faasoa mai a latou tali.

O gaoioiga taitasi nei e mafai ona fesoasoani i le autalavou e aoao ai pe faapefea ona ola tutoatasi atili faaleagaga. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

• Fai atu i le autalavou po o le a lo latou manatu po o le a uiga o le tapuai i le Atua, ma tusi a latou tali i luga o le laupapa. O a ni aafiaga faaleagaga na latou maua i le tapuai ai faapea? Valaaulia le autalavou e suesue i le saunoaga a Bishop Dean M. Davies “O Faamanuiaga o le Tapuai,” saili ai po o le a le uiga o le tapuai faamaoni i le Atua ma faamanuiaga tatou te maua pe a tatou tapuai. E mafai faapefea e faamanuiaga tatou te maua mai le tapuai faamaoni ona fesoasoani ia i tatou ia ola tutoatasi faaleagaga?

• Filifili ia fesili mai le parakalafa muamua o le lauga a Elder Jörg Klebingat “Faalatalata Atu i le Nofoalii o le Atua ma le Lototele,” ma fai atu i le autalavou e tali faalilolilo i fesili. Fai atu i talavou taitasi e suesue i se tasi o fautuaga e ono a Elder Klebingat ma faamatala mai i le vaega atoa o le vasega pe faapefea ona fesoasoani ia i latou ina ia ola tutoatasi atili ai faaleagaga.

• Fai i le autalavou taitoatasi e faitau se mau se tasi o loo fautuaina mai i lenei otootoga. A uma ona tuuina atu i le autalavou se taimi e faitau ai mau, vaevae i latou ia tofu paga ma fai atu i ai e faatalanoa e le tasi le isi, fai atu ni fesili faapenei: O le a se mea na tau mai e le mau lea sa e faitauina? O le a se mea sa e aoaoina e uiga i le ola tutoatasi faaleagaga mai nei mau? O le a se mea ua uunaia oe e faia ona o le mea sa e faitau i ai? Tuu atu i le autalavou le avanoa e faatalanoa ai isi i le vasega.

• Fai atu i le autalavou e faitau le vaega ua faaulutalaina “E Faapefea Ona Tatou Maua se Molimau?” mai le lauga a Peresitene Dieter F. Uchtdorf “O Le Mana o se Molimau Patino.” Aisea e taua ai le tofu o i tatou ma sa tatou lava molimau? Fai atu i le autalavou e faasoa mai pe na faapefea ona maua a latou lava molimau i le moni o le talalelei. Molimau atu i faamanuiaga na oo mai ia te oe ona o lau lava molimau. I le avea ma se vaega o lenei talanoaga, e mafai ona e faasoa atu le faamatalaga lenei mai ia Peresitene Thomas S. Monson: ”Ina ia mafai ona tatou malolosi ma tetee atu i malosiaga uma o loo tosoina ai i tatou i le itu sese po o leo uma o loo uunaia i tatou e o i ala sese, e tatau ona i ai ni a tatou lava molimau. Pe ua e 12 pe 112—po o soo se mea lava i le va—e mafai ona e iloaina mo oe lava ia o le talalelei a Iesu Keriso e moni” (“Ia Lototele e Tu Na o Oe,” Ensign po o leLiahona, Nov. 2011, 62). O a nisi mea e mafai e le autalavou ona faia ina ia ola tutoatasi atili faaleagaga?

• Fai atu i le autalavou e faitau le Mataio 25:1–13, pe faaali le vitio “They That Are Wise.” O le a se mea na aoao e le autalavou e uiga i le ola tutoatasi faaleagaga mai lenei faataoto? I le avea ma se vaega o lenei talanoaga, fai atu i le autalavou e faitau le vaega ua faaulutalaina “Molimau, Liuaina, ma le Faataoto i Taupou e Toasefulu” mai le lauga a Elder David A. Bednar “Faaliliuina i le Alii.” O le a se mea e mafai ona faia e le autalavou e faatele ai le suauu i a latou lamepa?

Fai atu i le autalavou e faasoa mai mea ua latou aoaoina i le aso. O latou malamalama i le auala e ola tutoatasi atili ai faaleagaga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Fesili i le autalavou po o le a se mea ua uunaia i latou e fai e faatatau i mea ua latou aoaoina i le aso. Uunaia i latou e faatino nei lagona. Mafaufau i ni auala e mafai ai ona e tulitataoina.